អត្រាអ្នកស្លាប់ និងរងរបួសដោយសារគ្រាប់មីន និងគ្រាប់មិនទាន់ផ្ទុះដែលបន្សល់ទុកពីសង្គ្រាម បានថយចុះយ៉ាងខ្លាំង ក្នុងអំឡុងពេល ២៤ឆ្នាំកន្លងទៅនេះ។
នៅក្នុងសារចូលរួបអបអរ ទិវាជាតិយល់ដឹងពីគ្រាប់មីន កាលពីថ្ងៃទី២៤ កុម្ភៈ លោកនាយករដ្ឋមន្ត្រី ហ៊ុន សែន ឱ្យដឹងថា ចំនួនអ្នកស្លាប់ និងរងរបួស បានថយចុះមកត្រឹម ៦៥នាក់ ក្នុងអំឡុងឆ្នាំ២០២០ ដែលកាលពីឆ្នាំ១៩៩៦ មានអ្នកស្លាប់ និងរបួស ៤.៣២០នាក់។ បន្ថែមពីនេះ ផ្ទៃដី ២.១៣៨គីឡូម៉ែតការ៉េ ត្រូវបានបោសសំអាត ចាប់ពីឆ្នាំ១៩៩២ ដល់ ឆ្នាំ២០២០។ លោក ហ៊ុន សែន បញ្ជាក់ថា ដីបោសសំអាតគ្រាប់មីនហើយនោះ ក៏បានប្រើប្រាស់សម្រាប់វិស័យកសិកម្ម សាងសង់ហេដ្ឋារចនាសម្ព័ន្ធ សាងសង់សាលារៀន ផ្ទះ និងមន្ទីរថែទាំសុខភាព ជាដើម សម្រាប់ប្រជាពលរដ្ឋប្រមាណ ជាង ៦លាននាក់។
ក្នុងសារដដែលនោះ លោក ហ៊ុន សែន បញ្ជាក់ថា ក្នុងអំឡុងពេល ២៨ឆ្នាំកន្លងមកនេះ អាជ្ញាធរមីន ក៏បានរកឃើញនិងដុតបំផ្លាញគ្រាប់មីនជាង ១លានគ្រាប់ មីនប្រឆាំងរថក្រោះជាង ២៥.៤៨៨គ្រាប់និងគ្រាប់សំណល់ជាតិផ្ទុះពីសង្គ្រាម ជិត៣លានគ្រាប់ផ្សេងទៀត។
របាយការណ៍របស់អាជ្ញាធរមីនឱ្យដឹងថា ចាប់ពីឆ្នាំ១៩៧៩ ដល់ ២០២០ ប្រជាពលរដ្ឋ ១៩.៧៩៧នាក់បានស្លាប់ និងរងរបួសពិការដាច់ដៃជើង ចំនួន ៤៥.១២៣នាក់ផ្សេងទៀត ដោយសារគ្រាប់មីន និងគ្រាប់សំណល់ជាតិផ្ទុះ។
អនុប្រធានទី១ នៃអាជ្ញាធរមីននិងសង្គ្រោះជនរងគ្រោះនៅកម្ពុជា (CMAA)លោក លី ធុជ ឱ្យដឹងថា កម្ពុជាត្រូវការថវិកាប្រមាណ ៣៧៧លានដុល្លារអាមេរិក សម្រាប់បោសសម្អាតគ្រាប់មីន និងគ្រាប់សំណល់ជាតិផ្ទុះពីសង្គ្រាម ឱ្យអស់ត្រឹមឆ្នាំ ២០២៥ នៅលើផ្ទៃដីគ្រាប់មីន ៨៣៥គីឡូម៉ែត្រក្រឡា និងផ្ទៃដី ១.៣១៦គីឡូម៉ែត្រការ៉េ ដែលមានសេសសល់គ្រាប់សំណល់ជាតិផ្ទុះ និងគ្រាប់បែកចង្កោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។