សង្គម​ស៊ីវិល​ថា ជនជាតិ​ចិន​មួយ​ចំនួន​នៅ​តែ​មិន​ញញើត​កាប់​សម្លាប់​មនុស្ស​នៅ​លើ​ទឹកដី​ខ្មែរ

ដោយ ជី វិតា
2022.10.19
Share on WhatsApp
Share on WhatsApp
សង្គម​ស៊ីវិល​ថា ជនជាតិ​ចិន​មួយ​ចំនួន​នៅ​តែ​មិន​ញញើត​កាប់​សម្លាប់​មនុស្ស​នៅ​លើ​ទឹកដី​ខ្មែរ ជនជាតិ​ចិន ៨នាក់ ត្រូវ​បាន​អាជ្ញាធរ​ឃាត់​ខ្លួន បន្ទាប់​ពី​ឈ្លោះ​ទាស់ទែង ទាញ​កាំបិត​កាប់​គ្នា នៅ​ក្នុង​ហាង​ផឹកស៊ី​មួយ​កន្លែង​ឈ្មោះ ស៊ីកាង (Sikang) ក្នុង​ខេត្តព្រះសីហនុ កាល​ពី​យប់​ថ្ងៃ​ទី១៧ ខែតុលា ឆ្នាំ២០២២។
រូប៖ ហ្វេសប៊ុក

មន្ត្រី​សង្គម​ស៊ីវិល លើក​ឡើង​ថា ក្រុម​ជនជាតិ​ចិន​មួយ​ចំនួន​នៅតែ​បន្ត​ធ្វើ​សកម្មភាព​ប៉ះពាល់​ដល់​សង្គម​កម្ពុជា បង្ក​អសន្តិសុខ ដោយ​ពួក​គាត់​គេ​មិន​ខ្លាច​ញញើត​ក្នុង​ការ​បាញ់​បោះ និង​កាប់​សម្លាប់​មនុស្ស​នៅ​លើ​ទឹកដី​ខ្មែរ​ជា​ដើម។ ប្រតិកម្ម​របស់​មន្ត្រី​សង្គម​ស៊ីវិល​បែប​នេះ ធ្វើ​ឡើង​បន្ទាប់​ពី​មាន​ជនជាតិ​ចិន​ចំនួន ២ក្រុម​បាន​ប្រើ​កាំបិត​ដេញ​កាប់​គ្នា​យ៉ាង​អនាធិបតេយ្យ​នៅ​ក្រុង​ព្រះសីហនុ កាល​ពី​ពេល​ថ្មីៗ នេះ។

អ្នក​សម្រប​សម្រួល​សមាគម​ការពារ​សិទ្ធិមនុស្ស​អាដហុក (ADHOC) ប្រចាំ​ខេត្តព្រះសីហនុ អ្នកស្រី ជៀប សុធារី ព្រួយ​បារម្ភ​អំពី​ការ​ប្រព្រឹត្ត​របស់​ជន​បរទេស​មួយ​ចំនួន ដែល​នៅ​តែ​បន្ត​ប្រព្រឹត្ត​បទ​ល្មើស និង​បង្ក​អសន្តិសុខ​សង្គម ដែល​ជា​ហេតុ​ធ្វើ​ឱ្យ​អ្នក​វិនិយោគិន​ល្អៗ មិន​ហ៊ាន​មក​បណ្ដាក់​ទុន​រកស៊ី​នៅ​ខេត្តព្រះសីហនុ។ 

អ្នកស្រី ជៀប សុធារី ប្រាប់​វិទ្យុ​អាស៊ី​សេរី​នៅ​ថ្ងៃ​ទី១៩ តុលា​ថា ជន​បរទេស ជាពិសេស ជនជាតិ​ចិន ដែល​តែងតែ​បង្ក​អសន្តិ​សង្គម​តាម​រយៈ​បាញ់​បោះ​ដាក់​គ្នា​នៅ​ទី​សាធារណៈ និង​កាប់​សម្លាប់​មនុស្ស​ជា​បន្ត​បន្ទាប់​មក​នេះ បាន​ធ្វើ​ឱ្យ​ពលរដ្ឋ​ស្ទើរ​គ្រប់​ស្រទាប់​វណ្ណៈ រាប់​ទាំង​អ្នក​មាន និង​អ្នក​ក្រ កសិករ ព្រមទាំង​សិស្ស​និស្សិត​តែងតែ​ព្រួយ​បារម្ភ​អំពី​បញ្ហា​សុវត្ថិភាព។ អ្នកស្រី​បញ្ជាក់​ថា ពលរដ្ឋ​ក្រីក្រ​មួយ​ចំនួន​ភ័យ​ខ្លាច​កូនៗ របស់​ពួក​គេ​ក្លាយ​ជា​ជន​រងគ្រោះ ដោយសារ​តែ​ពួក​គេ​ធ្វើការ​នៅ​កន្លែង​បើក​អាជីវកម្ម​ខុស​ច្បាប់ និង​នៅ​ក្បែរ​ជន​បរទេស ដែល​មាន​ការ​ប្រើប្រាស់​គ្រឿងញៀន​ជា​ដើម។

ទោះ​បី​ជា​យ៉ាង​ក្ដី អ្នកស្រី​នៅ​តែ​បន្ត​ស្នើ​ដល់​អាជ្ញាធរ​មាន​សមត្ថកិច្ច​ខេត្តព្រះសីហនុ ពង្រឹង​ការ​អនុវត្ត​ច្បាប់​ឱ្យ​មាន​ប្រសិទ្ធភាព និង​ចាត់​វិធានការ​លើ​ជន​បរទេស​ណា ដែល​តែងតែ​យក​ក្រុង​ព្រះសីហនុ​ធ្វើ​ជា​កន្លែង​ប្រព្រឹត្ត​បទឧក្រិដ្ឋ ដូចជា ការ​ជួញដូរ​មនុស្ស អំពើ​ឃាតកម្ម ការ​ជួញដូរ​គ្រឿងញៀន ការ​បាញ់​បោះ​កាប់​សម្លាប់​មនុស្ស​តាម​ទីផ្សារ​សាធារណៈ​ជា​ដើម៖ «ដូច​ថា សមត្ថកិច្ច ខំ​ប្រឹងប្រែង​ហើយ ក្នុង​ការ​អនុវត្ត​បង្ក្រាប​បទ​ល្មើស​ហ្នឹង ហើយ​គាត់​បញ្ជូន​ជន​ល្មើស​ទៅ​តុលាការ។ ប៉ុន្តែ ប្រសិន​ជា​នៅ​ស្ថាប័ន​អយ្យការ ឬ​ក៏​ស្ថាប័ន​តុលាការ​ហ្នឹង លោក​មាន​ការ​បន្ធូរបន្ថយ ឬ​ក៏​មាន​មន្ទិល​អី​នៅ​ពី​ក្រោយ​យើង ក៏​មិន​សូវ​ដឹង​ដែរ មាន​ការ​អនុគ្រោះ​អ៊ីចឹង​ទៅ វា​ធ្វើ​ឱ្យ​ការ​ខិតខំ​ប្រឹងប្រែង​របស់​សមត្ថកិច្ច​ហ្នឹង ក៏​គាត់​មិន​មាន​កម្លាំង​ចិត្ត​ក្នុង​ការ​ធ្វើ​ការ​អនុវត្ត​ត​ទៅ​ទៀត។ ប៉ុន្តែ ស្ថាប័ន​សមត្ថកិច្ច និង​ស្ថាប័ន​តុលាការ​ក្ដី លោក​គួរ​សហការ​គ្នា រឹត​បន្តឹង​បង្ក្រាប​បទ​ល្មើស​ទាំង​អស់​ហ្នឹង ដើម្បី​ជន​ដែល​ប្រព្រឹត្ត​បទ​ល្មើស​ហ្នឹង គាត់​ត្រូវ​ទទួល​ទោស​ទៅ​តាម​ការ​កំណត់​នៃ​ច្បាប់​កម្ពុជា។ សូម​កុំ​ឱ្យ​មាន​ការ​ប្រព្រឹត្ត អំពើ​ពុក​រលួយ​នៅ​ពី​ក្រោយ​ខ្នង​ហ្នឹង ព្រោះ​យើង​ចង់​ពង្រឹង​ច្បាប់​កម្ពុជា»

ការ​លើក​ឡើង​របស់​មន្ត្រី​សង្គម​ស៊ីវិល​រូប​នេះ ធ្វើ​ក្រោយ​ពី​អ្នក​ស្រី​មើល​ឃើញ​ថា វិធានការ​ក្នុង​ការ​គ្រប់គ្រង​ជន​បរទេស​របស់​អាជ្ញាធរ​ខេត្ត​ព្រះសីហនុ ហាក់​មិន​ទាន់​ធ្វើ​ឱ្យ​ជន​បរទេស​មាន​ការ​ខ្លាច​ញញើត​ច្បាប់​នៅ​កម្ពុជា​ឡើយ។

កាល​ពី​យប់​ថ្ងៃ​ទី១៧ តុលា ជនជាតិ​ចិន ២ក្រុម​បាន​ឈ្លោះ​ទាស់ទែង​គ្នា​រហូត​ទាញ​កាំបិទ​កាប់​គ្នា​នៅ​ក្នុង​ហាង​ផឹកស៊ី​មួយ​កន្លែង​ឈ្មោះ ស៊ី កាង (Sikang) ស្ថិត​ក្នុង​ខេត្តព្រះសីហនុ។ ក្នុង​ហេតុការណ៍​នោះ សមត្ថកិច្ច​បាន​ចាប់​ខ្លួន​ជនជាតិ​ចិន ៨នាក់ និង​រឹបអូស​បាន​កាំបិត​ចំនួន ៥ដើម។

វិទ្យុអាស៊ីសេរី​មិន​អាច​ទាក់ទង​ស្នងការ​នគរបាល​ខេត្តព្រះសីហនុ លោក ជួន ណារិន្ទ ដើម្បី​សុំ​អត្ថាធិប្បាយ​ជុំវិញ​រឿង​នេះ​បាន​ទេ នៅ​ថ្ងៃ​ទី១៩ តុលា។

ចំណែក​អ្នក​នាំ​ពាក្យ​សាលា​ខេត្តព្រះសីហនុ លោក ឃាង ភារម្យ បដិសេធ​មិន​បក​ស្រាយ​រឿង​នេះ​ទេ ព្រោះ​លោក​ថា ជនជាតិ​ចិន​ទាំង ៨នាក់​កំពុង​ស្ថិត​ក្នុង​នីតិវិធី​ស៊ើបសួរ​របស់​សមត្ថកិច្ច។ ទោះ​យ៉ាង​ណា​ក្ដី លោក​អះអាង​ថា អាជ្ញាធរ​មាន​សមត្ថកិច្ច​ខេត្ត​ព្រះសីហនុ​តែងតែ​បង្ក្រាប និង​អនុវត្ត​ច្បាប់​ជន​បរទេស​ណា ដែល​បង្ក​អសន្តិ​សង្គម៖ «ដំណើរ​ការ​នៃ​ប្រតិបត្តិការ ដឹកនាំ​ដោយ​ក្រុម​ការងារ​ក្រសួង​មហាផ្ទៃ និង​រដ្ឋបាល​ខេត្ត​កន្លង​មក​យើង​បាន​ដឹកនាំ​ប្រតិបត្តិការ ដែល​មាន​ការ​ចូលរួម​ពី​ស្ថាប័ន​ពាក់ព័ន្ធ ស្រាវជ្រាវ​ករណី ដែល​យើង​រក​ឃើញ​ដែល​មាន​បទ​ល្មើស គឺ​បាន​បញ្ជូន​ទៅ​តុលាការ​ចាត់ការ​តាម​នីតិវិធី​ច្បាប់»

ទោ​ជា​យ៉ាង​ណា​ក៏​ដោយ​ចុះ ក៏​អ្នក​តាម​ដាន​ស្ថានការណ៍​កម្ពុជា មើល​ឃើញ​ថា ការ​បង្ក​អសន្តិសុខ​សង្គម ដែល​ប្រព្រឹត្ត​ដោយ​ជនជាតិ​ចិន ជាពិសេស អាជីវកម្ម​បែប​ឧក្រិដ្ឋ​នៃ​ក្រុម​ឧក្រិដ្ឋជន​ជនជាតិ​ចិន​នៅ​បន្ត​កើត​មាន​ឡើង​នៅ​កម្ពុជា ហាក់​គ្មាន​ភាព​ថមថយ​ឡើយ ខណៈ​រដ្ឋាភិបាល​ក្រុង​ភ្នំពេញ និង​រដ្ឋាភិបាល​ក្រុង​ប៉េកាំង​បន្ត​រឹត​ចំណង​មិត្តភាព​ដែកថែប​យ៉ាង​ស្អិតល្មួត​នៃ​ប្រទេស​ទាំង​ពីរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។