កម្មករ​​រោងចក្រ​ប្រឈម​​នឹង​​ធ្លាក់​​ខ្លួន​​ក្រ ស្រប​ពេល​​កន្លែង​ការងារ​​ពួកគាត់​​ស្ថិត​​ក្នុង​​ស្ថាន​ភាព​​មិន​​ច្បាស់លាស់

ដោយ មួង ណារ៉េត
2021-07-12
Share
កម្មករ​​រោងចក្រ​ប្រឈម​​នឹង​​ធ្លាក់​​ខ្លួន​​ក្រ ស្រប​ពេល​​កន្លែង​ការងារ​​ពួកគាត់​​ស្ថិត​​ក្នុង​​ស្ថាន​ភាព​​មិន​​ច្បាស់លាស់ កម្មករ-កម្មការិនី នៅក្នុងរោងចក្រមួយនៅក្នុងទីក្រុងភ្នំពេញ កាលពីថ្ងៃទី០៩ ខែកុម្ភៈ ឆ្នាំ២០២១។
រូប៖ គេ​ផ្ដល់​ឱ្យ

ក្រុម​​កម្មករ​​​ត្អូញ​​ត្អែរ​​​ពី​​ទុក្ខ​​លំ​បាក​​​ផ្នែក​​​​ជីវ​​ភាពអំឡុង​​ពេល​​​ជំងឺ​​កូវីដ​​១៩ ពី​​ព្រោះ​ពួក​​​គាត់​​​ត្រូវ​​​រក​​​ប្រាក់​​​ដោះ​​ស្រាយ​​​ជីវ​​ភាព​ បង់​ទឹក​ភ្លើង បង់​បន្ទប់​ជួល និង​​សង​ម្ចាស់​​​បំណុល​​ជា​​ដើម​។ ពួក​​គាត់​ស្នើ​រដ្ឋា​ភិបាល​​និង​ស្ថាប័ន​ពាក់​ព័ន្ធ​ជួយ​ដោះស្រាយ​ទុក្ខ​កង្វល់​ទាំង​នេះ​ដោយ​ផ្តល់​ជំនួយ​សង្គម និង​ធានា​នូវ​សុវត្ថិ​ភាព​កន្លែង​ធ្វើ​ការ​ខណៈ​ពួក​គាត់​ទៅ​ធ្វើ​ការ​ទាំង​ភ័យ​ខ្លាច។

កម្មករ​រោង​ធ្វើការ​នៅ​ចក្រ​ឌីនហានលោក​ស្រី ជា ស៊ីណែត រៀប​​រាប់​​ថា ​លោកស្រី​បាន​ចូល​ធ្វើ​ការ​ឡើង​វិញ​ហើយ បន្ទាប់​ពី​រោង​ចក្រ​ផ្ទុះ​ជំងឺ​កូវីដ​១៩ ប៉ុន្តែលោក​ស្រី​និង​​កម្មករ​ផ្សេង​ទៀត​មិន​អាច​ធ្វើ​ការ​ថែម​ម៉ោង​ដូច​មុន​នោះ​ទេ ខណៈ​រោង​ចក្រ​នេះ​មិន​ទាន់​បើក​លុយ​អត្ថ​ប្រយោជន៍​ការ​ងារ​ជូន​កម្ម​ករ​នៅ​ឡើយ។ លោក​ស្រី បន្ត​ថា ​ប្រាក់​​ឈ្នួល​ដូច​បច្ចុប្បន្ន​នេះ​​មិន​ឆ្លើយ​តប​តម្រូវ​ការ និងផល​ប៉ះ​ពាល់​ជីវ​ភាព​គ្រួសារ​លោក​ស្រី​ទេ។ កម្មការិនី​រូប​នេះ​ប្រាប់​ថា កម្ម​ករទៅ​បំពេញ​ការ​ងារ​ទាំង​ភ័យ​​ខ្លាច​​​ឆ្លង​ជំងឺ​​កូវីដ ហើយ​ប្រសិន​បើ​រោង​ចក្រ​ផ្អាកម្តង​ទៀត​​នឹង​ទាញ​ជីវ​ភាព​កម្ម​ករ​ឲ្យ​ធ្លាក់​ក្នុង​ស្ថាន​ភាព​ក្រីក្រ​បន្ថែម​ទៀត។ លោក​ស្រី​ស្នើ​ក្រសួង​សុខ​ភិបាល​ចុះ​ពិនិត្យ​សុវត្ថិ​ភាព​សុខ​ភាព និង​ផ្សព្វ​ផ្សាយអប់រំ​​ជូន​កម្មករ​បន្ថែម​ទៀត ខណៈ​​រោង​ចក្រ​នេះ​មិន​ទាន់​អនុវត្ត​ពេញ​ពេញ​តាមវិធាន​ការ​សុខា​ភិបាល៖ «ខ្ញុំ​ក៏​ដូច​ជា​កម្មករ​ទូទៅ​ដែរ ​ចង់​សំណូម​ពរ​ទៅ​រដ្ឋា​ភិបាល ក្រសួង​ពាក់​ព័ន្ធ​នានា​ សូម​មេត្តា​ជួយ​ដល់​ពួក​ខ្ញុំ​កម្មករ​ផង ព្រោះ​អី​ពេល​នេះលំបាក​ខ្លាំង​ណាស់ ម្នាក់ៗ​សុទ្ធ​តែ​ជំពាក់​លុយ​ធនាគារ​ដល់​ពេល​អ៊ីចឹង​សូម​រាជរដ្ឋា​ភិបាល​ជួយ​បើ​អាច​ពន្យារ​បាន​សូម​ឱ្យ​គាត់​ជួយ​ពន្យារ​ខាង​ធនា​គារ​អី​ ព្រោះឥឡូវ​នេះ​ខាង​ពួក​ខ្ញុំ​អត់​បាន​ធ្វើ​ការ​ពេញ​ទេ ដល់​ពេល​អ៊ីចឹង​លុយ​ក៏​តិច​ទៅ​តាមហ្នឹង ហើយ​និយាយ​ទៅ​គ្រាន់​យក​មក​ដោះ​ស្រាយ​ថ្លៃ​ផ្ទះ ហូប​ចុក​ម្ហូប​អី​ក៏​វា​ថ្លៃសព្វ​បែប​យ៉ាង»។

ចំណែក​កម្មករ​រោង​ចក្រ​កាត់​ដេរ​នៅ​ស្រុក​កៀន​ស្វាយ ខេត្ត​កណ្តាលលោក​ស្រី លាស់ សុខនា ប្រាប់​ថា ចាប់​តាំង​ការ​រីក​រាល​ជំងឺ​កូវីដ​១៩ គ្រួសារ​លោកស្រី​ទទួល​រង​​ទុក្ខ​លំបាក​​ផ្អែក​ជីវភាព​ដោយ​សារ​រោង​ចក្រ​បើក​បិទ​ចុះ​ឡើងដោយ​សារ​ពុំ​សូវ​សំបូរ​ការ​ងារ។ លោក​ស្រីបន្តថា ប្រាក់​ឈ្នួល​សម្រាប់​ខែ​នេះ​ លោក​ស្រី​និង​កម្មករ​ដទៃ​ទៀត​​ទទួល​​បាន​ ៦០ ​ដុល្លារ​ប៉ុណ្ណោះ ដែល​មិន​អាចដោះ​ស្រាយ​តម្រូវ​ការ​គ្រួសារ​បាន​ទេ ជា​ពិសេស​បង់​បំណុល​គ្រឹះ​ស្ថាន​មីក្រូហិរញ្ញា​វត្ថុ។ កម្មការិនី​រូប​នេះ ​ ស្នើ​ឱ្យ​រដ្ឋាភិបាល​ជួយ​គិត​គូរ​ផ្តល់​ប្រាក់​ឧបត្ថម្ភ​ដល់​កម្មករ​​​​ដែល​ពួក​គាត់​ក៏​កំពុង​ជួប​ទុក្ខ​លំបាក​ដោយ​សារ​បាត់​បង់​ការ​ងារ៖ «កន្លែង​ការ​ងារ​ខ្ញុំ​ជួន​ណា​មាន​ការ​ងារ​ខ្លះ​អត់​អ៊ី​ចឹង ដល់​ចឹងអត់​មាន​អាវ​យើង​មក​ផ្ទះ​វិញមក​ដល់​មាន​អាវ​ធ្វើ​ទៅ​ជួប​បញ្ហា​ច្រើន ព្រោះយើង​អត់​លុយ​បង់​គេ អត់​លុយ​ក្នុង​ជីវភាព​គ្រួសារ​វា​ពិបាក​ដែរ ព្រោះ​យើង​ខ្វះខាត​ចឹង​បាន​ធ្វើ​ខ្លះ​ចឹង​ទៅ​បាន​ជួយ​ទប់​គ្នា»។

វិទ្យុ​​​អាស៊ី​​​​សេរី​​​​មិន​​​​អាច​​​​ទាក់​​​​ទង​ប្រធាន​អង្គ​ភាព​​អ្នក​​នាំ​​ពាក្យ​​រដ្ឋា​ភិបាលលោក ផៃ ស៊ីផាន និង​អ្នក​នាំ​ពាក្យ​ក្រសួង​​ការងារ​និង​បណ្តុះ​បណ្តាល​វិជ្ជា​ជីវៈលោក ហេង សួរ ដើម្បី​​​បក​​ស្រាយ​​រឿង​​នេះ​​បាន​​​ទេ ​​នៅ​​ថ្ងៃ​ទី​១១ ខែកក្កដា ដោយ​​​ទូរ​ស័ព្ទ​​ចូល ពុំ​​មាន​​​អ្នក​​​ទទួល។

ប៉ុន្តែកាល​​ពី​​ពេល​​ថ្មីៗនេះលោក​នាយករដ្ឋមន្ត្រី ហ៊ុន សែន បាន​​សន្យា​ថា រដ្ឋាភិបាល នឹង​​​បន្ត​ជួយ​ឧបត្ថម្ភសាច់ប្រាក់​ដល់​ប្រជាពលរដ្ឋក្រក្រី​ចំនួន​ ៣ ខែបន្ថែម​ទៀត ដោយត្រូ​វ​ចំណាយ​ប្រាក់​ប្រមាណ ​៤០ ​លាន​ដុល្លារក្នុង​មួយ​ខែប្រាក់​ឧបត្ថម្ភនេះ នឹ​ង​ផ្តល់ជូន​កម្មករ​ផងដែរ ប៉ុន្តែផ្តល់​ជូន​តែ​កម្មករ​មួយ​ចំនួន​ប៉ុណ្ណោះ ហើយ​ត្រូវ​មាន​លក្ខខណ្ឌ ដោយ​អ្នកក្រ ត្រូវ​ដែលមាន​បណ្ណក្រីក្រ​បញ្ជាក់ និង​កម្មករ​ដែល​ត្រូវ​បាន​ប្រាក់ គឺ​ទាល់តែ​រោងចក្រ ឬ​សហគ្រាសដែល​បិទឬព្យួរ​នោះ បាន​ចុះ​បញ្ជីត្រឹមត្រូវ​ នៅ​ក្រសួង​ការងារ ដែល​បញ្ជាក់​អំពី​ផលវិបាក​ផ្នែក​ហិរញ្ញាវត្ថុ​ដោយសារ​ជំងឺកូវីដ-១៩។

លោក ហ៊ុន សែន អះអាងថា រដ្ឋាភិបាល​​​​​បាន​សន្សំសាច់ប្រាក់​ជាង​ ៣​ ពាន់​លាន​ដុល្លារ​ ដើម្បី​ជួយ​អន្តរាគមន៍​ក្នុងវិស័យ​សង្គម​នេះ និង​ថា រដ្ឋាភិបាល​លោក​មិន​ក្លាយ​ជា​រដ្ឋក្ស័យធន គ្មាន​ប្រាក់​បើក​ឲ្យ​ពលរដ្ឋដែល​រង​គ្រោះ​នោះទេ

ទោះបី​ជា​លោក ហ៊ុន សែន អះអាងថា រដ្ឋមាន​ប្រាក់​មិន​ខ្វះ ដើម្បី​ជួយ​ដោះស្រាយ​បញ្ហារបស់​ពលរដ្ឋ​ដែល​រង​ផល​ប៉ះពាល់​ដោយ​សារ​ជំងឺកូវីដ-១៩ នេះក្ដី ថ្មីៗ​នេះលោក​ធ្លាប់​សារភាព​ថា​ រដ្ឋាភិបាលគ្មាន​យន្តការ ក្នុង​ការ​ចែក​ប្រាក់​ជូន​ពលរដ្ឋ សូម្បីតែ​អ្នក​ក្រុង​ភ្នំពេញ កាល​ក្នុង​អំឡុង​ពេល​បិទ​ខ្ទប់​ កាល​ពី​ខែមេសា៖ «សុំបងប្អូន​មេត្តា​យោគយល់! អធ្យាស្រ័យ​ចំពោះការ​លំបាករួម​របស់​យើង។ ប្រសិន​បើ​ម្នាក់ៗ​គិត​តែទាមទារ​ យើង​ពុំមាន​របស់​របរ​ប្រាក់គ្រប់គ្រាន់ យើង​មានប្រាក់​ក៏ប៉ុន្តែ​យើង​មិនដឹងថាតើ​យើង​ចែក​របៀបណា យន្តការ​នៃការ​ចែក​របៀបណា»

ទោះ​ជា​​យ៉ាង​នេះ​ក្តី ប្រជា​ពលរដ្ឋ​ស្នើ​​​ឱ្យ​​រដ្ឋា​ភិបាល​​​ពង្រីក​​ជំនួយ​​​ទាំង​​នេះ​​​ឱ្យ​​បាន​​ទៅ​​ដល់​​​ពល​រដ្ឋ​​​​កាន់​​​តែ​​ច្រើន​​ថែម​​​ទៀតដើម្បី​ធានា​​​ថា គ្មាន​​ពល​រដ្ឋ​​​ណា​​ម្នាក់​​​ត្រូវ​​​បាន​​​ទុក​​​ចោល​​​ឱ្យ​​​នៅ​​​ដោយ​​​ឡែក​​​នោះ​​ទេ ពី​​ព្រោះ​​គ្រប់​​​គ្នា​​​សុទ្ធ​​តែ​​រង​​ផល​​​ប៉ះ​ពាល់​​​ពី​​​វិបត្តិ​​​ជំងឺ​កូវីដ១៩។ ពួក​គាត់ក៏​ចង់​ឲ្យ​រដ្ឋា​ភិបាល ជួយអន្តរា​គមន៍​ផ្អាក​បង់​សង​បំណុល​ទាំង​ការ ទាំង​ដើម​ក្នុង​រយៈ​ពេល​សមរម្យ​ដែរ ព្រោះ​ថា បំណុល​ធនា​គារ គ្រឹះ​ស្ថាន​មីក្រូ​ហិរញ្ញ​វត្ថុ និង​បំណុល​ឯក​ជន​ គឺ​ជា​ដើម​​ចម​​ក៏សំខាន់​ដែល​ទាញ​ជីវភាព​ពលរដ្ឋ​ឱ្យ​​រង​ទុក្ខលំ​បាក​​វេទនា​ក្នុង​ស្ថាន​ភាព​វិបត្តិ​ជំងឺ​កូវីដ​១៩។

មន្រ្តី​​គ្រប់​​គ្រង​​កម្ម​វិធី​​សិទ្ធិ​​ការងារ​​នៃ​​មជ្ឈ​​មណ្ឌល​​សម្ព័ន្ធ​​ភាព​​ការ​​ងារ និង​​សិទ្ធមនុស្ស​​ហៅ​​កាត់​​ថា ​​សង់​​ត្រាល់ (CENTRAL) លោក ឃុន ថារ៉ូ មាន​ប្រសាសន៍ថា ​សហ​ជីព​ព្រួយ​បារម្ភ​កម្មករ​និយោ​ជិត​អំឡុង​ផ្ទុះ​រាល​ដាល​ជំងឺ​កូវីដ​១៩ ដែលត្រូវ​បង្ខំ​ចិត្ត​ទៅ​ធ្វើ​ការ​ងារ​ទាំង​ប្រថុយ​ប្រថាន​ដោយ​គ្មាន​ជម្រើស​ដើម្បី​ប្តូរ​យកប្រាក់​ឈ្នួល​ផ្គត់​ផ្គង់​ជីវភាព​ ខណៈ​ពួក​គាត់​កំពុង​ប្រឈម​នឹង​បំណុល។ លោកមើល​ឃើញ​ថា កម្មករ​វិស័យ​កាត់​ដេរ ប្រឈម​ការ​រំលោភ​បំពាន​សិទ្ធិ​ជា​មូលដ្ឋាន និង​ការ​កេង​ប្រវ័ញ្ច​អត្ថ​ប្រយោជន៍​ការ​ងារ​ពី​និយោ​ជក​ក្រោមហេតុ​ផល​កូវីដ​១៩។

ជា​មួយ​គ្នា​នេះលោក ឃុន ថារ៉ូ យល់​ថា​ កន្លែង​ធ្វើ​ការ​របស់​កម្មករ​មិន​ទាន់​ធានាការ​អនុវត្ត​ត្រឹម​ត្រូវ​តាម​វិធាន​ការ​សុខាភិបាល​នៅ​ឡើយ​ទេ​ ដូច​ជា​ ការ​ផ្តល់​សម្ភារៈការ​ពារ ការ​រក្សា​គម្លាត​សុវត្ថិ​ភាព និង​អនាម័យ​នៅ​ក្នុង​រោង​ចក្រ​ជា​ដើម។ លោក​ថា ប្រសិន​បើ​រដ្ឋា​ភិបាល​មិន​បាន​ត្រួត​ពិនិត្យ​និង​តាម​ដាន​ដោយ​យក​ចិត្ត​ទុកចំពោះ​វិធាន​ការ​របស់​ខ្លួន​ទេ ​នឹង​ធ្វើ​ឱ្យ​រោង​ចក្រ​មួយ​ចំនួន​ធ្វេស​ប្រហែស ឬល្មើស​នឹង​វិធាន​ការ​សុខា​ភិបាល​ដែល​នាំ​ឲ្យ​ប៉ះ​ពាល់​ដល់​ស្ថេរ​ភាព​ការ​ងារនិង​ជីវ​ភាព​របស់​កម្ម​ករ៖ «ការ​ធានា​ឱ្យ​វា​មាន​ស្ថេរ​ភាព​ការ​ងារ​នេះ​ គឺ​សំខាន់​ណាស់ពី​ព្រោះ​អីប្រសិន​បើ​មិន​មាន​ស្ថេរ​ភាព​ការ​ងារ​កម្មករ​ក៏​អត់​មាន​ស្ថេរ​ភាព​នៃ​ប្រាក់ចំណូល​របស់​គាត់​ទេ ហើយ​ការ​រក្សា​ស្ថេរ​ភាព​ការ​ងារ​នេះ​វា​ធ្វើ​ឱ្យ​ដំណើរ​ការទាំង​សេដ្ឋ​កិច្ច​និង​ដំណើរ​ការជីវ​ភាព​របស់​កម្ម​ករ​ហ្នឹង​អាច​ដោះ​ស្រាយ​ក្នុង​កាលៈទេសៈ​មួយ​ដែរ»

មន្រ្តី​សង្គម​ស៊ីវិល​ផ្នែក​សិទ្ធិការ​ងារ​រូប​នេះ​បាន​ឱ្យ​ដឹង​ថា ​អង្គការ​សង​ត្រាល់​បានប្រមូល​ព័ត៌​មាន​កម្មករ​នៅ​តាម​រោង​ចក្រ​ចំនួន​១១៩ ដើម្បី​វិភាគ​ពី​ទំហំ​ខាត​បង់ប្រាក់​ឈ្នួល​​របស់​កម្មករ​និយោជិត​នៅ​អំឡុង​ពេល​បិទ​ខ្ទប់​និង​បន្ទាប់​ពី​បិទ​ខ្ទប់ដោយ​សារ​ជំងឺ​កូវី​ដ១៩។ លទ្ធផល​នៃ​ទិន្នន័យ​​វិភាគ​បង្ហាញ​ថា ​កម្មករ​និយោ​ជិតខាត​បង់​ប្រាក់​ឈ្នួល​ប្រមាណ​ ១០០ លាន​ដុល្លារ​ដែល​និយោជក​មិន​ផ្តល់​ឱ្យ​ពួកគាត់​ដោយ​មិន​រួម​បញ្ជូល​ការ​ខាត​បង់​ប្រាក់​អត្ថ​ប្រយោជន៍​ផ្សេង​ទៀត។ ទំហំទឹក​ប្រាក់​ដ៏​ច្រើន​បែប​នេះ​បណ្តាល​ឱ្យ​កម្មករ​និយោ​ជិត​ធ្លាក់​ចុះ​ប្រាក់​ចំណូល​ បណ្តាល​ឱ្យ​ប៉ះ​ពាល់​ដល់​ជីវ​ភាព និង​សេចក្តី​ត្រូវ​ការ​ចាំ​បាច់​ប្រចាំ​ថ្ងៃ​ពួក​គាត់ ដែល​កំពុង​រង​​គ្រោះ​​ដោយ​សារ​វិបត្តិ​ជំងឺ​កូវីដ​១៩។ អង្គការ​សង​ត្រាល់​ក៏​គ្រោងផ្សព្វ​ផ្សាយ​របាយ​ការណ៍​ និង​ដាក់​លិខិត​ទៅ​ក្រុម​ហ៊ុន​បញ្ជា​ទិញ​នា​ពេល​ខាងមុខ​នេះ ដើម្បី​ជំរុញ​ក្រុម​ហ៊ុន​បញ្ជា​ទិញ​យក​ចិត្ត​ទុក​ដាក់​លើ​ប្រាក់​ឈ្នួល បញ្ហាសុខ​ភាព​សុវត្ថិ​ភាព ជីវភាព​សម្រាប់​កម្មករ​អំឡុង​ពេល​កូវីដ​១៩។

ក្រុម​កម្មករ​ស្នើ​ឱ្យ​​រដ្ឋា​ភិ​បាល​​​ និង​​ស្ថាប័ន​ពាក់​ព័ន្ធ​យក​​​ចិត្ត​​​​ទុក​​​​ដាក់​​​ឲ្យ​​​​បាន​​​​ខ្ពស់​ជុំ​វិញ​សុវត្ថិ​ភាព​ និង​​ជីវ​​ភាព​​របស់​​​ពួក​​​គាត់ ក្នុង​​ស្ថាន​​ភាព​​​ដ៏​​លំបាក​​​នេះ។ លើសពី​នេះ​ពួក​គាត់​ក៏​ទទូច​ដល់​រដ្ឋា​​ភិបាល​​​ផ្តល់​​ជំនួយ​​គាំ​​ពារ​​សង្គម និង​ជួយ​ការ​ពារ​​ផល​​ប្រយោជន៍​ការ​ងារ​​​របស់​កម្មករ​​ ដើម្បី​ធានា​ថា ​​ពួក​​​គាត់​​​អាច​​រស់​​នៅ​​បាន​​ដោយ​​សម​​រម្យ​​​អំឡុង​ពេល​ស្ថាន​ភាព​ការងារ​មិន​ច្បាស់​លាស់​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល