គ្រួសារកុមាររងគ្រោះពីការលិចទូកដទាំង១១ នាក់គ្រោងពិភាក្សាគ្នា ដើម្បីដាក់ពាក្យបណ្ដឹងស្វែងរកយុត្តិធម៌ក្នុងពេលឆាប់ៗ។ មន្ត្រីអង្គការសង្គមស៊ីវិលយល់ឃើញថា អាជ្ញាធរខេត្តកណ្ដាល ត្រូវតែទទួលខុសត្រូវ ក្នុងករណីលិចទូកដរបណ្ដាលឱ្យស្លាប់កុមារ ជាសិស្សានុសិស្សទាំង១១នាក់នេះ។
សាច់ញាតិកុមាររងគ្រោះដោយសារការលិចទូកដស្លាប់នៅខេត្តកណ្ដាល លើកឡើងថា ពួកគាត់ មិនទាន់ទទួលបានយុត្តិធម៌នៅឡើយទេរហូតមកដល់ពេលនេះ។
ឪពុកកុមារ ភារម្យ ដាវីន ដែលបានស្លាប់ដោយសារការលិចទូកដ គឺលោក យ៉ែម ភារម្យ ប្រាប់វិទ្យុអាស៊ីសេរីថា នៅថ្ងៃទី១៩ ខែតុលា គ្រួសារសពកុមារទាំង១១នាក់បានធ្វើបុណ្យប្រាំពីរថ្ងៃរួមគ្នានៅវត្ត គិរីរតនារាម ហៅវត្តកំពង់ភ្នំក្នុង។ លោក យ៉ែម ភារម្យ បន្ថែមថា រហូតមកដល់ថ្ងៃនេះ គ្រួសាររបស់លោកនៅតែសោកស្ដាយចំពោះការបាត់បង់កូនប្រុស។ លោកថា នឹងពិភាក្សាជាមួយគ្រួសារកុមាររងគ្រោះដទៃទៀត ដើម្បីដាក់ពាក្យបណ្ដឹងរកយុត្តិធម៌ក្នុងពេលឆាប់ៗ៖ «ខ្ញុំនឹងជំនុំគ្នាជាមួយគ្រួសារទាំង១១សពហ្នឹង ប៉ុន្តែរឿងហ្នឹងមិនទាន់បញ្ចប់ទេព្រោះ ការងារវាបាត់បង់អាយុជីវិតកូនគ្រប់គ្នា ឱ្យត្រូវបាត់បង់ស្រួលយ៉ាងនេះ គឺដូចជាស្រួលពេកហើយ យុត្តិធម៌នឹងត្រូវតែរកទៅលើម្ចាស់ទូកដ។
រហូតមកទល់ពេលនេះ គេនៅមិនទាន់ឃើញមានអាជ្ញាធររដ្ឋ ចេញមុខទទួលខុសត្រូវចំពោះការលិចទូកបណ្តាលឲ្យស្លាប់សិស្សសាលា១១នាក់និងរបួស៤នាក់ កាលពីថ្ងៃទី១៣ ខែតុលានៅឡើយទេ ក្រៅតែពីចាប់ខ្លួនម្ចាស់អាជីវកម្មទូកដ២នាក់ ឈ្មោះ ឆឹង ស្រីនាង អាយុ៦៣ឆ្នាំ និងឈ្មោះ ឆឹង វណ្ណា អាយុ៥២ឆ្នាំ និងក្មេងប្រុសអ្នកបើកទូកម្នាក់អាយុ១៥ឆ្នាំ។ ប៉ុន្តែចុងក្រោយតុលាការ បានដោះលែងអ្នកទាំង៣ឲ្យនៅក្រៅឃុំបណ្ដោះអាសន្នវិញនោះ។ លើសពីនេះ គ្រួសារជនរងគ្រោះ ក៏មិនទាន់ទទួលបានសំណង់រដ្ឋប្បវេណីមួយរៀលពីម្ចាស់ទូក ឬរដ្ឋាភិបាលឡើយ ប៉ុន្តែបានទទួលលុយជំនួយមនុស្សធម៌ខ្លះពីអាជ្ញាធរ និងសប្បុរសជន។
ឆ្លើយតបនឹងការលើកឡើងនេះ មេប៉ុស្តិ៍ឃុំកំពង់ភ្នំ ស្រុកលើកដែក ខេត្តកណ្ដាល លោក តុង ទីន ប្រាប់វិទ្យុអាស៊ីសេរីនៅថ្ងៃទី១៩ តុលាថា ព្រះរាជអាជ្ញាអមសាលាដំបូងខេត្តកណ្ដាល បានដោះលែងឱ្យម្ចាស់ទូកដ និងអ្នកបើកទូកដ ឱ្យនៅក្រៅឃុំជាបណ្ដោះអាសន្ន និងរង់ចាំនីតិវិធីដោះស្រាយតាមក្រោយ កាលពីថ្ងៃទី១៥ ខែតុលា ។ លោក តុង ទីន បន្ថែមថា អាណាព្យាបាលសិស្សដែលស្លាប់នោះមិនអាចបន្ទោសលើអាជ្ញាធរបានឡើយចំពោះករណីស្លាប់កុមារទាំងនេះ ព្រោះកន្លងមកអាជ្ញាធរក៏បានគិតគូរពីសុវត្ថិភាពក្នុងការធ្វើដំណើររបស់ប្រជាពលរដ្ឋក្នុងឃុំនេះដែរ៖ « ការគិតគូររបស់អាជ្ញាធរ យើងអត់មានអីត្រូវបន្ទោសទេ អាជ្ញាធរតាំងពីថ្នាក់ភូមិ ដល់ថ្នាក់ខេត្តគឺគិតគូរដល់ប្រជាពលរដ្ឋទីមួយ ទីពីរ ទាក់ទងជាមួយនឹងគម្រោងហ្នឹងយើងបានសិក្សាដែរ កំពុងរៀបចំធ្វើស្ពានហ្នឹងណា »។
នៅកម្ពុជា មានហេតុការណ៍អកុសលជាច្រើនកើតឡើង ដែលត្រូវបានគេចោទសួរថា តើអ្នកណាទទួលខុសត្រូវ ដូចជាករណីហេតុការណ៍លិចទូកនេះជាឧទាហរណ៍ស្រាប់។ ជាទូទៅ ថ្នាក់ដឹកនាំ ឬអាជ្ញាធរដែនដី តែងតែលើកហេតុផលយករួចខ្លួន និងទម្លាក់កំហុសទៅលើអ្នកដទៃវិញដោយមិនដែលបានបង្ហាញការទទួលខុសត្រូវធ្វើជាគំរូឡើយ ទោះបីជាគេដឹងថា ហេតុការណ៍ទាំងនោះ ជាប់ទាក់ទងនឹងការធ្វេសប្រហែស ឬកំហុសវិជ្ជាជីវៈ ក្នុងការរៀបចំរបស់អាជ្ញាធរដែនដីក្តី ឬថ្នាក់ដឹកនាំក្តី។ សង្គមស៊ីវិល និងអ្នកច្បាប់យល់ថា ប្រសិនបើកម្ពុជា មានច្បាប់ទម្លាប់ត្រឹមត្រូវប្រកបដោយការទទួលខុសត្រូវខ្ពស់ ប្រហែលជាមានមន្ត្រីជាច្រើន អាចត្រូវទទួលទោសកំហុស មិនត្រឹមតែម្ចាស់ទូកដនោះទេ ដើម្បីបង្ហាញនូវភាពទទួលខុសត្រូវ និងដើម្បីប៉ះប៉ូវនូវកំហុសវិជ្ជាជីវៈរបស់ខ្លួនដែលអសមត្ថភាពក្នុងការរក្សាសន្តិសុខសុវត្ថិភាពជូនសាធារណជន។
ផ្ទុយពីប្រទេសផ្សេងៗ ដែលមានមេដឹកនាំ ឬមន្ត្រីពាក់ព័ន្ធលាចេញពីតំណែង ឬសម្លាប់ខ្លួនឯងដើម្បីបញ្ជាក់នូវទឹកចិត្តសោកស្ដាយក្រោយពីព្រឹត្តិការណ៍អកុសលណាមួយបានកើតឡើង ដែលក្នុងនោះពួកគេមានចំណែកទទួលខុសត្រូវខាងផ្លូវសីលធម៌ក្ដី ផ្លូវច្បាប់ក្ដី។
ជុំវិញរឿងនេះ សមាជិកក្រុមអ្នកឃ្លាំមើលកម្ពុជា លោក រ៉ុង ឈុន យល់ថា ការស្លាប់របស់កុមារដែលជាសិស្សពេលជិះទូកដត្រឡប់មកពីរៀនវិញនេះ គឺបណ្ដាលមកពីថ្នាក់ដឹកនាំខេត្ត មិនបានយកចិត្តទុកដាក់គ្រប់គ្រាន់គិតគូរពីសុវត្ថិភាពរបស់សិស្សតូចៗទាំងនោះ។ លោកបន្ថែមថា មូលហេតុដែលបណ្ដាលឱ្យសោកនាដកម្មស្លាប់ប្រជាពលរដ្ឋច្រើននាក់នៅតែបន្តកើតមានដូចនេះ គឺបណ្ដាលមកពីអាជ្ញាធរមូលដ្ឋានគេចវេសមិនទទួលខុសត្រូវពីភាពទន់ខ្សោយការងាររបស់ខ្លួនឯង។ លោក រ៉ុង ឈុន ជំរុញឱ្យអភិបាលខេត្តកណ្ដាល លោក គង់ សោភ័ណ្ឌ គួរតែចេញមុខទទួលខុសត្រូវចំពោះសោកនាដកម្មដែលបានកើតឡើងនេះ៖ «ករណីនៅកោះពេជ្រ ករណីលំបាក់អគារនៅកំពង់សោម នៅកែបក្ដី គ្មានឃើញមន្ត្រីចេញទទួលខុសត្រូវរឿងទាំងអស់នេះ រួមទាំងរឿងកុមារទាំង១១នាក់បានលង់ទឹកស្លាប់ថ្មីៗនេះ ហើយយើងចង់ឃើញអ្នកដឹកនាំ ត្រូវមានសេចក្ដីក្លាហានក្នុងការចេញទទួលខុសត្រូវចំពោះមុខបញ្ហាដែលកើតឡើង។
ជាមួយគ្នានេះ មេធាវីការិយាល័យក្រុមអ្នកច្បាប់ និងទីប្រឹក្សាអមរិន្ទលោក សុក សំអឿន ថ្លែងថា ម្ចាស់ទូកដ អាចប្រឈមនឹងការចោទប្រកាន់ពីបទធ្វេសប្រហែសធ្ងន់ធ្ងរ ប្រសិនបើអាជ្ញាធរធ្លាប់បានណែនាំឲ្យពួកគាត់រៀបចំប្រព័ន្ធការពារសុវត្ថិភាពនៅលើទូក ប៉ុន្តែពួកគាត់មិនបានអនុវត្តតាម។ដោយឡែក ប្រសិនបើអាជ្ញាធរ ធ្វេសប្រហែស មិនបានចុះត្រួតពិនិត្យណែនាំម្ចាស់ទូកនោះទេ គឺជារឿងពិបាកក្នុងការចោទប្រកាន់លើម្ចាស់ទូកនិងអ្នកបើកទូក ហើយផ្ទុយទៅវិញ វាអាចជាកំហុសរបស់អាជ្ញាធរ ឬរដ្ឋាភិបាលតែម្តងដែលមិនបានគិតគួរអំពីបញ្ហានេះ។ ទោះជាយ៉ាងណា អ្នកជំនាញច្បាប់រូបនេះ បន្តថា ករណីលិចទូកនេះ ម្ចាស់ទូក និងរដ្ឋាភិបាល ត្រូវទទួលខុសត្រូវផ្តល់សំណងដល់គ្រួសារជនរងគ្រោះ ហើយប្រសិនបើម្ចាស់ទូកនិងរដ្ឋាភិបាល មិនបានផ្តល់សំណងទេ គឺក្រុមគ្រួសារជនរងគ្រោះ មានសិទ្ធិប្តឹងទៅតុលាការ ហើយត្រូវទារសំណងឲ្យច្រើនពីរដ្ឋាភិបាល ច្រើនជាងម្ចាស់ទូក។
កាលពីយប់ថ្ងៃទី១៣ តុលា ទូកដខ្នាតតូចសម្រាប់ចម្លងប្រជាពលរដ្ឋពីភូមិកំពង់ពោធិ និងភូមិអំពិលទឹក ទៅភូមិកោះចំរើន បានលិច និងបណ្តាលឱ្យសិស្ស១១នាក់បានស្លាប់ ។ បន្ទាប់ពីមានករណីលិចទូកចម្លងគួរឱ្យរន្ធត់នេះ ព្រះមហាក្សត្រ រដ្ឋាភិបាល អង្គការជាតិនិងអន្តរជាតិ ព្រមទាំងប្រជាពលរដ្ឋទូទៅ បានផ្ញើសាររំលែកទុក្ខនៅតាមបណ្តេញសង្គមជាបន្តបន្ទាប់ ចំពោះការបាត់បង់ជីវិតកុមារទាំងនេះ។ ករណីលិចទូកបណ្តាលឲ្យមានមនុស្សស្លាប់ទាំងក្រុមៗនេះ បានកើតឡើងជាច្រើនលើកមកហើយ ប៉ុន្តែរដ្ឋាភិបាល ហាក់មិនបានចាត់វិធានការទប់ស្កាត់រឿងនេះឲ្យមានប្រសិទ្ធភាព ដោយបណ្តោយឲ្យទូកចម្លងដែលគ្មានប្រព័ន្ធសុវត្ថិភាពត្រូវបន្តដំណើរការដដែល។ លើសពីនេះ នៅពេលមានហេតុការណ៍កើតឡើង ប្រជាពលរដ្ឋ សង្កេតឃើញថា អាជ្ញាធរ ហាក់យឺតយ៉ាវគ្មានជំនាញ និងគ្មានឧបករណ៍គ្រប់គ្រាន់ក្នុងការជួយសង្គ្រោះឡើយ ដោយភាគច្រើនបានត្រឹមតែឈរមើលមុខគ្នា រង់ចាំទទួលសាកសព។
ទោះជាយ៉ាងណា ក្រុមគ្រួសាររបស់ជនរងគ្រោះ និងសង្គមស៊ីវិល សង្ឃឹមថា ម្ចាស់អាជីវកម្មទូកដ និងរដ្ឋាភិបាល ត្រូវទទួលខុសត្រូវចំពោះការស្លាប់នេះ ព្រមទាំងចាត់វិធានការពង្រឹងប្រព័ន្ធសុវត្ថិភាពសម្រាប់ការពារជីវិតអ្នកធ្វើដំណើរឆ្លងទូកដ ឬសាឡាង ដើម្បីកុំឲ្យមានព្រឹត្តិការណ៍ដ៏រន្ធត់សោកសៅនេះកើតឡើងម្តងហើយម្តងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។