យុវជន​ស្នើ​ឱ្យ​បញ្ឈប់​ការរើសអើង​សហគមន៍​ចាម ដោយសារ​រឿង​ជំងឺ​កូវីដ​-១៩

ដោយ អាស៊ីសេរី
2020-03-22
អ៊ីម៉ែល
មតិ
Share
បោះពុម្ព
វិហារ​ឥស្លាម​ថ្មី​នៅ​តំបន់​បឹងកក់ ដែល​ត្រូវ​បាន​សម្ពោធ​ឲ្យ​ប្រើប្រាស់​ជា​ផ្លូវការ​នៅ​ថ្ងៃ​ទី​២៧ មីនា ២០១៥។
វិហារ​ឥស្លាម​ថ្មី​នៅ​តំបន់​បឹងកក់ ដែល​ត្រូវ​បាន​សម្ពោធ​ឲ្យ​ប្រើប្រាស់​ជា​ផ្លូវការ​នៅ​ថ្ងៃ​ទី​២៧ មីនា ២០១៥។
RFA/Tin Zakariya

យុវជន​អ្នក​កាន់សាសនា​ឥស្លាម​អំពាវនាវ​ដល់​សាធារណជន កុំ​ឱ្យ​រើសអើង​សហគមន៍​ជនជាតិ​ចាម ដែល​ជា​ពលរដ្ឋ​ខ្មែរ​ដូចគ្នា ព្រោះតែ​រឿង​ជំងឺ​រលាក​ផ្លូវ​ដង្ហើម​ថ្មី កូវីដ-១៩​។ ពួកគេ​ថា ស្ថានភាព​ពេលនេះ គ្រប់​សហគមន៍​ជនជាតិ​ដែល​ជា​ប្រជាជន​កម្ពុជា ត្រូវ​រួមគ្នា​ទប់ស្កាត់​ការ​រីក​រាលដាល​ជំងឺ​កូវីដ​-១៩ មិនមែន​រើសអើង ឬ​ស្អប់ខ្ពើម​គ្នា ធ្វើ​ឱ្យ​សង្គមជាតិ​បែកបាក់​គ្នា​នោះ​ឡើយ។

យុវជន​កម្ពុជា​ដែល​ជា​ជនជាតិ​ចាម​អះអាង​ថា បច្ចុប្បន្ន​នេះ​មាន​មនុស្ស​មួយ​ចំនួន​បាន​ចាប់ផ្តើម​បញ្ចេញ​កាយវិការ និង​ពាក្យ​សម្តី​បែប​រើសអើង​លើ​សហគមន៍​ចាម ពីព្រោះ​តែ​មាន​ករណី​ជនជាតិ​ចាម​ជាង ២០​នាក់ បាន​ឆ្លង​ជំងឺ​កូវីដ​-១៩ ក្រោយពេល​ពួកគាត់​បាន​វិលត្រឡប់​មកពី​ចូលរួម​ពិធី​សាសនា​នៅ​ប្រទេស​ម៉ាឡេស៊ី​វិញ។

យុវជន​ខ្មែរឥស្លាម​មួយ​រូប​រស់នៅ​សង្កាត់​ច្រាំងចំរេះ រាជធានី​ភ្នំពេញ លោក ម៉ាត់ អារីហ្វីន ប្រាប់​អាស៊ីសេរី​ថា នៅ​ក្នុង​សហគមន៍​របស់​លោក មាន​ពលរដ្ឋ​២ នាក់ បាន​កើត​ជំងឺ​កូវីដ-១៩​។ លោក​ថា រឿង​នេះ​បាន​បង្ក​ឱ្យ​មាន​ការរើសអើង​ពី​សំណាក់​អ្នក​មិនមែន​ជនជាតិ​ចាម តែ​ក៏​មាន​អ្នក​កាន់សាសនា​ឥស្លាម​ខ្លះ ហាក់​មានការ​រើសអើង​គ្នា​ដែរ​។ លោក​បញ្ជាក់​ថា ការរើសអើង​នោះ កើតមាន​ក្នុង​រូបភាព​នៃ​ការ​​មិន​ទិញ​ទំនិញ​ពី​អ្នកលក់​ដែល​ជា​ជនជាតិ​ចាម ឬក៏​ការ​មិន​ចង់​លក់ទំនិញ​ឱ្យ​ជនជាតិ​ចាម​ជាដើម។
លោក​ឱ្យ​ដឹង​ថា ករណី​ម្តាយ​របស់​លោក​ផ្ទាល់​ដែល​ជា​អាជីវករ​លក់​សាច់​មាន់ គឺ​មាន​អាជីវករ​នៅ​តូប​ជិត​គ្នា​ខ្លះ បាន​និយាយ​បញ្ឆិតបញ្ឆៀង​ក្នុង​ន័យ​ទម្លាក់កំហុស​ថា ជនជាតិ​ចាម​ជា​អ្នក​នាំ​ជំងឺ​កូវីដ​-១៩ ចូល​ស្រុក​ខ្មែរ ហើយ​មាន​អតិថិជន​មួយ​ចំនួន​ក៏​ចាប់ផ្ដើម​លែង​ទិញ​ទំនិញ​របស់​ពួកគាត់​ផង​ដែរ៖ «នេះ​វា​មិនមែន​ផ្ដោត​សំខាន់​ទៅលើ​បុគ្គល​ទេ វា​សំខាន់​ជា​រួម​ដែល​គាត់​ជា​សាសនិក​ឥស្លាម អ៊ីចឹង​ចង់ ឬ​មិន​ចង់ អ្នកទិញ គាត់​ផ្តោត​ទៅ​លើ​ថា តើ​អ្នកណា​ដែល​គាត់​មិនមែន​ជា​អ្នក​កាន់សាសនា​ឥស្លាម​។ បច្ចុប្បន្ន ភាគរយ​តិច​ដែរ​ទេ ដែល​ថា វា​មានការ​រើសអើង​បែប​ហ្នឹង ហើយ​វា​មានការ​ប៉ះពាល់​ទៅដល់​ការលក់ដូរ​របស់​ម្ដាយ​ខ្ញុំ​ផ្ទាល់​។ តែ​យើង​អត់​ដឹង​ថា ទៅ​មុខ​ទៀត​យ៉ាងម៉េច​ទេ ព្រោះ​ដោយសារ​ឥលូវ​កំណើន​នៃ​ការ​ឆ្លង​ហ្នឹង​វា​ច្រើន​ដែរ ហើយ​ភាគច្រើន​កើត​ចេញពី​ខាង​នេះ​អ៊ីចឹង​ទេ»
យុវជន ម៉ាត់ អារីហ្វីន ជឿ​ថា គ្មាន​អ្នកណាម្នាក់​ចង់​កើត​ជំងឺ​កូវីដ​១៩ ហើយ​យក​មក​ចម្លង​ដល់​គ្រួសារ និង​សហគមន៍​របស់​ខ្លួន​នោះ​ទេ​។ លោក​ថា ការរើសអើង​សហគមន៍​ជនជាតិ​ចាម​ដោយ​គ្រាន់តែ​ពួកគាត់​មួយ​ចំនួន​តូច​បាន​ឆ្លង​ជំងឺ​នេះ គឺជា​រឿង​មិន​ត្រឹមត្រូវ​ឡើយ​។ យុវជន​រូប​នេះ​បន្ថែម​ថា ស្ថានភាព​ពេលនេះ គឺ​គ្រប់​សហគមន៍​ជនជាតិ​ទាំងអស់​ដែល​ជា​ពលរដ្ឋ​ខ្មែរ ត្រូវតែ​រួមគ្នា​ប្រយុទ្ធ​ប្រឆាំង​នឹង​ជំងឺ​កូវីដ​-១៩ និង​ថែរក្សា​សុខភាព​រៀងៗ​ខ្លួន៖ «សំដៅ​ទាំងអស់ ទាំង​អ្នក​ដែល​កាន់សាសនា​ឥស្លាម អ្នក​ដែល​គាត់​សាសនាព្រះពុទ្ធ ឬក៏​អ្នក​កាន់សាសនា​ផ្សេង​ក៏ដោយ ចង់​ឱ្យ​ទាំងអស់​គ្នា​មានចិត្ត​ថា រឿង​ហ្នឹង​ពិតជា​កើតឡើង​មែន តែ​កុំ​ព្យាយាម​ដាក់​បន្ទុក​ទៅលើ​ខាង​ណាមួយ ហើយ​ព្យាយាម​ធ្វើ​យ៉ាងម៉េច​រក​វិធីសាស្ត្រ​ទាំងអស់​គ្នា ដើម្បី​ប្រយុទ្ធ​ប្រឆាំង​ទៅលើ​រឿង​ហ្នឹង ហើយ​ធ្វើ​ម៉េច​ឱ្យ​ជំងឺ​ហ្នឹង​ចាប់ផ្ដើម​ថយ​ចុះ​ទៅវិញ»
យុវជន​ចាម​មួយ​រូប​ទៀត គឺ​លោក ហ៊ីម អ៊ឹមរ៉ន ដែល​មក​ពី​ឃុំ​ក្បាល​ត្រាច ស្រុក​ក្រគរ ខេត្ត​ពោធិ៍សាត់ ឱ្យ​ដឹង​ថា នៅ​ក្នុង​សហគមន៍​របស់​លោក​មិន​ទាន់​មាន​ករណី​អ្នក​កើត​ជំងឺ​កូវីដ-១៩ នោះ​ទេ ក៏ប៉ុន្តែ​លោក​បញ្ជាក់​ថា ការ​រើសអើង​ជនជាតិ​ចាម​បាន​កើតមាន​ជា​បណ្ដើរៗ​ហើយ​នៅ​ក្នុង​តំបន់​របស់​លោក​។ លោក​ថា រូបភាព​នៃ​ការរើសអើង មាន​ដូចជា ការ​មិន​ទិញ​ទំនិញ ឬ​មិន​ចង់​លក់​របស់​ឱ្យ​ជនជាតិ​ចាម និង​ការ​តិះដៀល​ជនជាតិ​ចាម​ថា​ជា​ប្រភព​នៃ​ជំងឺ​កូវីដ​-១៩ នៅ​ស្រុក​ខ្មែរ ជាដើម​។ លោក​បន្ត​ថា ការរើសអើង​បង្ក​ឱ្យ​មាន​អំពើ​ហិង្សា​នៅ​ក្នុង​សហគមន៍ មិនទាន់​កើតមាន​នៅឡើយ​ទេ ក៏ប៉ុន្តែ​លោក​បារម្ភ​ថា ករណី​នេះ​នឹង​អាច​កើត​មាននៅ​ថ្ងៃមុខ ប្រសិនបើ​និន្នាការ​រើសអើង​ជនជាតិ​ចាម​រីក​រាលដាល​កាន់តែ​ខ្លាំង​នោះ។

យុវជន​ចាម​រូប​នេះ​កត់សម្គាល់​ថា ការរើសអើង​លើ​សហគមន៍​ចាម​នេះ ក៏​ផ្តើម​ចេញ​ជាពិសេស តាមរយៈ​ការ​ផ្សព្វផ្សាយ​និង​ចែករំលែក​ព័ត៌មាន​មិន​ពិត​នៅ​លើ​បណ្ដាញ​សង្គម​ហ្វេសប៊ុក​ផង​ដែរ​។ លោក​ស្នើ​ឱ្យ​អាជ្ញាធរ​មាន​ចំណាត់ការ​ផ្លូវច្បាប់​លើ​គណនី​ហ្វេសប៊ុក​ណា ដែល​ប្រឌិត​ព័ត៌មាន​បង្ក​ឱ្យ​មាន​ការ​រើសអើង​លើ​ពលរដ្ឋ​ជនជាតិ​ចាម៖ «ដោយសារ​បងប្អូន​យើង គាត់​ទទួល​បានតែ​របស់​ដែល​មិន​ពិត​អ៊ីចឹង​ទៅ វា​ធ្វើ​ឱ្យ​ពួកគាត់​ភ័យខ្លាច​កាន់តែ​ខ្លាំង ក៏ប៉ុន្តែ​ការភ័យខ្លាច​របស់​គាត់​ហ្នឹង វា​អត់​បាន​បំ​លែង​ទៅជា​ការ​ការពារ​ខ្លួន​ទេ​។ ពួកគាត់​បែរជា​នាំគ្នា​ភ័យខ្លាច ហើយ​និង​រើសអើង​។ អ៊ីចឹង​ហើយ​ខ្ញុំ​ក៏​សូម​សំណូមពរ​ដែរ​ថា សូម​ឱ្យ​ពួកគាត់​ព្យាយាម​យល់​គ្នា​ឱ្យ​បាន​ច្រើន ហើយ​អត់ធ្មត់​នៅ​ក្នុង​កាលៈទេសៈ​នេះ ចូលរួម​ទាំងអស់​គ្នា ដើម្បី​ប្រយុទ្ធ​ប្រឆាំង​នឹង​ជំងឺ​កូវីដ-១៩ ហើយ​រឿង​មួយទៀត បងប្អូន​ចាម ឬ​ខ្មែរឥស្លាម គឺ​គាត់​ស្រឡាញ់​ប្រទេស​នេះ ដូចជា​ប្រទេស​ផ្ទាល់​របស់​គាត់​អ៊ីចឹង»

ដោយឡែក យុវជន​ចាម​មួយ​រូប​ទៀត​មកពី​ឃុំ​ស្វាយ​ឃ្លាំង ស្រុក​ក្រូចឆ្មារ ខេត្ត​ត្បូងឃ្មុំ លោក ហ្វឺត ប៉ាត់ទ្រី ប្រាប់​អាស៊ីសេរី​ថា កាលពី​ប៉ុន្មាន​ថ្ងៃ​មុន​នេះ លោក​បាន​ជួប​ករណី​រើសអើង​ដោយ​ផ្ទាល់ គឺ​នៅ​ពេល​លោក និង​ប្អូនស្រី ចូល​ទទួលទាន​អាហារ​នៅ​ហាង​បាយ​មួយ​កន្លែង​នៅ​ខេត្ត​កំពង់ចាម មាន​អ្នកខ្លះ​បាន​សំឡឹង​មើល​ពួក​លោក​លើ​ក្រោម ហើយ​ពួកគេ​មិន​ហ៊ាន​ចូល​ទទួលទាន​អាហារ​នោះ​ទេ​។ លោក​ថា នៅ​ពេល​លោក និង​ប្អូនស្រី ចេញពី​កន្លែង​នោះ ទើប​មនុស្ស​ទាំងនោះ​ចូល​ទទួលទាន​អាហារ​នៅ​ក្នុង​ហាង​។ លោក​ឱ្យ​ដឹង​ទៀត​ថា នៅ​កន្លែង​ខ្លះ​ទៀត អាជីវករ​ខ្លះ​បាន​ប្រាប់​ទៅ​ពលរដ្ឋ​ជនជាតិ​ចាម​ថា កុំ​ឱ្យ​ចូល​ជិត​ពួកគេ ឬក៏​ត្រូវ​បែរមុខ​ចេញ​នៅ​ពេល​និយាយ​ទៅកាន់​ពួកគេ​ទៀត​ផង។

យុវជន ហ្វឺត ប៉ាត់ទ្រី យល់ថា នេះ​ជា​ទង្វើ​មិន​គួរ​គប្បី​ឡើយ ព្រោះថា មិនមែន​គ្រប់​សហគមន៍​ចាម​សុទ្ធតែ​បាន​ទៅ​ប្រទេស​ម៉ាឡេស៊ី ឬក៏​មាន​ផ្ទុក​ជំងឺ​កូវីដ​-១៩ នោះ​ទេ​។ លោក​ថា ជនជាតិ​ចាម ក៏ដូចជា​ជនជាតិ​ខ្មែរ​ដែរ គឺ​សុទ្ធសឹងតែ​ជា​ពលរដ្ឋ​កម្ពុជា​ដូចគ្នា ហើយ​បាន​រស់នៅ​ដោយ​សុខសាន្ត​ជាមួយគ្នា​យូរ​មក​ហើយ ដូច្នេះ​មិន​គួរ​មាន​ករណី​រើសអើង​គ្នា ដោយសារតែ​រឿង​ជំងឺ​កូវីដ-១៩ នេះ​ឡើយ៖ «ការរើសអើង​នេះ គឺ​វា​អត់​សម​ទាល់តែសោះ វា​មិន​គួរ​ឱ្យ​កើតមានឡើង​សម្រាប់​បងប្អូន​ខ្មែរ និង​ខ្មែរឥស្លាម​អ៊ីចឹង​ទេ ព្រោះ​យើង​រស់នៅ​សុខដុមរមនា​សាសនា​ជាមួយគ្នា​យូរ​មក​ហើយ ហើយ​ពួកគាត់​ទៅ​បុណ្យ​សាសនា​នៅ​ម៉ាឡេស៊ី ក៏​មិនមែន​ពួកគាត់​ចង់​ទៅ​យក​(​ជំងឺ​)​មក​ដែរ​។ ណាមួយ ពេល​ពួកគាត់​ចេញទៅ​ម៉ាឡេស៊ី ខាង​រដ្ឋាភិបាល​អត់​ទាន់​មាន​ប្រកាស​រឿង​ឱ្យ​បញ្ឈប់​ឱ្យ​អ្វី​ទេ ទាល់តែ​ពួកគាត់​ចេញទៅ​រួចហើយ​បាន​មាន​ប្រកាស​ឱ្យ​បិទ​កម្មវិធី​នៅ​ខ្មែរ​។ អ៊ីចឹង​ខ្ញុំ​សំណូមពរ​ឱ្យ​បងប្អូន​ឈប់​រើសអើង​គ្នា​ទៀត»
និន្នាការ​រើសអើង និង​វាយប្រហារ​លើ​ជនជាតិ​ចាម​ដែល​គោរព​សាសនា​ឥស្លាម​នោះ បាន​ផ្ទុះឡើង​នៅ​ពេល​ថ្មីៗ នេះ ដោយសារតែ​ជនជាតិ​ចាម​ជាច្រើន​នាក់​ត្រូ​បាន​ពិនិត្យ​ឃើញ​ថា មាន​ផ្ទុក​ជំងឺ​កូវីដ​-១៩ ក្រោយ​ពេល​ពួកគាត់​បាន​ទៅ​ចូលរួម​ពិធី​សាសនា​នៅ​ប្រទេស​ម៉ាឡេស៊ី។
នៅ​ចំពោះ​មុខ​ការ​កើនឡើង​អ្នក​ផ្ទុក​កូ​វីដ​-១៩ ជា​បន្តបន្ទាប់​នេះ រដ្ឋាភិបាល​កម្ពុជា​បានសម្រេច​បិទ​សាលា​រដ្ឋ និង​ឯកជន​ទូទាំង​ប្រទេស បិទ​ទីតាំង​ខារ៉ាអូខេ និង​រោងភាពយន្ត ព្រមទាំង​ផ្អាក​ការ​ផ្ដល់​ទិដ្ឋាការ​ដល់​ពលរដ្ឋ ៥​ប្រទេស​ក្នុង​តំបន់​អឺរ៉ុប និង​សហរដ្ឋអាមេរិក​ជាដើម​។ រដ្ឋាភិបាល​ក៏បាន​ផ្អាក​ការ​ជួបជុំ​ទាំងឡាយ​តាម​បែប​សាសនា ចាប់ពី​ថ្ងៃ​ទី​១៧ មីនា​តទៅ រហូតដល់​ស្ថានការណ៍​មាន​ភាព​ធូរស្រាល​ឡើងវិញ​។ ជាង​នេះ​ទៅ​ទៀត រដ្ឋាភិបាល​បានសម្រេច​បិទ​ព្រំដែន​ជាមួយ​ប្រទេស​វៀតណាម រហូត​ដល់​វៀតណាម​ដក​បម្រាម​លើ​ការ​ធ្វើ​ដំណើរ និង​បើក​ព្រំដែន​ជាមួយ​កម្ពុជា​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Deadly monster virus isn't dicriminating to whom or what are we?no matter u were king,queen,pm,president,pple or whatever...but in this difficult time...there we all must be united and stand together with no matter what the consequences is....love your neighbors as like your family with spread the word of love and spread the word of peace to other and make this world is better place know how to live altogether...

Deadly world virus diseases can occur in every 20,50s to 100 years and killed millions lives of pple around the world.This deadly virus disease isn't discriminated to who or what are we?no matter who were pm,president,king,queen,nationalities,religions,ethnic,rich or poor,strong or weak,or whatever,and we the human being have to face it .This deadly monster virus happened for centuries ago,is not just only happening as today.There are many names of deadly virus diseases in the past such as flu virus,influenza,H1N1,HIV/Aids,TB,SARS,MERS,Small pox,Bubonic plague,seasonal flu,Malaria,Cholera,Ebola,Cancer,coronavirus,or covid-19,and etc.See Spanish's flu virus a pandemic in 1918s,which killed 50 millions pple+500 million pple-about one-third of the world's population,influenza virus,killed 10,000 Americans,H1N1 virus killed 151,700 to 575,400 pple,100 years influenza virus,killed more than 50 million pple worldwide,2002 SARS virus had killed 774 pple,MERS virus in 2012,killed 252 pple,SmallPox virus in 20th century killed 300 to 500 million pple worldwide,Bobonic plague,killed 1350 in Europe,Spanish flu spread through out the world at the end WWI in 1918 by N1H1 fluenza virus killed 50 million pple,Seasonal flue virus,claimed with 500,000 lives worldwide,Tuberculosis in 2010 killed about1.5 million pple,Malaria virus killed one million pple worldwide,Cholera killed 100,000 pple every year,HIV/Aids"Human odifluency virus'has killed 25 million pple worldwide,first dicovered 1981s,Ebola,it has not killed too much pple,Cancer disease virus killed 7.6 million pple worldwide,and deadly coronavirus,or covid-19 killed more than 10,000 pple worldwide right now and infecting more than 300,000 pple across the globe"there endless".

Mar 22, 2020 12:41 PM

គេហទំព័រ​ទាំងមូល