អង្គការមនុស្សចាស់កម្ពុជា កាលពីព្រឹកថ្ងៃទី៦ ខែមេសា បានប្រារព្ធទិវាមនុស្សចាស់ជូនដល់ជនចាស់ជរានៅស្រុកមោងឬស្សី ខេត្តបាត់ដំបង ដែលមានប្រជាពលរដ្ឋ និងមន្ត្រីរាជការចូលរួមប្រមាណ ៤០០នាក់។ កម្មវិធីនេះ គឺធ្វើឡើងដើម្បីលើកកម្ពស់ការយល់ដឹង និងបង្កើនការយកចិត្តទុកដាក់បញ្ហាសុខភាពដល់មនុស្សចាស់ ដែលធ្លាប់មានគុណមើលថែកូនចៅនៅពេលកន្លងមក។
នៅក្នុងកម្មវិធីដែលធ្វើឡើងនៅវត្តចកធំ ឃុំកកោះ ស្រុកមោងឬស្សី នេះ មានការសម្ដែងសាច់រឿងខ្លីរបស់ក្រុមយុវជន ដែលបានអប់រំអំពីការយកចិត្តទុកដាក់របស់មនុស្សចាស់មកលើកូនចៅនៅក្នុងក្រុមគ្រួសារ។ អ្នកចូលរួមក្នុងកម្មវិធីនេះ ភាគច្រើនជាមនុស្សចាស់ អាយុប្រមាណ ៥០ឆ្នាំឡើងទៅ មកពីតាមសហគមន៍ផ្សេងៗគ្នាក្នុងស្រុកមោងឬស្សី។
អ្នកចូលរួមក្នុងកម្មវិធីម្នាក់ អ្នកស្រី លឹម រុន ប្រាប់វិទ្យុអាស៊ីសេរី បន្ទាប់ពីចប់កម្មវិធីថា អ្នកស្រីមានការសប្បាយរីករាយជាខ្លាំងរកអ្វីប្រៀបមិនបានឡើយ នៅពេលដែលមានអាជ្ញាធរខេត្តបាត់ដំបង និងអង្គការសង្គមស៊ីវិលយកចិត្តទុកដាក់មកលើពួកគាត់។ អ្នកស្រីបន្តថា កន្លងមកពួកគាត់រស់នៅជួបការលំបាកច្រើនក្នុងជីវិតប្រចាំថ្ងៃ ដូចជាការគ្មានលទ្ធភាពរកប្រាក់ដោះស្រាយជីវភាព និងខ្វះការយកចិត្តទុកដាក់ពីសំណាក់អាជ្ញាធរពាក់ព័ន្ធជាដើម៖ «ខ្ញុំចង់ឲ្យអង្គការរៀបចំពិធីមនុស្សនេះនៅឆ្នាំក្រោយៗទៀត ដើម្បីពួកខ្ញុំបានជួបជុំសប្បាយរីករាយជុំគ្នាទៀត»។
អភិបាលខេត្តបាត់ដំបង លោក ច័ន្ទ សុផល ដែលបានចូលរួមជាអធិបតីក្នុងកម្មវិធីមានប្រសាសន៍សាទរដល់អ្នករៀបចំទិវាមនុស្សចាស់ ថាជាការងារល្អមួយជួយដល់សង្គមជាតិ ជាពិសេសគឺមនុស្សចាស់។
លោកបន្ថែមថា កន្លងមក ដែលអាជ្ញាធរពាក់ព័ន្ធមិនបានផ្ដល់ថវិកាដល់មនុស្សចាស់ដោយសារប្រទេសកម្ពុជា ក្រីក្រ គ្មានថវិកាគ្រប់គ្រាន់ ហើយលោកថា រដ្ឋាភិបាលកំពុងយកចិត្តទុកដាក់លើការងារនេះ៖ «បាទ! និយាយឲ្យខ្លីទៅ គឺមនុស្សចាស់ជាអ្នកធ្វើឲ្យមានអ្វីៗនៅថ្ងៃនេះ ហើយមានមនុស្សចាស់ ទើបមានអ្វីៗនៅថ្ងៃនេះ»។
អ្នកចូលរួមក្នុងកម្មវិធីទទួលបានថវិកា ១ម៉ឺនរៀល ទឹកក្រូចមួយកំប៉ុង ទឹកសុទ្ធមួយដប និងនំប៉័ងដាក់សាច់មួយដើម។ ក្រៅអំពីនេះ ក៏មានរៀបចំពិធីមុជទឹកឲ្យមនុស្សចាស់ដែរ ដោយឲ្យពួកគាត់អង្គុយនៅលើកៅអីជា ២ជួរ ហើយអភិបាលខេត្តបាត់ដំបង និងមន្ត្រីពាក់ព័ន្ធជាអ្នកមុជទឹកឲ្យពួកគាត់។
ប្រធានអង្គការមនុស្សចាស់កម្ពុជា លោក ទុំ វីរ៉ា មានប្រសាសន៍ថា គោលបំណងសំខាន់ដែលរៀបចំកម្មវិធីនេះ ធ្វើយ៉ាងណាជួយឲ្យមនុស្សចាស់មានសុខភាពល្អ និងចង់ឲ្យអាជ្ញាធរខេត្ត និងមន្ត្រីពាក់ព័ន្ធបានដឹងពីទុក្ខលំបាកពិតប្រាកដរបស់មនុស្សចាស់ ដើម្បីមានវិធានការជួយដល់ពួកគាត់នៅថ្ងៃខាងមុខ៖ «ប៉ុន្តែបើសិនជាអាជ្ញាធរពាក់ព័ន្ធគាត់មិនបានយកចិត្តទុកដាក់ដល់មនុស្សចាស់ទេ នោះវានឹងក្លាយទៅជាបន្ទុកមួយរបស់សង្គម។ ដូច្នោះហើយបានជាយើងមានការចាប់អារម្មណ៍ទៅលើមនុស្សចាស់»។
របាយការណ៍របស់អង្គការមនុស្សចាស់កម្ពុជា បង្ហាញថា នៅខែធ្នូ ឆ្នាំ២០១៤ មនុស្សចាស់នៅកម្ពុជា មានចំនួនជាង ១,២លាននាក់ ឬស្នើនឹងប្រមាណ ៩ភាគរយ នៃប្រជាពលរដ្ឋជាង ១៥លាននាក់។
ចំណែកឯនៅខេត្តបាត់ដំបង មានមនុស្សចាស់ជាង ៩ម៉ឺននាក់ ក្នុងចំណោមប្រជាពលរដ្ឋជាង ១,១៧០,០០០នាក់។ របាយការណ៍នាយកដ្ឋានសុខុមាលភាពមនុស្សចាស់នៃក្រសួងសង្គមកិច្ច អតីតយុទ្ធជន និងយុវនីតិសម្បទា ឲ្យដឹងថា នៅឆ្នាំ២០១៥ សមាគមមនុស្សចាស់ដែលមានរចនាសម្ព័ន្ធត្រឹមត្រូវ មានចំនួនជាង ៣៦០សមាគមទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។