ជប៉ុន​ផ្តល់​​ជំនួយ​​ជាង​ ៣​លាន​​ដុល្លារ​ ​សម្រាប់​​គម្រោង​​អាហារូបករណ៍​​នៅ​កម្ពុជា

ដោយ អាស៊ីសេរី
2021-07-27
Share
ជប៉ុន​ផ្តល់​​ជំនួយ​​ជាង​ ៣​លាន​​ដុល្លារ​ ​សម្រាប់​​គម្រោង​​អាហារូបករណ៍​​នៅ​កម្ពុជា ឯកអង្គរាជទូតជប៉ុនប្រចាំកម្ពុជាលោក មិកាមិ ម៉ាសាហ៊ីរ៉ូ និងលោក ប្រាក់ សុខុន ឧបនាយករដ្ឋមន្រ្តី រដ្ឋមន្ត្រីការបរទេសកម្ពុជា ចុះហត្ថលេខាលើលិខិតប្តូរសារស្ដីពីការផ្ដល់ហិរញ្ញប្បទានឥតសំណង សម្រាប់គម្រោងអាហារូបករណ៍អភិវឌ្ឍន៍ធនធានមនុស្ស ហៅកាត់ថា JDS ដែលមានទឹកប្រាក់សរុបចំនួន៣៦២លានយ៉េន ប្រមាណ៣,៣៥លានដុល្លារអាមេរិក កាលពីថ្ងៃទី២៦ ខែកក្កដា ឆ្នាំ២០២១។
រូប៖ ស្ថានទូតជប៉ុនប្រចាំនៅកម្ពុជា

រដ្ឋាភិបាល​ជប៉ុន​ផ្តល់​ជំនួយ​​ប្រមាណ​ជាង ៣លាន​ដុល្លារ​អាមេរិក ដល់​កម្ពុជា​សម្រាប់​គម្រោង​អាហារូបករណ៍​ ដើម្បី​លើកកម្ពស់​ធនធាន​មនុស្ស​នៅកម្ពុជាក្នុង​ឆ្នាំ​២០២១។ តាមរយៈគម្រោងនេះ មន្ត្រី​រដ្ឋាភិបាល​ ​ចំនួន ​២៦​រូប ​ក្នុងនោះ​ ២៤​រូប​សំរាប់រៀនថ្នាក់អនុបណ្ឌិត និង ២រូប​ទៀត រៀន​ថ្នាក់​បណ្ឌិត ដែល​នឹង​ទៅ​បន្តការ​សិក្សា​នៅ​ក្នុង​ប្រទេស​ជប៉ុន​។

គេហទំព័រ​ហ្វេសប៊ុក​របស់​ស្ថាន​ទូត​ជប៉ុន​ឲ្យ​ដឹង​ថា រដ្ឋមន្ត្រី​ការបរទេស លោក​ ប្រាក់ សុខុន និង​ឯកអគ្គរាជទូត​ជប៉ុន​ប្រចាំ​​កម្ពុជា​ លោក​ មិកាមិ ម៉ាសាហ៊ីរ៉ូ​ (MIKAMI Masahiro) កាលពីថ្ងៃទី២៦ ខែកក្កដា បាន​ចុះហត្ថលេខាលើលិខិត​ប្តូរសារ​ស្ដីពី​ការ​ផ្ដល់​ហិរញ្ញប្បទាន​ឥត​សំណង​ សម្រាប់​គម្រោង​អាហារូបករណ៍​អភិវឌ្ឍន៍​ធនធាន​មនុស្ស ហៅកាត់ថា JDS ​(Japan Development Scholarship) ដែល​មាន​ទឹក​ប្រាក់​សរុប​ចំនួន​ ៣៦២លានយ៉េន ស្មើ​ប្រមាណ​ ៣លាន និង ៣៥ម៉ឺន​ដុល្លារអាមេរិកស្ថានទូត​ជប៉ុន​បន្តថា ដោយសារ​បច្ចុប្បន្ន ពិភពលោក​កំពុង​ប្រឈម​ នឹងការ​រាតត្បាត​នៃ​ជំងឺកូវីដ១៩ ដែល​ជា​ហេតុនាំឲ្យ​ការ​សិក្សា​នៅ​បរទេស​មានភាព​លំបាក រដ្ឋាភិបាល​ជប៉ុន​​ជឿ​ជាក់​ថា ជំនួយ​នេះនឹង​អាច​ចូលរួម​ចំណែក​ពង្រឹង​ធនធាន​មនុស្ស​នៅ​កម្ពុជា។

រដ្ឋមន្ត្រី​ការបរទេស​លោក​ ប្រាក់ សុខុន ឲ្យដឹងថា ហិរញ្ញប្បទាន​ឥត​សំណងនេះ ចូលរួម​ចំណែក​យ៉ាង​សំខាន់​ដល់​ការលើកកម្ពស់​ការអភិវឌ្ឍ​ធនធានមនុស្ស​ និង​ពង្រឹង​​កិច្ចសហប្រតិបត្តិការ​ ​រវាង​ប្រទេស​ទាំង​ពីរ។ លោក​បន្តថា ចាប់តាំងពី​ការដាក់​ឱ្យ​ដំណើរការ​នៅ​ឆ្នាំ២០០០ គម្រោង​នេះ បានផ្តល់​អាហារូបករណ៍​ដល់​មន្ត្រី​កម្ពុជា​ទៅបន្តការ​សិក្សា​នៅ​ប្រទេស​ជប៉ុន ប្រមាណ​ ៥០០នាក់​ ក្នុងនោះ​ ២៤នាក់​មកពី​ក្រសួង​ការបរទេស​។

ក្រៅពី​នេះ រដ្ឋាភិបាល​ជប៉ុន​ថ្មីៗ​នេះ ក៏បាន​ផ្ដល់​ជំនួយ​វ៉ាក់សាំង​អាស្ត្រាហ្សេនីកា (AstraZeneca) ចំនួន ​១​លានដូសដល់កម្ពុជា។

ស្ថានទូត​ជប៉ុន​ប្រចាំ​នៅ​កម្ពុជាឱ្យដឹង​ថា រដ្ឋាភិបាល​ជប៉ុន ក៏​បាន​ផ្ដល់​ជំនួយ​សរុប​ប្រមាណ​ជាង​ ៥០​លាន​ដុល្លារអាមេរិក​ដល់កម្ពុជា ក្នុងនោះមាន ​បរិក្ខារពេទ្យ ការកែ​លម្អមន្ទីរពេទ្យ ការ​គាំទ្រ​ដល់​គម្រោង​របស់​អង្គការ​អន្តរជាតិ​នានា សម្រាប់វិធានការ​ទប់​ស្កាត់​ការចម្លង​ជំងឺកាចសាហាវ​នេះ​ នៅ​តាម​ព្រំដែន ព្រមទាំង​ផ្ដល់​បរិក្ខារ​សម្រាប់​ដឹក​ជញ្ជូន និងរក្សាទុក​វ៉ាក់សាំងឱ្យ​បាន​ត្រឹម​ត្រូវ។

ទន្ទឹម​នេះ រដ្ឋាភិបាល​ជប៉ុន ក៏បាន​ផ្ដល់ប្រាក់​កម្ចីប្រមាណ ២២៧លានដុល្លារ​អាមេរិក សំរាប់​ប្រើ​ប្រាស់​ក្នុងកម្មវិធី​ឧបត្ថម្ភ សាច់​ប្រាក់ដល់​ប្រជាពលរដ្ឋ​ខ្មែរដែល​រងផលប៉ះពាល់​ដោយ​សារ​ជំងឺកូវីដ១៩ និង​សម្រាប់​ការពង្រឹង​ប្រព័ន្ធ​សុខាភិបាល​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល