ព្រះមហាក្សត្រ ព្រះបរមនាថ នរោត្តម សីហមុនី គ្រោងយាងទៅប្រទេសបារាំង ចាប់ពីថ្ងៃទី១០ ដល់ថ្ងៃទី១៥ ខែវិច្ឆិកា ដើម្បីចូលរួមក្នុងសម័យប្រជុំមហាសន្និបាត លើកទី៤១ ក្នុងឱកាសប្រារព្ធខួប លើកទី៧៥ នៃអង្គការយូណេស្កូ (UNESCO)។
ព្រះអង្គនឹងថ្លែងព្រះរាជសុន្ទរកថា នៅក្នុងពិធីបើកសម័យប្រជុំជាផ្លូវការនៃមហាសន្និបាត នៅថ្ងៃទី១២ ខែវិច្ឆិកា ដោយផ្ដោតលើសមិទ្ធផលសំខាន់ៗ ពាក់ព័ន្ធនឹងការចុះបញ្ជីបេតិកភណ្ឌពិភពលោក និងបេតិកភណ្ឌអរូបីមនុស្សជាតិ របស់អង្គការយូណេស្កូ នៅក្នុងប្រទេសកម្ពុជា នៅចំពោះវត្តមានរបស់ប្រមុខរដ្ឋ និងរដ្ឋាភិបាលជាច្រើនក្នុងពិភពលោកដែលមកចូលរួម។
ការយាងទៅចូលរួមកិច្ចប្រជុំកំពូលនេះ គឺតបទៅតាមការអញ្ជើញរបស់អគ្គនាយិកានៃអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) អ្នកស្រី អូដ្រេ អាហ្សូឡេ (Audrey Azoulay)។
ព្រះមហាក្សត្រ ចាត់តាំងប្រមុខរដ្ឋស្ដីទី លោក សាយ ឈុំ ជាតំណាងព្រះអង្គ ក្នុងពិធីពន្លត់ទៀនជ័យ នៃទិវាបុណ្យឯករាជ្យជាតិ នៅថ្ងៃទី១១ ខែវិច្ឆិកា ខាងមុខ នៅវិមានឯករាជ្យ ពេលអវត្តមានរបស់ព្រះអង្គ។
អង្គការយូណេស្កូ បង្កើតឡើងកាលឆ្នាំ១៩៤៥ បានរួមចំណែកយ៉ាងសំខាន់ ដល់ការលើកតម្កើងវិស័យអប់រំ វិទ្យាសាស្ត្រ វប្បធម៌ និងការប្រាស្រ័យទាក់ទងគ្នានៅក្នុងពិភពលោក តាមរយៈកម្មវិធីកិច្ចសហប្រតិបត្តិការពហុភាគី។ ក្នុងកិច្ចប្រជុំកំពូលនេះ មានថ្នាក់ដឹកនាំជាច្រើនក្នុងពិភពលោក បានមកចូលរួម ដែលបានចាប់ផ្ដើមពីថ្ងៃទី៩ ដល់ថ្ងៃទី២៤ ខែវិច្ឆិកា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។