លោក ហ៊ុន សែន បដិសេធ​រឿង​ចាប់ខ្លួន​ឧកញ៉ា គិត ម៉េង ខណៈ​មន្ត្រី​របប​នេះ​បន្ត​ជ្រៀតជ្រែក​ផ្ទៃក្នុង​ក្រុមហ៊ុន

ដោយ សេក បណ្ឌិត
2018.12.27
Share on WhatsApp
Share on WhatsApp
គិត ម៉េង ៦២២ ឧកញ៉ា គិត ម៉េង ម្ចាស់​ក្រុមហ៊ុន​បណ្ដាញ​ផ្សព្វផ្សាយ​កម្ពុជា (Cambodia Broadcasting Service) ដែល​ហៅ​កាត់​ថា ស៊ី​.ប៊ី​.​អេស (CBS)។
Screenshot

មេដឹកនាំ​របប​ក្រុងភ្នំពេញ​លោក ហ៊ុន សែន ប្រកាស​ច្រានចោល​ព័ត៌មាន​ចាប់ខ្លួន លោក​ឧកញ៉ា គិត ម៉េង។ ការ​ផ្ទុះ​រឿង​ចាប់ខ្លួន​លោក​ឧកញ៉ា គិត ម៉េង នេះ​ដោយសារតែ​មាន​ការ​បែក​ធ្លាយ​សារ​សំឡេង​របស់​លោក ហ៊ុន សែន ព្រមាន​ចាត់​វិធានការ លោក គិត ម៉េង ពាណិជ្ជករ​ស្និទ្ធ​នឹង​លោក ប្រសិន​បើ​មិន​ដក​បុគ្គលិក​នៃ​ស្ថានីយ​ទូរទស្សន៍​ស៊ីអ៊ិនស៊ី (CNC) ម្នាក់ ក្នុង​រឿង​ជម្លោះ​ផ្ទៃ​ក្រុមហ៊ុន​នោះ​ទេ។

លោក ហ៊ុន សែន បាន​បញ្ចេញ​ប្រតិកម្ម និង​ព្រួយបារម្ភ​អំពី​បញ្ហា​ព័ត៌មាន ដែល​លោក​អះអាង​ថា ជា​ព័ត៌មាន​ក្លែងក្លាយ​នៅ​ក្នុង​សង្គម​កម្ពុជា​ដែល​ផ្សាយ​ខុស​ការពិត​អំពី​រូបលោក ហើយ​ពេលខ្លះ ក៏​ធ្វើ​ឲ្យ​លោក​លង់​ជឿ​ម្ដងម្កាល​ដែរ។

ថ្លែង​ក្នុង​ជំនួប​ជាមួយ​កម្មករ​នៅ​ខេត្ត​កណ្ដាល នៅ​ព្រឹក​ថ្ងៃ​ទី​២៦ ខែ​ធ្នូ លោក ហ៊ុន សែន បាន​បដិសេធ ថា គ្មាន​ការ​ចាប់ខ្លួន​លោក គិត ម៉េង ម្ចាស់​ក្រុមហ៊ុន​រ៉ូយ៉ាល់គ្រុប (Royal Group) នោះ​ទេ។ លោក ចាត់ទុកថា ការ​លេច​លឺ​ដំណឹង​ចាប់ខ្លួន​លោក គិត ម៉េង រយៈពេល​ប៉ុន្មាន​ថ្ងៃ​ចុង​ក្រោយនេះ គឺជា​រឿង​បំភ្លៃ​ការពិត ដើម្បី​បង្ក​ភាព​ចលាចល​ប៉ុណ្ណោះ៖ «សុខៗ​ចេញ​ព័ត៌មាន​ទៀត​ថា សម្ដេច​ឲ្យ​ចាប់​មេ​ខ្ញុង (នាង​ខ្ញុង តារា​កំប្លែង) ហើយ​ចុះ​មេ​ខ្ញុង​វា​ធ្វើ​អី បាន​អញ​ចាប់ គេ​ថា មេ​ខ្ញុង​និយាយ​រឿង​ផ្ទះ​ឈ្នួល។ ស្លាប់​ហើយ​នាង​ខ្ញុង​អើយ​នាង​ខ្ញុង​! អី​ក៏​វា​កម្សត់​ម្ល៉េះ! ដល់​ថ្នាក់​នាយករដ្ឋមន្ត្រី​ចេញ​បញ្ជា​ឲ្យ​ចាប់។ ប៉ុន្មាន​ថ្ងៃនេះ ស្រាប់តែ​វីវរ​ហើយ សម្ដេច ចាប់ គិត ម៉េង បាត់​ទៅ​ហើយ។ អា​ឡប់​! ប៉ុន្តែ​ព័ត៌មាន​បែបនេះ គឺ​ទៅ​ជា​ព័ត៌មាន​ភូត​កុហក​មួយ ដែល​បាត់​តម្លៃ​អស់»

ការ​ផ្ទុះ​រឿង​ចាប់ខ្លួន​លោក គិត ម៉េង នេះ កើតឡើង​ក្រោយពី​មេដឹកនាំ​របប​ក្រុងភ្នំពេញ​បាន​ចេញ​បញ្ជា​ផ្ទាល់មាត់ ដល់​លោក គិត ម៉េង ឲ្យ​ដកហូត​មុខតំណែង​លោក អ៊ុក បូរ៉ា ចេញពី​អគ្គនាយក​ទូរទស្សន៍ CNC ជាមួយ​នឹង​ការ​គំរាម​ធ្ងន់ៗ ថា បើ​មិន​អនុវត្ត​តាម​បទបញ្ជា​លោក​ទេ នោះ​គ្រប់មុខ​ជំនួញ​ទាំង​ប៉ុន្មាន​របស់​មហាសេដ្ឋី ដែល​មាន​ប្រាក់​រាប់​លាន​នៅ​កម្ពុជា​រូប​នេះ នឹង​មាន​ផល​ប៉ះពាល់​។ ក្នុង​សារ​សំឡេង​នោះ លោក ហ៊ុន សែន សង្កត់ធ្ងន់​ទៀត​ថា សូម្បីតែ​មាតា បិតា​ព្រះមហាក្សត្រ (​ម៉ែឪ​ស្ដេច​) ក៏​លោក​មិន​ខ្លាច ហើយ​មិន​អាច​ការពារ​បាន​ដែរ។

លោក ហ៊ុន សែន អះអាង​ថា មូលហេតុ​លោក​ចេញមុខ​លូកដៃ​រឿង​ផ្ទៃក្នុង​ទូរទស្សន៍​CNC​នេះ ព្រោះ​លោក ហ៊ុន សែន យល់ថា ទូរទស្សន៍​នេះ មាន​តួនាទី​សំខាន់ ជួយ​ផ្សព្វផ្សាយ​លើក​តម្កើង និង​គាំទ្រ​របប​លោក កន្លង​មក រហូត​ដល់​លោក និង​ភរិយា​របស់​លោក តែងតែ​ជួយ​ផ្ដល់​ប្រាក់​ឧបត្ថម្ភ​ដល់​បុគ្គលិក​ទីនោះ​រៀងរាល់​ពិធីបុណ្យ​ជាតិ​ទៀត​ផង។

ទោះយ៉ាងណា​ក្តី ប្រភព​ពី​បុគ្គលិក​ទូរទស្សន៍​CNCដែល​សុំ​មិន​បញ្ចេញ​ឈ្មោះ​និង​សំឡេង ប្រាប់​អាស៊ីសេរីថា ថ្វី​ដ្បិត​តែ​មានការ​លូកដៃ​ពី​លោក ហ៊ុន សែន ក្តី ប៉ុន្តែ​ជម្លោះផ្ទៃក្នុង​នេះ មិន​ទាន់​បញ្ចប់​នៅ​ឡើយ គឺ​កំពុង​ស្ថិត​ក្នុង​អន្តរកាល ព្រោះ​មកដល់ពេលនេះ មិនទាន់​ឃើញ​ឧកញ៉ា គិត ម៉េង ព្រម បញ្ឈប់​លោក អ៊ុក បូរ៉ា តាម​បញ្ជា​លោក ហ៊ុន សែន នៅឡើយ​ទេ។

អាស៊ីសេរី បាន​ព្យាយាម​ទាក់ទង​លោក អ៊ុក បូរ៉ា ជាច្រើនលើក ប៉ុន្តែ​លោក​ពុំ​ទទួល​ទូរស័ព្ទ។ ចំណែក​ម្ចាស់​ភាគហ៊ុន​ទូរទស្សន៍ CNC វិញ លោក គិត ម៉េង បាន​បដិសេធ​មិន​ធ្វើ​អត្ថាធិប្បាយ៖ «ខ្ញុំ​កំពុង​ជាប់​ប្រជុំ។ សុំទោស​! អរគុណ​ច្រើន»

ប្រភព​បុគ្គលិក​ទូរទស្សន៍ CNC លើកឡើង​ថា ជម្លោះផ្ទៃក្នុង​របស់​ទូរទស្សន៍ CNCនេះ គឺ​មិនមែន​តែ លោក ហ៊ុន សែន នោះ​ទេ សូម្បីតែ​មន្ត្រី​នៃ​របប​លោក ក៏​ចូលរួម​លូកដៃ​ផង​ដែរ។ ប្រភព​ដដែល ចោទ​ថា អ្នក​នៅ​ពីក្រោយ​នៃ​ជម្លោះ​នេះ គឺ​ទីប្រឹក្សា​ក្រុមហ៊ុន​បណ្ដាញ​ផ្សព្វផ្សាយ​កម្ពុជា (Cambodia Broadcasting Service) ដែល​ហៅ​កាត់​ថា ស៊ី.ប៊ី.អេស (CBS) រួមមាន​ទូរទស្សន៍ CNC CTN My TV និង One TV គឺ​លោក ហ៊ុយ វណ្ណៈ ដែល​បច្ចុប្បន្ន លោក​ក៏​មាន​តួនាទី​ជា​រដ្ឋលេខាធិការ​ក្រសួង មហាផ្ទៃ​ផង និង​ជា​ជា​ប្រធាន​សហភាព​សហព័ន្ធ​អ្នកសារព័ត៌មាន​កម្ពុជា​ផង។ ប្រភព​បន្ត​ថា លោក ហ៊ុយ វណ្ណៈ គឺជា​អ្នក​រៀបចំ​ផែនការ និង​ជា​អ្នករាយការណ៍​ទៅ​លោក ហ៊ុន សែន ដើម្បី​ឲ្យ​ជួយ​បណ្ដេញ លោក អ៊ុក បូរ៉ា ចេញពី​តួនាទី ព្រោះ​លោក ហ៊ុយ វណ្ណៈ មាន​ការ​ជាប់​ពាក់ព័ន្ធ​រឿង​កិបកេង​លុយ​ក្រុមហ៊ុន​រាប់​ម៉ឺន​ដុល្លារ និង​ចង់​ប្រើប្រាស់​ឥទ្ធិពល​របស់​ខ្លួន​នៅ​ក្នុង​ក្រុមហ៊ុន​ទូរទស្សន៍​របស់​លោក គិត ម៉េង។ ប្រភព​ទម្លាយ​ទៀត​ថា ការ​ដែល​លោក គិត ម៉េង យក​លោក អ៊ុក បូរ៉ា ជា​អគ្គនាយក​ថ្មី នោះ ព្រោះ​ដើម្បី​ធ្វើ​កំណែ​ទម្រង់​ក្រុមហ៊ុន​ឡើងវិញ បន្ទាប់ពី​ក្រុមហ៊ុន​ខាតបង់ និង​បាត់​លុយ​ជាច្រើន ប៉ុន្តែ​ទីបំផុត​លោក អ៊ុក បូរ៉ា បែរ​ជា​រង​ថ្ម​បាក់​ទៅវិញ។

ជុំវិញ​ករណី​នេះ លោក ហ៊ុយ វណ្ណៈ បដិសេធ មិន​ឆ្លើយតប​ជាមួយ​អាស៊ីសេរី​នោះ​ទេ ព្រោះ​លោក មិន​ចាប់អារម្មណ៍​ចំពោះ​ការ​ចោទ​ប្រកាន់​លើ​រូបលោក​ឡើយ៖ «អើ​..​សំខាន់​អាស៊ីសេរី​ជឿ​មួយ​ណា? ខ្ញុំ​ចាំបាច់​ទៅ​បក្ស​ស្រាយ​អី សំខាន់​កិច្ចការ​របស់​ស្ថាប័ន​មួយ គឺ​ស្ថាប័ន​នឹង​មាន​ការ​យល់ដឹង និង​មានការ​ទទួលខុស​ត្រូវ​របស់​ស្ថាប័ន​នឹង​បាទ។ អាហ្នឹង​ជា​កិច្ចការ​របស់​ស្ថាប័ន​ហើយ​វា​សំខាន់​អាស៊ីសេរី​ជឿ​មួយ​ណា ហើយ​ផ្សាយ​ថា​ម៉េច? យើង​ទៅ​ខ្វល់​អី​រឿង​អ្នក​ដែល​មូល​បង្កាច់​រឿង​អ្នក​បំភ្លៃ​អី អាហ្នឹង​វា​ជា​មុខរបរ​របស់​អ្នក​បំភ្លៃ ហើយ​យើង​ចាំបាច់​ទៅ​បកស្រាយ​ធ្វើ​អី»

ទោះបីជា​លោក ហ៊ុយ វណ្ណៈ បដិសេធ​ក្តី ប៉ុន្តែ​អាស៊ីសេរី ទទួល​បាន​សារ​សំឡេង​ជាច្រើន​របស់​លោក ហ៊ុយ វណ្ណៈ និយាយ​នៅ​ក្នុង​គ្រុប​ការងារ​របស់​ទូរទស្សន៍ CNC ។ សារ​សំឡេង​ទាំងនោះ លោក ហ៊ុយ វណ្ណៈ បាន​ប្រើ​ឥទ្ធិពល​របស់​ខ្លួន​ក្នុង​ទូរទស្សន៍​CNC ដោយ​ប្រាប់​ឲ្យ​បុគ្គលិក គិតតែ​រឿង​ការងារ កុំ​រវើរវាយ​ច្រើន និង​បញ្ជាក់​ថា គ្មាន​អ្នកថ្មី​ណា​មក​គ្រប់គ្រង​ទៀត​ទេ។ ទន្ទឹមគ្នា​នោះ លោក បាន​ប្រើ ភាសា​ជេរ​ប្រមាថ​ធ្ងន់ៗ និង​ព្រមាន​ប្រើ​ដំបង​វាយ​បំបែក​ក្បាល​អ្នកណា​ដែល​ចោទ​ថា លោក​កិបកេង​លុយ​ក្រុមហ៊ុន​ទៀត​ផង។ សារ​សំឡេង​នោះ និយាយ​ទៀត​ថា ទោះបីជា​លោក​កិបកេង ឬ​យក​លុយ ក្រុមហ៊ុន មិនមែន​ជា​លុយ​ម៉ែឪ​អ្នក​និយាយ​ចោទ​លោក​ដែរ។

កាលពី​ខែ​មិថុនា ឆ្នាំ​២០១៤ លោក ហ៊ុយ វណ្ណៈ អាយុ ៤០​ឆ្នាំ ជា​អតីត​អគ្គនាយករង​ស្ថានីយ​ទូរទស្សន៍ CNC ធ្លាប់​ដក​កាំភ្លើង​ពី​អាវ​មក​អាម៉េ​បម្រុង​បាញ់​លោក រស់ ឌីណា អាយុ ៤២​ឆ្នាំ ជា​ប្រធាន​ផ្នែក​ផែនការ និង​ចាត់តាំង​ព័ត៌មាន​ទូរទស្សន៍ CTN និង​MyTV ។ លោក រស់ ឌីណា ក៏បាន​ដាក់ពាក្យ​ប្ដឹង​ទៅ​តុលាការ​ពី​​បទ «​បរិហារកេរ្តិ៍​ជេរប្រមាថ និង​ប៉ុនប៉ង​មនុស្សឃាត​ដោយ​ចេតនា» នៅ​ក្នុង​អគារ​ស្ថានីយ​ទូរទស្សន៍ CNC នៅ​ផ្លូវជាតិ​លេខ ៥ ក្នុង ភូមិ​ក្រោលគោ សង្កាត់​គីឡូម៉ែត្រ​លេខ ៦ ខណ្ឌ​ឫស្សីកែវ ដែរ ប៉ុន្តែ​សំណុំ​រឿង​នេះ បាន​បញ្ចប់​ទៅវិញ ដោយមាន​ការ​សម្របសម្រួល​ពី​លោក គិត ម៉េង។

អ្នក​សិក្សា​អំពី​បញ្ហា​នយោបាយ និង​សេដ្ឋកិច្ច លោក បុង ដែត លើកឡើង​ថា ការដែល​លោក ហ៊ុន សែន ប្រើប្រាស់​ឥទ្ធិពល​លូកដៃ​រឿង​ផ្ទៃក្នុង​ទូរទស្សន៍​CNC​នេះ ប្រហែល​លោក ហ៊ុន សែន ចង់ បង្ហាញ​ថា លោក យកចិត្តទុកដាក់​ចំពោះ​បុគ្គលិក​ព័ត៌មាន​ទាំងនោះ ដែល​ជួយ​ផ្សព្វផ្សាយ​គាំទ្រ​របប លោក។ ប៉ុន្តែ លោក ហ៊ុន សែន ប្រហែលជា​ភ្លេច​គិត​ដែរ​ថា ការ​លូកដៃ និង​ប្រើ​ភាសា​គំរាមកំហែង បែប​នេះ គឺ​មិន​ត្រឹមត្រូវ​ឡើយ ព្រោះ​ក្រុមហ៊ុន​ឯកជន តែង​មាន​រចនាសម្ព័ន្ធ និង​គោលការណ៍​ផ្សេងៗ របស់​ខ្លួន។ ជាមួយគ្នា​នេះ លោក បុង ដែត យល់ថា លោក ហ៊ុន សែន គួរតែ​មើល​សមត្ថភាព​ខ្លួន ឯង និង​មន្ត្រី​ថ្នាក់ក្រោម​របស់​លោក​ឡើង​វិញ​ដែរ ព្រោះ​ក្រោម​ការដឹកនាំ​នៃ​របប​សព្វថ្ងៃ​នេះ បាន បង្កើត​បញ្ហា​ស្មុគស្មាញ​ជាច្រើន​សម្រាប់​កម្ពុជា​ដូចជា​បញ្ហា​ប្រជាធិបតេយ្យ បញ្ហា​សិទ្ធិមនុស្ស បញ្ហា ដីធ្លី និង​បញ្ហា​យុត្តិធម៌​សង្គម​ជាដើម៖ «អ្វី​ដែល​សំខាន់​គឺ​រដ្ឋាភិបាល​មិន​ទាន់​ទាំង​បាន​យកចិត្តទុកដាក់​ទៅលើ​កិច្ចការ​រដ្ឋបាល​ឲ្យ​បាន​ច្បាស់លាស់​ទេ ទាក់ទង​នឹង​កិច្ចការ​ដឹកនាំ​ប្រទេស ទាក់​ទង់​នឹង​ប្រព័ន្ធ​អនុគ្រោះ​ពន្ធ ហើយ​ការ​គោរព​សិទ្ធិមនុស្ស​មិនទាន់​ធ្វើ​ឲ្យ​ត​ល្អ​នៅឡើយ បែរ​ជា​លេចចេញ​អ៊ីចឹង​មក តើ​វា​ទំនង​ទេ? ទាក់ទង​នឹង​រឿង​ស្ថាប័ន​តុលាការ​ដែល​មិន​មាន អព្យាក្រិត្យ​អី​ផ្សេងៗ តើ​រដ្ឋាភិបាល បាន​គ្រប់គ្រង​ច្បាស់លាស់​ខ្លួនឯង​ហើយ​នៅ រឿង​ជម្លោះដីធ្លី​រាំ​រ៉ៃ តើ​បាន​ដោះស្រាយ ១​រយ​ភាគរយ​ហើយ​នៅ​? ហេតុ​អី​បានជា​គាត់​យក​ពេលវេលា​ខ្លួនឯង ទៅ​លូកដៃ​រឿង​ក្រុមហ៊ុន​ឯកជន ដែល​គេ​មាន​រចនាសម្ព័ន្ធ និង​មាន​ក្រុមប្រឹក្សាភិបាល​របស់​គេ​ច្បាស់លាស់​ហើយ»

លោក បុង ដែត សង្កេត​ឃើញ​ដែរ​ថា ក្រុមហ៊ុន​របស់​ឧកញ៉ា​មួយ​ចំនួន តែង​ជាប់​ពាក់ព័ន្ធ​ជាមួយ​ជំនួញ​ទុច្ចរិត ម៉្លោះ​ហើយ​ទើប​ពួកគេ ស្ថិត​នៅ​ក្រោម​គំនាប​របស់​អ្នក​មាន​អំណាច ហើយ​បង្កើត​បាន​ទៅ​ជា​វប្បធម៌​ឯង​ជួយ​អញ អញ​ជួយ​ឯង ដែល​នឹង​ធ្វើ​ឲ្យ​ប៉ះពាល់​ច្បាប់​ជាតិ និង​សេដ្ឋកិច្ច​កម្ពុជា។ លើស​ពី​នេះ ក្រុមហ៊ុន ឧកញ៉ា​ទាំងនោះ ក៏​ក្លាយ​ជា​ប្រភព​ធនធាន​សម្រាប់​ជួយ​ទ្រទ្រង​គណបក្ស​កាន់​អំណា​ច ហើយ​អ្នកកាន់អំណាច ក៏​តែង​ជួយ​បិទបាំង និង​កាង​ក្រុមហ៊ុន​របស់​ឧកញ៉ា​ទាំងនោះ​វិញ ប៉ុន្តែ​ប្រសិនបើ ក្រុមហ៊ុន​ឧកញ៉ា​ណាមួយ ដើរ​ផ្ទុយ​ពី​មាគ៌ា​របស់​បក្ស​កាន់អំណាច​នោះ ពួកគេ​តែងតែ ប្រឈម​ផ្លូវច្បាប់។

អ្នកវិភាគ​លើកឡើង​ដែរ ចំពោះ​បញ្ហា​ព័ត៌មាន​ក្លែងក្លាយ​ដែល​កំពុង​រីក​រាលដាល​នៅ​ក្នុង​សង្គម​កម្ពុជា​សព្វថ្ងៃ​នេះ ក៏​ព្រោះតែ​កន្លង​មក របប​លោក ហ៊ុន សែន តែងតែ​លើកទឹកចិត្ត​ដល់​ព័ត៌មាន​ក្លែងក្លាយ​ដែរ ដូចជា​ពេលខ្លះ​របប​លោក ហ៊ុន សែន បាន​ប្រើប្រាស់​ព័ត៌មាន​ក្លែងក្លាយ ដើម្បី​ចំណេញ​នយោបាយ និង​ពេលខ្លះ​ប្រើប្រាស់​ដើម្បី​ធ្វើទុក្ខបុកម្នេញ និង​លាប​ពណ៌​លើ​គណបក្ស​បក្ស​ប្រឆាំង និង​អ្នក​ប្រជាធិបតេយ្យ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។