មន្ត្រីសង្គមស៊ីវិល ស្នើសុំរដ្ឋាភិបាលពិភាក្សាជាមួយដៃគូពាក់ព័ន្ធទាំងអស់ ឲ្យបានគ្រប់ជ្រុងជ្រោយ មុននឹងចាប់ផ្ដើមសិក្សាបង្កើតច្បាប់ចរាចរណ៍ផ្លូវគោកថ្មី ដែលមានលក្ខណៈតឹងរ៉ឹងជាងច្បាប់ចរាចរណ៍បច្ចុប្បន្ន។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ព្រួយបារម្ភថា ប្រសិនរដ្ឋាភិបាលបង្កើតច្បាប់ចរាចរណ៍ថ្មីមួយទៀត ដោយគ្មានការពិភាក្សាគ្នាច្បាស់លាស់ទេ ច្បាប់នោះនឹងក្លាយជាបន្ទុកធ្ងន់ធ្ងរថែមទៀត សម្រាប់ពលរដ្ឋក្រីក្រ ជាពិសេសក្រុមអ្នកគ្មានប្រាក់ឈ្នួលទៀងទាត់ ឬអ្នកប្រកបរបរសេដ្ឋកិច្ចក្រៅប្រព័ន្ធ។
លោកបន្តថា ស្ថានភាពបច្ចុប្បន្ននេះ រដ្ឋាភិបាលគួររកយន្តការធ្វើយ៉ាងណាឲ្យសមត្ថកិច្ចអនុវត្តច្បាប់ចរាចរណ៍ផ្លូវគោកបច្ចុប្បន្ន ឲ្យមានប្រសិទ្ធភាពខ្ពស់ ដូចជា ការចាប់ពិន័យត្រូវធានាថា ធ្វើឡើងដោយស្មើភាពគ្នា ការហាមឃាត់រថយន្តធុនធំ កុំឲ្យបើកចូលក្រុង ការសម្រួលចរាចរណ៍តាមដងផ្លូវ កុំឲ្យកកស្ទះជាដើម។
ការលើកឡើងនេះ ក្រោយពេលប្រធានគណៈកម្មាធិការចរាចរណ៍ផ្លូវគោក គឺរដ្ឋមន្ត្រីក្រសួងមហាផ្ទៃ លោក ស ខេង បានលើកឡើងកាលពីថ្ងៃទី២៥ មករាថា នៅពេលឆាប់ៗ ខាងមុខនេះ លោកនឹងដឹកនាំការពិនិត្យរៀបចំច្បាប់ចរាចរណ៍ថ្មីមួយទៀត ដែលច្បាប់នោះនឹងមានលក្ខណៈតឹងរ៉ឹងជាងច្បាប់ចរាចរណ៍បច្ចុប្បន្ន។ លោក បញ្ជាក់ថា មូលហេតុដែលត្រៀមធ្វើច្បាប់ថ្មីនោះ គឺដោយសារច្បាប់ចរាចរណ៍បច្ចុប្បន្នមានច្រើនមាត្រាពេក ដែលមិនអាចធ្វើវិសោធនកម្មបាន។
ទន្ទឹមនឹងការត្រៀមបង្កើតច្បាប់ថ្មីនេះ លោក ស ខេង បានបង្គាប់ឱ្យមន្ត្រីនគរបាលចរាចរណ៍ផ្លូវគោកអនុវត្តច្បាប់ និងវិធានការច្បាប់បច្ចុប្បន្ននេះឲ្យបានតឹងរ៉ឹង ក្រោយពេលលោកសង្កេតឃើញថា នៅមានពលរដ្ឋមួយចំនួនទៀត មិនទាន់គោរពច្បាប់ចរាចរណ៍។
ក្រៅពីច្បាប់ចរាចរណ៍ផ្លូវគោក ដែលមានច្រើនមាត្រាមិនអាចវិសោធនកម្មបានហើយនោះ រដ្ឋាភិបាលក៏បានចេញអនុក្រឹត្យបន្ថែមការពិន័យអ្នកបើកបរម៉ូតូ និងរថយន្ត ចំនួន ១៦ចំណុចថែមទៀតដែរ ដែលការពិន័យទាបបំផុតគឺ ចាប់ពី ៦ម៉ឺន (៦០.០០០) រៀល ដល់ ៤លាន (៤.០០០.០០០) រៀល។
របាយការណ៍ប្រចាំឆ្នាំ២០២១ បង្ហាញថា គ្រោះថ្នាក់ចរាចរណ៍បានថយចុះ ៥០៦ករណីស្មើនឹង ១៦ភាគរយ បើធៀបឆ្នាំ២០២០។ ចំណែកអ្នកស្លាប់ និងអ្នករងរបួស ក៏ថយចុះដែរ គឺស្លាប់ថយ ១៤៩នាក់ និងរបួសថយ ១.០៧១នាក់។ ប៉ុន្តែក្រុមអ្នកឃ្លាំមើលថា ការថយចុះនៃគ្រោះថ្នាក់ចរាចរណ៍នេះ បណ្ដាលមកពីស្ថានភាពការរាតត្បាតជំងឺកូវីដ១៩ (Covid-19) ដែលធ្វើឲ្យពលរដ្ឋផ្អាកការធ្វើដំណើរ។ ចំណែកពលរដ្ឋ ក៏មិនទាន់យល់ដឹងពីច្បាប់ចរាចរណ៍អ្វីដែរ គឺពួកគាត់ខ្លាចតែប៉ូលិសចរាចរណ៍ចាប់ផាកតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។