ក្រុមគ្រួសារសកម្មជនគណបក្សភ្លើងទៀនរិះគន់អាជ្ញាធរពន្ធនាគារខេត្តពោធិ៍សាត់ថា ប្រព្រឹត្តអំពើពុករលួយដែលធ្វើឱ្យប៉ះពាល់ដល់សិទ្ធិអ្នកជាប់ឃុំ និងជីវភាពគ្រួសារពួកគេជាខ្លាំង។ មន្ត្រីសិទ្ធិមនុស្សជំរុញអាជ្ញាធរពាក់ព័ន្ធចុះស្រាវជ្រាវដោយតម្លាភាព និងយុត្តិធម៌ ដើម្បីទប់ស្កាត់អំពើពុករលួយ និងការគាបសង្កត់លើសេដ្ឋកិច្ចរបស់គ្រួសារជនជាប់ឃុំដែលមានជីវភាពក្រីក្រស្រាប់នោះ។
គ្រួសារសកម្មជនបក្សប្រឆាំងនៅខេត្តពោធិ៍សាត់ស្នើដល់អាជ្ញាធរពាក់ព័ន្ធទប់ស្កាត់អំពើពុកលួយនៅពន្ធនាគារខេត្តនេះឱ្យមានប្រសិទ្ធភាព។
កូនប្រុសសកម្មជនគណបក្សភ្លើងទៀនដែលកំពុងជាប់ពន្ធនាគារខេត្តពោធិ៍សាត់ លោក អ៊ុក សៅវ៉ារិន គឺលោក អ៊ុក សៅសុភារ៉ា ប្រាប់វិទ្យុអាស៊ីសេរីនៅថ្ងៃទី១៨ ខែមីនាថា ឪពុករបស់លោកតែងតែផ្តាំផ្ញើដល់កូនចៅឱ្យទៅជួបនិងផ្ញើបាយម្ហូបជូនគាត់ឱ្យបានញឹកញាប់ ដោយសារបាយម្អូបនៅក្នុងគុកពិបាកហូប ហើយទំនិញវិញក៏ថ្លៃហួសប្រមាណ។ ប៉ុន្តែលោកថា រយៈពេលចុងក្រោយមកនេះមូលហេតុដែលលោកពុំសូវទៅសួរសុខទុក្ខ ឬផ្ញើចំណីអាហារជូនឪពុកឱ្យបានដិតដល់ដូចពីមុននោះ ដោយសារលោកគ្មានប្រាក់បង់ថ្លៃស៊ីម៉ង់១ប៉ាវ ស្មើនឹង២ម៉ឺនរៀលឱ្យទៅមន្ត្រីពន្ធនាគារនៅទីនោះ។ លើសពីនេះលោកអះអាងថា មន្រ្តីពន្ធនាគារដែលបានដឹកឪពុកចូលសវនាការនៅសាលាឧទ្ធរណ៍បាត់ដំបងកន្លងទៅក៏ធ្លាប់ទារថ្លៃសាំងពីឪពុករបស់លោកចំនួន៥០ដុល្លារ និងថ្លៃហូបចុកថែមទៀតផង។ លោក អ៊ុក សៅសុភារ៉ា ឱ្យដឹងថា ដោយសារការប្រព្រឹត្តអំពើពុករលួយរបស់មន្ត្រីពន្ធនាគារបែបនេះទើបឪពុករបស់លោកបានសម្រេចមិនប្តឹងជំទាស់នឹងសាលដីកាសាលាឧទ្ធរណ៍ទៅតុលាការកំពូលបន្តទៀតឡើយ ពីព្រោះជីវភាពគ្រួសារខ្វះខាត ហើយគាត់មិនសង្ឃឹមថា នឹងទទួលបានយុត្តិធម៌។
លោក អ៊ុក សៅសុភារ៉ា៖«ការយកកម្រៃពីការចូលជួបរបស់ក្រុមគ្រួសារនៅក្នុងពន្ធនាគារវាពិតជាមានផលប៉ះពាល់ណាស់ចំពោះអ្នកដែលមានក្រុមគ្រួសារជាប់ឃុំ ហើយរឿងផ្ញើរបស់របរប្រើប្រាស់ចូលក្នុងពន្ធនាគារសូមអស់លោកបើកទូលំទូលាយកុំឱ្យមានការរឹតបន្តឹងដោយសារតែមានការលក់ដូរនៅខាងក្នុងចំពោះការរកស៊ីរបស់អស់លោកបែរជាធ្វើឱ្យបាត់បង់សិទ្ធិ និងប្រយោជន៍របស់អ្នកជាប់ឃុំ»។
ស្រដៀងគ្នានេះប្រពន្ធសកម្មជនគណបក្សភ្លើងទៀនម្នាក់ទៀត ដែលកំពុងជាប់ឃុំលោក ឈួន ឈឿង គឺលោកស្រី ជូ ឈឿន ថ្លែងថាមកដល់ពេលនេះប្តីរបស់លោកស្រីកំពុងជាប់ឃុំអស់រយៈពេលមួយឆ្នាំដោយអយុត្តិធម៌។ លោកស្រីរៀបរាប់ថា បច្ចុប្បន្នលោកស្រី និងកូនៗ ក្រៅពីរងទុក្ខសោកលាយឡំនឹងជីវភាពទីទាល់ក្រហើយនោះ លោកស្រីត្រូវផ្សែផ្សំប្រាក់បន្តិចបន្តូចសម្រាប់ផ្ញើជូនប្តីជាប្រចាំខែ។ ប៉ុន្តែប្រពន្ធសកម្មជនបក្សប្រឆាំងរូបនេះថា អ្វីដែលអ្នកស្រីខកចិត្តខ្លាំងនោះ គឺដោយសារឆ្មាំពន្ធនាគារតែងតែកម្រិតឱ្យអ្នកស្រី និងគ្រួសារជនជាប់ឃុំផ្សេងទៀតត្រូវបង់ប្រាក់នៅកន្លងចុះឈ្មោះចំនួន៥ពាន់រៀល និងកន្លែងត្រួតពិនិត្យចំនួន២ម៉ឺនរៀលក្នុងម្នាក់ដើម្បីជាថ្នូរនឹងការអនុញ្ញាតឱ្យចូលសួរសុខទុក្ខអ្នកជាប់ឃុំនៅទីនោះ។ លោកស្រី ជូ ឈឿន អះអាងថា លោកស្រីចង់ដាក់ពាក្យប្តឹងករណីនេះដើម្បីស្នើឱ្យស្ថាប័នពាក់ព័ន្ធជួយអន្តរាគមន៍ដែរ ប៉ុន្តែអ្នកស្រីមិនដឹងទៅដាក់ពាក្យប្តឹងនៅកន្លែងណានោះទេ។
លោកស្រី ជូ ឈឿន៖ «ម្នាក់ឡើងយំជួយកាលអ្នកទៅអត់លុយថ្ងៃមុននេះ តាចាស់ម្នាក់គាត់ទៅជាមួយខ្ញុំ គាត់អត់លុយមិនបានទៅជួបកូនហើយក៏ទៅវិញ ខ្ញុំអត់មានភូតភរកុហកចោទប្រកាន់គេនោះទេ បើធ្វើហួសពេកអ៊ីចឹងដូចអយុត្តិធម៌ណាស់ មន្ត្រីនៅនោះប្រាក់ក៏មាន លុយក៏មាន ចុះហេតុអ្វីយកលុយអ្នកជាប់ទោសតើគ្រួសាររកលុយពីណា ហើយណាមួយប្តីជាប់ពន្ធនាគារ ហើយទៅទារលុយគ្នាយ៉ាងហ្នឹង»។
វិទ្យុអាស៊ីសេរីមិនអាចទាក់ទងប្រធានពន្ធនាគារខេត្តពោធិ៍សាត់លោក អ៊ី សំអុល ដើម្បីបកស្រាយជុំវិញរឿងនេះបានទេនៅថ្ងៃទី១៨ ខែមីនា។
ប៉ុន្តែអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សវនា បកស្រាយថាតាមច្បាប់ការផ្ញើសម្ភារៈ និងការចូលសួរសុខទុក្ខ ឬការដឹកជញ្ជូនជនជាប់ឃុំចូលសវនាការជាដើមមិនតម្រូវឱ្យបង់ប្រាក់ទេ ហើយបើមន្ត្រីពន្ធនាគារប្រព្រឹត្តទង្វើបែបនោះ គឺជាទង្វើខុសច្បាប់។ លោក នុត សវនា ជំរុញឱ្យគ្រួសាររាយការណ៍មកអគ្គនាយកដ្ឋានពន្ធនាគារ ឬសរសេរពាក្យប្តឹងភ្ជាប់អង្គហេតុឱ្យបានត្រឹមត្រូវផ្ញើចូលហ្វេសប៊ុករដ្ឋមន្ត្រីក្រសួងមហាផ្ទៃលោក ស ខេង ដើម្បីស្នើសុំអន្តរាគមន៍ដោះស្រាយ។
លោក នុត សវនា៖«គឺគេមិនតម្រូវឱ្យយកប្រាក់លើសេវាសាធារណៈរបស់ខ្លួន ហើយយើងទៅទារលុយគេ ហ្នឹងស្មើនឹងយើងមិនបំពេញតួនាទីដោយស្របច្បាប់បាត់ហើយ។ អគ្គនាយកដ្ឋានពន្ធនាគារធ្លាប់អំពាវនាវបើសិនមានករណីមន្រ្តីណាជំរិតទារប្រាក់នៅពេលណាក្រុមគ្រួសារទៅសួរសុខទុក្ខ ឬផ្ញើឥវ៉ាន់ចូលហ្នឹងឱ្យគាត់ប្រាប់ឈ្មោះ អត្តលេខមន្ត្រីហ្នឹងឱ្យមកអគ្គនាយកដ្ឋានពន្ធនាការដើម្បីយើងមានវិធានការ»។
ទោះជាមានការបកស្រាយបែបនេះពីមន្ត្រីជាន់ខ្ពស់ពន្ធនាគារយ៉ាងណាក្តី ក៏កន្លងមកសកម្មជននយោបាយ សកម្មជនការពារសិទ្ធិមនុស្សក្រោយចេញពីពន្ធនាគារធ្លាប់រិះគន់ភាពអសកម្មនានាដែលកើតឡើងក្នុងពន្ធនាគារអំឡុងពេលពួកគេជាប់ឃុំ ដូចជាបញ្ហាពុករលួយ ការគំរាមកំហែង កង្វះអនាម័យ ភាពចង្អៀតណែន ទំនិញក្នុងគុកថ្លៃហួសប្រមាណជាដើម។
ជុំវិញរឿងនេះ អ្នកឃ្លាំមើលការរំលោភសិទ្ធិមនុស្សនៃអង្គការលីកាដូ (Licadho) ប្រចាំខេត្តពោធិ៍សាត់ លោក ចឹក ចិត្ត្រា មានប្រសាសន៍ថា គ្រួសារអ្នកជាប់ឃុំតែងតែត្អូញត្អែរជុំវិញអំពើពុករលួយនៅក្នុងពន្ធនាគារខេត្តជាបន្តបន្ទាប់ ស្របពេលពួកគាត់មានជីវភាពក្រីក្រ។ លោកទទូចដល់ក្រសួងមហាផ្ទៃគួរចុះស៊ើបអង្កេតឱ្យបានច្បាស់លាស់ដើម្បីស្វែងរកការពិត និងទប់ស្កាត់អំពើពុករលួយឱ្យទាន់ពេលវេលា។
លោក ចឹក ចិត្ត្រា៖«ទាក់ទងជីវភាពអ្នកជាប់ឃុំនៅតាមពន្ធនាគារនីមួយៗសុទ្ធសឹងតែមានភាពលំបាកសម្រាប់ជីវភាពរបស់ពួកគាត់ អ៊ីចឹងទេ បើសិនមានបែបនេះយើងគួរពិនិត្យពិចារណា ហើយរឿងទាំងអស់ហ្នឹងបើសិនកើតមានអ៊ីចឹងមែនជារឿងមួយធ្វើឱ្យជនជាប់ឃុំជាពិសេសសកម្មជននយោបាយទទួលរងភាពអយុត្តិធម៌បន្ថែមទៀត»។
បច្ចុប្បន្នមានសកម្មជនបក្សភ្លើងទៀនខេត្តពោធិ៍សាត់ចំនួនពីរនាក់កំពុងជាប់ពន្ធនាគារ គឺបេក្ខជនក្រុមប្រឹក្សាឃុំអន្សាចំបក់ ស្រុកក្រគរ លោក អ៊ុក សៅវ៉ារិន និងបេក្ខជនមេឃុំស្រែស្តុក ស្រុកកណ្ដៀងលោក ឈួន ឈឿង។ ពួកគាត់ត្រូវបានអាជ្ញាធរខេត្តពោធិ៍សាត់ចាប់ឃុំខ្លួននៅដើមខែមីនា ឆ្នាំ២០២២ ពាក់ព័ន្ធការរៀបចំបញ្ជីដាក់ពាក្យបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ អាណត្តិទី៥ ហើយក្រោយមកសាលាដំបូងខេត្តនេះបានផ្ដន្ទាទោសពួកគាត់ដាក់ពន្ធនាគារម្នាក់២ឆ្នាំ ពីបទ «ក្លែងបន្លំឯកសារសាធារណៈ»។
ទោះជាយ៉ាងណា សហគមន៍ជាតិ និងអន្តរជាតិបានចាត់ទុករឿងក្ដីក្ដាំទាំងនេះ ថាជាការធ្វើទុក្ខបុកម្នេញផ្នែកនយោបាយ និងថ្កោលទោសរដ្ឋាភិបាលលោក ហ៊ុន សែន ចំពោះការប្រើប្រាស់ប្រព័ន្ធតុលាការ ដើម្បីបង្ក្រាបសំឡេងគណបក្សភ្លើងទៀន ដែលលេចធ្លោ និងអាចជាដៃគូប្រកួតប្រជែងជាមួយបក្សកាន់អំណាច។ ទន្ទឹមនឹងនេះ ពួកគេទាមទារឱ្យរដ្ឋាភិបាលលោក ហ៊ុន សែន ដោះលែងសកម្មជនទាំងនោះដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។