មន្ត្រី​អង្គការ​សង្គម​ស៊ីវិល ជំរុញ​ឲ្យ​រដ្ឋាភិបាល​អនុវត្ត​ការ​ដាក់​ទោស​សហគមន៍ ដើម្បី​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ

ដោយ ជី វិតា
2023.01.23
Share on WhatsApp
Share on WhatsApp
មន្ត្រី​អង្គការ​សង្គម​ស៊ីវិល ជំរុញ​ឲ្យ​រដ្ឋាភិបាល​អនុវត្ត​ការ​ដាក់​ទោស​សហគមន៍ ដើម្បី​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ ទណ្ឌិតដែលឃុំខ្លួននៅក្នុងពន្ធនាគារក្នុងប្រទេសកម្ពុជា។
រូប៖ អគ្គនាយកដ្ឋានពន្ធនាគារ

មន្ត្រី​អង្គការ​សង្គម​ស៊ីវិល និង​សកម្មជន​ដែល​ធ្លាប់​ជាប់​ពន្ធនាគារ ស្នើ​សុំ​ឱ្យ​រដ្ឋាភិបាល​អនុវត្ត​ការ​ដាក់​ទោស​ការងារ​សហគមន៍​ឱ្យ​បាន​ឆាប់ៗ ដើម្បី​ផ្ដល់​ឱកាស​ដល់​អ្នក​ទោស​ទទួល​បាន​ឱកាស​សម្រប​ខ្លួន​រស់នៅ​ក្នុង​សហគមន៍។ ការ​ស្នើ​សុំ​បែប​នេះ ធ្វើ​ឡើង​បន្ទាប់​ពី​រដ្ឋមន្ត្រី​ក្រសួង​មហាផ្ទៃ លោក ស ខេង កាល​ពី​ពេល​ថ្មីៗ​នេះ បាន​លើក​ឡើង​ថា ​ក្រសួង​មហាផ្ទៃ និង​ក្រសួង​យុត្តិធម៌ កំពុង​សហការ​គ្នា​ដើម្បី​ឱ្យ​មាន​ការ​អនុវត្ត​ទោស​ការងារ​សហគមន៍។

បើ​ទោះ​បី​ជា​ច្បាប់​ព្រហ្មទណ្ឌ​បាន​ចែង​ឱ្យ​មាន​ការ​ដាក់​ទោស​ការងារ​សហគមន៍ តាំង​ពី​ឆ្នាំ២០០៧ក្ដី ក៏​រហូត​មក​ដល់​ពេល​នេះ តុលាការ​មិន​ទាន់​បាន​ប្រើ​ប្រាស់​ច្បាប់​នេះ​ម្ដង​ណា​ឡើយ។ មន្ត្រី​អង្គការ​សង្គម​ស៊ីវិល យល់​ឃើញ​ថា ការ​អនុវត្ត​ទោស​ការងារ​សហគមន៍ មិន​ត្រឹម​តែ​ផ្ដល់​ឱកាស​ដល់​អ្នក​ទោស​កែប្រែ​ខ្លួន​តែ​ប៉ុណ្ណោះ​ទេ ប៉ុន្តែ​ក៏​អាច​ជួយ​កាត់​បន្ថយ​ចំណាយ​របស់​រដ្ឋាភិបាល លើ​ការ​ផ្គត់ផ្គង់​អ្នក​ទោស​ក្នុង​ពន្ធនាគារ​ផង​ដែរ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​លីកាដូ (LICADHO) លោក អំ សំអាត យល់​ឃើញ​ថា ការ​អនុវត្ត​ទោស​ការងារ​សហគមន៍​ទៅ​លើ​អ្នក​ទោស​កម្រិត​ស្រាល អាច​ផ្ដល់​ផល​ប្រយោជន៍​ដល់​រដ្ឋាភិបាល តាម​រយៈ​ការ​បំពេញ​កាតព្វកិច្ច​របស់​ពួកគេ​នៅ​ក្នុង​សហគមន៍ និង​កាត់​បន្ថយ​ការ​ចំណាយ​របស់​រដ្ឋ​ទៅ​លើ​អ្នក​ទោស​ក្នុង​ពន្ធនាគារ។ លោក​បន្ថែម​ថា ដើម្បី​ឱ្យ​ជន​ជាប់​ឃុំ​កែ​ប្រែ​ឥរិយាបថ​ល្មើស​ច្បាប់​របស់​ខ្លួន ការ​អនុវត្ត​ទោស​ការងារ​សហគមន៍ គឺជា​វិធានការ​ដែល​មាន​ប្រសិទ្ធិ​ភាព​ជាង ការ​ដាក់​អ្នក​ទោស​នៅ​ក្នុង​ពន្ធនាគារ ព្រោះ​ពួកគេ​បាន​រស់នៅ​ជា​មួយ​គ្រួសារ និង​បំពេញ​ការងារ​ជា​ប្រយោជន៍​ដល់​សង្គម។ ជាមួយ​គ្នា​នេះ លោក អំ សំអាត សំណូមពរ​ដល់​រដ្ឋាភិបាល និង​ក្រសួង​ពាក់ព័ន្ធ​ជំរុញ​ឱ្យ​មាន​ការ​អនុវត្ត​ទោស​ការងារ​សហគមន៍​ឱ្យ​បាន​ឆាប់ៗ ព្រោះ​ស្ថានភាព​ចង្អៀត​ណែន​នៅ​ក្នុង​ពន្ធនាគារ​នៅ​តែ​បន្ត​កើត​មាន ដោយ​ពន្ធនាគារ​ខ្លះ​កំពុង​ផ្ទុក​អ្នក​ទោស​លើស​ចំណុះ​រហូត​ដល់៣ដង នៃ​ទំហំ​បន្ទប់​ពន្ធនាគារ​អាច​ផ្ទុក​បាន។

លោក អំ សំអាត៖ «ទំហំ​ធំ​របៀប​នេះ ចង្អៀត​ណែន​របៀប​នេះ​វា​ប៉ះពាល់​ទៅ​ដល់​សុខភាព​អ្នក​ទោស ទៅ​ដល់​បញ្ហា​អាហារ​ហូប​ចុក បញ្ហា​បរិស្ថាន ការ​យក​ចេញ​យក​ខ្យល់​អាកាស ការ​ហាត់​ប្រាណ ហើយ​វា​ប៉ះពាល់​ទៅ​ដល់​មន្ត្រី ពី​ព្រោះ​ចំនួន​មន្ត្រី​ពន្ធនាគារ​មិន​ឆ្លើយ​តប​ទៅ​នឹង​ចំនួន​អ្នក​ទោស​ទៅ​ទៀត»

ការ​លើក​ឡើង​បែប​នេះ ធ្វើ​ឡើង​បន្ទាប់​ពី​រដ្ឋមន្ត្រី​ក្រសួង​មហាផ្ទៃ លោក ស ខេង បាន​ថ្លែង​ថា ក្រសួង​មហាផ្ទៃ និង​ក្រសួង​យុត្តិធម៌ កំពុង​សហការ​គា្ន​លើ​គម្រោង​ដាក់​ទោស​ការងារ​សហគមន៍ ទៅ​លើ​អ្នក​ដែល​មាន​ទោស​ស្រាលៗ កាល​ពី​ថ្ងៃ​ទី២០ ខែមករា នៅ​ក្នុង​ពិធី​ផ្សព្វផ្សាយ អនុវត្ត​គោល​នយោបាយ ភូមិ-ឃុំ-សង្កាត់ មាន​សុវត្ថិភាព នៅ​រាជធានី​ភ្នំពេញ។

លោក ស ខេង៖ «យើង​ផ្ដន្ទាទោស​ហើយ ប៉ុន្តែ​យើង​មិន​ដាក់​ក្នុង​ពន្ធនាគារ​ទេ។ មិន​ដឹង​ទៅ​រក​កន្លែង​ណា​ដាក់ ហើយ​វា​ត្រូវ​ការ​ចំណាយ ដើម្បី​នឹង​ដោះ​ស្រាយ​បាយ​ទឹក ចិញ្ចឹម​ពួក​គាត់ កាល​ណា​កាត់​ទោស​មាន​សាលដីកា មាន​អី​ហើយ​នោះ គឺ​បញ្ជូន​គាត់​ទៅ​នឹង​មូលដ្ឋាន ទៅ​នឹង​ផ្ទះ​សម្បែង ប៉ុន្តែ​គាត់​ត្រូវ​តែ​បំពេញ​កាតព្វកិច្ច​អនុវត្ត​ទោស តាម​ផ្លូវ​ច្បាប់ គាត់​ធ្វើ​ការងារ​ក៏​ប៉ុន្តែ​គ្មាន​កម្រៃ​ទេ»

មាត្រា ៧២នៃ​ក្រម​ព្រហ្មទណ្ឌ​ចែង​ថា៖ កាលណា​ជន​ជាប់​ចោទ​ទទួល​ទោស​ដាក់​ពន្ធនាគារ ដែល​អតិបរមា​តិច ជាង ឬ​ស្មើ​នឹង៣ (បី)ឆ្នាំ តុលាការ​អាច​ប្រកាស​ទោស​ការងារ​សហគមន៍។ ការងារ​សហគមន៍ គឺជា​កាតព្វកិច្ច​ត្រូវ​បំពេញ​ក្នុង​ថេរវេលា​ចន្លោះ​ពី ៣០ ម៉ោង ទៅ២០០ ម៉ោង នូវ​ការងារ​គ្មាន​កម្រៃ ជា​ប្រយោជន៍​ដល់​រដ្ឋបាល​ថ្នាក់​ក្រោម​ជាតិ ឬ​នីតិ​បុគ្គល នៃ​នីតិ​សាធារណៈ​ផ្សេង​ទៀត ដល់​សហគមន៍ សមាគម ឬ​ដល់​អង្គការ​មិនមែន​រដ្ឋាភិបាល។

ការ​អនុញ្ញាត​អោយ​ទណ្ឌិត​កម្រិត​ស្រាល​អនុវត្ត​ទោស​ក្រៅ​ពន្ធនាគារ ដោយ​អោយ​ធ្វើការ​ក្នុង​សហគមន៍ មាន​ប្រយោជន៍​ធំ៣ ទី១គឺ ជួយ​កាត់​បន្ថយ​ភាព​ចង្អៀត​ណែន​ក្នុង​ពន្ធនាគារ​ដែល​ជា​វត្ថុ​បំណង​នៃ​មាត្រា ៧២​នៃ​ក្រម​ព្រហ្មទណ្ឌ។ ទី២ កាត់​បន្ថយ​ការ​ចំណាយ​ថវិកា​រដ្ឋ និង​ទីបី គឺ​បាន​ផល​ប្រយោជន៍​ដល់​សហគមន៍ នៅ​ពេល​ទណ្ឌិត អាច​ជួយ​ធ្វើ​កិច្ចការ​សម្រាប់​សហគមន៍ ដូចជា សំអាត​អនាម័យ ផ្លូវ​ថ្នល់ សាលា​រៀន ការងារ​ក្នុង​មជ្ឈ​មណ្ឌល​មនុស្ស​ចាស់ ឬ​ដាំ​ដើម​ឈើ ជាដើម។

ជុំវិញ​រឿង​នេះ សកម្មជន​បរិស្ថាន និង​ធ្លាប់​បាន​ជាប់​ពន្ធនាគារ​កន្លង​មក គឺ​លោក ថុន រដ្ឋា គាំទ្រ​ឱ្យ​រដ្ឋាភិបាល​អនុវត្ត​ទោស​ការងារ​សហគមន៍​ឱ្យ​បាន​ឆាប់ៗ ព្រោះ​លោក​យល់​ថា ការ​ដាក់​ពន្ធនាគារ​ក្នុង​ពេល​បច្ចុប្បន្ន មិន​អាច​កែប្រែ​ឥរិយាបថ​របស់​ជន​ល្មើស​បាន​ឡើយ។ លោក​បន្ថែម​ថា អ្នក​ទោស​នៅ​ក្នុង​ពន្ធនាគារ​មិន​ត្រឹមតែ​មិន​ទទួល​បាន​ការ​បណ្ដុះបណ្ដាល​វិជ្ជាជីវៈ ឬ​សីលធម៌​ប៉ុណ្ណោះ​ទេ ប៉ុន្តែ​ពួកគេ​ថែម​ទាំង​បង្រៀន​គ្នា​ទៅ​វិញ​ទៅ​មក អំពី​វិធី​ប្រព្រឹត្តិ​បទល្មើស​ដូចជា របៀប​កាច់​សោ​ក​ម៉ូតូ របៀប​គាស់​ផ្ទះ និង​ជា​ពិសេស​ពួកគេ​បាន​កសាង​បណ្ដាញ​ចែកចាយ​គ្រឿង​ញៀន​បន្ទាប់​ពី​ពួកគេ​ចេញ​ពី​ពន្ធនាគារ ទៀតផង។

លោក ថុន រដ្ឋា៖ «ខ្ញុំ​ខ្លួនឯង​ជាប់​នៅ​ពន្ធនាគារ​ព្រៃ​ស​ហ្នឹង មាន​ភាព​ចង្អៀត​ណែន​មែន​ទែន គេ​ហៅថា​សម្រាប់​សិទ្ធិ​សេរីភាព បើ​ទោះ​បី​ជា​យើង​ជា​ជន​ជាប់​ឃុំ បាត់​បង់​សេរីភាព​មួយ​ចំនួន​មែន ប៉ុន្តែ​ដូចជា​កន្លែង​ធ្វើ​ទារុណ​កម្ម​បន្ថែម​អញ្ចឹង វា​មិនមែន​ជា​កន្លែង​អប់រំ​កែប្រែ​ទៅ​ណា»

ធ្ងន់ធ្ងរ​នេះ​ទៅ​ទៀត​នោះ អ្នក​ទោស​ក្នុង​ពន្ធនាគារ​នៅ​កម្ពុជា​មិន​ត្រឹម​តែ​គ្មាន​ឱកាស​ទទួល​បាន ការ​កែប្រែ​ខ្លួន​ប៉ុណ្ណោះ​ទេ ប៉ុន្តែ​ពួកគេ​ភាគ​ច្រើន​ធ្លាក់​ខ្លួន​ឈឺ ស្លេកស្លាំង ដោយសារ​គ្មាន​អាហារ​ដែល​មាន​ជីវជាតិ​បរិភោគ និង​មិន​បាន​ចេញ​ពី​បន្ទប់​ឃុំឃាំង​ហាត់​ប្រាណ​គ្រប់​គ្រាន់។ លើស​ពី​នេះ ដោយសារ​មន្ត្រី​គ្រប់​គ្រង​ពន្ធនាគារ​ដាក់​អ្នក​ទោស​ឱ្យ​រស់នៅ​ជា​មួយ​គ្នា​ចង្អៀត​ណែន គឺ​ចាប់​ពី២៥ ទៅ​ដល់​៣០នាក់ ក្នុង​បន្ទប់​ដែល​មាន​ទំហំ ៤ គុណ ៥ម៉ែត្រ ធ្វើ​ឱ្យ​អ្នក​ទោស​ភាគ​ច្រើន​កើត​ជំងឺ​រមាស់ និង​ឆ្លង​គ្នា​ទៅ​វិញ​ទៅ​មក។

ក្រៅ​ពី​ស្នើ​សុំ​ឱ្យ​រដ្ឋាភិបាល​អនុវត្ត​ការ​ដាក់​ទោស​ការងារ​សហគមន៍​ឱ្យ​បាន​ឆាប់ មន្ត្រី​អង្គការ​សង្គម​ស៊ីវិល ក៏​ស្នើ​សុំ​ឱ្យ​រដ្ឋាភិបាល​អនុវត្ត​ការ​ដាក់​ទោស​នេះ ដោយ​តម្លាភាព និង​យុត្តិធម៌​ផង​ដែរ ព្រោះ​កន្លង​មក​តែង​តែ​មាន​មតិ​រិះគន់​ថា ការ​លើក​លែង​ទោស​ទៅ​ដល់​អ្នក​ទោស មិន​បាន​ធ្វើ​ឡើង​ដោយ​ភាព​ត្រឹមត្រូវ និង​យុត្តិធម៌​នោះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។