គណបក្ស​ប្រជាធិបតេយ្យ​មូលដ្ឋាន​ធ្វើ​បុណ្យ​គម្រប់​ខួប​១​ឆ្នាំ​រំឭក​ដល់​បណ្ឌិត កែម ឡី

ដោយ ឡេង ម៉ាលី
2017.07.09
Share on WhatsApp
Share on WhatsApp
ខួប​១​ឆ្នាំ​បណ្ឌិត កែម ឡី ២០១៧ ១៤៤០ គណបក្ស​ប្រជាធិបតេយ្យ​មូលដ្ឋាន (GDP) ធ្វើ​ពិធី​រំឭក​ខួប​គម្រប់ ១​ឆ្នាំ​ឧទ្ទិស​កុសល​ចំពោះ​វិញ្ញាណក្ខន្ធ​លោក​បណ្ឌិត កែម ឡី នា​ទីស្នាក់ការ​គណបក្ស​នៅ​ព្រឹក​ថ្ងៃ​ទី​៩ ខែ​កក្កដា ឆ្នាំ​២០១៧។
RFA/Tep Sony

គណបក្ស​ប្រជាធិបតេយ្យ​មូលដ្ឋាន នៅ​ថ្ងៃ​ទី​៩ កក្កដា រៀបចំ​ពិធី​បុណ្យ​គម្រប់​ខួប ១​ឆ្នាំ ដើម្បី​ឧទ្ទិស​កុសល​ជូន​លោក​បណ្ឌិត កែម ឡី ដែល​ត្រូវ​ឃាតក​បាញ់​សម្លាប់​នៅ​ថ្ងៃ​ទី​១០ ខែ​កក្កដា ឆ្នាំ​២០១៦។ គណបក្ស​នេះ​ក៏​អំពាវនាវ​ឲ្យ​អាជ្ញាធរ​រដ្ឋាភិបាល បង្កើត​គណៈកម្មការ​ស៊ើប​អង្កេត​ឯករាជ្យ​ថ្មី​មួយ ដើម្បី​ស្វែងរក​យុត្តិធម៌​ជូន​លោក​បណ្ឌិត កែម ឡី។

ប្រធាន​គណបក្ស​ប្រជាធិបតេយ្យ​មូលដ្ឋាន លោក យ៉េង វីរៈ ថ្លែង​ក្នុង​ពិធី​នេះ​ដោយ​ជំរុញ​ឲ្យ​រដ្ឋាភិបាល និង​អាជ្ញាធរ​មាន​សមត្ថកិច្ច បើក​ការ​ស៊ើប​អង្កេត​លើ​ករណី​ឃាតកម្ម​លើ​បណ្ឌិត កែម ឡី នេះ​បន្ថែម​ទៀត ពីព្រោះ​ថា ការ​បាញ់​សម្លាប់​បណ្ឌិត កែម ឡី រយៈពេល ១​ឆ្នាំ​មក​ហើយ នៅ​មិន​ទាន់​រក​ឃើញ​ឃាតក​ក្រៅ​ពី​ឈ្មោះ អឿត អាង ហៅ ជួប សម្លាប់ នោះ​នៅ​ឡើយ។

លោក យ៉េង វីរៈ បញ្ជាក់​ថា រដ្ឋាភិបាល​គួរ​តែ​ស្នើសុំ​ឲ្យ​ភាគី​អន្តរជាតិ មក​ជួយ​ស៊ើប​អង្កេត​លើ​ករណី​ឃាតកម្ម​នេះ ដើម្បី​រក​យុត្តិធម៌​ជូន​ក្រុម​គ្រួសារ​បណ្ឌិត កែម ឡី និង​ពលរដ្ឋ​ខ្មែរ​ទូទៅ​ដែល​គោរព​ស្រឡាញ់​លោក កែម ឡី៖ «វា​នៅ​លើ​ថា​តើ​រដ្ឋាភិបាល​យើង​ហ្នឹង ស្វាគមន៍​ឬ​អត់? ទទួល​ឬ​អត់? បើ​យើង​អញ្ជើញ​គេ ពេល​ហ្នឹង​គេ​មិន​មែន​មក​ត្រួត​យើង គេ​ចូល​មក​ផ្ដេសផ្ដាស​ឯណា គឺ​គេ​ចូល​មក​តាម​ការ​អញ្ជើញ​របស់​រដ្ឋ​ជា​ភាគី ហើយ​បើ​សិន​ជា​ប្រមុខ​រាជ​រដ្ឋាភិបាល​យើង ក្នុង​នាម​ជា​តំណាង​រដ្ឋ​អធិបតេយ្យ​មួយ​អញ្ជើញ​គេ វា​ជា​រឿង​ធម្មតា​ទេ ហើយ​មាន​ឧទាហរណ៍​ដែល​យើង​រៀបចំ​ដែល​កំពុង​ដំណើរការ​មក​ដល់​ថ្ងៃ​នេះ គឺ​តុលាការ​ខ្មែរ​ក្រហម​នេះ គឺ​ជា​ឧទាហរណ៍​មួយ​ដែល​យើង​បើក​ច្រក​ឲ្យ​ចៅក្រម ព្រះរាជអាជ្ញា មេធាវី​អន្តរជាតិ ដែល​គេ​មាន​ជំនាញ​ក្នុង​ការ​ស៊ើប​អង្កេត​ក្នុង​ការ​កាត់​ក្ដី​សំណុំ​រឿង​ប្រល័យ​ពូជសាសន៍​ជាដើម ចូល​មក​ធ្វើ​ការ​នៅ​ក្នុង​ប្រទេស​ខ្មែរ​យើង»

គណបក្ស​ប្រជាធិបតេយ្យ​មូលដ្ឋាន បាន​ធ្វើ​ពិធី​រំឭក​ខួប​គម្រប់ ១​ឆ្នាំ ឧទ្ទិស​កុសល​ចំពោះ​វិញ្ញាណក្ខន្ធ​បណ្ឌិត កែម ឡី នៅ​ព្រឹក​ថ្ងៃ​ទី​៩ កក្កដា ដែល​មាន​អ្នក​ចូលរួម​ជាង ៦០​នាក់ នៅ​ឯ​ទីស្នាក់ការ​បក្ស​របស់​ខ្លួន​ក្នុង​សង្កាត់​ភ្នំពេញថ្មី ខណ្ឌ​សែនសុខ រាជធានី​ភ្នំពេញ។

ចំណែក​អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន លោក សាម អ៊ីន លើក​ឡើង​ថា លោក​បណ្ឌិត កែម ឡី គឺ​ជា​មនុស្ស​ម្នាក់​ដែល​ហ៊ាន​និយាយ​ការពិត​ពី​បញ្ហា​សង្គម​ហើយ និង​នយោបាយ​ឥត​ខ្លាច​រអា៖ «អ៊ីចឹង​យើង​នៅ​តែ​បន្ត​ទាមទារ​ឲ្យ​ស្ថាប័ន​មាន​សមត្ថកិច្ច ស្ថាប័ន​តុលាការ រក​ការពិត​ឲ្យ​ឃើញ​ចំពោះ​លោក​បណ្ឌិត កែម ឡី»

លោក​បញ្ជាក់​ថា បណ្ឌិត កែម ឡី ចង់​ឃើញ​យុត្តិធម៌​សម្រាប់​សង្គម​ខ្មែរ ហើយ​លោក​ក៏​ចង់​ឲ្យ​មាន​ការ​ផ្លាស់ប្ដូរ​ជា​វិជ្ជមាន មាន​ការ​រៀបចំ​អភិបាលកិច្ច​ល្អ​សម្រាប់​ប្រទេស​ជាតិ​ដែរ។

បើ​ទោះ​ជា​តុលាការ​ក្រុង​ភ្នំពេញ សម្រេច​ចោទ​ប្រកាន់ និង​ផ្ដន្ទាទោស​ឈ្មោះ អឿត អាង ហៅ ជួប សម្លាប់ ដាក់​ពន្ធនាគារ​អស់​មួយ​ជីវិត​ពី​បទ​ឃាតកម្ម​មក​លើ​បណ្ឌិត កែម ឡី ក្ដី ប៉ុន្តែ​ពលរដ្ឋ​រាប់​លាន​នាក់​ដែល​គោរព​ស្រឡាញ់​លោក​បណ្ឌិត កែម ឡី ព្រម​ទាំង​អង្គការ​សង្គម​ស៊ីវិល​ជាច្រើន​ទៀត នៅ​តែ​ចាត់​ទុក​ថា ការ​ស៊ើប​អង្កេត​របស់​តុលាការ​ហាក់​នៅ​មាន​មន្ទិល​សង្ស័យ​នៅ​ឡើយ។

បុណ្យ​គម្រប់​ខួប ១​ឆ្នាំ​នៃ​ឃាតកម្ម​លើ​បណ្ឌិត កែម ឡី នេះ ក្រុម​អង្គការ​សង្គម​ស៊ីវិល​ជាតិ និង​អន្តរជាតិ ព្រម​ទាំង​គណបក្ស​នយោបាយ​មួយ​ចំនួន បាន​អំពាវនាវ​ឲ្យ​រដ្ឋាភិបាល​បង្កើត​ឲ្យ​មាន​គណៈកម្មការស៊ើប​អង្កេត​ឲ្យ​ឯករាជ្យ​មួយ ព្រោះ​ការ​ស៊ើប​អង្កេត​កន្លង​ទៅ​នៅ​មាន​មន្ទិល​សង្ស័យ​ច្រើន

ទោះ​ជា​យ៉ាង​ណា​ក្ដី មន្ត្រី​ក្រសួង​មហាផ្ទៃ បញ្ជាក់​ថា ក្រសួង​នៅ​មិន​ទាន់​ទទួល​បាន​សំណើ​សុំ​ជា​ផ្លូវការ​ពី​គណបក្ស​នយោបាយ ឬ​អង្គការ​សង្គម​ស៊ីវិល ដែល​សុំ​ឲ្យ​អាជ្ញាធរ​រដ្ឋាភិបាល​ស៊ើប​អង្កេត​បន្ថែម​នោះ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។