សេដាក​ជ្រើស​រើស​យុវជន​២៥​នាក់​ចូល​រៀន​វគ្គ​បណ្ដុះបណ្ដាល​ជំនាញ​កសិកម្ម

ដោយ ខែ សុណង
2014.05.31
Share on WhatsApp
Share on WhatsApp
សេដាក ៦១០ គេហទំព័រ​អង្គការ​សេដាក (CEDAC)។
Screenshot

មជ្ឈមណ្ឌល​សិក្សា និង​អភិវឌ្ឍន៍​កសិកម្ម​កម្ពុជា សេដាក (CEDAC) ប្រកាស​ជ្រើស​រើស​យុវជន​ចំនួន ២៥​នាក់ ឲ្យ​ចូល​រៀន​វគ្គ​បណ្ដុះបណ្ដាល​ជំនាញ​មួយ​ស្ដី​អំពី ការ​អភិវឌ្ឍ​សហគមន៍​កសិកម្ម​អាស្រ័យ​ខ្លួន​ឯង។

នាយក​ប្រតិបត្តិ​នៃ​អង្គការ​សេដាក លោក សម វិទូ មាន​ប្រសាសន៍​ថា វគ្គ​នេះ​មាន​រយៈពេល ៤​ខែ ដោយ​រៀន​សូត្រ​តាម​រយៈ​ការ​អនុវត្ត​ការងារ​ដោយ​ផ្ទាល់។ យុវជន​ដែល​ទើប​បញ្ចប់​ថ្នាក់​ឧត្ដមសិក្សា ចាប់​ពី​កម្រិត​បរិញ្ញាបត្រ​រង​គ្រប់​ជំនាញ​ទៅ អាច​ដាក់​ពាក្យ​សុំ​រៀន​វគ្គ​នេះ​បាន ប៉ុន្តែ​យុវជន​ដែល​បាន​រៀន​ជំនាញ​កសិកម្ម អភិវឌ្ឍន៍​ជនបទ និង​បរិស្ថាន កាន់​តែ​ប្រសើរ។ ក្នុង​រយៈពេល​សិក្សា សិក្ខាកាម​នឹង​ទទួល​បាន​ប្រាក់​ឧបត្ថម្ភ​ពី​អង្គការ​សេដាក ហើយ​អ្នក​ដែល​បាន​បញ្ចប់​វគ្គ​បណ្ដុះបណ្ដាល​នេះ​ប្រកប​ដោយ​ជោគជ័យ​នោះ នឹង​ត្រូវ​បាន​ជ្រើស​រើស​អោយ​បម្រើ​ការងារ​ជាមួយ​អង្គការ​សេដាក និង​ស្ថាប័ន​ពាក់ព័ន្ធ​នានា។

លោក សម វិទូ៖ «ពេល​ដែល​គាត់​ចប់​ពី​មហាវិទ្យាល័យ​មក គាត់​មិន​សូវ​ជា​មាន​ជំនាញ​នៅ​ក្នុង​ការ​អនុវត្ត​ផ្ទាល់​ទេ។ គាត់​មាន​ជំនាញ​ខាង​ទ្រឹស្ដី​ច្រើន។ ការ​អនុវត្ត​ផ្ទាល់​វា​អាច​ជួយ​បង្កើន​សមត្ថភាព​របស់​គាត់ នៅ​ក្នុង​ការ​គ្រប់គ្រង​ផ្ទាល់​ក៏​ដូច​ជា​ការ​ដក​ស្រង់​បទ​ពិសោធន៍ ក្នុង​ការ​អនុវត្ត​ផ្ទាល់​របស់​កសិករ។ យើង​ធ្វើ​ការ​នេះ​បណ្ដុះបណ្ដាល​គាត់ ហើយ​ឲ្យ​គាត់​ទៅ​ធ្វើ​ផ្ទាល់​តែ​ម្ដង។ ឧទាហរណ៍​ថា យើង​ឲ្យ​ដី ១០​អា បើ​សិន​ជា​គាត់​មាន​ដី ១០​អា តើ​គាត់​អាច​ធ្វើ​យ៉ាង​ម៉េច​ឲ្យ ១០​អា​ហ្នឹង អាច​ចិញ្ចឹម​ខ្លួន​គាត់​រស់​ហើយ អាច​រក​ប្រាក់​ចំណេញ​ថែម​ទៀត»

វគ្គ​បណ្ដុះបណ្ដាល​ជំនាន់​ទី​២៥ នេះ​នឹង​ចាប់​ទទួល​ពាក្យ​ពី​ពេល​នេះ ដល់​ថ្ងៃ​ទី​១៣ ខែ​មិថុនា ហើយ​នឹង​ចាប់​ផ្ដើម​នៅ​ពាក់​កណ្ដាល​ខែ​មិថុនា ឆ្នាំ​២០១៤ ដល់​ពាក់​កណ្ដាល​ខែ​តុលា ឆ្នាំ​២០១៤។

នៅ​ក្នុង​សេចក្ដី​ប្រកាស​ដដែល​សរសេរ​ថា អង្គការ​នេះ​កំពុង​អនុវត្ត​ផែនការ​រយៈពេល ១០​ឆ្នាំ ចាប់​ពី​ឆ្នាំ​២០១៣ ដល់​ឆ្នាំ​២០២២ ដែល​ផ្ដោត​ទៅ​លើ​ការ​កសាង​សហគមន៍​អាស្រ័យ​ខ្លួន​ឯង ជាពិសេស​ផ្ដោត​ទៅ​លើ​ផលិតកម្ម​កសិកម្ម​សរីរាង្គ ការ​កែច្នៃ និង​ទីផ្សារ រួម​ទាំង​ការ​អភិវឌ្ឍ​សហករណ៍​កសិកម្ម។ ដើម្បី​អនុវត្ត​នូវ​ផែនការ ១០​ឆ្នាំ​នេះ​ជោគជ័យ អង្គការ​នេះ​ត្រូវ​ការ​ជ្រើស​រើស​បុគ្គលិក​បន្ថែម​ប្រមាណ ៥០០​នាក់ ក្នុង​កំឡុង​ពេល​ប៉ុន្មាន​ឆ្នាំ​ខាង​មុខ​នេះ។

ទំនាក់ទំនង​ព័ត៌មាន​និង​ការ​ដាក់​ពាក្យ៖ ផ្ទះលេខ​៩១ និង ៩៣ ផ្លូវ​២០១១ (ផ្លូវB បុរី​ពិភព​ថ្មី​បឹងឈូក) ភូមិ​ក្រាំងអង្រ្កង សង្កាត់​ក្រាំងធ្នង់ ខណ្ឌ​ពោធិ៍សែនជ័យ រាជធានី​ភ្នំពេញ។ ទូរស័ព្ទ​លេខ៖ ០១២ ៤៤៧ ៥៩៩ ០១២ ៧២៥ ៧២៤ ឬemail: cedacinfo@cedac.org.kh

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។