អ្នកស្នាក់​នៅ​​តាម​​បែរ​​ចិញ្ចឹម​ត្រី​ និង​​​ផ្ទះ​បណ្ដែត​ទឹក​ មិន​ទាន់​​មាន​ផែនការ​​រើ​ចេញ​​​ទេ​​

ដោយ ទីន ហ្សាការីយ៉ា
2021-06-07
Share
អ្នកស្នាក់​នៅ​​តាម​​បែរ​​ចិញ្ចឹម​ត្រី​ និង​​​ផ្ទះ​បណ្ដែត​ទឹក​ មិន​ទាន់​​មាន​ផែនការ​​រើ​ចេញ​​​ទេ​​ បែរចិញ្ចឹមត្រីនិងផ្ទះបណ្តែតទឹករបស់ពលរដ្ឋវៀតណាមនៅលើផ្ទៃទឹកទន្លេសាប រាជធានីភ្នំពេញ។
រូប៖ គេ​ផ្ដល់​ឱ្យ

នៅ​សល់​តែ​២​ថ្ងៃ​ទៀត​ទេ នឹង​ដល់​កាល​កំណត់​រយៈ​ពេល​នៃ​ការ​តម្រូវ​ឲ្យ​រុះរើ​បែរ​ចិញ្ចឹម​ត្រី និង​ផ្ទះ​បណ្ដែត​ទឹក​ចេញ​ឲ្យ​អស់​ពី​​ផ្ទៃ​ទន្លេ​ក្នុង​ភូមិ​សាស្ត្រ​រាជធានី​ភ្នំពេញ​ហើយ។

ប៉ុន្តែ​តំណាង​ពលរដ្ឋ​វៀតណាម ដែល​រស់​នៅ​លើ​ផ្ទៃ​ទន្លេ​នៅ​តែ​រក្សា​ជំហរ​​គ្មាន​លទ្ធភាព​រើ​ចេញ​ឲ្យ​ទាន់​ពេល​ទេ។​ ប្រធាន​សមាគម​វៀតណាម​នៅ​កម្ពុជា លោក ស៊ឹម ជឺ ប្រាប់​អាស៊ី​សេរី​ថា ​ខាង​សមាគម​បាន​ដាក់​សំណើ​ទៅ​​អាជ្ញាធរ​រាជធានី​ភ្នំពេញ​រួច​ហើយ ដើម្បី​​ស្នើសុំ​ពន្យារ​ពេល​ក្នុង​លក្ខណៈ​ប្រសើរ​ណា​មួយ និង​កំពុង​រង់ចាំ​ចម្លើយ​តប​ពី​អាជ្ញាធរ។ លោក អះអាង​ថា ពលរដ្ឋ​វៀតណាម​ដែល​រស់​នៅ​លើ​ផ្ទះ​បណ្ដែត​ទឹក​ក្នុង​ភូមិ​សាស្ត្រ​​រាជធានី​ភ្នំពេញ​​ទាំងអស់ មាន​ជាង​មួយ​ពាន់ (១.០០០)​ផ្ទះ។​ លោក បន្ត​ថា​ពួកគាត់​​គ្មាន​លទ្ធភាព​​រើ​ចេញ​ទាន់​ពេល​វេលា​ទេ ហើយ​ក៏​មិន​ដឹង​ថា ​ត្រូវ​រើ​ទៅ​ណា​ដែរ ព្រោះ​គ្មាន​កន្លែង​សម្រាប់​រើ​ទៅ​​ទេ។ ​លោក បញ្ជាក់​ទៀត​ថា អ្នក​ទាំង​នោះ ភាគច្រើន​គឺ​ស្នាក់នៅ​ និង​ប្រកប​មុខ​របរ​ចិញ្ចឹម​ត្រី​តាម​បែរ​លើ​ទន្លេ​សាប នៅ​ភ្នំពេញ​ច្រើន​ឆ្នាំ​មក​ហើយ ដូច្នេះ​ពួកគាត់​មិន​ដឹង​ត្រូវ​រើ​ចេញ​ទៅ​ណា​ទេ។

លោក​ ស៊ឹម ជឺ ឲ្យ​ដឹង​ទៀត​ថា ក្នុង​នោះ ក៏​មាន​ផ្ទះ​បណ្ដែត​ទឹក​របស់​​ជនជាតិ​វៀតណាម​​ខ្លះ​ទៀត ប្រហែល​​មួយ​​រយ​(១០០)​ ផ្ទះ បាន​ចល័ត​​​​ពី​ខេត្ត​កំពង់ឆ្នាំង ចូល​មក​ភ្នំពេញ នៅ​ពេល​ថ្មីៗនេះ។ ​​លោក​ប្រាប់​ថា ​ការ​ចល័ត​នេះ​​ដោយសារ​អាជ្ញាធរ​ខេត្ត​កំពង់ឆ្នាំង​បាន​បណ្ដេញ​​ពួកគេ​ចេញ​ពី​ទីតាំង​ធ្លាប់​រស់​នៅ​ដែរ៖ «ដោយសារ​បងប្អូន​ដែល​គាត់​រស់​នៅ​ទី​ហ្នឹង ច្រើន​ឆ្នាំ​មក​ហើយ ហើយ​បើ​សិន​ជា​យើង​ឲ្យ​គាត់​រក​ទីតាំង​ថ្មី​​ទាល់​តែ​ឲ្យ​គាត់​ហ្នឹង​ត្រៀម​លក្ខណៈ​ត្រឹមត្រូវ ព្រោះ​អ្វី​ត្រី​បែរ​ប្រសិន​ជា​យើង​ឲ្យ​គាត់​បម្លាស់​ទៅ​ទី​កន្លែង​គាត់​ចាស់​ចេញ​ទៅ​ វា​មាន​ការ​ខូច​ខាត​ច្រើន។​អ៊ីចឹង​​សំណើ​យ៉ាង​ម្ដេច​ឲ្យ​សាលា​រាជធានី​ភ្នំពេញ មើល​តាម​ខណៈ​ណា​ឲ្យ​សម​ស្រប​ឲ្យ​បង​ប្អូន​បាន​ចេញ​ទៅ​ អ៊ីចឹង​ណា»។​​​​

លោក ស៊ឹម ជឺ ដដែល​ទទួល​ស្គាល់​ថា​​ អ្នក​រស់​នៅ​លើ​ផ្ទះ​បណ្ដែត​ទឹក​​មួយ​ចំនួន បាន​ធ្វើ​ឲ្យ​ប៉ះពាល់​ដល់​បរិស្ថាន​មែន​ ដោយសារ​ពួកគេ​​មិន​យល់​ដឹង​ពី​បញ្ហា​ទាំង​នេះ​។​​តែ​យ៉ាង​ណា​ លោក​ថា ​ខាង​សមាគម​បាន​អំពាវនាវ​​ឲ្យ​​​អ្នក​ចិញ្ចឹម​ត្រី​តាម​បែរ​ទាំងអស់​​​ចូលរួម​ជាមួយ​អាជ្ញាធរ​មូលដ្ឋាន​ដើម្បី​ថែ​រក្សា​បរិស្ថាន​រួម​។ 

ជាមួយ​គ្នា​នេះ ​​ស្ថានទូត​វៀតណាម​ប្រចាំ​នៅ​កម្ពុជា​ និង​សមាគម​ខ្មែរ​ឥស្លាម​ បាន​ទាមទារ​ឲ្យ​​រដ្ឋាភិបាល​កម្ពុជា​ពន្យារ​ពេល​​​ការ​បណ្ដេញ​ផ្ទះ​បណ្ដែត​ទឹក​ និង​បែរ​ចិញ្ចឹម​ត្រី​របស់​​ជនជាតិ​​វៀតណាម​ និង​​ជនជាតិ​​ចាម​សិន ព្រោះ​ពួកគេ​កំពុង​ជួប​ការ​លំបាក​​ខ្លាំង​​ក្នុង​បរិបទ​ការ​រាតត្បាត​ជំងឺ​​កូវីដ១៩(Covid-19)ជុំវិញ​បញ្ហា​នេះ​​​ អាស៊ី​សេរី​​មិន​អាច​សុំ​ការ​បញ្ជាក់​បន្ថែម​ពី​​អាជ្ញាធរ​រាជធានី​ភ្នំពេញ​ លោក ឃួង ស្រេង និង​ លោក ម៉េត មាស​ភក្ដី​ បាន​ទេ​នៅ​ថ្ងៃ​ទី​០៧​មិថុនា។​ប៉ុន្តែ លោក​ ឃួង ស្រេង​ បាន​ប្រាប់​សារព័ត៌មាន​ក្នុង​ស្រុក​(khmernas.com)​ថា អាជ្ញាធរ នៅ​តែ​តម្រូវ​ឲ្យ​រុះរើ​ផ្ទះ​បណ្ដែត​ទឹក និង​បែរ​ចិញ្ចឹម​ត្រី​ឲ្យ​អស់​​តាម​កាលកំណត់​ ព្រោះ​ការ​​​ពន្យារ​ពេល​​​​នឹង​ធ្វើ​ឲ្យ​​​ខូច​ប្រយោជន៍​ពលរដ្ឋ​ពី​ ៣​ ទៅ ​៤ ​លាន​នាក់។

ចំណែក​សមាជិក​​សម្ព័ន្ធ​ប្រជា​នេសាទ​កម្ពុជា លោក ភួង​ ហ៊ីង ​គាំទ្រ​វិធានការ​របស់​សាលា​ក្រុង តែ​លោក អះអាង​ថា​តាម​បទ​ពិសោធន៍​ការ​ចល័ត​​​​​បែរ​ចិញ្ចឹម​ត្រី​​ចេញ​ ត្រូវ​ប្រើ​ពេល​ប្រហែល​កន្លះ​ខែ​ ទៅ​មួយ​ខែ​ទើប​អាច​រុះរើ​​ទាន់​។​ លោក​​ បន្ត​ថា​ប្រសិន​បើ​អាជ្ញាធរ​​ពិត​ជា​ចង់​បណ្ដេញ​ផ្ទះ​ទាំង​​ក្នុង​រយៈ​ពេល​មួយ​សប្ដាហ៍​មែន គឺ​មាន​តែ​ជម្រើស​អូស​សណ្ដោង​​បែរ និង​ផ្ទះ​ទាំង​នោះ ចល័ត​ចេញ​ទើប​ទាន់៖ «មាន​តែ​វិធី​មួយ​ទេ​ដែល​លឿន​មួយ​អាទិត្យ​អស់ មាន​តែ​វិធី​មួយ​គាត់ មាន​តែ​វិធី​សណ្ដោង​ផ្ទះ​ ហ្នឹង​ចេញ​ឲ្យ​ផុត​រាជធានី​ភ្នំពេញ​មក រួច​ហើយ​ឲ្យ​​វា​រើ​​បណ្ដើរ​មក​ អា​ហ្នឹង​មាន។ ខ្ញុំ​មើល​ដែរ​​ព័ត៌មាន​ហ្នឹង​ខ្ញុំ​មើល​ដែរ គេ​អត់​មាន​ចេញ​សំណង​អ្វី​ទាំង​អស់​ណា»។

សាលា​រាជធានី​ភ្នំពេញ ​​​​​បាន​​ជូនដំណឹង​​​ឲ្យ​អ្នក​រស់នៅ​លើ​បែរ​ចិញ្ចឹម​​ត្រី ផ្ទះ​បណ្តែត​ទឹក​ចល័ត ផ្ទះ​ទូក​តូចៗ និង​សំណង់​មិន​រៀបរយ​លើ​ផ្ទៃ​ទន្លេសាប ក្នុង​​ភូមិ​សាស្ត្រ​រាជធានី​ភ្នំពេញ​ត្រូវ​រុះរើ និង​ចល័ត​ចេញ​ជា​បន្ទាន់​ក្នុង​រយៈពេល​មួយ​សប្ដាហ៍​ គិត​ពី​ថ្ងៃ​ទី​០២​មិថុនា​ទៅ​ បើ​ពុំ​ដូច្នោះ​ទេ​អាជ្ញាធរ​នឹង​មាន​វិធានការ​ច្បាប់​។

ពាក់ព័ន្ធ​បញ្ហា​នេះ អាជ្ញាធរ​រាជធានី​ភ្នំពេញ មិន​បាន​បង្ហាញ​តួលេខ​​អ្នក​ស្នាក់នៅ​លើ​ផ្ទះ​បណ្ដែត​ទឹក​​​មាន​ទាំងអស់​ចំនួន​ប៉ុន្មាន​ទេ។​​តែ​​ភាគច្រើន​នៃ​អ្នក​កំពុង​ស្នាក់នៅ​​ ជាង​មួយ​ពាន់ (១.០០០)​គ្រួសារ​នោះ ​គឺជា​ជនជាតិ​វៀតណាម និង​ជនជាតិ​ចាម៕​​​​​​​​

​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល