ពលរដ្ឋ​សម្ដែង​ការ​ព្រួយ​បារម្ភ​ចំពោះ​ជនជាតិ​ចិន​បន្ត​ពង្រាយ​រោងចក្រ​ផលិត​គ្រឿងញៀន​នៅ​កម្ពុជា

ដោយ សេក បណ្ឌិត
2022.07.15
Share on WhatsApp
Share on WhatsApp
ពលរដ្ឋ​សម្ដែង​ការ​ព្រួយ​បារម្ភ​ចំពោះ​ជនជាតិ​ចិន​បន្ត​ពង្រាយ​រោងចក្រ​ផលិត​គ្រឿងញៀន​នៅ​កម្ពុជា អគ្គ​ស្នងការ​រង​នគរបាល​ជាតិ​ទទួល​ផែន​ប្រឆាំង​គ្រឿងញៀន លោក ម៉ក់ ជីតូ (រូប​ក​ណ្ដាល) ក្នុង​សន្និសីទ​កាសែត​ក្រោយ​ចាប់​បាន​គ្រឿងញៀន នា​ពេល​កន្លង​ទៅ។
RFA

ប្រជាពលរដ្ឋ​សម្ដែង​ក្ដី​ព្រួយបារម្ភ​ចំពោះ​សមាជិកគ្រួសារ​របស់​ពួកគាត់ និង​ធនធាន​យុវជន​ជំនាន់​ក្រោយ​គ្រោះថ្នាក់​អាច​នឹង​បាត់បង់​សតិ​ស្មារតី ដោយសារតែ​ការ​ផុងខ្លួន​ប្រើប្រាស់​គ្រឿងញៀន​។ ក្ដី​កង្វល់​របស់​ប្រជាពលរដ្ឋ បែបនេះ កើត​ឡើង បន្ទាប់​ពី​ជនជាតិ​ចិន​បន្ត​នាំសារ​ធាតុគីមី​មក​កែច្នៃ​ជា​គ្រឿងញៀន​រាប់​រយ​តោន និង​បើក​រោងចក្រ​ផលិត​ចែកចាយ​ក្នុងស្រុក​យ៉ាង​អនាធិបតេយ្យ​។ មន្ត្រី​សង្គម​ស៊ីវិល​ថា បើ​អាជ្ញាធរ​នៅតែ​គ្មាន​វិធានការ ទប់ស្កាត់​ឧក្រិដ្ឋកម្ម គ្រឿងញៀន​នេះ​ឱ្យ​មាន​ប្រសិទ្ធភាព​ទេ​នោះ ករណី​បទល្មើស​ឧក្រិដ្ឋ និង​ផល​វិបត្តិ​ក្នុង​សង្គម​នឹង​បន្ត​កើត​មាន​ឡើង​កាន់តែ​ច្រើន។

ប្រជាពលរដ្ឋ និង​មន្ត្រី​សង្គម​ស៊ីវិល​ព្រួយបារម្ភ​ថា បញ្ហា​លំហូរ​គ្រឿងញៀន​បន្ត​ហូរ​ចូល​កម្ពុជា​យ៉ាងច្រើន​សន្ធឹកសន្ធាប់​តាមរយៈ​ជនជាតិ​ចិន​ជា​បន្តបន្ទាប់​មកនេះ បាន​ធ្វើ​ឱ្យ​សង្គម​កម្ពុជា​កាន់តែ​មាន​ភាព​វឹកវរ​ក្នុង​សង្គម​។ ពួកគាត់​ស្នើ​ដល់​រដ្ឋាភិបាល​ឱ្យ​មាន​ចំណាត់ការ​ឱ្យ​បាន​ម៉ឺងម៉ាត់ ក្នុង​ការ​ទប់ស្កាត់​ឱ្យ​មាន​ប្រសិទ្ធភាព​ចំពោះ​វត្តមាន​ជនជាតិ​ចិន​ដែល​ចេះតែ​យក​កម្ពុជា​ធ្វើជា​កន្លែង​រោងចក្រ​សម្រាប់​ផលិត​គ្រឿងញៀន។

ពលរដ្ឋ​ម្នាក់​រស់នៅ​ស្រុក​ស្អាង ខេត្ត​កណ្ដាល ថ្លែង​សុំ​មិន​បញ្ចេញ​ឈ្មោះ ប្រាប់​វិទ្យុ​អាស៊ីសេរី​នៅ​ថ្ងៃទី​១៤ កក្កដា ថា ភូមិ​មួយចំនួន​ស្ថិត​ក្នុង​ស្រុក​ស្អាង បាន​បង្ក​នូវ​អនាធិបតេយ្យ ដោយសារតែ​យុវជន​ដែល​ប្រើប្រាស់​គ្រឿងញៀន​មាន​ចំនួន​កាន់តែ​កើនឡើង​។ ជាពិសេស លោកស្រី​ថា កូនៗ​ លោកស្រី​តែងតែ​ចេញ​ពី​សាលា​មក​ដល់​ផ្ទះ​យប់​ព្រលប់ ដូច្នេះ​លោកស្រី​ព្រួយ​បារម្ភ​ថា អាច​មាន​យុវជន​មួយ​ចំនួន​ដែល​ប្រើប្រាស់​គ្រឿងញៀន​ប្រព្រឹត្ត​អំពើ​មិន​គប្បី​លើ​កូន​លោកស្រី៖ «ចេះតែ​ព្រួយ​ចេះតែ​បារម្ភ​ណាស់ ឃើញ​ចេះតែ​មាន​យុវជន​ឥឡូវ​វា​ចេះ​ប្រើ​គ្រឿងញៀន គ្រឿង​អី​ច្រើន​អ៊ីចឹង​ចេះតែ​ភ័យ​ដែរ​ហ្នឹង​។ មិនដឹង​យ៉ាងណា​យ៉ាង​ណី​ទៅមុខ​ទៀត​យើង​វា​មិនដឹង​ដែរ? ពិបាក ចេះតែ​បារម្ភ​មាន​កូន​សុទ្ធតែ​ប្រុសៗ​ច្រើន​ដែរ​។ មីង​មិន​ទាន់​មានកូន​អ៊ីចឹង​ទេ​។ ប៉ុន្តែ​អ្នក​នៅ​ជិតខាង​អ៊ីចឹង ថ្ងៃ​មុនគេ​ចាប់​ទៅ​ម្នាក់​ពីរ​នាក់​អ៊ីចឹង​។ យើង​មិនដឹង​ធ្វើ​ម៉េច​ភ័យ​នោះ​ភ័យខ្លាច​ហើយ មាន​ទាំង​ឆក់​កាបូប ឆក់​ខ្សែក អ៊ីចឹង លើក​មុន​អត់​ដែល​មាន​ទេ​ឥឡូវ​ចេះ​មាន​មួយៗ​ដែរ ហើយ​ក្មេង​គ្នា​រៀន​ព្រលប់​អី​គ្នា​មិន​ហ៊ាន​ជាមួយ​ពួក​គ្រឿងញៀន​ព្រលប់​ឡើង​វា​ចេញ​ហើយ​កាល​ថ្ងៃមុន​ចាប់​ដល់​ម៉ោង​១​យប់​អី​នោះ»

ស្រដៀង​គ្នា​នេះ​ដែរ ពលរដ្ឋ​ម្នាក់ទៀត​រស់​នៅ​ខេត្ត​ព្រៃវែង លោក ប៉ាវ វន់ ថ្លែង​ថា លោក​ឈឺចាប់​នៅ​ពេល​ដែល​ជនបរទេស ជាពិសេស​ជនជាតិ​ចិន​យក​ទឹកដី​ខ្មែរ​ធ្វើជា​កន្លែង​ប្រព្រឹត្ត​អាជីវកម្ម​បង្កើត​រោងចក្រ​ផលិត​គ្រឿងញៀន​តាម​អំពើ​ចិត្ត។ លោក​យល់​ថា បើ​លំហូរ​គ្រឿងញៀន​ចូល​កម្ពុជា​ឥត​ថមថយ​ដូច​សព្វថ្ងៃ​នេះ នឹង​កាន់តែ​បង្ក​ផល​វិបត្តិ​ក្នុង​សង្គម​យ៉ាងធ្ងន់ធ្ងរ​។ ក្រៅ​ពី​នេះ លោក​ក៏​ព្រួយ​បារម្ភ​ចំពោះ​កូនៗ និង​សមាជិកគ្រួសារ​របស់​លោក ជាពិសេស​យុវជន​ខ្មែរ​ជំនាន់​ក្រោយ​ថា អាច​មាន​ជនខិលខូច​បញ្ចុះបញ្ចូល​ឱ្យ​ពួកគាត់​ប្រើប្រាស់​គ្រឿងញៀន​ទៅ​តាម​រូបភាព​បង្ខិតបង្ខំ​ណាមួយ៖ «​បើ​គេ​មក​រក​ស៊ី​ធម្មតា​វា​មិនសូវ​ប៉ះពាល់​។ ប៉ុន្តែ​នេះ​មក​ផលិត​របស់ [​គ្រឿងញៀន​] អ៊ីចឹងៗ វា​ប៉ះពាល់​ខ្លាំង ព្រោះ​អី​គេ​ចាប់​ទៅ​គេ​យក​ទៅ​ណា ឃើញ​គេ​ចាប់បាន​ហើយ ឃើញ​គេ​ផ្សាយ​ឃើញ​គេ​អី​ដែរ គេ​ចាប់បាន​ប៉ុន្តែ​ចាប់​ហើយ​មិនដឹង​យក​ទៅ​ណា​ទៅ​ណី​? ខ្ញុំ​ជា​ប្រជាពលរដ្ឋ​មួយ​រូប​សុំ​ស្នើ​ដល់​រាជរដ្ឋាភិបាល​ហ្នឹង​ជួយ​រឹត​បន្តឹង​ច្បាប់​ហ្នឹង​ឱ្យ​ខ្លាំង ព្រោះ​អី​របស់​ហ្នឹង​តែ​ចូល​មក​ហើយ​កូន​ខ្មែរ​យើង​ទំពាំង​ស្នង​ឫស្សី​ហ្នឹង​ពិបាក​ទប់​ណាស់ ព្រោះ​គេ​បញ្ចុះបញ្ចូល​ហ្នឹង​ចេះតែ​ទៅៗ​ តៗ ​គ្នា​អ៊ីចឹង»

ដោយឡែក ពលរដ្ឋ​ដែល​ជា​អ្នក​រត់​តាក់ស៊ី​នៅ​ក្រុង​ប៉ោយប៉ែត ខេត្ត​បន្ទាយមានជ័យ​ឯណោះ​វិញ លោក ម៉ន សុផល ប្រាប់​វិទ្យុ​អាស៊ីសេរី​ថា លោក​មិន​សប្បាយចិត្ត​ចំពោះ​ជនជាតិ​ចិន​ដែល​ចាត់ទុក​ទឹកដី​ខ្មែរ​សម្រាប់​តែ​ការ​ប្រកប​របរ​អាជីវ​កម្ម​ខុសច្បាប់​របស់​ពួកគេ​។ លោក​ឱ្យ​ដឹង​ទៀត​ថា ក្រុង​ប៉ោយប៉ែត​ក៏​មាន​ជនជាតិ​ចិន​ច្រើន​សន្ធឹក​សន្ធាប់ ដែល​ជា​ញឹកញាប់​ជន​ជាតិចិន​ទាំងនេះ​ដក​កាំភ្លើង​បាញ់​រះ​គ្នា​ជា​សាធារណៈ​បង្ក​ការភ័យខ្លាច​ដល់​ប្រជាពលរដ្ឋ​ម្ចាស់​ស្រុក​ជា​បន្តបន្ទាប់៖ «ជនបរទេស​ដែល​មក​ផលិត​គ្រឿងញៀន​នៅ​ស្រុក​ខ្មែរ​អ៊ីចឹង​វា​មិន​សម​ទេ។ វា​មិន​សម​ឱ្យ​មាន​ទេ គ្មាន​ទៅ​ចង់​បាន​ទេ​អា​គ្រឿងញៀន​ឡើង​ពេញ​ទឹក​ពេញ​ដី​នៅ​ស្រុក​ខ្មែរ​។ អ្នកណា​មិន​បារម្ភ ហើយ​កូន​យើង អនាគត​កូន​យើង​ទៅ​ជា​យ៉ាងណា? បារម្ភ​ខ្លាំង​ដែរ​ហ្នឹង​គ្រឿងញៀន​ហូរ​ចូល​ខ្មែរ​ច្រើន​អ៊ីចឹង​បារម្ភ​ខ្លាំង​មែនទែន​ហ្នឹង​ហ្អា៎»

ចំណែក ពលរដ្ឋ​ម្នាក់ទៀត​រស់នៅ​រាជធានី​ភ្នំពេញ លោក ស៊ុម រស់ លើកឡើង​ថា ករណី​ជនជាតិ​ចិន​ដែល​អាច​នាំសារ​ធាតុគីមី និង​ហ៊ាន​បើក​រោងចក្រ​ផលិត​គ្រឿងញៀន​នៅ​កម្ពុជា​ជា​បន្តបន្ទាប់​បែបនេះ បើ​គ្មាន​អ្នក​មាន​អំណាច និង​មន្ត្រី​អាជ្ញាធរ​ឃុបឃិត​គ្នា​ជាមួយ​ក្រុម​ឧក្រិដ្ឋជន ក៏​ជន​ជាតិចិន​ទាំង​មិនអាច​ដំណើរ​សង្វាក់​ផលិតកម្ម​របស់​ពួកគេ​បាន​ដែរ​។ លោក​រិះគន់​ថា បើ​មន្ត្រី​អាជ្ញាធរ​នៅតែ​ប្រព្រឹត្ត​អំពើពុករលួយ​ជា​ប្រព័ន្ធ ការ​ទប់ស្កាត់​បញ្ហា​គ្រឿងញៀន​នៅ​កម្ពុជា​នេះ នឹង​គ្មាន​ប្រសិទ្ធភាព​ដែល​អាច​ឱ្យ​ប្រជាពលរដ្ឋ​មាន​ជំនឿ​លើ​ប្រព័ន្ធ​ច្បាប់​នៅ​កម្ពុជា​បាន​ឡើយ៖ «ជា​ឧទាហរណ៍ ខ្ញុំ​លើក​ជា​ឧទាហរណ៍​ថា សព្វថ្ងៃ​គាត់ លើក​នូវ​ពាក់​ស្លោក​មួយ អរគុណ​សន្តិភាព​។ ក៏ប៉ុន្តែ​អសន្តិសុខ​ដូចជា បញ្ហា​ចោរកម្ម ឬក៏​លួច​ឆក់​នៅ​តាម​ដងផ្លូវ​ជាពិសេស​ប្រជាជន​នៅ​ក្រុង​អសន្តិសុខ​។ សន្តិសុខ​សម្រាប់​ការ​រស់​នៅ​វា​អត់​មាន​។ ហ្នឹង​វា​ពាក់ព័ន្ធ​ជាមួយនឹង​បញ្ហា​គ្រឿងញៀន​និង​ល្បែង​នេះ​។ ខ្ញុំ​ឆ្ងល់​មួយទៀត ហេតុ​អី​បាន​ជា​ការ​នាំចូល [​គ្រឿងញៀន​] ហ្នឹង​ហេតុ​អី​ក៏​វា​ទូលំទូលាយ​ល្អ​ម្ល៉េះ​?»

ក្ដី​កង្វល់​របស់​ប្រជាពលរដ្ឋ​បែបនេះ​កើត​ឡើង ក្រោយពី​ពួកគាត់​ឃើញ​សង្កេត​ឃើញ​ថា ជនជាតិ​ចិន​មក​វិនិយោគ​រកស៊ី​នៅ​កម្ពុជា​ភាគច្រើន​ហាក់​មិន​បាន​ខ្វាយខ្វល់​ពី​ការគោរព​អធិបតេយ្យ និង​ខ្លាចញញើត​ច្បាប់​កម្ពុជា​នោះ​ឡើយ​។ ក្រៅ​ពី​នេះ ជន​ជាតិចិន​ទាំងនោះ បាន​ប្រើប្រាស់​ទឹកដី​ខ្មែរ​បើក​រោងចក្រ​ផលិត​គ្រឿងញៀន​រាប់​រយ​តោន​ជា​បន្តបន្ទាប់ ដែល​ធ្វើ​ឱ្យ​សង្គម​កម្ពុជា​ទាំងមូល​ប្រឈម​ភាព​វឹកវរ និង​ប៉ះពាល់​ដល់​ធនធាន​យុវជន​យ៉ាងធ្ងន់ធ្ងរ។

កាលពី​ថ្ងៃទី​១៣ កក្កដា អាជ្ញាធរ​ប្រឆាំង​បទល្មើស​គ្រឿងញៀន​បង្ក្រាប​បាន ជនជាតិ​ចិន​ចំនួន​១១ នាក់ ព្រមទាំង​រក​ឃើញ រោងចក្រ​ផលិត​គ្រឿងញៀន និង​ទីតាំង​ឃ្លាំង​សម្រាប់​ផ្ទុក​សារធាតុ​គីមី​ផ្សំ​គ្រឿងញៀន​របស់​ក្រុម​ឧក្រិដ្ឋជន​នៅ​ទីតាំង​ផ្សេងៗ​គ្នា​។ គ្រឿងញៀន ដែល​សមត្ថកិច្ច​រឹបអូស​បានជា​ប្រភេទ​កេតាមីន (Ketamine) ជិត ២​តោន សារធាតុ​គីមី​ផ្សំ​ជា​គ្រឿងញៀន ជិត​៣​រយ​តោន (២៧៦​តោន​) និង​ឧបករណ៍ សម្ភារ​: គ្រឿងបន្លាស់​សម្រាប់ កែច្នៃ ផលិត គ្រឿងញៀន​មួយ​ចំនួន​ធំ ដែល​ក្រុម​ឧក្រិដ្ឋជន​ទាំង​១១​នាក់​នោះ​បាន​លួច​បន្លំ​ដឹក​ចូល​ឆ្លងកាត់​សមុទ្រ​វៀតណាម​ចូល​តាម​ច្រក​កំពង់ផែ​ក្រុងភ្នំពេញ​តាំងពី​ថ្ងៃទី​៧ ខែមេសា។

ដោយឡែក​ថ្មីៗ​នេះ កម្លាំង​សមត្ថកិច្ច​ចម្រុះ​បង្ក្រាប​បាន​ក្រុម​ឧក្រិដ្ឋជន​គ្រឿងញៀន​ជនជាតិ​ចិន​ចំនួន ៧​នាក់​បន្ថែម​ទៀត ដែល​ពួកគេ​បាន​នាំចូល​សារធាតុ​គីមី​ផ្សំ​កែ​ទៅជា​គ្រឿងញៀន​ប្រមាណ​ជាង ១៤​តោន ព្រមទាំង​រឹបអូស​សម្ភារៈ​ឧបករណ៍​កែច្នៃ និង​ធុង​សម្រាប់​ផ្ទុក​គ្រឿងញៀន​មួយ​ចំនួន​ធំ ដែល​ស្ថិតក្នុង​រោងចក្រ​ផលិត​កែច្នៃ​គ្រឿងញៀន​ពួក​ក្រុម​ឧក្រិដ្ឋជន​ក្នុង​ខេត្ត​ព្រះសីហនុ។

អគ្គ​ស្នងការ​រង​នគរបាល​ជាតិ​ទទួល​ផែន​ប្រឆាំង​គ្រឿងញៀន លោក ម៉ក់ ជីតូ ទទួលស្គាល់​ថា បទល្មើស​គ្រឿងញៀន​នៅ​កម្ពុជា​មិន​ទាន់​មាន​ភាព​ថមថយ​នៅឡើយ ដោយសារតែ​ក្រុម​ឧក្រិដ្ឋជន​តែងតែ​ចង់បាន​កម្ពុជា​ធ្វើ​កន្លែង​ផលិត​គ្រឿងញៀន​។ លោក​បន្ត​ថា ការ​ទប់​ស្កា​ប់​បទល្មើស​គ្រឿងញៀន​នេះ​ត្រូវ​ទាមទារ​ឱ្យ​មាន​អង្គការ​អន្តរជាតិ​ជា​មិត្ត​មួយចំនួន​ចូលរួម​សហការ​ជាមួយ​អាជ្ញាធរ​កម្ពុជា ហើយ​ប្រជាពលរដ្ឋ​មូលដ្ឋាន​ក៏​ត្រូវ​ចូលរួម​សហការ​ផ្តល់​ព័ត៌មាន​សម្ងាត់​ជូន​សមត្ថកិច្ច ដើម្បី​ចុះ​បង្ក្រាប​កន្លែង​ក្រុម​ឧក្រិដ្ឋជន​បាន​ទាន់ពេល៖ «ចំពោះ​សមត្ថកិច្ច​យើង យើង​មាន​អី​ព្រួយ​បារម្ភ យើង​បង្ក្រាប​រហូត​ហ្នឹង​។ គ្រាន់តែ​ថា​ពាក់ព័ន្ធ​នឹង​សមត្ថកិច្ច​យើង​រដ្ឋាភិបាល​បាន​ដាក់​មាន​យុទ្ធនាការ​ប្រយុទ្ធ​ប្រឆាំង​គ្រឿងញៀន​ដែល​យើង​ទាំងអស់គ្នា​ចូលរួម​ដែល​សមត្ថកិច្ច​ម្នាក់​ធ្វើ​មិន​បានទេ​។ អ៊ីចឹង​ទាល់តែ​មាន​ដំណឹង​ពាក់ព័ន្ធ​នៅ​​​ក្នុង​ប្រទេស​ក្រៅប្រទេស​ជាមួយ​បណ្តាល​ប្រទេស​ជា​មិត្ត»

ជុំវិញ​រឿង​នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា មាន​ប្រសាសន៍​ថា អាជ្ញាធរ​ត្រូវតែ​ពង្រឹង​មន្ត្រី​តាម​ច្រកព្រំដែន និង​ចុះ​ស្រាវជ្រាវ​ចំពោះ​មេខ្លោង​ដែល​ពាក់ព័ន្ធ​ក្នុង​ការ​អនុញ្ញាត​ឱ្យ​ជនជាតិ​ចិន​អាច​នាំចូល​សារធាតុ​ញៀន​ចូល​កម្ពុជា​ជា​បន្តបន្ទាប់​។ លោក​បន្ត​ថា ការ​នាំ​ចូល​នៃ​សារធាតុ​ញៀន​របស់​ក្រុម​ឧក្រិដ្ឋជន​មក​កម្ពុជា​ឥត​ឈប់ឈរ គឺជា​ការ​ព្រួយបារម្ភ​សម្រាប់​មន្ត្រី​អាជ្ញាធរ​ដែល​អនុវត្ត​ច្បាប់​ធូរ និង​មានការ​ប្រព្រឹត្ត​អំពើពុករលួយ៖ «បន្ទាប់ពី​រឿង​មួយ ដល់​រឿង​មួយ​មិន​ចេះ​អស់​សោះ នេះ​ក៏​អាច​បញ្ជាក់​ពី​ការ​ធូររលុង ក្នុង​ការ​អនុវត្ត​ច្បាប់​របស់​ខាង​មន្ត្រី​ពាក់ព័ន្ធ​។ មន្ត្រី​ដែល​មាន​តួនាទី​ទប់ស្កាត់​អី​ទាំងអស់​ហ្នឹងឯង ដែល​ជា​អ្នក​ទទួលខុសត្រូវ ហើយ​បើសិនជា​អំពី​ទាំង​អស់ហ្នឹង​កើតឡើង​ដដែលៗ បញ្ហា​គួរតែ​មានការ​ពិនិត្យមើល​មន្ត្រី​ទាំងអស់​នោះ​តើ​គាត់​ធ្វើ​អី​? ហើយ​ពិតជា​ធ្វើ​ការងារ​របស់​ខ្លួន​បាន​ត្រឹមត្រូវ​ឬទេ​? ហើយ​បើ​រក​ឃើញ​ថា មន្ត្រី​ទាំងអស់​ហ្នឹង​ពាក់ព័ន្ធ​ទទួល​បាន​ផលប្រយោជន៍ ឬក៏​លាភសក្ការៈ​ណាមួយ​គួរតែ​មាន​វិធានការ​តាមផ្លូវ​ច្បាប់»

កាលពី​ថ្ងៃទី​២៦ មិថុនា អាជ្ញាធរ​ប្រយុទ្ធ​ប្រឆាំង​គ្រឿងញៀន​បាន​ដុត​បំផ្លាញ​សារធាតុ​ញៀន និង​សារធាតុគីមី សរុប​ជាង ៦​តោន ក្នុងចំណោម​វត្ថុ​តាង​គ្រឿងញៀន សារធាតុ​គីមី​ផ្សំ និង​សារ​ធាតុគីមី​ពាក់ព័ន្ធ​ផ្សេងៗ ដែល​រឹបអូស​បាន មាន​ទម្ងន់​សរុប​ជិត ១០០​តោន​។ អាជ្ញាធរ​ឱ្យដឹងទៀតថា ក្នុង​ឆ្នាំ​២០២០ និង​២០២១ ដែល​មាន​ការ​រីក​រាល​ដាល​ជំងឺ​កូវីដ​-១៩ សមត្ថកិច្ច​បង្ក្រាប និង​រឹបអូស​គ្រឿងញៀន​បាន​ជិត ១០​តោន និង​ឃាត់ខ្លួន​ជនសង្ស័យ​បាន​ជាង ៣​ម៉ឺន​នាក់​។ ក្នុង​នោះ​សមត្ថកិច្ច​បង្ក្រាប​បទល្មើស​គ្រឿងញៀន​បាន​ចំនួន​ជាង ១​ម៉ឺន​ករណី (១០.៤៦១​ករណី​) ក្នុង​ឆ្នាំ​២០២០ និង​ជាង​៦​ពាន់​ករណី (.៣០៨​ករណី​) ទៀត​ក្នុង​ឆ្នាំ​២០២១។

ទោះជា​យ៉ាងណា ក្រុម​អង្គការ​សង្គម​ស៊ីវិល​នៅតែ​ជំរុញ​ដល់​អាជ្ញាធរ​ពាក់ព័ន្ធ​ឱ្យ​ពង្រឹង​ការអនុវត្ត​ច្បាប់ និង​ស៊ើបអង្កេត​ដោយ​តម្លាភាព​ចាប់​មេខ្លោង​ធំៗ ដាក់​ពន្ធនាគារ ទើប​អាច​ទប់ស្កាត់​បញ្ហា​គ្រឿងញៀន​មាន​ប្រសិទ្ធភាព៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។