មន្ត្រីគណបក្សភ្លើងទៀននៅខេត្តបន្ទាយមានជ័យម្នាក់ប្តឹងក្រសួង អប់រំ យុវជន និងកីឡា ទៅតុលាការក្នុងសំណុំរឿងលុបឈ្មោះគាត់ចេញពីក្របខណ្ឌគ្រូបង្រៀនដោយអយុត្តិធម៌។ មន្ត្រីសង្គមស៊ីវិលយល់ថា ការដកហូតក្របខណ្ឌរបស់មន្រ្តីរាជការដែលគាំទ្រគណបក្សប្រឆាំងនោះថា ជាការរើសអើងផ្នែកនយោបាយ និងរំលោភសិទ្ធិសេរីភាពពលរដ្ឋដែលក្រសួងអប់រំគួរតែពិចារណាឡើងវិញ។
គ្រូបង្រៀននៅវិទ្យាល័យសិរីសោភ័ណលោក ស៊ិន វត្ថា បានប្តឹងក្រសួងអប់រំ យុវជននិងកីឡាទៅតុលាការក្រុងភ្នំពេញដើម្បីទាមទារយុត្តិធម៌ និងក្របខណ្ឌមកវិញ ពីព្រោះការសម្រេចរបស់ក្រសួងអប់រំកន្លងទៅលោភអំណាច និងច្បាប់។
ប្រធានគណៈកម្មាធិការប្រតិបត្តិនៃគណបក្សភ្លើងទៀននៅខេត្តបន្ទាយមានជ័យលោក ស៊ិន វត្ថា ប្រាប់វិទ្យុអាស៊ីសេរីនៅថ្ងៃទី១៦ ខែកក្កដា ថា មូលហេតុដែលលោកប្តឹងទៅតុលាការដោយសារតែលោកមិនសុខចិត្ត ចំពោះការសម្រេចរបស់ក្រសួងអប់រំបានលុបឈ្មោះរបស់លោកចេញពីក្របខណ្ឌគ្រូបង្រៀន ដោយមិនបានអនុវត្តត្រឹមត្រូវតាមនីតិវិធីរដ្ឋបាល។ លោក ស៊ិន វត្ថា ស្នើសុំឱ្យតុលាការចាត់ការរឿងនេះដោយយុត្តិធម៌ ហើយផ្តល់ក្របខណ្ឌដើមឱ្យលោកមកវិញ។
លោក ស៊ិន វត្ថា៖ «គេឆ្ងល់ហេតុអ្វីកើតអ៊ីចឹងចំពោះខ្ញុំដែលអ្នកលុបឈ្មោះខ្ញុំមានខួរក្បាលមានវិចារណញ្ញាណដែរឬទេ ខ្ញុំអត់មានកំហុសអ្វីនៅសាលាផងហ្នឹង ហើយមកកាត់ក្របខណ្ឌចោលមួយគឺមិនធម្មតាទេ ក្របខណ្ឌរបស់ខ្ញុំនេះតែងតាំងដោយព្រះរាជក្រឹត្យដោយខ្ញុំប្រឡងជាប់ត្រឹមត្រូវ ហើយវិជ្ជាជីវៈគ្រូរបស់ខ្ញុំមិនដែលមានបញ្ហាអ្វីទេ អ៊ីចឹងខ្ញុំបញ្ជាក់ថាបើរកកំហុសខ្ញុំមិនឃើញទេ គឺខ្ញុំសូមច្រាលចោល ហើយបើរើសអើងផ្នែកនយោបាយសូមយកច្បាប់ណាបញ្ជាក់ឱ្យច្បាស់មក»។
រដ្ឋមន្ត្រីក្រសួងអប់រំលោក ហង់ ជួនណារ៉ុន កាលពីថ្ងៃទី៨ ខែមិថុនា បានប្រកាសលុបឈ្មោះមន្ត្រីគណបក្សភ្លើងទៀន លោក ស៊ិន វត្ថា ដែលបម្រើការងារជាគ្រូបង្រៀននៅវិទ្យាល័យសិរីសោភ័ណខេត្តបន្ទាយមានជ័យ ក្រោមហេតុផលថា គ្រូបង្រៀនរូបនេះ មានកំហុសឆ្គងវិជ្ជាជីវៈជាមន្រ្តីរាជការ។ ប៉ុន្តែលិខិតរបស់លោក ហង់ ជួនណារ៉ុន មិនបានបញ្ជាក់ហេតុផលជាក់លាក់ជុំវិញកំហុសឆ្គងវិជ្ជាជីវៈដែលឈានដល់ការលុបឈ្មោះលោក ស៊ិន វត្ថា ចេញពីក្របខណ្ឌនេះទេ។
ទោះជាយ៉ាងណាក្ដី លោក ស៊ិន វត្ថា អះអាងថា លោកមិនបានប្រព្រឹត្តកំហុសដូចការចោទប្រកាន់នេះឡើយ។ លោកបកស្រាយថា ចាប់តាំងពីលោកទទួលបានក្របខណ្ឌជាគ្រូបង្រៀនមក គឺលោកបានបំពេញការងារ ដោយបង្រៀនគ្រប់ពេលវេលា មានសីលធម៌ និងមិនដែលមានបញ្ហាក្នុងរឿងព្រហ្មទណ្ឌ ឬរដ្ឋប្បវេណីនៅសាលានោះទេ។ ក្នុងពាក្យបណ្តឹងផ្ញើជូនប្រធានសាលាដំបូងរាជធានីភ្នំពេញនៅថ្ងៃទី១៤ ខែកក្កដា បញ្ជាក់ថា ទោះបីលោកជាសមាជិកគណបក្សភ្លើងទៀននៅខេត្តបន្ទាយមានជ័យក៏ដោយ ក៏លោកមិនដែលយកម៉ោង ឬកេងម៉ោងបង្រៀនទៅបម្រើឱ្យគណបក្សណាមួយឡើយ ពោលគឺលោកធ្វើសកម្មភាពនយោបាយតែថ្ងៃឈប់សម្រាកដែលស្របទៅនឹងច្បាប់ស្ដីពីគណបក្សនយោបាយតែប៉ុណ្ណោះ។
លោក ស៊ិន វត្ថា ចាត់ទុកការលុបឈ្មោះចេញក្របខណ្ឌនេះរំលោភនីតិវិធីព្រហ្មទណ្ឌរដ្ឋបាលនៅតាមស្ថាប័នឯកជន ឬស្ថាប័នរដ្ឋដែលត្រូវធ្វើតាមនីតិវិធីដោយផ្តល់សិទ្ធិនិងពេលវេលាឱ្យភាគីដឹងមូលហេតុ និងបានតតាំង រួមទាំងការពារខ្លួនជាមុន ផ្ទុយទៅវិញការសម្រេចរបស់ក្រសួងអប់រំកន្លងមកនេះលោកមិនដែលបានថ្នាក់លើកោះហៅទៅប្រជុំ ឬព្រមានម្តងណាឡើយ ហើយក្រសួងមិនដែលប្រគល់ប្រកាសទាក់ទងនឹងការលុបឈ្មោះលោកជាផ្លូវការម្តងណានោះទេ។
វិទ្យុអាស៊ីសេរីមិនអាចទាក់ទងប្រធានមន្ទីរអប់រំខេត្តបន្ទាយមានជ័យលោក ឈូ ប៉ុនរឿង និងរដ្ឋមន្ត្រីក្រសួងអប់រំយុវជន និងកីឡា លោក ហង់ ជួនណារ៉ុន ដើម្បីបកស្រាយជុំវិញរឿងនេះបានទេនៅថ្ងៃទី១៦ ខែកក្កដា។
យ៉ាងហោចណាស់មន្ត្រីគណបក្សភ្លើងទៀនចំនួន៥នាក់ ត្រូវបានរដ្ឋាភិបាលឯកបក្សលុបឈ្មោះចេញពីក្របខ័ណ្ឌរដ្ឋ។ ក្រៅពីនេះ លោក រ៉ុង ឈុន និងអតីតសកម្មជនបក្សសង្គ្រោះជាតិជាង១០នាក់ក៏ត្រូវបានរដ្ឋាភិបាលលោក ហ៊ុន សែន លុបឈ្មោះបុគ្គលិកអប់រំ និងគ្រូបង្រៀនចេញពីក្របខណ្ឌរដ្ឋដែរ កាលពីឆ្នាំ២០១៨។ ផ្ទុយទៅវិញរដ្ឋាភិបាលឯកបក្សបានផ្តល់ក្របខណ្ឌរដ្ឋឱ្យសមាជិកបក្សប្រឆាំងរូបណាដែលចុះចូលជាមួយគណបក្សប្រជាជនកម្ពុជាទៅវិញ។
ជុំវិញរឿងនេះ ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី មើលឃើញថាបច្ចុប្បន្នគ្រូបង្រៀននៅតាមខេត្តមួយចំនួនកំពុងរងការគំរាមកំហែងរឹតត្បិតសិទ្ធិសេរីភាពគួរឱ្យព្រួយបារម្ភ។ អ្នកស្រីបន្តថា រដ្ឋាភិបាលតែងតែយកលេសចោទប្រកាន់រឿងកំហុសឆ្គងវិជ្ជាជីវៈដើម្បីលុបក្របខណ្ឌចំពោះមន្រ្តីរាជការស៊ីវិលរូបណាដែលមាននិន្នាការមិនស្របនឹងរដ្ឋាភិបាល ឬរក្សាជំហរមិនចុះចូលជាមួយគណបក្សកាន់អំណាចជាដើម។ អ្នកស្រីចាត់ទុកទង្វើបែបនេះថាជាសកម្មភាពរើសអើងនយោបាយ និងរំលោភសិទ្ធិរបស់មន្ត្រីរាជការ។
អ្នកស្រី អ៊ុក ឆាយ៉ាវី យល់ថា ករណីបណ្តេញលោក ស៊ិន វត្ថា ចេញពីក្របខណ្ឌនោះបានអនុវត្តផ្ទុយនឹងច្បាប់ស្ដីពីសហលក្ខន្តិកៈមន្ត្រីរាជការស៊ីវិល។ អ្នកស្រីថាទោះបីប្រព័ន្ធតុលាការនឹងមិនផ្តល់យុត្តិធម៌ក៏ដោយ ក៏អ្នកស្រីគាំទ្រចំពោះលោក ស៊ិន វត្ថា ដែលនៅតែជំហរមុតមាំក្នុងការបង្ហាញភាពស្អាតស្អំដើម្បីទាមទារក្របខណ្ឌត្រឡប់មកវិញ។
អ្នកស្រី អ៊ុក ឆាយ៉ាវី៖ «បើសិនជាទង្វើនៃការលុបឈ្មោះជាប្រព័ន្ធបែបនេះ គឺហាក់បីដូចជាធ្វើឱ្យវិស័យអប់រំហ្នឹងវាកាន់តែធ្លាក់ចុះធ្ងន់ធ្ងរហើយ អ៊ីចឹងក្រសួងអប់រំត្រូវបោះបង់ចោលទៅការលាបពណ៌ ការបិទសិទ្ធិសេរីភាពរបស់គេនេះគឺគ្មានអ្វីប្រសើរនោះទេ ថ្ងៃនេះអ្នកអាចធ្វើបានតែថ្ងៃក្រោយអ្នកនឹងមានវិប្បដិសារី»។
លោក ស៊ិន វត្ថា រៀនចប់ថ្នាក់បរិញ្ញាបត្រធនាគារ និងហិរញ្ញវត្ថុនៅវិទ្យាស្ថានជាតិអប់រំ។ លោកបានចូលបម្រើការងារជាគ្រូបង្រៀនអស់រយៈពេល១៦ឆ្នាំ គឺគិតចាប់ពីឆ្នាំ២០០៧រហូតមក។ លោកជាគ្រូបង្រៀនមុខវិជ្ជាសីលធម៌ និងពលរដ្ឋនៅវិទ្យាល័យសិរីសោភ័ណ ខេត្តបន្ទាយមានជ័យ។ ក្រៅពីការងារមន្ត្រីរាជការ លោកបានចូលរួមសកម្មភាពនយោបាយជាមួយគណបក្សសង្គ្រោះជាតិនៅមុនពេលតុលាការកំពូលរំលាយគណបក្សនេះកាលពីឆ្នាំ២០១៧។ បច្ចុប្បន្នលោក ស៊ិន វត្ថា ឈរឈ្មោះតំណាងរាស្រ្តលេខរៀងទី៣នៃគណបក្សភ្លើងទៀននៅក្នុងបញ្ជីបោះឆ្នោត។ ក៏ប៉ុន្តែ គណបក្សភ្លើងទៀន មិនត្រូវបាន គ.ជ.ប អនុញ្ញាតឱ្យចូលរួមការបោះឆ្នោតថ្ងៃទី២៣ ខែកក្កដា នេះឡើយ។
មន្ត្រីសង្គមស៊ីវិលស្នើឱ្យក្រសួងអប់រំពិចារណាផ្តល់ក្របខណ្ឌដល់ក្រុមគ្រូបង្រៀននោះវិញ ដោយសារគាត់ជាធនធានមនុស្សដ៏សំខាន់ និងមានសក្ដានុពលក្នុងការរួមចំណែកអភិវឌ្ឍវិស័យអប់រំ និងផ្តល់ប្រយោជន៍ដល់សង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។