ពិធីបុណ្យចូលឆ្នាំប្រពៃណីខ្មែរ នៅថ្ងៃទី២នេះ ប្រព្រឹត្តទៅក្នុងសភាពស្ងប់ស្ងាត់ដូចថ្ងៃដំបូង។ពលរដ្ឋមិនសូវចេញដើរលេងកម្សាន្តក្រៅផ្ទះ ឬទៅធ្វើទៅបុណ្យទានតាមវត្តអារាមដូចឆ្នាំមុនឡើយ។ ឯតំបន់ទេសចរណ៍ខេត្តកំពត កែប ព្រះសីហនុ និងសៀមរាប ស្ងាត់ជ្រងំ ព្រោះគ្មានអ្នកដើរលេងកម្សាន្តនៅថ្ងៃចូលឆ្នាំ។
ប្រជាពលរដ្ឋនៅតាមបណ្ដាខេត្ត និងរាជធានីភ្នំពេញ លើកឡើងស្រដៀងគ្នាថា ថ្ងៃទី២ នៃពិធីបុណ្យចូលឆ្នាំប្រពៃណីជាតិឆ្នាំនេះ មានសភាពសោះកក្រោះ ដូចថ្ងៃធម្មតា សឹងតែមិនដឹងថា ជាថ្ងៃបុណ្យសំខាន់របស់ជាតិ។ ពលរដ្ឋ មិននាំគ្នា ដើរលេងកម្សាន្ត ឬទៅធ្វើបុណ្យតាមទីវត្តអារាម ឲ្យគគ្រឹកគគ្រេងដូចរាល់ឆ្នាំទេ។
អ្នករស់នៅរាជធានីភ្នំពេញម្នាក់ លោក តារា វិច្ឆ័យ ឲ្យដឹងថា ទូទាំងរាជធានីភ្នំពេញ មានសភាពស្ងប់ស្ងាត់ធម្មតាដូចរាល់ថ្ងៃ គឺមនុស្សជុំគ្នាតែនៅតាមហាងកាហ្វេ ជជែកគ្នា តែប្រុងប្រយ័ត្នរៀងៗខ្លួន។ ការដើរផ្សារ និងទៅវត្តអារាមក៏មិនសូវអ៊ូអរ ប៉ុន្តែលោកមើលឃើញ មនុស្សច្រើនកកកុញ ដើរប្រជ្រៀតគ្នា នៅតាមមុខរោងចក្រ ពេលកម្មករចេញពីធ្វើការ ដោយកម្មករទាំងនោះ បានឆ្លៀតឆៀងចូលផ្សារ ក្បែររោងចក្រទិញម្ហូបអាហារផងដែរ។
ឯនៅតាមវត្តអារាមមួយចំនួនវិញ លោកឃើញ តាអាចារ្យជាអ្នកកាន់ម៉ាស៊ីនវាស់កម្ដៅ និងដាក់អាកុល ឲ្យពុទ្ធិបរិស័ទលាងដៃ មុនយកចង្ហាន់ប្រគេនព្រះសង្ឃ។ លោកបន្តថា តាមវត្តអារាមនៅក្នុងក្រុងភ្នំពេញ ស្ងាត់ជ្រងំ មិនធ្លាប់មានទេ ហើយគ្មានការរៀបចំពិធីពូនភ្នំខ្សាច់ ស្រង់ព្រះ លេងល្បែងប្រជាប្រិយ ឬរាំវង់កម្សាន្តដូចរាល់ឆ្នាំឡើយ។
ទោះយ៉ាងណា លោកថា ពលរដ្ឋខ្មែរ បានរក្សាប្រពៃណីចូលឆ្នាំក្នុងចិត្ត ដោយនៅតែនាំគ្នារៀបចំរណ្ដាប់ទទួលទេវតាតាមផ្ទះរៀងខ្លួន ជូនលុយកាក់ សំលៀកបំពាក់ជូនម្ដាយឪពុក សម្រាប់ចូលឆ្នាំ និងការជួបជុំគ្នាជាទ្រង់ទ្រាយតូច ក្នុងក្រុមគ្រួសាររៀងខ្លួន។ ឯការជួបជុំគ្នា ទទួលទានគ្រឿងស្រវឹង ក្នុងថ្ងៃចូលឆ្នាំ ក៏មិនសូវឃើញមានច្រើនដែរ៖ « ការប្រមូលផ្ដុំគ្នាផឹកស៊ី ដូចជាកាត់បន្ថយខ្លះដែរ។ តែជាក់ស្ដែងអ្នកមិនស្ដាប់ការណែនាំរបស់ក្រសួងសុខាភិបាលនៅតែមានអ៊ីចឹងណា ហើយនៅវត្ត ព្រឹកមិញ ខ្ញុំបានទៅវត្ត ហើយស្ងាត់ជ្រងំល្អណាស់។ នៅវត្តជើងឯកហ្នឹងមួយកន្លែងទៅ ហើយវត្តព្រែកជ្រៃហ្នឹងមួយកន្លែង ស្ងាត់ល្អណាស់ អាណិតលោកដែរ»។
ចំណែកនៅតាមខេត្តវិញ ក៏ដូចគ្នានឹងរាជធានីភ្នំពេញដែរ។ តាមដងផ្លូវឆ្លងទៅខេត្ត សមត្ថកិច្ចបន្តដាក់បារ៉ាស់ ហាមពលរដ្ឋមិនឲ្យធ្វើដំណើរឆ្លងខេត្តឡើយ។ រមណីយដ្ឋាន កន្លែងទេសចរណ៍ ដែលធ្លាប់មានភ្ញៀវទៅលេងអ៊ូអរពេលចូលឆ្នាំ ប្រែជាមានសភាពស្ងប់ស្ងាត់គ្មានពលរដ្ឋទៅកម្សាន្តទេ។
លោក គឹម សុខ គឺជាម្ចាស់តូបលក់ម្ហូបអាហារ នៅឆ្នេរអូរឈើទាល ខេត្តព្រះសីហនុ ឲ្យដឹងថា រយៈពេល២ថ្ងៃមកនេះ មិនសូវមានទេសចរណ៍ ទៅលេងសមុទ្រ ដូចរាល់ឆ្នាំទេ។ លោកថា តូបជាច្រើននៅឆ្នេរអូឈើទាល បានបិទចោល នៅថ្ងៃចូលឆ្នាំ។ ឯលោក ក៏នៅលក់បាយម្ហូប កំដរតូប ព្រោះមិនដឹងទៅណា។
អាជីវកររូបនេះ ប្រាប់ថា ២ថ្ងៃ នៃថ្ងៃចូលឆ្នាំនេះ ភ្ញៀវទៅលេងសមុទ្រ ស្ងាត់ជាងថ្ងៃធម្មតាទៅទៀត។ លោកថា សឹងតែមិនឃើញ ទេសចរណ៍ជនជាតិខ្មែរទៅលេង គឺឃើញតែជនជាតិចិន មួយចំនួន ទៅមុជទឹកលេង។ ឯស្ថានភាព ក្នុងក្រុងព្រះសីហនុ ក៏ស្ងាត់ជ្រងំដែរ។ មនុស្សម្នា នាំគ្នានៅក្នុងផ្ទះ ជួបជុំគ្រួសាររៀងៗខ្លួន៖ « បើលក្ខណៈគ្រួសារសម្រាប់ជនជាតិខ្មែរយើងអត់មានទេ។ តើបើជនជាតិចិន អាហ្នឹងមាន មានមកមួយៗដែរ មិនថា អត់សោះទេ មួយតុ ពីរតុ អ៊ីចឹងណា។ ប៉ុន្តែភាគច្រើន គឺសម្រាប់ជនជាតិចិនបង ដែលជនជាតិចិន គាត់នៅក្នុងក្រុងកំពង់សោម គាត់ដើរលេង។ ដូចថា គេបិទកាស៊ីណូ បិទអ្វីអស់ទៅ នៅសល់តែការងារ គាត់រកស៊ីនៅក្នុងស្រុកហ្នឹង គាត់នាំមិត្តភក្ដិមកដើរកម្សាន្តនៅក្នុងស្រុកហ្នឹង មិនមែនអត់សោះនោះទេ»។
នៅខេត្តទេសចរណ៍ កំពត និងកែប ក៏ពលរដ្ឋមិនធ្វើដំណើរលេងកម្សាន្តដែរ។ រមណីយដ្ឋានកែច្នៃជាប់មាត់សមុទ្រ ដៃព្រែក នៅខេត្តកំពត ភ្នំបូកគោ ទឹកឈូ និងឆ្នេរកែប មិនទទួលបានអ្នកទេសចរណ៍ដើរកម្សាន្តដូចរាល់ឆ្នាំទេ។ លោក ហេង សឿន ជាអ្នកខេត្តកំពត ប្រាប់ថា តាមផ្លូវស្ងាត់ជ្រាប ផ្សារបើកលក់ធម្មតា តែមិនសំបូរមនុស្សចូលទិញឡើយ។ ឯហាងនៅជាប់មាត់ព្រែកកំពង់បាយ ម្ដុំសាលាខេត្ត ដែលជាទីប្រជុំជនអ្នកទេសចរណ៍ក៏បានបិទអស់។ រីឯសួនច្បារ ជាប់មាត់ព្រែក ដែលតែងតែមានមនុស្សម្នា ទៅជួបជុំហាត់ប្រាណនិងលំហែកាយក៏គ្មានមនុស្សទៅរត់ដែរ នៅថ្ងៃចូលឆ្នាំនេះ៖ « នៅថ្ងៃចូលឆ្នាំហ្នឹង បើពីម្សិលមិញ ពេលព្រឹកហ្នឹងដូចជាមិនមានអ្វីទេស្ងាត់ស្ងៀមធម្មតា ដូចជាអត់មានកម្មវិធីបុណ្យអ្វីអ៊ីចឹងណា ហើយចាប់ផ្ដើមទេវតាចុះអ៊ីចឹង យើងឃើញការរៀបចំ ទទួលទេវតាអ្វីអ៊ីចឹងដែរ ហើយមានការអុជអូប អុជទៀន ទទួលទេវតាអ្វីអ៊ីចឹងដែរ ហើយមានបាញ់ផាវ បាញ់អ្វីខ្លះៗដែរ។ តែមិនសូវជាអ៊ឹកធឹក អ្វីប៉ុន្មានទេ អ៊ីចឹងណា ហើយនៅពេលព្រឹកថ្ងៃនេះ អត់មានអ្វីដែរ ស្ងាត់ស្ងៀមធម្មតា។ តាមវត្តតាមវ៉ា ក៏ធម្មតា និយាយទៅ ដូចអត់មានចូលឆ្នាំអ្វីអ៊ីចឹងណា»។
ចំណែកនៅខេត្តបាត់ដំបង កំពង់ធំ និងកំពង់ចាមវិញ ក៏មិនសូវមានមនុស្សធ្វើដំណើរក្នុងថ្ងៃបុណ្យចូលឆ្នាំនេះដែរ ។អ្នកភូមិខ្លះ ឲ្យដឹងថា មនុស្សម្នា នាំគ្នាទៅថែស្រែ ចម្ការ ដូចសព្វថ្ងៃ ដោយមិនសូវធ្វើដំណើរទៅមក ឬជួបជុំគ្នា នៅតាមរមណីយដ្ឋានប្រវត្តិសាស្ត្រដូចរាល់ឆ្នាំទេ។ ឯយុវជន ដែលធ្លាប់តែមកលេងស្រុកកំណើត ក៏អវត្តមានដែរ ដោយសារជាប់ធ្វើការនៅភ្នំពេញ និងអ្នកខ្លះជាពលករនៅប្រទេសថៃ មិនបានឈប់សម្រាកទៅលេងស្រុកកំណើតនៅឆ្នាំនេះទេ។
សម្រាប់តំបន់ទេសចរណ៍អង្គរនៅខេត្តសៀមរាបវិញ ទទួលបានភ្ញៀវទេសចរណ៍ក្នុងខេត្តខ្លះដែរ នៅថ្ងៃទី២ នៃពិធីបុណ្យចូលឆ្នាំនេះ។ អ្នកធ្វើការវិស័យទេសចរណ៍ និងសណ្ឋាគារ នៅខេត្តសៀមរាប លោក ហាំង រ៉ុន ប្រាប់ថា អ្នកនៅតាមស្រុក ក្នុងខេត្តសៀមរាបខ្លះ បាននាំគ្នាមកដើរមើលប្រាសាទ នៅថ្ងៃចូលឆ្នាំ តែដើរដោយពាក់ម៉ាស់គ្រប់គ្នា ដើរឆ្ងាយៗពីគ្នា និងធ្វើដំណើរដោយមធ្យោបាយផ្ទាល់ខ្លួន ព្រោះអ្នករត់រម៉ក ម៉ូតូឌុប រថយន្តឈ្នួលបានផ្អាកទាំងអស់ សឹងតែគ្មានអ្នកបន្តអាជីពសេវាដឹកជញ្ជូនភ្ញៀវទេសចរណ៍ក្នុងថ្ងៃចូលឆ្នាំ។ លោក ហាំង រ៉ុន បន្តថា នៅក្រៅតំបន់អង្គរវិញ អ្នកសៀមរាប នៅតែធ្វើដំណើរធម្មតា តែមានមនុស្សម្នាតិចតួច ដែលធ្វើដំណើរចេញពីផ្ទះ៖ « អត់សូវច្រើនទេបង គឺមានលក្ខណៈ គ្រាន់តែថាច្រើនជាងថ្ងៃធម្មតាតិច។ សម្រាប់ថ្ងៃចូលឆ្នាំ រាងច្រើនជាងថ្ងៃធម្មតាបន្តិច ដោយសារគាត់មកជាលក្ខណៈគ្រួសារ គាត់មកលេងកម្សាន្តជាលក្ខណៈគ្រួសារ។ ( ហាង ) នៅសៀមរាបភាគច្រើនត្រូវបានបិទអស់ហើយ មិនថា Restaurant ឬក៏សណ្ឋាគារទេ ភាគច្រើនត្រូវបានព្យួរ ព្យួរការងារ ព្យួរ Hotel ព្យួរអ្វីអ៊ីចឹងណា ហើយកម្មកររបស់យើងធ្វើការអ៊ីចឹង នៅឆ្ងាយពីខេត្ត គាត់ទៅនៅផ្សេង»។
ថ្វីដ្បិតពលរដ្ឋមិនបានទៅធ្វើបុណ្យនៅទីវត្តអារាម និងលេងកម្សាន្តដូចរាល់ឆ្នាំក្ដី ប៉ុន្តែព្រះសង្ឃផ្ដល់ឱវាទថា ពុទ្ធបរិស័ទ អាចធ្វើពិធីចូលឆ្នាំនៅតាមផ្ទះរៀងៗ ខ្លួនបាន ដោយសំខាន់ត្រូវតាំងចិត្តឱ្យបានស្ងប់ ហើយលះបង់អំពើអាក្រក់ពីឆ្នាំចាស់ចោល ប្រព្រឹត្តិអំពើល្អជំនួសវិញនៅក្នុងឆ្នាំថ្មីនេះ។
ព្រះសង្ឃ លួន សាវ៉ាត ដែលតែងចូលរួមសកម្មភាពសង្គម ផ្ដល់ឱវាទថា បើក្នុងឆ្នាំកន្លងផុតទៅ ចិត្តធ្លាប់មានលោភៈគឺការលោភលន់ យកទ្រព្យសម្បត្តិអ្នកដទៃលួចប្លន់ដីធ្លី ផ្ទះសម្បែង ឬក៏ទៅកាប់បំផ្លាញព្រៃឈើសម្បត្តិធនធានធម្មជាតិមកធ្វើជាប្រយោជន៍ផ្ទាល់ខ្លួន ចូរលះបង់កំហុសទាំងអស់ចោលហើយធ្វើអ្វីដែលល្អ អ្វីដែលមានប្រយោជន៍ដែលនាំមកសេចក្ដីសុខដល់ខ្លួនក្រុមគ្រួសារនិងដល់អ្នកដទៃ នោះហើយជាអត្ថន័យការចូលឆ្នាំពិតប្រាកដ។
ព្រះអង្គជំរុញពលរដ្ឋគួរតែអនុវត្តតាមការណែនាំរបស់អ្នកជំនាញផ្នែកសុខាភិបាលឱ្យបានខ្ជាប់ខ្ជួនដោយត្រូវចេះថែរក្សាសុខភាព លាងសម្អាតអនាម័យខ្លួនប្រាណឱ្យបានញឹកញាប់ ជៀសវាងការធ្វើដំណើរ ឬនៅកន្លែង ដែលមានមនុស្សច្រើន គួរពាក់ម៉ាស់ការពារមាត់និងច្រមុះ ជាពិសេស ត្រូវនៅក្នុងផ្ទះឱ្យបានច្រើន និងមិនត្រូវប្រមូលផ្ដុំគ្នាទទួលទានគ្រឿងស្រវឹងជាក្រុម និងដើរលេងនៅទីកន្លែងដែលមានមនុស្សកុះករឡើយ ដើម្បីរួមចំណែកបង្ការទប់ស្កាត់ជំងឺកូវីដ១៩ (Covid-19) ទាំងអស់គ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។