មន្ត្រីសង្គមស៊ីវិលរិះគន់រដ្ឋាភិបាលកម្ពុជាថា មុនរដូវបោះឆ្នោតម្ដងៗ រដ្ឋាភិបាលកម្ពុជាដែលដឹកនាំដោយ លោក ហ៊ុន សែន បង្កើនការតែងតាំងទីប្រឹក្សា និងជំនួយការរបស់នាយករដ្ឋមន្ត្រី រដ្ឋមន្ត្រី តាមក្រសួង ស្ថាប័នហួសពីតម្រូវការ។ មន្ត្រីសង្គមស៊ីវិលថា ការតែងតាំងលើសពីតម្រូវការ គឺកំពុងតែយកលុយបង់ពន្ធពីពលរដ្ឋដែលខិតខំធ្វើការទាំងលំបាកទៅផ្ដល់ប្រាក់ខែដល់ ទីប្រឹក្សា និងជំនួយការ ដែលពុំបានបម្រើពលរដ្ឋឱ្យមានប្រសិទ្ធភាព។
មន្ត្រីសង្គមស៊ីវិលលើកឡើងថា រដ្ឋាភិបាលបង្កើនការចំណាយថវិការដ្ឋខ្ជះខ្ជាយលើការតែងតាំងទីប្រឹក្សា និងជំនួយការ ខណៈដែលទីប្រឹក្សា និងជំនួយការមួយចំនួនពុំបានបង្ហាញសមិទ្ធផលការងារជាក់លាក់ណាមួយបម្រើពលរដ្ឋនោះទេ។
ការលើកឡើងរបស់មន្ត្រីសង្គមស៊ីវិលនេះ ក្រោយការតែងតាំងជំនួយការ និងទីប្រឹក្សាកាន់តែកើនឡើងសឹងរៀងរាល់ថ្ងៃ ជាក់ស្ដែងនៅថ្ងៃទី២៧ និង២៨ ខែមិថុនា កន្លងទៅនេះ រដ្ឋាភិបាលបានតែងតាំងទីប្រឹក្សារាជរដ្ឋាភិបាលចំនួន ២១រូប ដែលមានឋានស្មើរដ្ឋលេខាធិការ និងអនុរដ្ឋលេខាធិការ និងទីប្រឹក្សាក្រសួងព័ត៌មានមានឋានៈស្មើអគ្គនាយកចំនួន ៦រូប។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី លើកឡើងថា រដ្ឋាភិបាលកម្ពុជាកំពុងតែបង្កើនការចំណាយខុសគោលដៅលើការតែងតាំង ជំនួយការ និងទីប្រឹក្សា ច្រើនលើសលប់ ហើយប្រសិទ្ធភាពការងាររបស់ជំនួយការ និងទីប្រឹក្សា មិនសមនឹងតួនាទីជាមន្ត្រីដឹកនាំក្បាលម៉ាស៊ីនរបស់រដ្ឋនោះទេ។
លោក ប៉ិច ពិសី៖ «ពិនិត្យមើលតម្រូវការ ខ្ញុំគិតថាមិនទាន់មានតម្រូវការដែល ត្រូវរើសមន្ត្រីក្នុងចំនួនដែលច្រើននោះទេ មួយវិញទៀតទោះបីជាមានការបង្កើនចំនួនមន្ត្រីសាធារណៈច្រើន ប៉ុន្តែសេវាសាធារណៈនៅមានភាពយឺតយ៉ាវ នៅមានភាពមិនប្រក្រតី ហើយមិនទាន់ឆ្លើយតបតាមតម្រូវការជាក់ស្ដែងដែលពលរដ្ឋចង់បានពីការផ្ដល់សេវាសាធារណៈទេ ហើយប្រសិទ្ធភាព និងលទ្ធផលនៃការផ្ដល់សេវាសាធារណៈនៅខ្សោយនៅឡើយ»។
លោក ប៉ិច ពិសី លើកឡើងថា នៅពេលដែលរដ្ឋាភិបាលបង្កើនការចំណាយលើការតែងតាំង ជំនួយការ និងទីប្រឹក្សា ដូច្នេះរដ្ឋាភិបាលមិនមានថវិកាគ្រប់គ្រាន់ចំណាយលើវិស័យសាធារណៈដូចជាសាលារៀន មន្ទីរពេទ្យ និងផ្លូវថ្នល់ ដែលជាតម្រូវការពិតប្រាកដដល់ប្រជាជន។
ចំណែកប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនៅកម្ពុជា លោក យង់ គិមអេង សង្កេតឃើញថា រដ្ឋាភិបាលតែងតែបង្កើនការតែងតាំងមន្ត្រីរាជការជាពិសេស ជំនួយការ និងទីប្រឹក្សា នៅមុនការបោះឆ្នោត។ លោក យង់ គិមអេង បន្តថា នៅពេលដែលរដ្ឋាភិបាលតែងតាំងជំនួយការ និងទីប្រឹក្សាហួសតម្រូវការ ហើយរដ្ឋកំពុងតែយកលុយពន្ធរបស់ពលរដ្ឋទាំងដែលពួកគាត់រកបានទាំងលំបាកឱ្យប្រាក់ខែទៅ ជំនួយការ និងទីប្រឹក្សាមួយចំនួនដែលអសមត្ថភាព។
លោក យង់ គិមអេង៖ «បញ្ហានឹងគឺជាសេចក្ដីព្រួយបារម្ភ ព្រោះអីតែការតែងតាំងមានតួនាទី មានប្រាក់ខែ មានប្រាក់ខែប៉ះពាល់ដល់ថវិការបស់ជាតិ ហើយថវិកាជាតិគឺជាថវិការបស់ប្រជាពលរដ្ឋ ហើយកាលណាការតែងតាំងណាមួយដែលមិនចាំបាច់ខ្ញុំគិតថា មិនគួរឱ្យមានការតែងតាំងទេ ព្រោះធ្វើនឹងខាតបង់ថវិកា ប្រសិនបើទុកថវិកាទាំងអស់ហ្នឹង យកទៅជួយការអភិវឌ្ឍន៍ផ្សេងៗ តាមមូលដ្ឋានផ្សេងៗ ខ្ញុំគិតថាមានលក្ខណៈល្អប្រសើរមួយចំណែកដែរ»។
លោក យង់ គិមអេង បន្ថែមថា រដ្ឋាភិបាលមិនបានតែងតាំងមន្ត្រីរាជការឱ្យមានតុល្យភាពនោះទេ ដូចជាការតែងតាំង ជំនួយការ និងទីប្រឹក្សា មានឋានរដ្ឋលេខាធិការ និងអនុរដ្ឋលេខាធិការគឺជាមន្ត្រីថ្នាក់ជាតិមានច្រើន ប៉ុន្តែរដ្ឋាភិបាលមិនបានយកចិត្តទុកដាក់តែងតាំងមន្ត្រីថ្នាក់ក្រោមជាតិដែលកន្លងទៅប្រជាពលរដ្ឋតែងតែត្អូញថា ខ្វះគ្រូបង្រៀន ខ្វះគ្រូពេទ្យនៅតាមតំបន់ដាច់ស្រយាលនោះទេ។
លោក យង់ គិមអេង៖ «អ្នកទៅយកតួនាទីធំៗ បានតែតួនាទីធំៗ ប៉ុន្តែមន្ត្រីដែលអនុវត្តការងារផ្ទាល់ៗ ហាក់ដូចជាខ្វះទៅវិញ អត់សូវសម្បូរ អ៊ីចឹងទេខ្ញុំថា ការតែងតាំងឧទាហរណ៍ថា ខាងវិស័យសុខាភិបាល អាចថា ជំរុញឱ្យមានមន្ត្រីឱ្យបានច្រើនដើម្បីជួយដល់ប្រជាពលរដ្ឋតាមឃុំ តាមសង្កាត់គឺជាការល្អប្រសើរ»។
រដ្ឋាភិបាលកម្ពុជាបានកំណត់ប្រាក់បៀវត្សសម្រាប់ជំនួយការ និងទីប្រឹក្សា ដែលមានឋានស្មើរដ្ឋលេខាធិការទទួលបានប្រាក់បៀវត្សប្រចាំខែ ១លាន និង៧៥ម៉ឺនរៀល និងអនុរដ្ឋលេខាធិការទទួលបានបៀវត្សប្រចាំខែ ១លាន និង៤សែនរៀល។
អ្នកវិភាគ និងមន្ត្រីអង្គការសង្គមស៊ីវិល បានរិះគន់លើការដឹកនាំបុរសខ្លាំង លោក ហ៊ុន សែន ថាក្បាលម៉ាស៊ីនដឹកនាំរដ្ឋ មានច្រើនហួសតម្រូវការ។ ជាក់ស្ដែង អ្នកវិភាគដ៏ល្បីគឺបណ្ឌិត កែម ឡី បានលើកឡើងពេលដែលនៅលោកមានជីវិត ថា លោក ហ៊ុន សែន បង្កើតក្រសួង និងតែងតាំងមន្ត្រីច្រើនលើសលប់ដើម្បីបែងចែងដំណែងដោយមិនខ្វល់ពីពលរដ្ឋក្រីក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។