មន្ត្រីសង្គមស៊ីវិល និងក្រុមយុវជន ទាមទារឱ្យអង្គភាពប្រឆាំងអំពើពុករលួយ និងស្ថាប័នពាក់ព័ន្ធ ពន្លឿនចាត់វិធានការលើចៅក្រមពីររូប ដែលបង្ខំឱ្យមេប៉ូលិសផ្កាយ ៣ម្នាក់ គឺឧកញ៉ា ឌួង ងៀប សូកប៉ាន់អស់លុយពីខ្លួន។ ពួកគេបារម្ភថា ការពន្យារពេលមិនស៊ើបអង្កេតចាត់វិធានការលើចៅក្រមទាំងនេះ ឆ្លុះបញ្ចាំងថា ការអនុវត្តច្បាប់លម្អៀង និងមានស្តង់ដារច្រើនបែបច្រើនយ៉ាង ប៉ះពាល់កាន់តែធ្ងន់ដល់ប្រព័ន្ធច្បាប់នៅកម្ពុជា។
មន្ត្រីសង្គមស៊ីវិល និងក្រុមយុវជន នៅមិនទាន់ស្ងប់អារម្មណ៍នៅឡើយដរាបណា អង្គភាពប្រឆាំងអំពើពុករលួយ និងស្ថាប័នពាក់ព័ន្ធរបស់រដ្ឋាភិបាល នៅតែពន្យារពេលស៊ើបអង្កេត លើចៅក្រមពីររូប ដែលទទួលសំណូក ពីឧកញ៉ា ដួង ងៀប មកផ្ដន្ទាទោសតាមច្បាប់។
អតីតអ្នកជាប់ឃុំមនសិការ លោក មាន ព្រហ្មមុនី យល់ថា អង្គភាពប្រឆាំងអំពើពុករលួយ គឺជាភ្នាក់ងារឯករាជ្យមួយត្រូវអនុវត្តច្បាប់ លើចៅក្រម និងអ្នកពាក់ព័ន្ធក្នុងសំណុំរឿងនេះ ដើម្បីធានាថា ពលរដ្ឋមានសិទ្ធិស្មើគ្នាចំពោះមុខច្បាប់។ លោកបន្តថា សមត្ថកិច្ចចាប់ខ្លួនឧកញ៉ារូបនេះ ប៉ុន្តែមិនអនុវត្តច្បាប់លើចៅក្រមពីររូប ដែលទទួលសំណូក ឆ្លុះបញ្ចាំងថា ការអនុវត្តច្បាប់ គ្មានតម្លាភាព និងរើសអើង។ លោកបញ្ជាក់ថា ប្រសិនបើការទទួលសំណូកក្នុងស្ថាប័នតុលាការមិនត្រូវបានចាត់វិធានការទេ វប្បធម៌អាក្រក់នេះនឹងក្លាយជាទម្លាប់ដដែលៗ និងប៉ះពាល់ដល់ប្រព័ន្ធយុត្តិធម៌នៅកម្ពុជាមួយកម្រិតទៀត៖ «វាប៉ះពាល់ដល់សង្គមមានន័យថា មានឋានៈ មានខ្នង និងមានតួនាទី បុណ្យស័ក្ដិធំ តែងតែរួចខ្លួនរហូត។ ចំពោះអ្នកដែលមានឋានៈតូចទាបជាង ខ្សែតូចជាង។ អាហ្នឹងត្រូវបានអនុវត្តច្បាប់ ផ្ដន្ទាទោស។ អ្នកខ្លះមិនខុសផង ហើយតែងទទួលរងគ្រោះ អយុត្តិធម៌សង្គម ដោយសារការអនុវត្តច្បាប់មិនត្រឹមត្រូវមិនស្មើភាពគ្នា គ្មានតម្លាភាព»។
កាលពីថ្ងៃទី១៣ នគរបាលបានចាប់ខ្លួនលោកឧកញ៉ា ឌួង ងៀប ដែលមានតំណែងជាឧត្ដមសេនីយ៍នៃក្រសួងមហាផ្ទៃពាក់ផ្កាយ ៣ផង ដោយចោទប្រកាន់ ពី «បទឆបោក» និង «បទមិនបំពេញកាតព្វកិច្ច ចំពោះឧបករណ៍អាចជួញដូរបានករណីចេញសែកស្អុយ» ឲ្យទៅជនជាតិតៃវ៉ាន់២នាក់ ក្នុងការរកស៊ីបណ្ដាក់ទុនជាមួយគ្នា។
សមាជិកក្រុមយុវជនខ្មែរថាវរៈ និងជាអតីតអ្នកជាប់ឃុំមនសិការ គឺលោកស្រី ឈឿន ដារ៉ាវី ថ្លែងថា លោកស្រីគ្មានសង្ឃឹមថា នឹងមានយុត្តិធម៌ក្នុងសំណុំរឿងនេះទេ ព្រោះការទទួលសំណូក ស្ទើរក្លាយជាទម្លាប់ទៅហើយ ក្នុងស្ថាប័នតុលាការ។ លោកស្រីមើលឃើញថា នៅគ្រាដែលតុលាការប្រព្រឹត្តអំពើពុករលួយ អ្នករងគ្រោះពុំមែនតែពលរដ្ឋស្លូតត្រង់ទេ សូម្បីជនខូចខិលក៏រងគ្រោះដែរ៖ «តុលាការជាទីពឹងហើយ តែបើតុលាការពុករលួយ យើងទៅរំពឹងអីទៀត។ វាលក្ខណៈពាលស៊ីពាលហើយ បើខ្ញុំខ្លួនឯងឆ្លងកាត់ ភាពអយុត្តិធម៌ វាអត់មានអីខុសផង។ យើងមើលធ្វើការរបស់តុលាការ ចង់មិនចង់ យើងខុសដដែល ហើយពេលជាប់ឃុំ កាន់តែឃើញប្រព័ន្ធពុករលួយហួសនឹងថ្លែង ឆ្អែត ព្រោះអ្នកខូចក៏រងភាពអយុត្តិធម៌ បែបអ្នកខូចដែរ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីប្រធានអង្គភាពប្រឆាំងអំពើពុករលួយ លោក ឱម យិនទៀង និងអ្នកនាំពាក្យសាលាដំបូង រាជធានីភ្នំពេញ លោក អ៊ីន រិន្ទ បាននៅឡើយទេ នៅថ្ងៃទី ១៦ កុម្ភៈ ដោយទូរស័ព្ទហៅចូលច្រើនដង តែគ្មានអ្នកលើក។
រីឯអនុប្រធានអង្គភាពប្រឆាំងអំពើពុករលួយលោក ឃាង សេង បដិសេធមិនបំភ្លឺរឿងនេះទេ ដោយលោករុញឱ្យសួរអ្នកនាំពាក្យវិញ។
ការចាប់ខ្លួនឧកញ៉ារូបនេះ ធ្វើឡើង ក្រោយពី លោក ឌួង ងៀប ឈរនៅមុខក្លោងទ្វារពន្ធនាគារព្រៃស រួចបង្ហោះវីដេអូ តាមបណ្តាញសង្គមហ្វេសប៊ុក (facebook) ដោយបញ្ជាក់ថា លោកត្រៀមដើរចូលពន្ធនាគារ ក្រោយពេលចៅក្រមនៃសាលារាជធានីភ្នំពេញចំនួន២នាក់ ស្រាក់ដៃគ្នាគាបសង្កត់យកលុយពីលោកអស់ពីខ្លួន ពាក់ព័ន្ធនឹងបទចោទប្រកាន់ឆបោកលុយក្នុងសំណុំរឿងកិច្ចព្រមព្រៀមពាណិជ្ជកម្ម ក្នុងទំហំទឹកប្រាក់ ៦ លានដុល្លារ ជាមួយជនជាតិតៃវ៉ាន់។ លោក ឌួង ងៀប អះអាងថា ចៅក្រមបានធ្វើឲ្យសំណុំរឿងរបស់លោកប្រែពីសទៅជាខ្មៅ។
រីឯអ្នកនាំពាក្យពន្ធនាគារ លោក នុត សវនា ប្រាប់វិទ្យុអាស៊ីសេរីយ៉ាងខ្លីថា មកទល់ពេលនេះ ឧកញ៉ារូបនេះ កំពុងជាប់ឃុំនៅពន្ធនាគារព្រៃស ផ្អែកតាមដីកាបង្គាប់ឱ្យឃុំខ្លួនរបស់តុលាការ៖ «តុលាការចេះដីកាហើយ សមត្ថកិច្ចបញ្ជូនគាត់ទៅហើយ មានទៅយើង យកគាត់ទៅណា ?
ក្នុងវីដេអូដដែលនោះ លោក ឌួង ងៀប មិនបានបង្ហាញថា លោកត្រូវប្រគល់លុយចំនួនប៉ុន្មាន និងត្រូវប្រើវិធីណា ដើម្បីប្រគល់លុយឲ្យចៅក្រមណាខ្លះនោះទេ។ ប៉ុន្តែលោកអះអាងថា ក្រោយរងការជំរិតទារប្រាក់នេះ លោកក៏ធ្លាប់ទៅសុំជំនួយអន្តរាគមន៍ ពីលោកនាយករដ្ឋមន្ត្រី ហ៊ុន សែន និងមន្ត្រីកំពូលៗជាច្រើនទៀត ប៉ុន្តែពុំបានផលឡើយ។
ជុំវិញរឿងនេះ មន្ត្រីនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មើលឃើញថា តុលាការគួរតែចាត់វិធានការ លើឧកញ៉ារូបនេះ តាំងពីដំបូងឡើយ មិនគួរបណ្តោយឱ្យ បែកធ្លាយវីដេអូ ផ្ទុះរឿងអាស្រូវរបស់ចៅក្រម ទើបមានចំណាត់ការច្បាប់នោះទេ។
លោកបញ្ជាក់ថា មកទល់ពេលនេះ លោកមិនទាន់ឃើញស្ថាប័នជំនាញស៊ើបអង្កេត និងស្រាវជ្រាវ ទាក់ទិនករណីចៅក្រមពីររូប បានទទួលសំណូកពីឧកញ៉ារូបនេះនៅឡើយទេ៖ «អង្គភាពប្រឆាំងអំពើពុករលួយគួរតែមានចំណាត់ការស៊ើបអង្កេត ឱ្យមានភាពច្បាស់លាស់ និងតម្លាភាព ដើម្បីបញ្ជាក់ប្រាប់សាធារណជន ដែលគេតាមដានរឿងហ្នឹង កុំឱ្យមានមន្ទិល សង្ស័យថា ស្ថាប័នតុលាការពាក់ព័ន្ធអំពើពុករលួយ វាប៉ះពាល់ដល់កិត្តិយស និងសេចក្ដីថ្លៃថ្នូរ ដល់ចៅក្រមផ្សេងទៀត ដែលគេបានប្រព្រឹត្តត្រឹមត្រូវតាមច្បាប់»។
ក្រោយពីមេប៉ូលិសផ្កាយបី លោក ឌួង ងៀប បានលាតត្រដាងអំពើពុករលួយនៅស្ថាប័នតុលាការក្រុងភ្នំពេញនោះ សាលាដំបូងរាជធានីភ្នំពេញបានចេញសេចក្ដីថ្លែងការណ៍បដិសេធការចោទប្រកាន់ របស់មេប៉ូលិសរូបនេះ។ តុលាការក្រុងភ្នំពេញបកស្រាយ ក្នុងលិខិត កាលពីសប្ដាហ៍មុន (១០ កុម្ភៈ) ថា តុលាការនឹងបន្តអនុវត្តតាមនីតិវិធី មិនអនុញ្ញាតឱ្យជនត្រូវចោទ លោក ឌួង ងៀប ប្រើប្រាស់ប្រព័ន្ធបណ្ដាញសង្គមដើម្បីគេចវេះពីការទទួលខុសត្រូវរបស់ខ្លួនឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។