ប្រជាពលរដ្ឋខ្មែរក្មេងចាស់ប្រុសស្រីដែលរស់នៅតំបន់ស្ព្រីងវែល (Springvale) ជាយក្រុងមែលបួន (Melbourne) រដ្ឋវិចតូរីយ៉ា នៅថ្ងៃទី៩ ខែមេសា បានជួបជុំគ្នានៅក្នុងឧទ្យានប៊ឺតឌិន (Burden Park) ដើម្បីចូលរួមកម្សាន្តសប្បាយអបអរបុណ្យចូលឆ្នាំថ្មីប្រពៃណីជាតិខ្មែរ។ ពិធីនេះ ក៏មានការចូលរួមពីពលរដ្ឋខ្មែរក្រោម និងពលរដ្ឋនៃប្រទេសសី្រលង្កា (Sri slanka)។ កាលពីសប្តាហ៍មុន សមាគមខ្មែររដ្ឋវិចតូរីយ៉ា ក៏បានរៀបចំពិធីបុណ្យចូលឆ្នាំដែរ។
ចាប់តាំងពីព្រឹកមក ប្រជាពលរដ្ឋមកពីតំបន់ផ្សេងៗ ស្លៀកសំលៀកបំពាក់តាមបែបប្រពៃណីខ្មែរ ប៉ុន្តែពាក់អាវក្រាស់ៗ ពីលើ ដើម្បីទប់ទល់នឹងអាកាសធាតុត្រជាក់ បានកាន់ម្ហូបអាហារ នំចំណីមកដល់ និងអង្គុយជជែកសួរសុខទុក្ខគ្នាជាក្រុមៗ នៅក្រោមដើមឈើ ដើម្បីរងចាំប្រគេនចង្ហាន់ដល់ព្រះសង្ឃ។
ក៏ជួបជុំគ្នានៅថ្ងៃនេះ មិនមែនគ្រាន់តែប្រារព្ធពិធីបុណ្យចូលឆ្នាំទេ ប៉ុន្តែក៏ជាវេទិកាមួយសម្រាប់តំណាងសហគមន៍ខ្មែរល្បីៗ មកជួបជុំជជែកគ្នាដែរ ដូចជាប្រធានសមាគមខ្មែរវិចតូរីយ៉ា លោក ជា យូហ៊ន សមាជិកក្រុមប្រឹក្សាក្រុងគ្រីតធើរដង់ដឺណង់ (Greater Dangdenong) លោកឱសថការី លឹម សួរ និងសមាជិកសភារដ្ឋវិចតូរីយ៉ា លោក តាក់ ម៉េងហ៊ាង ព្រមទាំងតំណាងសមាគមន៍ខ្មែរកម្ពុជាក្រោមលោក យ៊ាញ់ បូណាត ជាដើម។
ពិធីនេះ ក៏មានធម្មកថិកដ៏ល្បីមួយអង្គ គឺព្រះតេជព្រះគុណ សាន សុជា បានផ្តល់ឱវាទដល់ពុទ្ធបរិស័ទឲ្យចេះអង្គុយជជែកគ្នាដោយសន្តិវិធី និងរួបរួមសាមគ្គីគ្នា ទោះបីជាមកពីគណបក្សនយោបាយ ឬក្រុមណាក៏ដោយ៖ «សូម្បីតែខ្មែរយើងមករស់នៅទីនេះក៏ពិតមែន ប៉ុន្តែនិន្នាការ យើងអត់ដូចគ្នាទេ ប៉ុន្តែគួរមានពេលមួយដែលយើងគួរអង្គុយជាមួយគ្នាបាន មិនមែន អង្គុយជាមួយសុទ្ធតែចូលបក្សសម្ព័ន្ធទេតែត្រូវតែអង្គុយ បានយើងស្គាល់គ្នា » ។
ក្រោយមក ប្រជាពលរដ្ឋ ក៏បន្តលេងល្បែងប្រជាប្រិយផ្សេងៗ រហូតដល់ម៉ោង ៥ល្ងាច។
បុរសខ្មែរវ័យកណ្តាលម្នាក់ពាក់អាវសបង់កក្រមាលោក រឹម ឡុច ថ្លែងថា ការជួបជុំគ្នាប្រារព្ធបុណ្យចូលឆ្នាំថ្មីនេះ ដើម្បីថែរក្សាប្រពៃណីជាតិ និងទុកជាគំរូដល់កូនខ្មែរជំនាន់ក្រោយៗទៀត។ បុរសរូបនេះ ក៏បង្ហាញក្តីនឹករលឹកដល់បងប្អូននិងប្រជាពលរដ្ឋខ្មែរនៅរស់ប្រទេសកម្ពុជាដែរ៖ « ក្រុមយុវជនសមាគមខ្មែរ ដែលបានរៀបចំនេះ គឺថា ល្អមែនទែន ដើម្បីជួយកូនខ្មែរយើងឲ្យគ្នារៀនល្បែងប្រជាប្រិយខ្មែរពីដើម។ ដូចថា ក្មេងៗ ស្រុកនេះគ្នាអត់ដែលស្គាល់ទេ ដូចជាល្បែងលាក់កន្សែង បោះអង្គុញ ចោលឈួង គឺជាការសប្បាយមួយទេ »។
ស្ត្រីម្នាក់ទៀត រៀបរាប់ថា លោកស្រី សប្បាយរីករាយដែលបានចូលរួមពិធីបុណ្យចូលឆ្នាំនេះ ប៉ុន្តែលោកស្រី ហាក់មិនសូវនឹករលឹកដល់ស្រុកខ្មែរប៉ុន្មានទេ ព្រោះប្រទេសកំណើតរបស់ខ្លួន ហាក់មានបញ្ហាច្រើនពេក ខុសប្លែកពីពេលមុន៖ « ខ្ញុំមកនេះយូរហើយឈប់នឹកហើយ។ ឥឡូវភ្លេចហើយ ដោយសារស្រុកយើងអត់សូវសប្បាយអីដូចពីដើមៗ អ៊ីចឹង » ។
ចំណែកព្រះសង្ឃវិញ គឺព្រះតេជគុណ ឡឹម ស៊ីសុផល ក៏មានសារផ្ដាំផ្ញើក្នុងឱកាសឆ្នាំថ្មីនេះដែរ៖ «ឆ្លៀតក្នុងឱកាសនេះផងដែរ អាត្មាភាព ក៏សូមជូនពរឲ្យប្រសិទ្ធិពរឲ្យប្រជាពលរដ្ឋ ពុទ្ធបរិស័ទ្ធខ្មែរយើងនៅទូទាំងសកលលោកទាំងអស់ សូមឲ្យទទួលនូវពុទ្ធពរ៤ប្រការនិងសម្បត្តិបី គឺ សម្បត្តិមនុស្ស ទេវតានិងសម្បត្តិព្រះនិព្វាន កុំបីឃ្លៀនឃ្លាតឡើយ។សូមឲ្យមានសេរីសួរស្តីឆ្នាំថ្មី »៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។