បុគ្គលិកសណ្ឋាគារ ហ្រ្គេតឌ្យូក ភ្នំពេញ (Great Duke Phnom Penh) ជាង១៥០នាក់ កំពុងប្រឈមនឹងបញ្ហាជីវភាពរស់នៅ ដោយសារតែភាគីម្ចាស់សណ្ឋាគារមិនព្រមបើកប្រាក់សំណងឱ្យពួកគេ និងអូសបន្លាយទំនាស់ការងារមួយនេះអស់រយៈពេល ៤ខែហើយ។ ពួកគេភាគច្រើន ដែលមានវ័យចំណាស់ ពិបាកនឹងរកការងារធ្វើផ្សេង ឯអ្នកខ្លះទៀតរកការងារបានធ្វើហើយ តែត្រូវក្រុមហ៊ុនផ្អាកវិញ ដោយសារការឆ្លងរាលដាលជំងឺកូវីដ១៩។
ស្ថិតក្នុងផ្ទះជួលតូចមួយក្រោមវត្តស្ទឹងមានជ័យ រាជធានីភ្នំពេញ អតីតបុគ្គលិកសណ្ឋាគារ ហ្គ្រេតឌ្យូក ភ្នំពេញ (Great Duke Phnom Penh) លោកស្រី ហេង ម៉ួយអេង រៀបរាប់ថា ចាប់តាំងពីសណ្ឋាគារមានបញ្ហាចាប់តាំងពីចុងខែធ្នូ ឆ្នាំ២០១៩ រហូតមកដល់ពេលនេះ លោកស្រី ក៏ដូចជាបុគ្គលិកទាំងអស់ គឺមានជីវភាពលំបាកលំបិនជាខ្លាំង ព្រោះមិនអាចរកការងារធ្វើ ដើម្បីបានប្រាក់ចំណូលផ្គត់ផ្គង់គ្រួសារ ដូចពីមុនទៀតឡើយ។
សព្វថ្ងៃ លោកស្រី និងកូនស្រីអាយុ ៩ឆ្នាំម្នាក់ រស់នៅជាមួយបងស្រី ដែលធ្វើការផ្នែកសំអាតនៅក្រសួងមួយ។ លោកស្រីបន្តថា រាល់ចំណាយថ្លៃបន្ទប់ជួល ៥០ដុល្លារក្នុងខែ និងការហូបចុក១ថ្ងៃៗ ប្រមាណ ៣ ទៅ ៤ម៉ឺនរៀល គឺពឹងផ្អែកទាំងស្រុងលើបងស្រី។
លោកស្រី ហេង ម៉ួយអេង ដែលធ្លាប់បម្រើការផ្នែករៀបចំបន្ទប់ រយៈពេល ៦ឆ្នាំ នៅសណ្ឋាគារហ្គ្រេតឌ្យូក ដើរដាក់ពាក្យសុំធ្វើការងារជាច្រើនកន្លែងដែរ ប៉ុន្តែមកដល់ពេលនេះ គឺមិនមានខាងក្រុមហ៊ុនណា ហៅគាត់ទៅធ្វើការទេ ខណៈដែលជំងឺកូវីដ១៩ កំពុងឆ្លងរាលដាលដល់ពលរដ្ឋខ្មែរ។
លោកស្រីឱ្យដឹងថា បើសរុបប្រាក់សំណងការងារ ដែលលោកស្រី ត្រូវទទួលបានពីថៅកែសណ្ឋាគារ គឺមិនច្រើនណាស់ណាទេ ប៉ុន្តែថៅកែបែរជាតម្រូវឱ្យបុគ្គលិកទទួលសំណងរំលស់ ១ខែម្ដង រហូតដល់៦ខែទៅវិញ ដោយលើកហេតុផលខ្វះប្រាក់។
ស្ត្រីវ័យ ៣១ឆ្នាំរូបនេះ ស្នើដល់ប្រមុខរដ្ឋាភិបាល និងក្រសួងការងារ ជួយអន្តរាគមន៍ទៅម្ចាស់សណ្ឋាគារទូទាត់ប្រាក់សំណងការងារឱ្យបុគ្គលិកគ្រប់ៗ គ្នា ដើម្បីបានប្រាក់យកទៅដោះស្រាយបញ្ហាជំពាក់បំណុលធនាគារ និងចំណាយផ្សេងៗ ទៀត៖ «ពួកខ្ញុំមិនបានអីច្រើនណាស់ណាទេ ព្រោះពួកខ្ញុំធ្វើការបានតែ ៦ឆ្នាំហ្នឹង ហើយប្រាក់ខែយើងតិច មិនបានច្រើនអីទេ។ ខ្ញុំចង់ឱ្យសម្ដេច និងក្រសួងការងារ ជួយឱ្យម្ចាស់សណ្ឋាគារហ្នឹង ទូទាត់សំណងឱ្យពួកខ្ញុំឆាប់ៗ។ ហើយកុំឱ្យបង់រំលោះ សូមឱ្យម្ចាស់សណ្ឋាគារបង់តែម្ដង»។
អតីតបុគ្គលិកម្នាក់ទៀត ដែលធ្វើជាជាងអគ្គិសនីនៅសណ្ឋាគារមួយនេះ ប្រមាណ ២០ឆ្នាំ លោក ជា ចាន់ម៉ន ឱ្យដឹងថា ក្នុងកំឡុងពេលជាង ៤ខែកន្លងមកនេះ គ្រួសារលោក ក៏ជួបបញ្ហាជីវភាពខ្លាំងដែរ។ លោកឱ្យដឹងថា ទំនិញនិងរបស់ហូប ដែលលក់នៅតាមផ្សារឡើងថ្លៃ នៅពេលមានជំងឺកូវីដ១៩ នេះ។
ជាច្រើនខែដែរមកហើយ បុរសវ័យជាង ៥០ឆ្នាំរូបនេះ ដែលមានគ្រួសាររស់ក្នុងផ្ទះជួលមួយក្នុងក្រុងភ្នំពេញ ក៏មិនទាន់មានការងារធ្វើដែរ។ លោកបារម្ភថា បើបន្តរកការងារធ្វើមិនបានបែបនេះទៀត មិនដឹងថា បានប្រាក់ពីណា មកចិញ្ចឹមកូនស្រីទើបកើតបាន ៣ខែ ហើយនិងជួយទំនុកបម្រុងកូនប្រុសម្នាក់ ដែលកំពុងរៀនថ្នាក់ទី៩។
លោកស្នើដល់រដ្ឋាភិបាលចេញមុខដោះស្រាយ បញ្ហាវិវាទការងារជាមួយថៅកែសណ្ឋាគារនេះ ដើម្បីឱ្យពួកគាត់ទាំងអស់ដែលភាគច្រើនមានវ័យចំណាស់ បានទទួលប្រាក់សំណងការងារ ដើម្បីដោះស្រាយជីវភាពប្រចាំថ្ងៃ។ លោករំពឹងថា នៅពេលបានប្រាក់នេះ លោកនឹងទិញម៉ូតូកង់បី ផាស់អ៊ែប (Passapp) មួយគ្រឿង បើករត់ឌុប ដើម្បីរកប្រាក់ចំណូលចិញ្ចឹមគ្រួសារ៖ «កាលយើងទាមទារជំងឺចិត្តទៅ បាន ៥ ទៅ ៦ពាន់ដែរ។ ឥឡូវយើងយល់ព្រមតាមការសម្រេចរបស់ក្រុមប្រឹក្សាអាជ្ញាកណ្ដាល គេមិនគិតឱ្យជំងឺចិត្តយើងទេ។ ការគណនាហ្នឹង ពួកខ្ញុំខ្លះបាន ៣ពាន់ ខ្លះ ២ពាន់ ដូចខ្ញុំអ៊ីចឹង អត់បាន ៣ពាន់ផងហ្នឹង។ សូមឱ្យក្រសួងដែលពាក់ព័ន្ធហ្នឹង ជួយឱ្យម្ចាស់អូតែលហ្នឹង កុំបង់រំលស់អី។ បង់រំលស់វាតិចតួចណាស់ អ្នកខ្លះបាន ៧ ទៅ ៨រយដុល្លារ រហូតនៅដល់កោះកុង មកបង់រំលោះ យក ៦ដងដែរ វាតិចតួចណាស់។ អ៊ីចឹង ! ក្រសួងពាក់ព័ន្ធ ជាពិសេស នាយករដ្ឋមន្ត្រី សូមមេត្តាជួយដល់កូនចៅ ឱ្យម្ចាស់អូតែលហ្នឹង បង់កញ្ចប់ថវិកាតែម្ដង»។
ចាប់តាំងពីចុងខែធ្នូឆ្នាំ ២០១៩ ក្រុមបុគ្គលិកសណ្ឋាគារ ហ្គ្រេតឌ្យូក ភ្នំពេញ បានចេញតវ៉ាទាមទារប្រាក់សំណងការងាររបស់ពួកគេ ជាច្រើនលើកច្រើនសា រហូតដល់ទទួលបានដំណោះស្រាយមួយពីក្រុមប្រឹក្សាអាជ្ញាកណ្ដាល នៅពាក់ខែកុម្ភៈ ឆ្នាំ២០២០ ប៉ុន្តែខាងថៅកែសណ្ឋាគារ គឺឧកញ៉ា ខូវ សម្បត្តិ បែរជាមិនព្រមបើកប្រាក់ឱ្យកម្មករ តាមសេចក្ដីសម្រេចនោះឡើយ។
ប្រធានសហព័ន្ធសហជីពកម្មករ និយោជិកវិស័យទេសចរណ៍កម្ពុជា លោក ទូច កុសល ថ្លែងថា ចំនួនទឹកប្រាក់សរុបដែលខាងថៅកែត្រូវបើកឱ្យបុគ្គលិកនោះ គឺប្រមាណ ៧០ម៉ឺនដុល្លារ ប៉ុន្តែទំហំទឹកប្រាក់នេះ អាចធ្លាក់នៅត្រឹមចន្លោះពី ៤០ម៉ឺនដុល្លារ ទៅ ៥០ម៉ឺនដុល្លារវិញ ដោយសារក្រុមប្រឹក្សាអាជ្ញាកណ្ដាល ដកចេញប្រាក់សំណងជំងឺចិត្ត។
លោកយល់ថា វិវាទការងារដែលបន្លាយជាច្រើនខែមកនេះ ភាគីថៅកែគួរតែបញ្ចប់ក្នុងពេលមានមានជំងឺកូវីដ១៩ នេះ ដោយបើកប្រាក់សំណងផ្ដាច់ឱ្យបុគ្គលិកទាំងអស់ ដើម្បីបញ្ឈប់ការតវ៉ាតទៅទៀត និងមានឱកាសរកការងារធ្វើ ដើម្បីចិញ្ចឹមគ្រួសារ៖ «ខ្ញុំយល់ថា គេដូចជាមានចេតនាអីមិនល្អ ពីព្រោះការពិតគួរតែដោះស្រាយបញ្ហាហ្នឹង ឱ្យកម្មករដាច់ស្រេចសិន បានដាក់កន្លែងហ្នឹងទៅជាកន្លែងព្យាបាលអ៊ីចឹង។ ទៅជាសំណងហ្នឹង មិនបានទូទាត់ហើយ បែរជាយកកន្លែងទៅដាក់ព្យាបាល ហាក់បីដូចជាមានចេតនាមួយមិនល្អក្នុងហ្នឹង។ កម្មករខ្លះ គាត់សម្ដែងការមិនសប្បាយចិត្តទេ នៅពេលដែលសំណងអត់ទាន់បាន បែរជាយកសណ្ឋាគារធ្វើជាកន្លែងព្យាបាលជំងឺកូវីដហ្នឹង»។
ប្រធានសហព័ន្ធរូបនេះ ឱ្យដឹងថា ខាងក្រសួងការងារ នៅមិនទាន់ចេញអន្តរាគមន៍ដោះស្រាយបញ្ចប់រឿងនេះនៅឡើយ ថ្វីបើពួកគាត់បានដាក់ញត្តិជូនលោករដ្ឋមន្ត្រី អ៊ិត សំហេង ៣ដងមកហើយ។
អាស៊ីសេរីមិនអាចសុំការឆ្លើយរឿងនេះ ពីអ្នកនាំពាក្យក្រសួងការងារ លោក ទេស រុក្ខាផល និងមេធាវីតំណាងឱ្យថៅកែសណ្ឋាគារ លោក នូវ ពិសិដ្ឋ បានទេ ដោយគ្មានអ្នកទទួលទូរស័ព្ទ។
ក្រុមអ្នកតវ៉ាសរុប ១៥២នាក់ ប្រកាន់ជំហរថា ពួកគេនឹងនាំចេញតវ៉ាទាមទារប្រាក់សំណងការងារនេះ ពីម្ចាស់សណ្ឋាគារថ្មីទៀត ដរាបណានៅមិនទាន់ទទួលដោះស្រាយពីក្រសួងការងារ និងអាជ្ញាធរពាក់ព័ន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។