ប្រធានគណៈកម្មការអង្កេត បោសសំអាត ប្រឆាំងអំពើពុករលួយនៃរដ្ឋសភា ឬហៅថា គណៈកម្មការទី១០ ប្រកាសឲ្យប្រជាពលរដ្ឋ និងមន្ត្រីរាជការត្រូវសហការផ្ដល់ព័ត៌មានដើម្បីឈានដល់ចុះស៊ើបអង្កេតអំពើពុករលួយ ដែលនាំឲ្យបាត់បង់ចំណូលបង់ពន្ធចូលរដ្ឋជារៀងរាល់ឆ្នាំ។
សារអំពាវនាវនេះ ធ្វើឡើងក្រោយពេលរូបលោកទទួលបានពាក្យបណ្ដឹងថ្មីៗនេះថា នៅក្នុងកំពង់ផែស្វយ័តក្រុងព្រះសីហនុ បានកើតមានភាពមិនប្រក្រតី ឬអំពើពុករលួយធ្ងន់ធ្ងរ ប៉ុន្តែគ្មានស្ថាប័នឯករាជ្យ ឬមន្ត្រីជំនាញចុះត្រួតពិនិត្យចំណូលចំណាយនៅកំពង់ផែនេះ ឲ្យបានត្រឹមត្រូវទេ។
ប្រធានគណៈកម្មការអង្កេត បោសសំអាត ប្រឆាំងអំពើពុករលួយនៃរដ្ឋសភា ឬហៅថា គណៈកម្មការទី១០ លោក ហូរ វ៉ាន់ បានប្រកាសលេខទូរស័ព្ទដល់សាធារណជន ពិសេសមន្ត្រីរាជការបម្រើការងារនៅតាមស្ថាប័នរដ្ឋនានា ឲ្យផ្ដល់ព័ត៌មានមករូបលោកផ្ទាល់ ជុំវិញភាពមិនប្រក្រតីអំពើពុករលួយដែលកើតមាននៅតាមស្ថាប័ននីមួយៗ ដើម្បីឈានដល់មានវិធានការតាមផ្លូវច្បាប់។
លោកបន្តថា ថ្មីៗនេះ លោកបានទទួលពាក្យបណ្ដឹងពីបុគ្គលិកបម្រើការងារនៅក្នុងស្ថាប័នកំពង់ផែស្វយ័តក្រុងព្រះសីហនុ ថាមានការកិបកេង ឬចាយវាយថវិកាចំណូលចំណាយ នាំឲ្យបាត់បង់ថវិកាជាតិរាប់លានដុល្លារក្នុងមួយឆ្នាំៗ។
បញ្ហានេះ លោក ហូរ វ៉ាន់ ថ្លែងថា កន្លងមកស្ថាប័នខ្លួនបានចុះអង្កេត ឬសួរនាំថ្នាក់ដឹកនាំស្ថាប័នកំពង់ផែស្វយ័ត និងសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ម្ដងរួចហើយ ប៉ុន្តែរបាយការណ៍ដែលទទួលបានគឺមានភាពរលូន៖ «បើបងប្អូនមន្ត្រីរាជការមានព័ត៌មានជុំវិញអំពើពុករលួយ ឬឯកសារនៅកំពង់ផែស្វយ័តក្រុងព្រះសីហនុ ច្រកចេញចូលតែមួយ ... សូមទាក់ទងមកខ្ញុំតាមរយៈពេលទូរស័ព្ទ ០៧៨ ៧៨ ៩៥ ៣២ ខ្ញុំនឹងចាត់ការជូន»។
យ៉ាងណាក៏ដោយចុះ លោក ហូរ វ៉ាន់ ប្រធានគណៈកម្មការទី១០ រដ្ឋសភា បានសង្កត់ធ្ងន់ថា នឹងមិនលះបង់ការចុះអង្កេតរាល់ពាក្យបណ្ដឹង ឬភាពមិនប្រក្រតីដែលកើតឡើងនៅក្នុងស្ថាប័នគយ ឬស្ថាប័នពាក់ព័ន្ធកំពង់ផែអន្តរជាតិក្រុងព្រះសីហនុ នេះទេ។
មន្ត្រីរូបនេះបានអំពាវនាវដល់ប្រជាពលរដ្ឋ ពិសេសមន្ត្រីរាជការ ឲ្យជួយសហការផ្ដល់ព័ត៌មានជុំវិញអំពើពុករលួយ ដើម្បីឈានដល់ហៅអ្នកជាប់ពាក់ព័ន្ធមកសួរនាំ និងចាត់វិធានការតាមផ្លូវច្បាប់៖ «បើបងប្អូនមានឯកសារទាក់ទងអំពើពុករលួយនៅតាមស្ថាប័ននីមួយៗ ពិសេសនៅស្ថាប័នកំពង់ផែអន្តរជាតិក្រុងព្រះសីហនុ ឬស្ថាប័នពន្ធដារ និងស្ថាប័នគយខេត្តព្រះសីហនុ ជាដើម សូមសហការជាមួយស្ថាប័នគណៈកម្មការទី១០រដ្ឋសភា ដើម្បីឈានដល់ចាត់វិធានការតាមផ្លូវច្បាប់ ឬលុបបំបាត់អំពើពុករលួយឲ្យបាន»។
ឆ្លើយតបបញ្ហានេះ លោក លូ គឹម ឈន់ អគ្គនាយកកំពង់ផែស្វយ័តក្រុងព្រះសីហនុ ថ្លែងថា ស្ថាប័នខ្លួនមានអ្នកឯកទេសដើម្បីត្រួតពិនិត្យចំណូលចំណាយមានលក្ខណៈស្តង់ដារអន្តរជាតិជាប្រចាំ។ លោកបន្តថា រាល់ការចំណាយ ឬចាយវាយថវិកាដើម្បីអភិវឌ្ឍន៍កំពង់ផែនេះ គឺមានបញ្ជីស្នាមត្រឹមត្រូវ និងមានលក្ខណៈច្បាស់លាស់។
ទោះយ៉ាងណា លោក លូ គឹមឈុន ប្រកាសសាទរមន្ត្រីពីគ្រប់ស្ថាប័នពាក់ព័ន្ធ ឬមន្ត្រីគណៈកម្មការទី១០ រដ្ឋសភា ក្នុងការចុះស៊ើបអង្កេត ឬចង់ឲ្យស្ថាប័នខ្លួនឆ្លើយបំភ្លឺទៅលើចំណូលចំណាយ ដែលកំពុងដំណើរការងារមានការរីកចម្រើនជាបន្តបន្ទាប់រហូតមកដល់ពេលនេះ។
ទាក់ទិនបញ្ហានេះ លោក សន ជ័យ តំណាងសម្ព័ន្ធគណនេយ្យភាពសង្គមប្រចាំអាស៊ីបូព៌ា និងប៉ាស៊ីហ្វិក ថ្លែងសាទរប្រធានគណៈកម្មការទី១០រដ្ឋសភា ដែលបានប្រកាសទូរស័ព្ទផ្ទាល់ខ្លួនឲ្យផ្នែកពាក់ព័ន្ធផ្ដល់ព័ត៌មានជុំវិញអំពើពុករលួយនៅក្នុងស្ថាប័នរដ្ឋនានា ពិសេសបញ្ហានៅក្នុងស្ថាប័នពន្ធដារ ឬស្ថាប័នគយ និងរដ្ឋាករកំពង់ផែអន្តរជាតិ ក្រុងព្រះសីហនុ ជាដើម។ លោកស្នើដល់ថ្នាក់ដឹកនាំគណៈកម្មការទី១០រដ្ឋសភា ត្រូវពង្រឹងការទទួលខុសត្រូវរបស់ខ្លួន ដើម្បីឈានដល់លុបបំបាត់អំពើពុករលួយនៅតាមស្ថាប័នរដ្ឋមួយចំនួនឲ្យមានប្រសិទ្ធភាព។
លោក សន ជ័យ បន្ថែមថា បញ្ហាគ្រប់គ្រងចំណូលពន្ធគយ និងចំណូលពន្ធដារនៅកម្ពុជា ពិសេសនៅខេត្តព្រះសីហនុ គួរតែរដ្ឋាភិបាល ឬស្ថាប័នពាក់ព័ន្ធបង្កើតឲ្យមានក្រុមអធិការកិច្ចតាមដានជាប្រចាំ ដើម្បីគ្រប់គ្រងចំណូលពន្ធរដ្ឋឲ្យបានកាន់តែប្រសើរ។
កាលពីថ្ងៃទី២៦ ខែមករា លោក ហូរ វ៉ាន់ ធ្លាប់បានដឹកនាំប្រតិភូគណៈកម្មការទី១០រដ្ឋសភា ជួបពិភាក្សាជាមួយលោក លូ គឹមឈន់ អគ្គនាយកកំពង់ផែស្វយ័តក្រុងព្រះសីហនុ និងលោក គិន លី ប្រធានសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ព្រមទាំងមន្ត្រីស្ថាប័នពាក់ព័ន្ធមួយចំនួនទៀត ដើម្បីស្ដាប់របាយការណ៍អំពីលទ្ធផលនៃការគ្រប់គ្រង និងប្រមូលពន្ធគយនៅកំពង់ផែនេះ។ លទ្ធផលកាលណោះ គឺមានភាពរលូនដោយស្ថាប័នរដ្ឋសភារកមិនឃើញកំហុសឆ្គងអ្វីទេ។
ទោះជាបែបនេះក្តី លោក ហូរ វ៉ាន់ បានអះអាងថា ស្ថាប័ននេះមិនទាន់មានជំនឿទៅលើរបាយការណ៍ផ្ដល់ជូនដោយថ្នាក់ដឹកនាំស្ថាប័នកំពង់ផែស្វយ័ត និងសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ផ្ដល់ជូនទេ។
បញ្ហានេះ មន្ត្រីសង្គមស៊ីវិលមួយចំនួននាខេត្តព្រះសីហនុ បានស្នើឲ្យស្ថាប័នជំនាញរដ្ឋសភា ត្រូវបញ្ជូនមន្ត្រីជំនាញចុះស៊ើបអង្កេតពីភាពមិនប្រក្រតីដែលកើតមាននៅតាមស្ថាប័នសាខាពន្ធដារ ស្ថាប័នគយ និងរដ្ឋាករ ឬស្ថាប័នកំពង់ផែស្វយ័តខេត្តព្រះសីហនុ ឲ្យបានត្រឹមត្រូវ ដើម្បីគ្រប់គ្រងចំណូលពន្ធរដ្ឋឲ្យបានប្រសើរ។
មន្ត្រីសម្របសម្រួលអង្គការលីកាដូ (LICADHO) ខេត្តព្រះសីហនុ លោក ប៊ួន ណារិទ្ធិ មានប្រសាសន៍ថា កន្លងមករូបលោកក៏ធ្លាប់ទទួលបានពាក្យបណ្ដឹងជុំវិញអំពើពុករលួយនៅក្នុងកំពង់ផែស្វយ័តក្រុងព្រះសីហនុ និងសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ជាច្រើនករណីដែរ។
លោកស្វាគមន៍ថ្នាក់ដឹកនាំគណៈកម្មការទី១០រដ្ឋសភា ត្រូវបញ្ជូនមន្ត្រីជំនាញឯករាជ្យចុះអង្កេតពីភាពមិនប្រក្រតី ឬការចាយវាយថវិកាក្នុងស្ថាប័នកំពង់ផែស្វយ័តក្រុងព្រះសីហនុ និងស្ថាប័នសាខាគយ និងរដ្ឋាករ កំពង់ផែអន្តរជាតិខេត្តព្រះសីហនុ ពេលនេះ៖ «ស្វាគមន៍ស្ថាប័នរដ្ឋសភា ឬព្រឹទ្ធសភា ដែលជាស្ថាប័នមានសិទ្ធិក្នុងការចុះត្រួតពិនិត្យចំណូលចំណាយនៅកំពង់ផែស្វយ័ត ឬកំពង់ផែអន្តរជាតិក្រុងព្រះសីហនុ ដែលកន្លងមកធ្លាប់មានការចោទប្រកាន់កើតមានអំពើពុករលួយ ដើម្បីរក្សាតម្លៃកំពង់ផែនេះឡើងវិញ»។
ត្រង់ចំណុចនេះ លោក ហូរ វ៉ាន់ ប្រធានគណៈកម្មការទី១០រដ្ឋសភា បានអះអាងថា នឹងបន្តចុះអង្កេត ឬកោះហៅមន្ត្រីនៅក្នុងស្ថាប័នកំពង់ផែស្វយ័ត ស្ថាប័នសាខាគយ និងរដ្ឋាករកំពង់ផែអន្តរជាតិ និងស្ថាប័នពន្ធដារខេត្តព្រះសីហនុ ដើម្បីបំភ្លឺលើបញ្ហាគ្រប់គ្រងចំណូលពន្ធរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។