សម្ព័ន្ធសហជីពចលនាកម្មករ នៅថ្ងៃទី២ មេសា បើកវគ្គបណ្ដុះបណ្ដាលស្ដីពីថ្នាក់ដឹកនាំសហជីពមូលដ្ឋាន ដែលមានតំណាងសហជីពរោងចក្រប្រមាណ ៤០នាក់មកពី៣រោងចក្រ ក្នុងខេត្តព្រៃវែងចូលរួម។
វគ្គបណ្ដុះបណ្ដាលនេះ ផ្ដោតសំខាន់ទៅលើប្រធានបទចំនួន៣គឺ នីតិវិធីចងក្រង នីតិវិធីដោះស្រាយវិវាទ និងនីតិវិធីចរចា។
ប្រធានសម្ព័ន្ធសហជីពកម្មករលោក ប៉ាវ ស៊ីណា មានប្រសាសន៍ថា ការចុះទៅបណ្ដុះបណ្ដាលមន្ត្រីសហជីពថ្នាក់មូលដ្ឋាននេះគឺជាកាតព្វកិច្ចដែលត្រូវតែធ្វើ ដើម្បីពង្រឹងសមត្ថភាពសហជីពថ្នាក់មូលដ្ឋាន ក្នុងការដើរតួនាទីជាតំណាងដល់សមាជិករបស់ខ្លួន សម្រាប់ដោះស្រាយវិវាទការងារនៅក្នុងរោងចក្រ។
លោក ប៉ាវ ស៊ីណា៖ «បងប្អូនកម្មករនៅពេលដែលគាត់ ចូលជាសមាជិកសហជីព គាត់មានគុណប្រយោជន៍ច្រើនណាស់ ទី១ការពារសិទ្ធិរបស់ពួកគាត់ ទី២ លើកកម្ពស់លក្ខខណ្ឌការងារ ទី៣នៅពេលដែលពួកគាត់មានវិវាទផ្សេងៗ ជាមួយនឹងអ្នកគ្រប់គ្រងរបស់គាត់ គឺសហជីពដើរតួនាទីយ៉ាងសំខាន់នៅក្នុងការជួយដោះស្រាយជួយការពារ ទៅនឹងវិវាទការងារដែលកើតមានរបស់បងប្អូនកម្មករជាមួយអ្នកគ្រប់គ្រងរបស់ខ្លួន»។
សម្ព័ន្ធសហជីពចលនាកម្មករ អំពាវនាវដល់កម្មករទាំងអស់ ក្នុងប្រទេសកម្ពុជា ចូលរួមចងក្រងគ្នាជាមួយសហជីពឯករាជ្យដែលមាននៅក្នុងរោងចក្រ ឬសហគ្រាស ដើម្បីជួយដោះស្រាយ និងជួយការពារផលប្រយោជន៍កម្មករទាំងអស់គ្នា នៅពេលណាដែលមានវិវាទរវាងកម្មករ និងភាគីក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។