បុគ្គលិកក្រុមហ៊ុនដឹកជញ្ជូនមួយទាមទារឲ្យក្រុមហ៊ុនបញ្ឈប់ការរើសអើង និងទទួលពួកគេចូលធ្វើការវិញ
2023.04.24
សកម្មភាពបុគ្គលិកក្រុមហ៊ុនដឹកជញ្ជូនចាយអិន អាយប៊ីស(Giant Ibis Transportation) លើកបដាតវ៉ា កាលពីថ្ងៃទី២២ មេសា ដើម្បីទាមទារឲ្យក្រុមហ៊ុនបញ្ឈប់ការរើសអើងទៅលើសហជីព និងទទួលពួកគេចូលធ្វើការវិញ។
Photo: CLC Cambodia
បុគ្គលិកក្រុមហ៊ុនដឹកជញ្ជូនចាយអិន អាយប៊ីស(Giant Ibis Transportation)ទាមទារ ឲ្យក្រុមហ៊ុនបញ្ឈប់ការរើសអើងទៅលើសហជីព និងទទួលពួកគេចូលធ្វើការវិញ។ ការទាមទារនេះ បន្ទាប់ពីក្រុមហ៊ុនព្យួរកិច្ចសន្យាការងារតាំងតែពីឆ្នាំ២០២០ ដោយមិនបានកំណត់ថ្ងៃចូលធ្វើការងារវិញនោះទេ។ មន្ត្រីសហជីពឯករាជ្យ យល់ឃើញថា ការរើសអើងទៅលើសហជីព ហាក់កើតឡើងច្រើននាពេលបច្ចុប្បន្ន និងស្នើដល់ក្រសួងការងារ ពិនិត្យទៅលើការរំលោភសិទ្ធិការងារពីសំណាក់ម្ចាស់ក្រុមហ៊ុនទៅលើកម្មករ។
បុគ្គលិកក្រុមហ៊ុនចាយ អិន អាយប៊ីស ជិត១០នាក់ នៅថ្ងៃទី២២ មេសា តវ៉ាទាមទារនៅខាងមុខក្រុមហ៊ុន ដែលស្ថិតនៅខាងជើងផ្សាររាត្រីជាប់មាត់ទន្លេ ក្នុងរាជធានីភ្នំពេញ។ ពួកគាត់ កាន់បដាមួយចំនួនដែលសរសេរថា បញ្ឈប់ការគំរាមកំហែង និងការរើសអើងលើកម្មករ និងសហជីព ហើយការងារជាឆ្នាំងបាយរបស់កម្មករ គ្មានការងារ គ្មានជីវិត ។
ប្រធានសហជីពប្រចាំក្រុមហ៊ុន ចាយអិន អាយប៊ីស លោក សៀម ម៉ូរ៉ាឌី ប្រាប់វិទ្យុអាស៊ីសេរីនៅថ្ងៃទី២២ មេសាថា មូលហេតុនៃការតវ៉ា គឺបណ្ដាលមកពីភាគីក្រុមហ៊ុន មិនទទួលយកបុគ្គលិក ដែលជាសមាជិកសហជីព ចូលធ្វើការវិញនោះទេ។ លោកបន្តថា ក្រុមហ៊ុន បានតម្រូវឲ្យបុគ្គលិកណា ដែលចង់ចូលធ្វើការងារឡើងវិញ ត្រូវតែលាលែងពីសហជីពជាមុនសិន។ លោកបញ្ជាក់ថា ក្រុមហ៊ុនបានព្យួរកិច្ចសន្យាការងារតាំងតែពីឆ្នាំ ២០២០មកម្ល៉េះ ដោយមិនកំណត់ពេលវេលាចូលធ្វើការវិញ។ ក៏ប៉ុន្តែថ្មីៗនេះ ក្រុមហ៊ុនបានរើសបុគ្គលិកដើម្បីធ្វើការ តែបានរើសអើងលើបុគ្គលិក ដែលជាសមាជិកសហជីពដោយមិនទទួលយកពួកគេចូលធ្វើការវិញឡើយ។
លោក សៀម ម៉ូរ៉ាឌី៖ «ការទាមទារនេះ គឺឲ្យរដ្ឋាភិបាលមើលឡើងវិញ ទៅលើវិស័យកម្មករជាពិសេសក្រសួងការងារជាក្រសួងពាក់ព័ន្ធ ត្រូវតែដោះស្រាយឲ្យកម្មករនិយោជិកយើងហ្នឹង ឲ្យបានសមរម្យ ឲ្យបានត្រឹមត្រូវ ទៅតាមនីតិវិធីច្បាប់ ព្រោះច្បាប់ការងារយើងមានហើយច្បាប់ស្រុកខ្មែរ ហេតុអ្វីយើងមិនយកច្បាប់មកនិយាយបាទ ហេតុអ្វីបានជាយើងទៅកាន់ជើងថៅកែទៅវិញ ថៅកែដែលមានលុយ បាទ ហើយក្រសួងមួយទាំងមូលទៅកាន់ជើងថៅកែ ដែលមានលុយហើយមកធ្វើបាប កម្មករនិយោជិក ដែលគាត់ស៊ីអត់ស៊ីឃ្លាន គាត់អ្នកទៅធ្វើការមិនមែន ជាអ្នកមានលុយមានកាក់អ្វីនោះទេ»។
លោក សៀម ម៉ូរ៉ាឌី អះអាងថា ធ្លាប់មានការចរចារវាងសហជីព និងភាគីក្រុមហ៊ុននៅក្រសួងការងារនូវលក្ខខណ្ឌមួយចំនួន ក៏ប៉ុន្តែមិនមានអ្វីដែលអាចឲ្យខាងសហជីពទទួលយកបាននោះទេ។ លោកបន្តថា ក្រុមហ៊ុន បានឲ្យបុគ្គលិក ដែលធ្លាប់ធ្វើការនៅទីនោះ ទទួលយកកិច្ចសន្យាថ្មី ដោយមិនបានផ្ដល់ប្រាក់រំលឹកអតីតភាពការងារ និងមិនបានផ្ដល់ប្រាក់កំឡុងពេលព្យួរកិច្ចសន្យាការងារនោះទេ។ លោកស្នើដល់ក្រសួងការងារ ដោះស្រាយរឿងនេះដោយវិជ្ជាជីវៈ និងមិនលំអៀងទៅដល់ភាគីអ្នកមានលុយ មានអំណាច។
វិទ្យុអាស៊ីសេរី នៅពុំទាន់អាចទាក់ទងអ្នកនាំពាក្យក្រសួងការងារលោក ហេង សួរ ដើម្បីសុំការអត្ថាធិប្បាយជុំវិញបញ្ហានេះបាននៅឡើយទេ នៅថ្ងៃទី២២ មេសា។
ទោះជាយ៉ាងណា ប្រធានសហភាពការងារកម្ពុជា(CLC)លោក អាត់ ធន់ មានប្រសាសន៍ថា ការទាមទាររបស់ក្រុមបុគ្គលិក ដែលជាសមាជិកសហជីពទាំងនេះ គឺបណ្ដាលមកពីភាគីក្រុមហ៊ុន រើសអើងទៅលើថ្នាក់ដឹកនាំសហជីព និងមិនទទួលយកពួកគេចូលធ្វើការងារវិញ។ លោកស្នើដល់ ក្រសួងការងារពិនិត្យ ទៅលើការរំលោភសិទ្ធិកម្មករនៅតាមកន្លែងការងារ ពីសំណាក់ភាគីក្រុមហ៊ុន និងដោះស្រាយវិវាទការងារឲ្យមានប្រសិទ្ធភាព។
លោក អាត់ ធន់៖ «ខ្ញុំគិតថា បញ្ហានេះវាកើតឡើងច្រើន សម្រាប់កម្មករនាពេលបច្ចុប្បន្ន ហើយមានតិចតួចណាស់ ដែលកម្មករតវ៉ា ហើយក្រសួងក៏ត្រូវពិនិត្យឡើងវិញ ចំពោះការមិនអនុវត្តច្បាប់ ឬក៏រំលោភសិទ្ធិផ្សេងៗទៅលើកម្មករហ្នឹង ហើយកម្មករ ដែលតវ៉ានៅក្រុមហ៊ុនចាយអិន អាយ ប៊ីស នេះគួរតែត្រូវបាន ឲ្យពួកគេចូលធ្វើការ និងទទួលបានលក្ខខណ្ឌដូចអ្វី ដែលពួកគេធ្លាប់ទទួលដូចពីខាងដើមដែរបាទ»។
ក្រុមបុគ្គលិក និងសហជីពនៅតែស្នើដល់ក្រសួងការងារពន្លឿននីតិវិធី ដោះស្រាយវិវាទការងារនេះ ដើម្បីជួយការពារសិទ្ធិចូលរួមសហជីពនៅកន្លែងការងារ និងឲ្យពួកគាត់ឆាប់បានចូលធ្វើការងារវិញ ដើម្បីលើកកម្ពស់សេដ្ឋកិច្ចគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
