អង្គការ សមាគម និងសហជីពមួយចំនួនធ្វើការក្នុងវិស័យកាត់ដេរ សំណង់ ចំណីអាហារ កសិកម្ម និងសេដ្ឋកិច្ចក្រៅប្រព័ន្ធ រួមគ្នាទៅលើកទឹកចិត្តក្រុមកម្មករណាហ្គាវើលដ៍ ដែលធ្វើកំពុងកូដកម្មទាមទារឲ្យក្រុមហ៊ុនទទួលយកបុគ្គលិកជាង ៣រយនាក់ចូលធ្វើការវិញ និងដោះលែងតំណាងពួកគេ ៨នាក់ត្រឡប់មកវិញ។ ពួកគេស្នើឲ្យតុលាការទម្លាក់ចោលបទចោទ ហើយដោះលែងអ្នកជាប់ឃុំទាំងអស់ឲ្យមានសេរីភាព ដើម្បីវិលចូលតុចរចាដោះស្រាយបញ្ចប់វិវាទការងាររ៉ាំរ៉ៃមួយនេះ។
ថ្នាក់ដឹកនាំសមាគមនិងសហជីពទាំងនោះ ថ្លែងសារម្នាក់ម្ដងៗ នៅចំពោះក្រុមកូដករណាហ្គាវើលដ៍កាលពីថ្ងៃទី២២ ខែមករា ដោយលើកទឹកចិត្តឲ្យកម្មករបន្តការតស៊ូដោយអហិង្សាតទៅទៀត រហូតដល់មានដំណោះស្រាយ ហើយទាមទារឲ្យអាជ្ញាធរគោរពសិទ្ធិការងារ និងដោះលែងថ្នាក់ដឹកនាំនិងសកម្មជនសហជីព៨នាក់ ដោយគ្មានលក្ខខណ្ឌ ដើម្បីឈានទៅបញ្ចប់វិវាទការងារជាមួយភាគីក្រុមហ៊ុន។
ការចូលរួមពីសមាគម និងសហជីពនៅទីតាំងធ្វើកូដកម្មរបស់ក្រុមកម្មករណាហ្គាវើលដ៍ នៅថ្ងៃទី២២ ខែមករា ធ្វើឡើងក្រោយពេលពួកគេបញ្ចប់ពិធីរំលឹកខួប ១៨ឆ្នាំនៃការព្រឹត្តិការណ៍បាញ់សម្លាប់មេដឹកនាំសហជីពសេរីកម្មករនៃព្រះរាជាណាចក្រកម្ពុជាលោក ជា វិជ្ជា នៅក្បែរវត្តលង្កា កណ្ដាលទីក្រុងភ្នំពេញ។
ប្រធានសហភាពសហជីពកម្ពុជា (CCU) លោក រ៉ុង ឈុនថ្លែងថា ការចាប់ខ្លួនតំណាងសហជីពដាក់ពន្ធនាគារ មិនមែនជាដំណោះស្រាយនោះទេ។ លោកយល់ថា មានតែការដោះលែងសហជីពឲ្យវិលមកជួបចរចាជាមួយក្រុមហ៊ុនហើយសម្របសម្រួលដោយក្រសួងការងារវិវាទនេះ ទើបជាជម្រើសល្អដែលអាចបញ្ចប់បញ្ហាបាន៖ «ពួកយើងសហជីពក៏មិនឱបដៃឈរមើលប្អូនៗ ដែរ។ យើងត្រូវរួមចិត្ត រួមកម្លាំងទឹកចិត្តដើម្បីទាមទារលក្ខខណ្ឌការងារ ទាមទារឲ្យមានដំណោះស្រាយក្នុងពេលឆាប់ៗ នេះ។ ហើយបើមិនមានដំណោះស្រាយទេ សហជីពយើងនឹងជជែកគ្នា គួរកម្មករនៅតាមរោងចក្រកាត់ដេរឲ្យធ្វើកូដកម្មដើម្បីជំរុញឲ្យមានដំណោះស្រាយជូនបុគ្គលិកណាហ្គាវើលដ៍»។
ទន្ទឹមគ្នានោះ មន្ត្រីក្រសួងការងារ ចាក់សារសំឡេងអំពាវនាវខ្លាំងៗ តាមមេក្រូឲ្យកម្មករណាហ្គាវើលដ៍ទៅទទួលយកប្រាក់សំណងក្រសួងការងារ ទោះបីជាពួកគេគ្មានតំណាងក៏ដោយ។ ចំណែកក្រុមកម្មករបដិសេធមិនទទួលយកសំណងនោះទេ ប្រសិនបើគ្មានវត្តមានតំណាងសហជីព ៨នាក់ចូលតុចរចាដោះស្រាយវិវាទមួយនេះ។
ប្រធានសហភាពការងារកម្ពុជាលោក អាត ធន់ ដែលទៅមើលការតវ៉ានេះថ្លែងថា វិធានការរបស់ក្រសួងការងារដោយចាក់សំឡេងដដែលៗនេះ គឺមិនមែនជាដំណោះស្រាយទេ តែជាការរំខានដល់ក្រុមកម្មករដែលធ្វើកូដកម្មដោយសន្តិវិធីទៅវិញ ព្រោះពួកគាត់បានដឹងសារអំពាវនាវនេះរួចមកហើយ។ លោកបន្តថា ដើម្បីដោះស្រាយវិវាទនេះ ទាល់តែអាជ្ញាធរដោះលែងតំណាងកម្មករជាមុនសិន ហើយក្រសួងការងារ សម្របសម្រួលដោះស្រាយបញ្ចប់វិវាទជាមួយភាគីក្រុមហ៊ុន តាមច្បាប់សហជីពនិងច្បាប់ស្ដីពីការងារ ទើបរឿងអាចបញ្ចប់ទៅបាន៖ «រឿងដែលត្រូវដោះស្រាយ ត្រូវផ្ដល់ឱកាសឲ្យតំណាងរបស់គាត់នោះ មានឱកាសចេញមកជជែកដោះស្រាយ។ បន្ទាប់មកវាចប់ហើយ។ វាមិនចាំបាច់បង្ខំទេ អ្នកណាគេចង់បើកលុយ ក៏លុយទៅ អ្នកទៀតចង់ធ្វើការ ក៏ធ្វើការទៅ វាចប់បាត់ហើយ។ អ្វីដែលយើងលើកទឹកចិត្តឲ្យខាងក្រសួងធ្វើ គឺត្រូវតែមានការសម្របសម្រួលថ្នាក់ខ្ពស់ជាងនេះបន្តិច។ អាចថា កម្រិតរដ្ឋមន្ត្រី ឬក៏រដ្ឋលេខាធិការដែលធ្លាប់ដោះស្រាយរឿងហ្នឹងកន្លងមក ឲ្យមានឥទ្ធិពលជាមួយខាងតុលាការ និងកងកម្លាំងផ្សេងៗ ឲ្យធានាថារឿងហ្នឹង ត្រូវបានដោះលែងអ្នកតំណាងរបស់គេ មកធ្វើការចរចា បានបញ្ចប់រឿងបាន»។
វិទ្យុអាស៊ីសេរីមិនអាចសុំការឆ្លើយតបរឿងនេះពីអគ្គលេខាធិការនៃអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញា (គ.ក.ប) និងជាអ្នកនាំពាក្យក្រសួងការងារលោក ទេស រុក្ខាផល បានទេ ដោយសារហៅទូរស័ព្ទចូល តែពុំមានអ្នកទទួល។
គិតត្រឹមថ្ងៃទី២២ ខែមករា ថ្នាក់ដឹកនាំនិងសមាជិកសហជីពនៃកម្មករណាហ្គាវើលដ៍ ៨នាក់ កំពុងជាប់ឃុំក្នុងពន្ធនាគារព្រៃសអស់រយៈពេល ២៣ថ្ងៃហើយ។ ក្រុមកម្មករណាហ្គាវើដល៍បន្តធ្វើកូដកម្មដដែល រហូតមានការដោះលែងតំណាងពួកគេត្រឡប់មកវិញ ហើយក្រុមហ៊ុនត្រូវទទួលយកបុគ្គលិកជាង ៣រយកាន់ចូលធ្វើការវិញ ទើបពួកគេរំសាយការតវ៉ា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។