ពលរដ្ឋ​នៅ​ស្វាយរៀង​ជាង​មួយរយ​នាក់​ដែល​ចាញ់បោក​ក្រុមហ៊ុន​ភូមិ​ខ្មែរ​គ្រុប ស្នើ​រដ្ឋាភិបាល​ជួយ​អន្តរាគមន៍ ឱ្យ​ម្ចាស់​ក្រុមហ៊ុន​សង​លុយ​វិញ

ដោយ ប្រាជ្ញ ចេវ
2024.06.08
ពលរដ្ឋ​នៅ​ស្វាយរៀង​ជាង​មួយរយ​នាក់​ដែល​ចាញ់បោក​ក្រុមហ៊ុន​ភូមិ​ខ្មែរ​គ្រុប  ស្នើ​រដ្ឋាភិបាល​ជួយ​អន្តរាគមន៍ ឱ្យ​ម្ចាស់​ក្រុមហ៊ុន​សង​លុយ​វិញ អគ្គនាយកក្រុមហ៊ុន​ខ្មែរ​គ្រុប (Khmer Group) លោក សោម សុធា។
រូប៖ ហ្វេសប៊ុក​ក្រុមហ៊ុន​ខ្មែរ​គ្រុប

ជនរងគ្រោះ​ចាញ់បោក​ក្នុង​ទម្រង់ ផនហ្សី (Ponzi scheme) របស់​ក្រុមហ៊ុន​ភូមិ​ខ្មែរ​គ្រុប នៅ​ខេត្ត​ស្វាយរៀង ទទូច​ឱ្យ​រដ្ឋាភិបាល​អន្តរាគមន៍​ករណីនេះ និង​ពន្លឿន​ឱ​ចំណាត់​ការ​ឱ្យ​ក្រុមហ៊ុន​ប្រគល់​លុយ​ទៅ​ពលរដ្ឋ​ដែល​កំពុង​ជាប់​បំណុល​ធនាគារ ដោយសារ​ការខ្ចី​បុល​យក​មក​ចូលរួម​ការ​វិនិយោគ។ ពួកគាត់​សង្ស័យ​ថា ក្រុមហ៊ុន​ដែល​បោកប្រាស់​ពួកគាត់​នេះ មាន​មន្ត្រី​រដ្ឋាភិបាល​ជា​អ្នក​នៅ​ពី​ក្រោយ។

បន្ទាប់ពី​ផ្ទុះ​ករណី​ឆបោក របស់​ក្រុមហ៊ុន ប្រ៊ីលាន ស៊ីធី (Brilliant City) របស់​អ្នកស្រី ឡេង ចាន់ណា ហើយ​នោះ ពេលនេះ ករណី​ឆបោក​មួយទៀត ដែល​មាន​ភាព​ស្រដៀងគ្នា​នេះ នៅ​ខេត្ត​ស្វាយរៀង បាន​លេចចេញ​មួយទៀត​ហើយ នោះ​គឺ​គម្រោង​បោកប្រាស់​របស់​ក្រុមហ៊ុន​ភូមិ​ខ្មែរ​គ្រុប របស់​បុគ្គល​ឈ្មោះ សោម សុធី ដែល​មាន​ទំនាក់ទំនង​ជាមួយ​ជំនួយការ​ផ្ទាល់​របស់​លោក ហ៊ុន សែន គឺ​លោក ឌួង តារា បាន​ប្រមូល​លុយ ពី​ប្រជាពលរដ្ឋ​រាប់​ម៉ឺន​ដុល្លារ​យក​ទៅ​វិនិយោគ ដោយ​សន្យា​ផ្ដល់​ប្រាក់​ចំណេញ​មក​វិញ។

ជនរងគ្រោះ កញ្ញា មាឃ សុម៉ារ៉ា ប្រាប់​វិទ្យុ​អាស៊ីសេរី នៅ​ថ្ងៃទី​៧ ខែ​មិថុនា ថា កញ្ញា​បាន​ចូលរួម​វិនិយោគ​ក្នុង​គម្រោង​ក្រុមហ៊ុន​នេះ​ចំនួន ១​ម៉ឺន ៥​ពាន់​ដុល្លារ ដោយ​គេ​សន្យា​ថា នឹង​ផ្ដល់​ការប្រាក់​ចំនួន ៤៥០​ដុល្លារ ជា​រៀងរាល់​ខែ។ កញ្ញា​បន្ត​ថា ក្រុមហ៊ុន​ឱ្យ​ការប្រាក់​បានតែ​ប៉ុន្មាន​ខែ​ដំបូង ក្រោយមក​ក៏​ស្ងាត់ឈឹង ចំណែកឯ​ម្ចាស់​ក្រុមហ៊ុន ក៏​មិន​ព្រម​ចូលខ្លួន​ដោះស្រាយ​ដែរ ដែល​ធ្វើ​ឱ្យ​កញ្ញា​ជំពាក់​បំណុល​ធនាគារ។

កញ្ញា មាឃ សុម៉ារ៉ា៖ «ដល់ពេល​ឥឡូវ​យើង​ត្រូវ​ការ​រក​គាត់ រក​អត់​ឃើញ​ទេ ហ្វេសប៊ុក​គាត់​ប្លក់​ពួក​យើង​អស់ហើយ​។ តែ​សំខាន់​គឺ​ខ្ញុំ​ចង់ឱ្យ​ថ្នាក់ដឹកនាំ​ខាងលើ​ហ្នឹង​ជួយ​រក​វិធីសាស្ត្រ​ណា​ដើម្បី​បង សោម សុធា ហ្នឹង មក​ជជែក​រឿង​ករណី​ពួក​ខ្ញុំ​ហ្នឹង ដោះស្រាយ​តាម​វិធី​ណា ដែល​ឱ្យ​គាត់​បង្វិលដើម​មក​ឱ្យ​ពួក​ខ្ញុំ​ខ្លះ តិចតួច​ក្ដី ច្រើន​ក្ដី គឺ​តាម​លទ្ធភាព​ដែល​គាត់​អាច​ធ្វើ​បាន។ យើង​ក៏​មិន​ទារ​ទាំង​ដុំ​ដែរ»

ជនរងគ្រោះ ឱ្យ​ដឹង​ថា ក្នុង​គម្រោង​ឆបោក​នេះ​មាន​អ្នករងគ្រោះ​ជាង ១០០​នាក់ ដោយមាន​អ្នកខ្លះ​ដាក់​លុយ ៤​ម៉ឺន​ដុល្លារ ខ្លះ ៨​ម៉ឺន​ដុល្លារ និង​ខ្លះ​ឡើង​ដល់ ១២​ម៉ឺន​ដុល្លារ ដែល​ភាគច្រើន​ពួកគេ​បាន​ចូលរួម​ការ​វិនិយោគ​ក្នុង​អំឡុង​ឆ្នាំ​២០២១​។ ពលរដ្ឋ​រងគ្រោះ​បញ្ជាក់​ថា បន្ទាប់ពី​ម្ចាស់​ក្រុមហ៊ុន​ភូមិ​ខ្មែរ​គ្រុប លោក សោម សុធី គេចវេះ​មិន​ឱ្យ​ការប្រាក់ ឬ​ភាគលាភ​តាម​កិច្ចសន្យា​ហើយ​នោះ ពលរដ្ឋ​រងគ្រោះ​បាន​ដាក់​ពាក្យបណ្ដឹង​ទៅ​តុលាការ​ជាង​មួយឆ្នាំ​មក​ហើយ ប៉ុន្តែ​នៅតែ​គ្មាន​លទ្ធផល ហើយ​លោក សោម សុធី បាន​យក​ប្រាក់​ទាំងនោះ ទៅ​វិនិយោគ​លើ​គម្រោង​ដី​ឡូត៍​បន្ត​ទៀត។

ជនរងគ្រោះ​ម្នាក់ទៀត ថ្លែង​ក្នុង​លក្ខខណ្ឌ​មិន​បញ្ចេញ​ឈ្មោះ ប្រាប់​វិទ្យុ​អាស៊ីសេរី​ថា កញ្ញា​បាន​ចាញ់​បោក​ក្រុមហ៊ុន​វិនិយោគ​ភូមិ​ខ្មែរ​គ្រុប ដល់​ទៅ​២​លើក ដោយ​លើក​ទីមួយ កញ្ញា​បាន​ចាញ់បោក​ក្រុមហ៊ុន​អស់​ចំនួន ១​ម៉ឺន​ដុល្លារ ដោយ​ក្រុមហ៊ុន​បាន​ផ្ដល់​ចំណូល​ប្រចាំខែ​បានតែ ៦​ខែ​ប៉ុណ្ណោះ ក៏​ស្ងាត់​សូន្យឈឹង​។ កញ្ញា​បន្ត​ថា លើក​ទីពីរ​នេះ ក្រុមហ៊ុន​ភូមិ​ខ្មែរ​គ្រុប បាន​ប្រើប្រាស់​រូបមន្ត​បោក ដូច​អតីត​ឧកញ៉ា ឡេង ចាន់ណា ដែរ ដោយ​ភាគី​ក្រុមហ៊ុន បាន​សន្យា​ផ្ដល់​ដីឡូត៍​ឱ្យ​មួយ​កន្លែង ដែល​មាន​តម្លៃ ៣​ពាន់​ដុល្លារ ដើម្បី​កាច់​កិន​ចំពោះ លុយ ១​ម៉ឺន​ដុល្លារ ដែល​កញ្ញា​វិនិយោគ ក៏ប៉ុន្តែ​ដី​ឡូត៍ ដែល​ក្រុមហ៊ុន​ភូមិ​ខ្មែរ ដែល​បាន​សន្យា​ថាឱ្យ​នោះ ក៏​ជា​ដី​ឡូត៍​ខ្យល់​ទៅទៀត។

ពលរដ្ឋ​ថ្លែង​លាក់​ឈ្មោះ៖ «ដោយសារ​មួយរយៈ​នេះ មាន​ករណី​ហ្នឹង​ផ្ទុះឡើង​ច្រើន ហើយ​ខ្ញុំ​មើលទៅ​វា​ហាក់បីដូចជា រឿង​តែមួយ​។ អ៊ីចឹង​សុំ​ឱ្យ​ថ្នាក់ដឹកនាំ​ពាក់ព័ន្ធ ដែល​គាត់​មាន​សមត្ថកិច្ច ឱ្យ​គាត់​ជួយ​ពន្លឿន ហើយ​សូមកុំ​ឱ្យ​មាន​ករណី​ហ្នឹង​កើតឡើង​ទៀត​។ អ្នក​វិនិយោគ​ផ្សេងៗ មិន​ថា​ខ្ញុំ ឬក៏​អ្នក​វិនិយោគ​ផ្សេងទៀត សុទ្ធ​តែ​មាន​វិបត្តិ​បញ្ហា​ហិរញ្ញវត្ថុ​ដូចគ្នា​។ អ្នកខ្លះ​យក​លុយ​ពី​ធនាគារ ទៅ​វិនិយោគ»

ពលរដ្ឋ​ឱ្យ​ដឹង​ថា ម្ចាស់​ក្រុមហ៊ុន​ភូមិ​ខ្មែរ​គ្រុប គឺ​លោក សោម សុធា បាន​ឃោសនា​ថា ប្រាប់​ពួកគាត់ អំពី​គម្រោង​វិនិយោគ លើ​វិស័យ​កសិដ្ឋាន​ចិញ្ចឹម​ទា រោងចក្រ​ផលិត​ចំណី​សត្វ ភោជនីយដ្ឋាន គម្រោង​លក់​ដី​ឡូត៍ និង​ផ្ទះល្វែង​ជាដើម ដោយ​ធានា​ផ្ដល់​ផល​ចំណេញ ឬ​ការប្រាក់ ៤​ភាគរយ​ក្នុង​មួយ​ខែ ដោយ​អ្នក​ដាក់​លុយ​វិនិយោគ ១​ម៉ឺន​ដុល្លារ នឹង​ទទួល​បាន​ប្រាក់​ចំណេញ ៤​រយ​ដុល្លារ​ក្នុង​មួយ​ខែ។

យ៉ាងណា​ក៏​ដោយ​ចុះ ទម្រង់​ឆបោក​ក្នុង​គម្រោង​ភូមិ​ខ្មែរ​នេះ មាន​លក្ខណៈ​ដូចគ្នា​ទៅ​នឹង​គម្រោង​ក្រុមហ៊ុន ប្រ៊ីលាន ស៊ីធី របស់​អ្នកស្រី ឡេង ចាន់ណា គម្រោង​ដីឡូត៍ លោក ជា សារ៉ន និង​លោក ហ៊ី គឹមហុង ដែរ ដែល​ជា​ការ​ឆបោក​ក្នុង​ទម្រង់ ផនហ្ស៊ី (Ponzi scheme) ដោយ​ល្បួង​ពលរដ្ឋ​ឱ្យ​ដាក់​លុយ​ចូល​វិនិយោគ ហើយ​ផ្ដល់​ផល​ឱ្យ​ក្នុង​រយៈពេល​ខ្លី ដើម្បី​ឱ្យ​ពួកគេ​អូសទាញ​អ្នក​ផ្សេងទៀត​ឱ្យ​ដាក់​លុយ​ចូល​វិនិយោគ​បន្ថែម​ទៀត​។ លុះ​ពេល​ក្រុមហ៊ុន​ប្រមូល​លុយ​បាន​ច្រើន គេ​នឹង​ផ្ដាច់​ផលប្រយោជន៍​អតិថិជន​ចាស់ ហើយ​រត់​គេច​ខ្លួន ប្រកាស​ក្រុមហ៊ុន​ក្ស័យធន ឬ​រក​លេស​ពន្យារ​ការ​ប្ដឹងផ្ដល់​ឡើង​តុលាការ​ជាដើម។

អ្វី​ដែល​រឹតតែ​ដូចគ្នា​នោះ​គឺ ពលរដ្ឋ​រងគ្រោះ​អះអាង​ថា នាយក​ក្រុមហ៊ុន ភូមិ​ខ្មែរ​គ្រុប លោក សោម សុធា មាន​ទំនាក់ទំនង​ជិតស្និទ្ធ​ជាមួយ​លោក ដួង ដារ៉ា ដែល​ជា​ជំនួយការ​លោក ហ៊ុន សែន ហើយ​ក៏បាន​យកឈ្មោះ​លោក មក​អះអាង​ប្រាប់​ពលរដ្ឋ គឺ​ដូច​ករណី​លោកស្រី ឡេង ចាន់ណា យកឈ្មោះ​លោក ហ៊ុន ម៉ាណែត មក​សំអាង​ថា ជា​ក្បាលម៉ាស៊ីន​ក្រុមហ៊ុន ប្រ៊ីលាន ស៊ីធី ដែរ។

វិទ្យុ​អាស៊ីសេរី មិនអាច​ទាក់ទង​ម្ចាស់​ក្រុមហ៊ុន​ភូមិ​ខ្មែរ​គ្រុប លោក សោម សុធី ដើម្បី​សុំ​ការ​បកស្រាយ​បាន​ទេ នៅ​ថ្ងៃទី​៧ ខែ​មិថុនា។

រីឯ​ជំនួយការ​ផ្ទាល់​របស់ លោក ហ៊ុន សែន គឺ​លោក ដួង តារា បង្ហោះ​សារ​នៅ​លើ​ទំព័រ​ហ្វេសប៊ុក​របស់​លោក​ថា លោក​មិន​ជាប់​ពាក់ព័ន្ធ​នឹង​ក្រុមហ៊ុន​ភូមិ​ខ្មែរ​គ្រុប នោះ​ទេ ដោយ​កន្លងមក​ក្រុមហ៊ុន​នេះ ធ្លាប់​អញ្ជើញ​លោក​ទៅ​ចូលរួម ចែក​ស្បៀងអាហារ​ជូន​ពលរដ្ឋ​ក្រីក្រ​តែប៉ុណ្ណោះ។ ទោះជា​យ៉ាងណា មាន​រូបភាព​ជាច្រើន​ដែល​បង្ហាញ​ពី​លោក ដួង តារា មាន​ទំនាក់​ទំនង​ជាមួយ​ក្រុមហ៊ុន​ភូមិ​ខ្មែរ​គ្រុប និង​តែង​ចេញមុខ​ការពារ​ក្រុមហ៊ុន​ថា ជា​ក្រុមហ៊ុន​ស្អាតស្អំ បើ​ទោះ​បី​ជា​ក្រុមហ៊ុន​នោះ បាន​យក​លុយ​ពី​ពលរដ្ឋ​ដោយ​គ្មាន​សំណង​វិញ​ក៏ដោយ​។ ជាមួយ​គ្នា​នេះ ពលរដ្ឋ​រងគ្រោះ អះអាង​ថា លោក ដួង តារា និង​ប្អូនប្រុស​របស់​លោក គឺ​លោក ដួង វីរ៉ាត់ សុទ្ធ​តែ​មាន​ភាគហ៊ុន នៅក្នុង​ក្រុមហ៊ុន​ភូមិ​ខ្មែរ​គ្រុប ក្នុង​នោះ ក្រុមហ៊ុន​ក៏បាន​បង់លុយ​ប្រចាំខែ ដល់​រដ្ឋបាល​ខេត្តស្វាយរៀង ទើប​ធ្វើ​ឱ្យ​ក្រុមហ៊ុន​មួយ​នេះ អាច​ឈ​ជើង​បាន និង​គេច​ផុត​ពី​ការ​ទទួលខុសត្រូវ​តាមផ្លូវ​ច្បាប់។

ទាក់ទិន​រឿង​នេះ ប្រធាន​អង្គការ​សម្ព័ន្ធភាព​ការពារ​សិទ្ធិមនុស្ស ហៅ​កាត់​ថា ច្រាក់ (CHRAC) លោក រស់ សុដ្ឋា សង្កេត​ឃើញ​ថា ករណី​ឆបោក​ក្នុង​ទម្រង់ ផនហ្សី (Ponzi) ដែល​លេចឡើង​កន្លងមក​នេះ តែងតែ​ត្រូវ​បាន​ជនរងគ្រោះ​លាតត្រដាង​ថា មាន​ជាប់​ពាក់ព័ន្ធ​នឹង​មន្ត្រី​រដ្ឋាភិបាល​។ លោក​លើកឡើង​ថា ដើម្បី​ជម្រះ​ការសង្ស័យ និង​ធ្វើ​ឱ្យ​មាន​តម្លាភាព រដ្ឋាភិបាល​គួរតែ បើក​ការស៊ើបអង្កេត​ទៅលើ​មន្ត្រី​ក្នុង​ជួរ​រដ្ឋាភិបាល​ណា ដែល​ជាប់​ពាក់ព័ន្ធ​ក្នុង​ការ​វិនិយោគ ឬ​ចូលរួម​ក្នុង​សកម្មភាព ជាមួយ​ក្រុមហ៊ុន​បោកប្រាស់​ទាំងនោះ។

លោក រស់ សុដ្ឋា៖ «ប្រសិនបើ​រដ្ឋាភិបាល​មាន​យន្តការ​មួយ ទទួល​ពាក្យបណ្ដឹង ហើយ​ដោះស្រាយ​ជូន ប្រហែលជា​ពលរដ្ឋ​មក​ដាក់​ច្រើន​ហើយ ព្រោះ​ប្រជាពលរដ្ឋ​មានការ​ខ្មាសអៀន ហើយ​ណាមួយ​មិន​ហ៊ាន​តវ៉ា​ជាមួយ​ម្ចាស់​ក្រុមហ៊ុន​ផង ខ្លាច​តែ​មាន​អ្នក​នៅ​ពី​ក្រោយខ្នង​ទៅ មាន​គ្រោះថ្នាក់​បាត់​អស់​ទាំង​លុយ​ហើយ នៅ​ជាប់​គុក​ទាំង​ខ្លួន​ទៀត»

ប្រជាពលរដ្ឋ​រងគ្រោះ ស្នើ​ឱ្យ​រដ្ឋាភិបាល បញ្ជូន​ក្រុម​មេធាវី ឱ្យ​មក​ជួយ​ពួកគាត់ ដូច​ករណី​អតីត​ឧកញ៉ា ឡេង ចាន់ណា ដែរ ដើម្បី​បង្ខំ​ឱ្យ​ម្ចាស់​ក្រុមហ៊ុន​ភូមិ​ខ្មែរ​គ្រុប សង​លុយ​ទៅ​ពួកគាត់​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។