ពលរដ្ឋ​ជំរុញ​ឱ្យ​អាជ្ញាធរ​ចាត់វិធានការ​លើ​ម្ចាស់​អាជីវកម្ម​ល្បែង​ស៊ីសង និង​អាជ្ញាធរ​មូលដ្ឋាន​ដែល​ពាក់ព័ន្ធ​នៅ​ពី​ក្រោយ

ដោយ ទីន ហ្សាការីយ៉ា
2024.02.17
ពលរដ្ឋ​ជំរុញ​ឱ្យ​អាជ្ញាធរ​ចាត់វិធានការ​លើ​ម្ចាស់​អាជីវកម្ម​ល្បែង​ស៊ីសង និង​អាជ្ញាធរ​មូលដ្ឋាន​ដែល​ពាក់ព័ន្ធ​នៅ​ពី​ក្រោយ ទិដ្ឋភាព​នៅ​កន្លែង​​ភ្នាល់​ល្បែងតាម​អនឡាញ​​មួយ​កន្លែង​នៅ​រាជធានី​ភ្នំពេញ ដែល​គេ​ចាក់​បញ្ចាំង​ជា​ចំហ​លើ​អេក្រង់​ និង​បញ្ជា​តាម​ប្រព័ន្ធ​កុំព្យូទ័រ​ កាល​ពី​ថ្ងៃ​ទី៦ ខែកញ្ញា ឆ្នាំ២០២២។
រូប​៖ ពលរដ្ឋ​ផ្តល់ឱ្យ

ប្រជាពលរដ្ឋ​ជំរុញ​ឱ្យ​អាជ្ញាធរ​បង្ក្រាប​ល្បែងស៊ីសង​ខុសច្បាប់ នៅ​តាម​មូលដ្ឋាន​ឱ្យ​មាន​ប្រសិទ្ធភាព និង​ស្រាវជ្រាវ​រក​មន្ត្រី​ឃុបឃិត​ជាមួយ​ម្ចាស់​អាជីវកម្ម​យក​មក​ដាក់​ទោស​។ មន្ត្រី​សង្គម​ស៊ីវិល​ថា រដ្ឋាភិបាល​គួរ​បង្ក្រាប និង​អនុវត្ត​ច្បាប់​តឹងរ៉ឹង​លើ​មេខ្លោង​បង្កើត​ល្បែងស៊ីសង ព្រមទាំង​បញ្ឈប់​ការ​ផ្សព្វផ្សាយ​គ្រប់​រូបភាព​ដែល​ជំរុញ​ឱ្យ​ពលរដ្ឋ​ទៅ​លេង​ល្បែង​ទាំងនោះ។

ប្រជាពលរដ្ឋ​នៅ​តាម​មូលដ្ឋាន​លើកឡើង​ថា ការ​បង្ក្រាប​ល្បែងស៊ីសង និង​ល្បែង​អនឡាញ​ខុសច្បាប់​នៅ​តាម​មូលដ្ឋាន​កន្លង​មក មិន​សូវ​មាន​ប្រសិទ្ធ និង​អនុវត្ត​បាន​យូរអង្វែង​ឡើយ ក្នុង​នោះ​ម្ចាស់​ទីតាំង​បន​ល្បែង​មួយ​ចំនួន នៅ​តែ​បន្ត​សាជីវកម្ម​របស់​ខ្លួន​ធម្មតា។

ពលរដ្ឋ​នៅ​សង្កាត់​ស្វាយប៉ោ ក្រុង​បាត់ដំបង កញ្ញា ស៊ុន ស្រីនិច ប្រាប់​វិទ្យុ​អាស៊ីសេរី នៅ​ថ្ងៃ​ទី១៦ ខែកុម្ភៈ ថា បន​ល្បែងស៊ីសង ឆ្នោត​កន្ទុយ​លេខ និង​ឡូតូ​អនឡាញ​មួយ​ចំនួន​នៅ​តាម​សង្កាត់​នានា ក្នុង​ក្រុង​បាត់ដំបង នៅតែ​បើក​ដំណើរការ​ធម្មតា ដោយ​កន្លែង​ខ្លះ ម្ចាស់​អាជីវកម្ម​បាន​ប្ដូរ​ទីតាំង ចូលក្នុង​ផ្ទះ ខ្លះ​បិទទ្វារ​ពី​ខាងក្រៅ ចំណែកឯ​ឆ្នោត​កន្ទុយ​លេខ​វិញ ម្ចាស់​អាជីវកម្ម ឬ​មេ​ឆ្នោត​បាន​បង្កើត​ក្រុម​ក្នុង​បណ្ដាញ​សង្គម ដើម្បី​ដំណើរការ​ភ្នាល់ ឬ​លក់​លេខ​ឆ្នោត​ជា​ធម្មតា។

កញ្ញា ស៊ុន ស្រីនិច៖ «នៅ​ពេល​ដែល​គាត់​(​អាជ្ញាធរ​) ចុះ​បង្ក្រាប​អ៊ីចឹង គឺ​គាត់​(​ម្ចាស់​អាជីវកម្ម​)​ដូច​ដឹង​មុន​អ៊ីចឹង គាត់​រៀបចំ​ធ្វើ​ធម្មតា ប៉ុន្តែ​នៅ​ពេល​គេ​ចុះ​បង្ក្រាប​អត់​មាន​ឃើញ​អ្វី​អ៊ីចឹង ហើយ​នៅ​ពេល​ដែល​គេ​ទៅ​អស់ បាន​គេ​រៀបចំ​ជាថ្មី​ឡើងវិញ​។ កន្លែង​បង្ក្រាប​ហ្នឹង គឺ​កន្លែង​ដដែលៗ ដូចជា​ល្បែង​ឡូតូ ឬ​ល្បែង​បៀ​។ គឺ​គាត់​ដូច​ដឹង​មុន ព្រោះ​គាត់​មាន​ខ្សែរយៈ»

ការ​លើកឡើង​នេះ បន្ទាប់​ពី​នៅក្នុង​កិច្ចប្រជុំ​គណៈកម្មការ​ប្រយុទ្ធ​ប្រឆាំង​អំពើ​ជួញដូរ​មនុស្ស នៃ​ខេត្ត​ជាប់​ព្រំដែន​កម្ពុជា​-​ថៃ កាលពី​ថ្ងៃទី​១៥ កុម្ភៈ រដ្ឋមន្ត្រី​ក្រសួង​មហាផ្ទៃ លោក ស សុខា បាន​ដាក់​បញ្ជា​ឱ្យ​អាជ្ញាធរ នៅ​តាម​រាជធានី​-​ខេត្ត បង្ក្រាប​ឱ្យ​អស់​នូវ​ទីតាំង​បញ្ចាំ​ខុសច្បាប់ និង​ទីតាំង​ល្បែង​ផ្សងសំណាង ឬ​ឡូតូ​ខុសច្បាប់ ដែល​មាននៅ​គ្រប់​ភូមិ ឃុំ សង្កាត់​។ លោក ស សុខា ទទួលស្គាល់​ថា វិធានការ​បង្ក្រាប​ល្បែងស៊ីសង​ដែល​បាន​ធ្វើ​កន្លងមក នៅ​មិន​ទាន់​មាន​ប្រសិទ្ធភាព​គ្រប់​ជ្រុងជ្រោយ​នៅ​ឡើយ។

ទោះជា​បែបនេះ​ក្ដី ការ​ដាក់​បទបញ្ជា​ឱ្យ​បិទ​ល្បែងស៊ីសង​ខុសច្បាប់​នេះ ធ្វើឡើង​តាំង​ពី​នៅ​ពេល​ដែល លោក ហ៊ុន សែន ធ្វើជា​នាយករដ្ឋមន្ត្រី និង​លោក ស ខេង ជា​រដ្ឋមន្ត្រី​ក្រសួង​មហាផ្ទៃ រហូត​ដល់​ជំនាន់​កូន ដែល​មាន​នាយករដ្ឋមន្ត្រី ហ៊ុន ម៉ាណែត និង​រដ្ឋមន្ត្រី​ក្រសួង​មហាផ្ទៃ លោក ស សុខា ជា​អ្នក​បន្តវេន​ក្ដី ប៉ុន្តែ​វិធានការ​នេះ អនុវត្ត​បាន​តែមួយ​ឆាវ​ដូច​ភ្លើងចំបើង ហើយក៏​ស្ងាត់​ទៅ​វិញ។

ជាក់ស្ដែង នៅ​មួយ​ថ្ងៃមុន​ការប្រកាស​របស់ លោក ស សុខា លោកនាយក​រដ្ឋមន្ត្រី ហ៊ុន ម៉ាណែត ក៏បាន​បញ្ជា​ឱ្យ​គណៈ​អភិបាល​រាជធានី​-​ខេត្ត ទាំងអស់​ចាត់​វិធានការ​បង្ក្រាប​ល្បែង​ផ្សង​សំណាង​ខុសច្បាប់ និង​ផ្អាក​ការ​ផ្ដល់​អាជ្ញាប័ណ្ណ​នៃ​អាជីវកម្ម​បនល្បែង អនឡាញ គ្រប់​ប្រភេទ នៅ​ទូទាំង​ប្រទេស​ផង​ដែរ។

ពលរដ្ឋ​នៅ​សង្កាត់​សាលាកំរើក ក្រុង​សៀមរាប លោក សារឿង វីរៈ សង្កេត​ឃើញ​ថា ការ​បង្ក្រាប​ល្បែងស៊ីសង​របស់​អាជ្ញាធរ​នៅ​តាម​មូលដ្ឋាន​កន្លងមក ប្រៀប​ដូចជា​ល្បែង​បិទពួន ឬ​ឆ្មា​ចាប់​កណ្ដុរ​ដូច្នេះ​ដែរ។ លោក​បញ្ជាក់​ថា ម្ចាស់​សាជីវកម្ម​ល្បែង​ខុសច្បាប់​ទាំងនោះ តែងតែ​ដឹងខ្លួន​ជាមុន​នៅ​ពេល​ដែល​អាជ្ញាធរ​ចុះ​បង្ក្រាប ហើយ​ក្រោយ​មក ពួកគេ​នឹង​បើក​សាជីវកម្ម​ល្បែងស៊ីសង​នេះ​ម្ដង​ទៀត នៅ​ពេល​ដែល​រដ្ឋាភិបាល​លែង​ចាប់អារម្មណ៍ លើ​ការ​បង្ក្រាប​ល្បែងស៊ីសង​នេះ​តទៅ​ទៀត។

លោក សារឿង វីរៈ៖ «កន្លែង​ទាំងអស់​ហ្នឹង បើក​ដូច​អត់​មាន​អ្វី​ត្រូវ​ព្រួយបារម្ភ​ទេ ព្រោះ​អ្នក​គ្រប់គ្រង​កន្លែង​ហ្នឹង មាន​សែស្រឡាយ​ជាមួយ​នឹង​មន្ត្រីរាជការ ជាពិសេស​គឺ​កង​កម្លាំង​ប្រដាប់​អាវុធ»

បន្ទាប់ពី​ការ​ប្រកាស​របស់​ថ្នាក់ដឹកនាំ​ទាំងពីរ​លើក​មក អាជ្ញាធរ​នៅ​តាម​បណ្ដា​រាជធានី និង​ខេត្ត​មួយចំនួន បាន​ចុះ​អនុវត្ត​តាម​បទបញ្ជា​នេះ​ភ្លាមៗ ចំណែក​នៅ​តាម​បណ្ដា​ខេត្ត​មួយ​ចំនួន​ទៀត មិន​ទាន់​ចុះ​អនុវត្ត​នៅ​ឡើយ។

អ្នកនាំពាក្យ​ស្នងការ​នគរបាល​រាជធានី​ភ្នំពេញ លោក សំ វិច្ឆិកា ប្រាប់​វិទ្យុ​អាស៊ីសេរី ថា ស្នងការដ្ឋាន​នគរបាល​រាជធានី​ភ្នំពេញ បាន​សម្រេច​បង្កើត​ក្រុមការងារ​ចុះ​ត្រួតពិនិត្យ​ស្រាវជ្រាវ ដើម្បី​បង្ក្រាប​ល្បែងស៊ីសង​ខុសច្បាប់ ដោយ​ក្នុង​នោះ អាជ្ញាធរ​បាន​រក​ឃើញ​ទីតាំង​ល្បែង​ខុសច្បាប់​មួយចំនួន ខ្លះ​ប្ដូរ​ទីតាំង និង​ខ្លះទៀត​មាន​អាជ្ញាប័ណ្ណ​ហួស​សុពលភាព។

លោក សំ វិច្ឆិកា៖ «អ៊ីចឹង​ករណី ដែល​យើង​ចុះទៅ​បន្ថែម​ពីលើ​សកម្មភាព​របស់​សមត្ថកិច្ច​នៅ​តាម​មូលដ្ឋាន​ដើម្បី​រក​ថា អ្វី​ជា​ការ​ឃុបឃិត ខុសច្បាប់ យើង​នឹង​ធ្វើ​ការ​អនុវត្ត ហើយ​ប្រសិនបើជា ដែល​យើង​ស្រាវជ្រាវ​ទៅ​ឃើញ​ថា វា​ពាក់ព័ន្ធ​នឹង​សមត្ថកិច្ច ឬ​អាជ្ញាធរ​ណា យើង​នឹង​ធ្វើ​របាយការណ៍ ដើម្បី​មាន​វិធានការ​ជា​បន្តបន្ទាប់ និង​អនុវត្ត​ទៅ​តាម​អ្វី​ដែល​យើង​រក​ឃើញ​ថា ជា​កំហុស​នោះ»

វិទ្យុ​អាស៊ីសេរី មិនអាច​ទាក់ទង​លេខាធិការ​នៃ​គណៈកម្មការ​គ្រប់គ្រង​ល្បែង​ពាណិជ្ជកម្ម លោក រស់ ភីរុណ ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃទី​១៦ ខែ​កុម្ភៈ។

ក៏ប៉ុន្តែ លោក រស់ ភីរុណ ធ្លាប់​ប្រាប់​វិទ្យុ​អាស៊ីសេរី ថា សាជីវកម្ម​ល្បែង​អនឡាញ​មួយ​ចំនួន កំពុង​ជ្រក​ក្រោម​អាជ្ញាប័ណ្ណ​ក្លែងក្លាយ ក្រោម​រូបភាព​ជា​តំណាង​ចែកចាយ និង​ខ្លះទៀត​កំពុង​វិវត្ត​ទៅ​រក​ភាព​ខុស​ច្បាប់ ដោយ​ប្រែក្លាយ​ពី​ល្បែង​ផ្សង​សំណាង ទៅជា​ល្បែង​ភ្នាល់។

ទាក់ទិន​រឿង​នេះ ប្រធាន​អង្គការ​អប់រំ​យុវជន​ដើម្បី​អភិវឌ្ឍន៍ និង​សន្តិភាព លោក បូ ពៅ យល់ឃើញ​ថា ដើម្បី​អនុវត្ត​ការងារ​បង្ក្រាប​ល្បែងស៊ីសង ឱ្យ​មាន​ប្រសិទ្ធភាព រដ្ឋាភិបាល គួរ​ចាត់​វិធានការ​ទៅលើ​មេខ្លោង​រកស៊ី​បើក​បន​ល្បែង និង​ចុះ​ធ្វើ​អធិការកិច្ច ដើម្បី​រក​មន្ត្រី​ដែល​ជាប់​ពាក់ព័ន្ធ នឹង​អំពើពុករលួយ​ជាមួយ​ម្ចាស់​ទីតាំង​បន​ល្បែង យក​ទៅ​អនុវត្ត​ទោស​តាម​ច្បាប់។

លោក បូ ពៅ៖ «វា​អត់​មាន​ល្បែង​ណាមួយ​នាំ​ឱ្យ​រីកចម្រើន​ទេ យើង​មើល​ទៅ​មើល​។ មាន​ពាក្យស្លោក​ថា ល្បែង​តែង​វិនាស​។ អ៊ីចឹង​កាល​ដែល​អាជ្ញាធរ​នៅ​ពីក្រោយ ខ្ញុំ​គិតថា​ដើម្បី​ចៀសវាង​មាន​បញ្ហា​ហ្នឹង ស្ថាប័ន​ខាងលើ ឬក៏​ក្រសួង​ជំនាញ គួរ​ធ្វើការ​ស្រាវជ្រាវ​ហើយ​ចាត់វិធានការ​ទៅ»

ពលរដ្ឋ និង​សង្គម​ស៊ីវិល​ជំរុញ​ឱ្យ​អាជ្ញាធរ​បង្ក្រាប​ទីតាំង​ល្បែង​ខុសច្បាប់ ឱ្យ​ដូច​ភ្លៀងរលឹម ដើម្បី​បញ្ឈប់​អាជីវកម្ម អបាយមុខ​មួយ​នេះ បន្ត​បំផ្លាញ​សង្គម និង​ញ៉ាំញ៉ើ​ជីវភាព​ពលរដ្ឋ ដែល​ជួបប្រទះ​ការ​លំបាក​ស្រាប់​ទៅ​ហើយ​នោះ ឱ្យ​កាន់តែ​វេទនា​បន្ត​ទៅ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។