ប៉ូលិស​ហុងកុង​ចាប់​បាន​គ្រឿងញៀន​ទម្ងន់​ជាង ៥១គ.ក ដែល​មាន​តម្លៃ ៤លាន​ដុល្លារ​អាមេរិក​នៅ​ក្នុង​ទំនិញ​មាន​ប្រភព​ពី​កម្ពុជា

ដោយ ម៉ៅ សុធានី
2021-03-10
Share
ប៉ូលិស​ហុងកុង​ចាប់​បាន​គ្រឿងញៀន​ទម្ងន់​ជាង ៥១គ.ក ដែល​មាន​តម្លៃ ៤លាន​ដុល្លារ​អាមេរិក​នៅ​ក្នុង​ទំនិញ​មាន​ប្រភព​ពី​កម្ពុជា គ្រឿងញៀន​ប្រភេទ​មេតំហ្វេតាមីន​គ្រីស្តាល់ (Crystal Methamphetamine) ដែល​​គយ​នៅ​ហុងកុង​រក​ឃើញ​​នៅ​ក្នុង​កៅអី​អង្គុយ​របស់​កុមារ​សម្រាប់​ដាក់​ក្នុង​រថយន្ត (Car seats)​ ​ដឹក​តាម​កប៉ាល់​ចេញ​ពី​កម្ពុជា ទៅ​ក្រុង​ហុងកុង​ កាល​ពី​ថ្ងៃ​ទី១៨ ខែកុម្ភៈ ឆ្នាំ២០២១។
រូប៖ គេហទំព័រ Hong Kong Customs and Excise Department

ប៉ូលិស​ហុងកុង​ចាប់​បាន​គ្រឿងញៀន​ទម្ងន់​ជាង ៥១គ.ក ដែល​មាន​តម្លៃ​ជាង ៤លាន​ដុល្លារ​​នៅ​ក្នុង​ទំនិញ​មាន​ប្រភព​ពី​កម្ពុជា។

មន្ត្រី​គយ​នៅ​ហុងកុង​បាន​រក​ឃើញ​គ្រឿងញៀន​ប្រភេទ​មេតំហ្វេតាមីន​គ្រីស្តាល់ (Crystal Methamphetamine) នៅ​ក្នុង​កៅអី​អង្គុយ​របស់​កុមារ​សម្រាប់​ដាក់​ក្នុង​រថយន្ត (car seats)​ ចំនួន ៣២កៅអី ដែល​ដឹក​ជញ្ជូន​តាម​កប៉ាល់​ចេញ​ពី​កម្ពុជា ទៅ​ក្រុង​ហុងកុង។ ទំនិញ​ទាំង​នោះ​បាន​ទៅ​ដល់​កំពង់ផែ​នៅ​ហុងកុង​ កាល​ពី​ថ្ងៃ​ទី១៨ ខែកុម្ភៈ។

គេហទំព័រ​ផ្លូវការ​របស់​គយ​នៅ​ក្រុង​ហុងកុង​ឱ្យ​ដឹង​ថា បន្ទាប់​ពី​ធ្វើ​ការងារ​អស់​រយៈ​ពេល ១៧ថ្ងៃ ប៉ូលិស​បាន​ចាប់​ខ្លួន​បុរស ២នាក់​កាល​ពី​ថ្ងៃ​អាទិត្យ​ទី៧ ខែមីនា ពាក់ព័ន្ធ​នឹង​ទំនិញ​មាន​ផ្ទុក​គ្រឿង​ញៀន ដឹក​ចេញ​ពី​កម្ពុជា​នេះ។ ពេល​នេះ​ក្រុម​ប៉ូលិស​កំពុង​ស្រាវជ្រាវ​បន្ត។

អាស៊ី​សេរី​បាន​ព្យាយាម​ទាក់ទង​ទៅ​អគ្គនាយក​នៃ​អគ្គនាយកដ្ឋាន​គយ លោក គុណ ញឹម ​ជា​ច្រើន​ដង​តែ​ទូរស័ព្ទ​ចូល​គ្មាន​អ្នកទទួល​នៅ​ល្ងាច​ថ្ងៃ​ទី១០ ខែមីនា។ ចំណែក​អគ្គស្នងការ​រង​នគរបាល​ជាតិ​ទទួល​បន្ទុក​ប្រឆាំង​គ្រឿងញៀន លោក ម៉ក់ ជីតូ ក៏​មិន​អាច​ទាក់ទង​បាន​ដែរ។ អគ្គលេខាធិការ​នៃ អាជ្ញាធរ​ជាតិ​ប្រយុទ្ធ​គ្រឿងញៀន លោក មាស វារិទ្ធិ ប្រាប់​អាស៊ី​សេរី​ថា នៅ​មិន​ទាន់​មាន​ព័ត៌មាន​នេះ​ទៅ​ដល់​ដៃ​លោក​នៅ​ឡើយ។ រីឯ​លេខាធិការរង​អាជ្ញាធរ​នេះ​លោក នាក់ យុទ្ធា ថ្លែង​ថា អាជ្ញាធរ​បាន​ទទួល​ព័ត៌មាន​នេះ​ហើយ ប៉ុន្តែ​មិន​ទាន់​អាច​បញ្ជាក់​អ្វី​បាន​នៅ​ឡើយ​ទេ។

ព័ត៌មាន​ពី​គយ​នៅ​ហុងកុង​អោយ​ដឹង​ថា បុរស​ម្នាក់​មាន​អាយុ ៣៣ឆ្នាំ ដែល​ត្រូវ​ចាប់ខ្លួន​នោះ​មាន​តួនាទី​ជា​នាយក​ក្រុមហ៊ុន​មួយ ដែល​ទើប​បង្កើត​ថ្មី ដើម្បី​ដឹកជញ្ជូន​ទំនិញ​នោះ។

ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គឹមអេង មើល​ឃើញ​ថា​នេះ​មិនមែន​ជាលើកទី១ ដែល​កម្ពុជា​ជាប់​ឈ្មោះ​ថា​ជា​ប្រទេស ដែល​ទាក់ទង​នឹង​ការ​ជួញដូរ​គ្រឿង​ញៀន​មាន​ទំហំ​ធំ​បែប​នេះ។ លោក​ថា​មក​ដល់​ពេល​នេះ ​អាជ្ញាធរ​នៅ​តែ​ត្រូវ​ពលរដ្ឋ​មើល​ឃើញ​ថា​ពុំ​អាច​វែក​មុខ​អ្នក​ពាក់ព័ន្ធ​ករណី​ជួញដូរ​គ្រឿងញៀន​ទាំងនេះ​បាន ឬ​អាច​ចាប់​បាន​តែ​អ្នកប្រើប្រាស់ និង​អ្នក​ជួញដូរ​តូចតាច​តាម​សហគមន៍។

ក្នុង​រយៈ​ពេល ១០ថ្ងៃក្នុង​ខែ​មីនា​នេះ កម្ពុជា​បាន​បង្ក្រាប​បទ​ល្មើស​គ្រឿង​ញៀន​ចំនួន ១៤ករណី​នៅ​ទូទាំង​ប្រទេស និង​ឃាត់​ខ្លួន​មនុស្ស ៥២នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល