ការក្រើនរំលឹកនេះ គឺនៅគ្រាដែលអង្គភាពប្រឆាំងអំពើពុករលួយ និងក្រសួងប្រៃសណីយ៍ និងទូរគមនាគមន៍ បានបើកកិច្ចប្រជុំមួយស្ដីពីការផ្សព្វផ្សាយច្បាប់ពីការប្រឆាំងអំពើពុករលួយ។
អង្គភាពប្រឆាំងអំពើពុករលួយបានក្រើនរំលឹកដល់មន្ត្រីនៅក្នុងស្ថាប័នរដ្ឋជាបន្តបន្ទាប់ កុំឲ្យប្រព្រឹត្តអំពើពុករលួយ ក្នុងនោះមានក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុ និងស្ថាប័នរដ្ឋជាច្រើនផ្សេងទៀត។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង លោកបានលើកឡើងនូវស្នាដៃនៃការបង្ក្រាបជនសង្ស័យប្រព្រឹត្តអំពើពុករលួយមួយចំនួន ក្នុងយុទ្ធនាការបោសសម្អាតអំពើពុករលួយកន្លងមក ដូចជាព្រះរាជអាជ្ញាសាលាដំបូងខេត្តពោធិ៍សាត់ លោក តុប ច័ន្ទសិរីវុឌ្ឍន៍ និងប្រធានមន្ទីរប្រឆាំងគ្រឿងញៀន លោកឧត្តមសេនីយ៍ឯក ម៉ឹក ដារ៉ា ជាដើម។
កាលពីសប្ដាហ៍កន្លងទៅនេះ បុគ្គលិកក្រសួងប្រៃសណីយ៍ និងទូរគមនាគមន៍ជាច្រើននាក់ បានធ្វើបាតុកម្មទាមទារឲ្យដកតំណែងអគ្គនាយកប្រៃសណីយ៍ និងទូរគមនាគមន៍ លោក ឡៅ សារឿន ក្រោមបទសង្ស័យមានជាប់ពាក់ព័ន្ធនឹងអំពើពុករលួយ។
លោក ឱម យ៉ិនទៀង និងជាទេសរដ្ឋមន្ត្រី បានមានប្រសាសន៍ទៅកាន់បុគ្គលិកនៃក្រសួងប្រៃសណីយ៍ និងទូរគមនាគមន៍ចំនួនជិត ៣០០នាក់ថា អ្នកតវ៉ាទាំងនោះគប្បីស្វែងរកដំណោះស្រាយផ្សេងៗ ប្រសើរជាងធ្វើបាតុកម្មប្រឆាំងអំពើពុករលួយលើសំណុំរឿងនេះ៖ «យើងមានសិទ្ធិជួបគ្នា និយាយគ្នា ប្ដឹងមក ប្ដឹងអីបានអត់មាននរណាមកធ្វើអីទេ មកជាសម្ងាត់ក៏បាន មកជាចំហក៏បាន។ តែយើងខ្ញុំអនុវត្តច្បាប់ការពារប្រភព ការពារអ្នកប្ដឹងតាមផ្លូវច្បាប់ អត់ឲ្យអ្នកណាធ្វើបាបទេ។ បើមានគេទៅធ្វើបាប យើងខ្ញុំដាក់អង្គរក្ស ដាក់នគរបាលយាមផ្ទះឲ្យទៀត ព្រោះបាតុកម្មវាអាចខូចខាតផលប្រយោជន៍បងប្អូន បើណាមានច្រកដោះស្រាយល្អជាងបាតុកម្មហើយ គួរតែបាតុកម្មបងប្អូនខាងបង់ការងារ»។
ជាមួយគ្នានេះ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក សូ ឃុន បានមានប្រសាសន៍ថា ការប្រឆាំងអំពើពុករលួយនៅពេលនេះ គឺជាផ្នែកមួយនៃផែនការយុទ្ធសាស្ត្រអភិបាលកិច្ចល្អ និងការកែទម្រង់ស៊ីជម្រៅនៅកម្ពុជា។
ប្រធានអង្គការសម្ព័ន្ធភាពកម្ពុជា ដើម្បីតម្លាភាពចំណូលធនធាននៅកម្ពុជា លោក ឆាយ សារ៉ាត់ បានមានប្រសាសន៍ថា ការអប់រំឲ្យយល់អំពីច្បាប់ប្រឆាំងអំពើពុករលួយ គឺជាការល្អប្រសើរ ប៉ុន្តែការដាក់ទោសជនសង្ស័យ គឺធ្វើឲ្យរាងចាលក៏ល្អប្រសើរណាស់ដែរ៖ «កាលពីខែមុន គាត់បានធ្វើការស៊ើបអង្កេតនៅក្នុងក្រសួងហិរញ្ញវត្ថុ ប៉ុន្តែកន្លែងនេះ ការស៊ើបអង្កេតនេះ មិនទាន់បានឃើញផ្លែផ្កានៅឡើយ។ ការដែលស៊ើបអង្កេតហើយមិនទាន់ឃើញមានដាក់ទោសទណ្ឌមន្ត្រីណាមួយ ក៏មិនមែនជាការកាត់បន្ថយអំពើពុករលួយកើតដែរ ព្រោះថាមន្ត្រីរាជការទាំងអស់ បើសិនគ្មានការដាក់ទោសទណ្ឌទេ គាត់នៅតែហ៊ានប្រព្រឹត្តអំពើពុករលួយអីចឹង ព្រោះគាត់អត់ខ្លាច»។
ប្រទេសកម្ពុជា មានច្បាប់ប្រឆាំងអំពើពុករលួយលើកដំបូង ចាប់តាំងពីសភាជាតិបានអនុម័តសេចក្តីព្រាងច្បាប់នេះ កាលពីថ្ងៃទី១៧ ខែមេសា ឆ្នាំ២០១០ កន្លងមក។ ក្រោយមក អង្គភាពប្រឆាំងអំពើពុករលួយ និងក្រុមប្រឹក្សាជាតិប្រឆាំងអំពើពុករលួយ ត្រូវបានបង្កើតក្រោយពីច្បាប់នេះចូលជាធរមាន។
ទាក់ទងនឹងស្ថានការណ៍អំពើពុករលួយនៅកម្ពុជា អង្គការតម្លាភាពអន្តរជាតិ (Transparency International) បានចេញផ្សាយរបាយការណ៍ឆ្នាំ២០១២ កាលពីខែធ្នូ ឆ្នាំ២០១២ កន្លងទៅនេះ បានឲ្យដឹងថា អំពើពុករលួយនៅកម្ពុជា ស្ថិតក្នុងស្ថានភាពធ្ងន់ធ្ងរនៅឡើយ។
អង្គការនេះបានដាក់ឈ្មោះកម្ពុជា ក្នុងលំដាប់លេខ១៥៧ នៅក្នុងចំណោមប្រទេសចំនួន១៧៥ ប្រៀបធៀបឆ្នាំ២០១១ កន្លងទៅនេះ អង្គការតម្លាភាពអន្តរជាតិ បានដាក់ឈ្មោះកម្ពុជា ក្នុងលំដាប់លេខ១៦៤ នៅក្នុងចំណោមប្រទេស១៨៣។
កាលពីឆ្នាំ២០០៤ កន្លងទៅ អង្គការយូអេសអេអាយឌី (USAID) របស់សហរដ្ឋអាមេរិក បានចេញផ្សាយរបាយការណ៍សិក្សាលំអិតមួយ បានឲ្យដឹងថា កម្ពុជា បាត់បង់ថវិកាជាតិសរុបរវាង ៣០០លានដុល្លារអាមេរិក ទៅ ៤០០លានដុល្លារអាមេរិក ក្នុងមួយឆ្នាំៗ ដោយសារអំពើពុករលួយ អំពើស៊ីសំណូក និងអំពើគេចពន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។