សហគមន៍​នេសាទ​ខេត្ត​បាត់ដំបង​ថា អាជ្ញាធរ​មិន​ចាត់​វិធាន​ផ្លូវច្បាប់​លើ​អ្នក​ទន្ទ្រាន​ដី​ព្រៃ​លិច​ទឹក

ដោយ មួង ណារ៉េត
2019-07-06
អ៊ីម៉ែល
មតិ
Share
បោះពុម្ព
ដី​ព្រៃ​លិច​ទឹក​នៅ​តំបន់​ភូមិ​ព្រែកត្រប់ ឃុំ​ព្រែកនរិន្ទ ស្រុក​ឯកភ្នំ ខេត្ត​បាត់ដំបង។ រូបថត​ថ្ងៃ​ទី​២៨ ខែ​មេសា ឆ្នាំ​២០១៥
ដី​ព្រៃ​លិច​ទឹក​នៅ​តំបន់​ភូមិ​ព្រែកត្រប់ ឃុំ​ព្រែកនរិន្ទ ស្រុក​ឯកភ្នំ ខេត្ត​បាត់ដំបង។ រូបថត​ថ្ងៃ​ទី​២៨ ខែ​មេសា ឆ្នាំ​២០១៥
Photo Adhoc

សហគមន៍​នេសាទ​នៅ​ស្រុក​ឯក​ភ្នំ​ខេត្ត បាត់ដំបង ព្រួយបារម្ភ​ខ្លាច​ជនល្មើស​ទន្ទ្រានព្រៃ​យក​ដី​ធ្វើជា​កម្មសិទ្ធិ​បណ្ដាល​ឱ្យ​ហិនហោច​ព្រៃ​លិច​ទឹក ហើយ​នាំ​ឱ្យ​ប៉ះពាល់​ដល់​ការ​ថែរក្សា​ពូជ​ត្រី​ក្នុង​តំបន់​អភិរក្ស​របស់​ពួកគាត់ នៅ​តំបន់​បឹង​ទន្លេសាប។ មន្ត្រី​សហគមន៍​អះអាង​ថា ការ​ទន្ទ្រាន​ព្រៃ​នេះ​ដោយសារ​អាជ្ញាធរ​មិន​ចាត់វិធានការ​ទៅលើ​ជនល្មើស​តាមច្បាប់។

ប្រធាន​សហគមន៍​នេសាទ​ស្ដី​ក្រោម​រហាលសួង លោក ភី ហឿត ប្រាប់​អាស៊ីសេរី នៅ​រសៀល​ថ្ងៃ​ទី​៦​កក្កដា ថា ចាប់ពី​ខែ​កុម្ភៈ ឆ្នាំ​២០១៩ មកទល់​សព្វថ្ងៃ យ៉ាងហោចណាស់​ព្រៃ​លិច​ទឹក​នៅ​តំបន់​បឹង​អភិរក្ស​របស់​ពួកគាត់​នៅ​ភូមិ​បាក់រទេះ ឃុំ​ព្រែកហ្លួង ស្រុក​ឯក​ភ្នំ ប្រមាណ​៣០​ហិកតារ​ហើយ ដែល​ជនល្មើស​លួច​ទន្ទ្រានព្រៃ​យក​ដី​ធ្វើជា​កម្មសិទ្ធិ។ លោក​បន្ត​ថា ជនល្មើស​នៅតែ​នាំគ្នា​ទន្ទ្រានព្រៃ​យក​ដី​បន្ថែម​ទៀត ប្រសិនបើ​អាជ្ញាធរ​បន្ត​គ្មាន​វិធានការ​ទប់ស្កាត់​ឱ្យ​បាន​តឹងរ៉ឹង ព្រោះ​ចាប់ពី​ឆ្នាំ​២០១៣​មក​ហិនហោច​អស់​ព្រៃ​តំបន់​បឹង​អភិរក្ស​របស់​ពួកគាត់​ជាង​ហើយ​១០០​ហិកតារ​ហើយ ដោយ​អាជ្ញាធរ​មិន​ទាន់​ចាប់​ជនល្មើស​ផ្ដន្ទាទោស​តាមច្បាប់​បាន​ម្នាក់​នៅឡើយ​ទេ៖ «សហគមន៍​ព្រួយបារម្ភ​ថា វា​នឹង​បាត់បង់​ព្រៃ​លិច​ទឹក​ហិនហោច​អស់​ទៅ ហើយ​ក្លាយទៅជា​វាលស្រែ ហើយ​វា​អាច​បាត់បង់​គ្រប់យ៉ាង​ទាំង​ត្រី​ទាំង​អី​ទាំងអស់ ហើយ​ដី​ដែល​គាត់​កាប់​ស្ថិត​ក្នុង​តំបន់​៣​ទៀត។ ហើយ​ដំណោះស្រាយ​អត់​មាន​វិធានការ​យ៉ាងម៉េច​ទៅលើ​ពួកគាត់​ទេ ហើយ​ពួកគាត់​អ្នក​កាប់​ព្រៃ​ភាគច្រើន​នៅ​ឃុំ​ព្រែក​ហ្លួង​តែម្ដង»

លោក​បន្ត​ថា ការ​កាប់​បំផ្លាញ​ព្រៃ​លិច​ទឹក​នេះ បាន​ប៉ះពាល់​យ៉ាង​ខ្លាំង​ដល់​ដែន​អភិរក្ស​ពូជ​ត្រី​របស់​ពួកគាត់ ទៅ​ថ្ងៃ​អនាគត​ដែល​ធ្វើ​ឱ្យ​ត្រី​ក្នុង​តំបន់​អភិរក្ស​កាន់តែ​ថយ​ចុះ។ ទាក់ទង​នឹង​បញ្ហា​នេះ​ប្រធាន​រដ្ឋបាល​ជលផល​ខេត្ត​បាត់ដំបង​លោក ជួង សុភា ប្រាប់​អាស៊ីសេរី​ថា ខាង​លោក និង​សមត្ថកិច្ច​ពាក់ព័ន្ធ​កំពុង​ស្រាវជ្រាវ​រក​ចាប់​ជនល្មើស​ផ្ដន្ទាទោស​តាមច្បាប់ ដោយ​មិន​បណ្ដោយ​ឱ្យ​ពួកគេ​រួចខ្លួន​នោះ​ទេ។ លោក​បន្ត​ថា ក្នុង​ឆ្នាំ​២០១៩​នេះ ខាង​លោក​ចាប់​បាន​អ្នក​ទន្ទ្រានព្រៃ​លិច​ទឹក​ចំនួន​៧​នាក់​ហើយ ដែល​ជា​ប្រជាពលរដ្ឋ​រស់នៅ​ស្រុក​មោងឬស្សី និង​ស្រុក​ឯក​ភ្នំ និង​បាន​បញ្ជូន​ពួកគាត់​ទៅ​សាលាដំបូង​ខេត្ត​បាត់ដំបង​ដោះស្រាយ​តាមច្បាប់​រួច​ហើយ៖ «បាទ​!​ខ្ញុំ បើសិនជា​សហគមន៍​គាត់​រាយការណ៍ ហើយ​សហការ​ជាមួយ​អាជ្ញាធរ​ច្បាស់លាស់ និង​មាន​សាវតារ​ពី​ជនល្មើស​មក​គឺ យើង​ធ្វើការ​កោះ​អញ្ជើញ​គាត់​ដើម្បី​បំភ្លឺ​រក​អ្នក​នៅ​ពីក្រោយ​ខ្នង ដើម្បី​រក​អ្នក​ប្រព្រឹត្ត​ផ្ទាល់​ហើយ​យើង​កសាង​សំណុំរឿង​ដាក់​ទៅ​តុលាការ​។​ហើយ​ករណី​ស្រាវជ្រាវ​ទៅ​មានការ​ពាក់ព័ន្ធ​យើង​សុំ​ការ​ឯកភាព​ពី​គណបញ្ជាការ​ឯកភាព​ខេត្ត​សិន»

តំណាង​ប្រជា​នេសាទ​ខេត្ត​បាត់ដំបង​លោក ហ៊ុត ហាន ប្រាប់​អាស៊ីសេរី​ថា បញ្ហា​ហិនហោច​ព្រៃ​លិច​ទឹក​តំបន់​បឹង​ទន្លេសាប​ក្នុង​ខេត្ត​បាត់ដំបង ស្ថិត​ដល់​កម្រិត​ត្រូវ​ប្រកាស​អាសន្ន​ហើយ ព្រោះ​សព្វថ្ងៃ​មាន​ទាំង​អ្នក​លួច​ទន្ទ្រានព្រៃ​យក​ដី​ធ្វើជា​កម្មសិទ្ធិ និង​ភ្លើង​ឆេះ​ព្រៃ ជាពិសេស​នៅ​តំបន់​បឹង​ទន្លេសាប​ក្នុងស្រុក​មោងឫស្សី ថ្មគោល និង​ស្រុក​ឯក​ភ្នំ បណ្ដាល​ឱ្យ​ហិនហោច​ព្រៃ​ក្នុង​មួយឆ្នាំៗ​រាប់ពាន់​ហិកតារ។ លោក​បន្ត​ថា មូលហេតុ​ដែល​ហិនហោច​ព្រៃ ដោយសារ​អាជ្ញាធរ​ពាក់​ព័ន្ធ​គ្មាន​វិធានការ​ទប់ស្កាត់​ឱ្យ​បាន​តឹងរ៉ឹង៖ «និយាយ​ឱ្យ​មន្ត្រី​ពាក់ព័ន្ធ​គឺ​អាជ្ញាធរ​ទាំង​ឃុំ​រហូត​ដល់​ស្រុក គាត់​តែង​ថា​វា​ហួស​ជំនាញ​របស់​គាត់ ដូចជា​ថា​វា​ត្រូវ​តួនាទី​របស់​ជលផល តួនាទី​របស់​ខាង​មន្ត្រី​កសិកម្ម​ជាដើម អីចឹង​ចំណុច​នេះឯង​ដែល​ធ្វើ​ឱ្យ​បាត់បង់​ធនធាន​ទាំងអស់​នេះ ដោយសារ​អាជ្ញាធរ​មិន​ស្គាល់​តួនាទី​របស់​ខ្លួនឯង ហើយ​មួយទៀត​មន្ត្រី​ជំនាញ​ជលផល​និយាយ​ថា ជា​សិទ្ធិអំណាច​របស់​មន្ត្រី​បរិស្ថាន​ទៅ​វិញ»

លោក​បន្ត​ថា ឆ្នាំនេះ​ភ្លើង​ឆេះ​ព្រៃ​លិច​ទឹក​នៅ​ភូមិ​ក្បាលតោល ឃុំ​កោះជីវាំង ហើយ​ភ្លើង​ទើបតែ​រលត់​ទៅ​វិញ​កាល​ពី​ចុងខែ​មិថុនា​កន្លង​មក បណ្ដាល​ខូចខាត​ព្រៃ​អស់​ជាង​១​ពាន់​ហិកតារ។

ប្រធាន​រដ្ឋបាល​ជលផល​ខេត្ត​បាត់ដំបង​ឱ្យ​ដឹង​ថា ព្រៃ​លិច​ទឹក​នៅ​តំបន់​បឹង​ទន្លេសាប​ខេត្ត​បាត់ដំបង​ត្រូវ​បាន​ជនល្មើស​ទន្ទ្រានព្រៃ​យក​ដី​ធ្វើជា​កម្មសិទ្ធិ នៅ​ក្នុង​ឆ្នាំ​២០១៩​នេះ អស់​ព្រៃ​ជាង​៦០០​ហិកតារ ក្នុង​ចំណោម​ព្រៃ​លិច​ទឹក​សរុប​ជាង​២០​ម៉ឺន​៦​ពាន់​ហិកតារ (២០៦.៨០០) ក្នុង​នោះ​ស្រុក​ថ្មគោល និង​ស្រុក​មោងឬស្សី​អស់​ព្រៃ​ច្រើន​ជាង​គេ៕

អ្នក​និយម​ប្រជាធិបតេយ្យ​រស់នៅ​ប្រទេស​អឺរ៉ុប​ប្រមូល​ផ្ដុំ​គ្នា​តវ៉ា​នៅ​ថ្ងៃ​បញ្ចប់​ទស្សនកិច្ច​លោក ហ៊ុន សែន នៅ​ស្វីស

អ្នក​និយម​ប្រជាធិបតេយ្យ និង ភាគច្រើន​ជា​អ្នកគាំទ្រ​គណបក្ស​សង្គ្រោះ​ជាតិ ពិសេស មកពី​ប្រទេស​បារាំង និង អ៊ីតាលី និង​អ្នក​រស់នៅ​ប្រទេស​ស្វីស​ផ្ទាល់ បាន​ប្រមូល​ផ្ដុំ​គ្នា​តវ៉ា នៅ​ទីក្រុង​ហ្សឺណែវ ប្រទេស​ស្វីស កាល​ពី​ថ្ងៃ​ទី៥ ខែ​កក្កដា នៅ​ថ្ងៃ​បិទ​បញ្ចប់​នៃ​ទស្សនកិច្ច​របស់​លោក ហ៊ុន សែន នៅ​ប្រទេស​នេះ។

អ្នកដឹកនាំ​ការ​តវ៉ា និង​ជា​ប្រធាន​ចលនា​យុវជន​គាំទ្រ​គណបក្ស​សង្គ្រោះ​ជាតិ​នៅ​ទីក្រុង​ប៉ារីស កញ្ញា លឹម កណ្ណិការ ថា ការ​តវ៉ា​នេះ ក៏​មិន​ខុស​ពី​ការ​តវ៉ា​មុនៗ​ដែរ គឺ​ធ្វើ​ឡើង ដើម្បី​បង្ហាញ​អំពី​ការ​មិន​អាច​ទទួលយក​បាន នូវ​ចំណាត់ការ​របស់​របប​លោក ហ៊ុន សែន ដែល​រំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ​ធ្ងន់ធ្ងរ​នៅ​កម្ពុជា។ កញ្ញា​បញ្ជាក់​ថា អ្វី​ដែល​អ្នក​និយម​ប្រជាធិបតេយ្យ​ចង់បាន​យ៉ាង​ទទូច​នោះ គឺ​ការ​ដោះលែង​ប្រធាន​គណបក្ស​សង្គ្រោះជាតិ​លោក កឹម សុខ និង​ទម្លាក់​ចោល​រាល់​បទចោទប្រកាន់​ទាំងឡាយ លើ​មន្ត្រី​បក្ស​ប្រឆាំង​ទាំងអស់ និង​ឱ្យ​គណបក្ស​សង្គ្រោះ​ជាតិ​មានដំណើរ​ការ​ឡើង​វិញ​ជាដើម។

កញ្ញា លឹម កណ្ណិការ បន្ថែម​ថា សេរីភាព​ក្នុង​ការ​បញ្ចេញមតិ និង ជួបជុំគ្នា​តវ៉ា​ដូច្នេះ បើ​ធ្វើ​នៅ​កម្ពុជា ច្បាស់​ជា​នឹង​ត្រូវ​របប​លោក ហ៊ុន សែន បង្ក្រាប ដូច្នេះ​ទើប​ពលរដ្ឋ​ខ្មែរ​នៅ​ក្រៅ​ប្រទេស ត្រូវ​បន្ត​សាមគ្គី​គ្នា តវ៉ា​នៅ​លើ​ឆាក​អន្តរជាតិ​តទៅទៀត រហូត​បាន​ជោគជ័យ៖ «ទោះបី​មេឃ​ក្ដៅ​មែនទែន​ថ្ងៃនេះ​! ប៉ុន្តែ យើង​នៅតែ​មក​រួបរួម​គ្នា ដើម្បី​បង្ហាញ​ថា យើង​មាន​សាមគ្គី​ខ្លាំង​សម្រាប់​ថ្ងៃនេះ​។ ការ​ស្នេហា​ជាតិ​សម្រាប់​យើង មិន​ចេះ​ឈប់​ទេ គឺ​នៅតែ​មាន​សម្រាប់​សង្គ្រោះ​ប្រទេស​យើង​។ បើ​ខ្មែរ​យើង​មិន​ធ្វើ អ្នកណា​ធ្វើ​សម្រាប់​យើង​? ដូច្នេះ​យើង​ដែល​មាន​សញ្ជាតិ​បារាំង និង​សញ្ជាតិ​ដទៃ ដែល​យើង​មាន​សិទ្ធិ​ពេញលេញ​នៅ​ទីនេះ យើង​ធ្វើ​តទៅទៀត យើង​អត់​ឈប់​ទេ»

ការ​ប្តេជ្ញា​មិន​ឈប់​តវ៉ា រហូត​ទាមទារ​សិទ្ធិមនុស្ស និង​ប្រជាធិបតេយ្យ​បាន​មក​វិញ​នេះ គឺ​ធ្វើ​ឡើង​ស្រប​ពេល​ដែល​ប្រធាន​ស្ដីទី​គណបក្ស​សង្គ្រោះ​ជាតិ​លោក សម រង្ស៊ី និង​មន្ត្រី​ជាន់ខ្ពស់​គណបក្ស​នេះ​ជាច្រើន​រូប​ទៀត គ្រោង​នឹង​ធ្វើ​ដំណើរ​វិលត្រឡប់​ទៅ​កម្ពុជា​វិញ មិន​ឱ្យ​ហួស​ពី​ខែ​កញ្ញា ខាងមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល