អ្នកប្រើប្រាស់​បណ្តេញ​សង្គម រិះគន់​វិធាន​ការ​បិទ​ទីក្រុង ដើម្បី​ប្រឆាំង​កូវីដ-១៩

អ្នកប្រើប្រាស់​បណ្ដាញ​សង្គម រិះគន់​វិធានការ​បិទ​ទីក្រុង​ដើម្បី​ប្រឆាំង​កូវីដ-១៩ ធ្វើ​ឡើង​ដោយ​តក់ក្រហល់ គ្មាន​ផែនការ​ច្បាស់លាស់ និង​ពុំ​មាន​ការ​ទទួលខុស​ត្រូវ​ពិតប្រាកដ លើ​ការ​ផ្គត់ផ្គង់​ស្បៀងអាហារ ចំពោះ​គ្រួសារ​ទីទាល់​ក្រីក្រ។

អ្នកប្រើប្រាស់​បណ្ដាញ​សង្គម​ភាគច្រើន​ចាប់​អារម្មណ៍ លើ​ព្រឹត្តិការណ៍​ឆ្លង​កូវីដ-១៩ ចូល​សហគមន៍ ២០ កម្ភៈ រហូត​អាជ្ញាធរ​រដ្ឋាភិបាល​ប្រកាស​បិទ​ទីក្រុង ខេត្ត​កណ្តាល និង​តំបន់​មួយចំនួន​នៃ​បណ្តា​ខេត្ត​នានា​នៅ​ទូទាំង​ប្រទេស មិន​ឱ្យ​ពលរដ្ឋ​ធ្វើដំណើរ​ឆ្លងកាត់​រកគ្នា​បាន​ឡើយ។

ម្ចាស់​គណនី​ហ្វេសប៊ុក ViReak Seth Fsp បាន សរសេរ​ថា​៖ ជីវិត​អ្នកក្រ​ដូច​ខ្ញុំ មាន​តែ​ពាក្យ​ថា តស៊ូ​…​ជាមួយនឹង​រូបភាព​កម្មករ ឈរ​តម្រៀប​គ្នា​ជាច្រើន​នៅ​លើ​អគារ​ស្នាក់នៅ​មួយ​កន្លែង ដែល​ទំនងជា​មិន​អាច​ចេញ​ទៅ​ណា​រួច។

ម្ចាស់​គណនី​ហ្វេសប៊ុក​ដដែល​សរសេរ​ទៀត​ថា​៖ យើងខ្ញុំ​ជា​កូន​អ្នក​ក្រីក្រ​មក​ធ្វើការ​នៅ​ភ្នំពេញ ហើយ​ដោយសារ​មេរោគ​កូ​វីដ​១៩ កន្លែង​ធ្វើការ​ត្រូវ​បិទ ហើយ​ពួក​ខ្ញុំ​នៅ​ជាប់​នៅក្នុង​ផ្ទះ គ្មាន​ស្បៀងអាហារ​សំរាប់​ហូប​ទេ សូម​អាជ្ញាធរ​មេត្តា​ជួយ​ពួក​ខ្ញុំ​ផង អាសយដ្ឋាន សង្កាត់ ទឹកថ្លា ផ្លូវ 2004 លេខ​ទូរស័ព្ទ​ 0973192319 និង 0712686802។

ឆ្លើយតប​នឹង​រឿង​នេះ ម្ចាស់​គណនី ហ្វេសប៊ុក ឈ្មោះ Chantha Muth Comment បន្ត​ថា៖ "មាន​ការ​បង្ហើយ​រក​ជំនួយ​ស្បៀង​អាហារ​សង្គ្រោះ" ខ្ញុំ​បាន​អាន​សារ​មួយ​បង្ហោះ​ដោយ​គណនេយ្យ​ហ្វេសប៊ុក​ឈ្មោះ «ViReak Seth Fsp» ខ្ញុំ​សូម​សំណូមពរ​ដល់​អាជ្ញាធរ​រាជធានី​ភ្នំពេញ និង​គណៈកម្មការ មេត្តា​ពិនិត្យមើល​ស្ថានភាព​រស់នៅ​របស់​ពួកគាត់ និង​ជួយ​ឆ្លើយតប​តាម​ការ​អំពាវនាវ​របស់​គាត់​ផង។

ចំណែក​ម្ចាស់​គណនី ហ្វេសប៊ុក ឈ្មោះ AN Vicheth ផុស និង​ចែក​រំម្លែក (Share) នូវ ទស្សន​នយោបាយ​របស់​គណបក្ស​ប្រជាធិបតេយ្យ​មូលដ្ឋាន​ជុំវិញ​វិធាន​ការ​បិទ​ខ្ទប់​(lockdown) ទីក្រុង របស់​អាជ្ញាធរ​រដ្ឋាភិបាល​លោក ហ៊ុន សែន ថា៖ វិធាន​ការ​បិទ​ខ្ទប់​ក្រុង​ត្រូវតែ​ផ្សា​ភ្ជាប់​ជាមួយ​វិធានការ​ដោះស្រាយ​បញ្ហា​ស្បៀង​ជូន​ប្រជាជន ទើប​បាន​ជោគជ័យ​គណបក្ស​ប្រជាធិបតេយ្យ​មូលដ្ឋាន សង្កេត​ឃើញ​ថា វិធានការ​បិទ​ខ្ទប់​រាជធានី​ភ្នំពេញ និង​ក្រុង​តាខ្មៅ​ ហាក់ដូចជា​មិន​បាន​ផ្សា​ភ្ជាប់​ឱ្យ​បាន​ល្អ​ប្រសើរ​ជាមួយ​វិធានការ​ផ្គត់ផ្គង់ និង​បែងចែក​ស្បៀង។ អ្នក​ដឹក​ស្បៀង​ចូល​ទីក្រុង​មាន​បញ្ហា​ទាក់ទង​លិខិតស្នាម​រដ្ឋបាល អ្នក​ដឹក​ស្បៀង​ទៅ​ផ្គត់ផ្គង់​តាម​ផ្ទះ​មាន​បញ្ហា​លិខិតស្នាម​រដ្ឋបាល អ្នកធ្វើការ​កន្លែង​ផលិត កែច្នៃ វិច​ខ្ចប់ លក់ដូរ​ស្បៀង​មាន​បញ្ហា​លិខិត​រដ្ឋបាល។ ដើម្បី​ដោះស្រាយ​បញ្ហា​នេះ គណបក្ស​​ប្រជាធិបតេយ្យ​​មូលដ្ឋាន គាំទ្រ​ការ​មាន​សេចក្ដីណែនាំ​រួម​មួយ​ដែល​រដ្ឋបាល​រាជធានី ខេត្ត ខណ្ឌ ក្រុង ស្រុក ឃុំ សង្កាត់ ដើម្បី​ជួយ​សម្រួល​ដល់​អ្នក​ដែល​ពាក់ព័ន្ធ​ការងារ​ផ្គត់ផ្គង់​ស្បៀង​ទទួល​បាន​លិខិតស្នាម​ច្បាស់លាស់ និង​ជួយ​សម្រួល​ដល់​ការ​ធ្វើ​ដំណើរ​របស់​ពួកគាត់​។ លើស​ពី​នេះ​ទៀត​រដ្ឋបាល​មូលដ្ឋាន​ទាំងអស់​សូម​ជួយ​សម្របសម្រួល​ដោះស្រាយ​បញ្ហា​ខ្វះ​ស្បៀង​ជូន​ប្រជាពលរដ្ឋ​ដែល​ជួប​ការ​លំបាក​ខ្លាំង​ឱ្យ​បាន​គ្រប់គ្នា។ គណបក្ស​នេះ សូម​អំពាវនាវ​ឱ្យ​ប្រជាពលរដ្ឋ​ដែល​មាន​ការ​លំបាក​តិច​បង្កើន​សាមគ្គីភាព​ជួយ​ដល់​អ្នក​ដែល​មាន​ការ​លំបាក​ខ្លាំង​ដើម្បី​រួមគ្នា​ទប់ទល់​វិបត្តិ​កូវីដ-១៩ បាន​ជោគជ័យ​ទាំងអស់គ្នា។

ចំណែក​ម្ចាស់​គណនី​ហ្វេសប៊ុក ឈ្មោះ Lor Krem បាន​សរសេរ​ដាស់​តឿន​ថា៖ ក្នុង​អំឡុង​ពេលនេះ យើង​ទាំងអស់គ្នា​មិន​គួរ​ផុស​រូបថត​ដើរលេង រូបថត​ហូបចុក​ចាស់ៗ ​ដែល​​មាន​លក្ខណៈ​ជួបជុំគ្នា​ឡើយ។ ប្រសិនបើ​ផុស គប្បី​បញ្ជាក់​កាល​បរិច្ឆេទ​ឱ្យ​បាន​ច្បាស់​ផង ចៀសវាង​ការភាន់ច្រឡំ​ជាយថាហេតុ និង​នាំទុក្ខ​ដល់​ខ្លួន។ រួមគ្នា​ប្រយុទ្ធ​ប្រឆាំងនឹង​ជំងឺ​កូ​វីដ​-១៩ ដើម្បី​ខ្លួន​យើង គ្រួសារ​យើង និង​សង្គមជាតិ​យើង។

រីឯ​ម្ចាស់​គណនី​ហ្វេសប៊ុក ឈ្មោះ Sam Inn ក៏​បាន​សរសេរ​ដែរ​ថា៖ ធូររលុង​ពេក​ក៏​មិនល្អ បង្ក​ការ​ឆ្លង​រាលដាល​ខ្លាំង តែ​រឹត​បន្តឹង​ពេក​ក៏​លំបាក បង្ក​ការ​ខ្វះ​ស្បៀង​ដោយ​បញ្ហា​ដឹកជញ្ជូន និង​ចែកចាយ។ ដូច្នេះ ត្រូវ​ស្វែងរក​ផ្លូវ​កណ្តាល។

ម្ចាស់គណនី​ហ្វេសប៊ុក ឈ្មោះ Ratna Leak បាន​ប្រកាស​ជា​ដំណឹង​ថា​៖ ទំនិញ​ប្រភេទ​ស្បៀង នៅ​តាម​ម៉ា​ត (​ផ្សារ​) មួយចំនួន ចាប់ផ្តើម​អស់​ស្តុក​បណ្តើរៗ ​ហើយ។

អ្នកប្រើប្រាស់​បណ្តាញ​សង្គម​មួយចំនួន​ក៏​បាន Comments ដឺដង​តប​វិញ​ថា ម្ហូប​អាហារ​បម្រុង​ទុក នៅ​ក្នុង​ទូទឹកកក ក៏​អស់​ដែរ នៅ​សល់​តែ​ទូរ​ទទេ មក​ដល់​ថ្ងៃ​នេះ។

ចំណែក​ម្ចាស់​គណនី ហ្វេសប៊ុក ឈ្មោះ Sem Kung បាន​សរសេរ ដោយ​លើក​ជា​សំណួរ​ថា​៖ «​ឃុំខ្លួន​នៅ​ក្នុង​ផ្ទះ បាត់បង់​ចំណូល ទំនិញ​ឡើងថ្លៃ អត់​លុយ​បង់​ធនាគារ! សួរ​ថា​ស្លាប់​ដោយសារ​កូវីដ ឬ​ស្លាប់​ដោយសារ​អ្វី?៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។