ការដាក់លិខិតស្នើសុំធ្វើបាតុកម្មរាល់សប្ដាហ៍របស់ លោក ម៉ម សូណង់ដូ ទៅសាលារាជធានីភ្នំពេញ គឺបន្ទាប់ពីក្រសួងព័ត៌មាន ចេញលិខិតបដិសេធការផ្ដល់ហ្វ្រេកង់ ឬរលកធាតុអាកាស សម្រាប់វិទ្យុ និងទូរទស្សន៍។
នៅក្នុងលិខិតរបស់ លោក ម៉ម សូណង់ដូ ដែលបានដាក់ទៅសាលារាជធានីភ្នំពេញ មានខ្លឹមសារថា ចាប់ពីថ្ងៃច័ន្ទ ទី២៧ មករា តទៅ លោកនឹងដឹកនាំបាតុករចំនួនតិចជាង ២០០នាក់ ធ្វើបាតុកម្មជារៀងរាល់សប្ដាហ៍ ចាប់ពីថ្ងៃច័ន្ទ ដល់ថ្ងៃសុក្រ ដោយជួបជុំគ្នានៅទីលានប្រជាធិបតេយ្យ វេលាម៉ោង ៧ព្រឹក។ នៅម៉ោង ៨ព្រឹក ដល់ម៉ោង ១២ថ្ងៃត្រង់ ហែក្បួនឆ្ពោះទៅក្រសួងព័ត៌មាន ដើម្បីទាមទារឱ្យក្រសួងនេះអនុញ្ញាតឱ្យវិទ្យុសម្បុកឃ្មុំ ដំឡើងការផ្សាយបន្ត (Relay) ទៅតាមបណ្ដាខេត្ត និងសុំហ្វ្រេកង់ ឬរលកធាតុអាកាស សម្រាប់បង្កើតទូរទស្សន៍ទៅតាមសំណូមពររបស់ប្រជាពលរដ្ឋរាប់លាននាក់ នៅក្នុងព្រះរាជាណាចក្រកម្ពុជា។
លិខិតលេខ០៥៣ របស់ក្រសួងព័ត៌មាន ដែលចុះហត្ថលេខាដោយលោករដ្ឋមន្ត្រី ខៀវ កាញារីទ្ធ ថ្ងៃទី១០ មករា បានសរសេរតបទៅអ្នកស្រី ឌិន ផាណារ៉ា ប្រធានស្ដីទីវិទ្យុសម្បុកឃ្មុំ អែហ្វ.អិម ១០៥ មេហ្គាហឺតស៍ ថា ក្រសួងព័ត៌មាន មានការសោកស្ដាយដោយពុំមានសល់ហ្វ្រកង់វិទ្យុ និងហ្វ្រេកង់ទូរទស្សន៍ សម្រាប់ផ្ដល់តាមការស្នើសុំរបស់អ្នកស្រីបានទេ។
ទាក់ទងនឹងលិខិតស្នើសុំធ្វើបាតុកម្មរាល់សប្ដាហ៍ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បញ្ជាក់ថា ខាងលោកបានទទួលលិខិតរបស់ លោក ម៉ម សូណង់ដូ នៅវេលាម៉ោង ៤ល្ងាច ហើយថ្នាក់ដឹកនាំកំពុងពិនិត្យ និងពិភាក្សាលើលិខិតស្នើសុំនេះ៖ «ទទួលពីលោកប្រធាននៅម៉ោង ៤នេះឯង។ ឥឡូវយើងកំពុងធ្វើបទបង្ហាញដាក់ជូនឯកឧត្ដមអភិបាលរាជធានីលោកសម្រេច។ ប្រហែលជាស្អែកយ៉ាងយូរ បានលទ្ធផលហើយ»។
វិទ្យុអាស៊ីសេរី ព្យាយាមទាក់ទងប្រធាន និងប្រធានស្ដីទីនៃវិទ្យុសម្បុកឃ្មុំ គឺលោក ម៉ម សូណង់ដូ និងអ្នកស្រី ឌិន ផាណារ៉ា ដើម្បីបញ្ជាក់បន្ថែមជុំវិញគម្រោងធ្វើបាតុកម្មនេះដែរ ប៉ុន្តែទូរស័ព្ទមិនអាចទាក់ទងបាន។
ទោះជាដូច្នេះក្ដី កាលពីដើមខែមករា លោក ម៉ម សូណង់ដូ ធ្លាប់ថ្លែងទាក់ទងនឹងការសុំហ្វ្រេកង់បង្កើតទូរទស្សន៍ថា ការដែលរដ្ឋាភិបាលមិនផ្ដល់ហ្វ្រេកង់ឱ្យលោកបង្កើតទូរទស្សន៍ គឺហាក់ដូចជាឪពុកម្ដាយផ្ដល់អាហារឱ្យកូនមិនស្មើគ្នាដែរ ដោយលោកថ្លែងថា ជាការឱ្យកូនមួយបានស៊ី ហើយកូនមួយទៀតអត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។