អាជ្ញាធរ​ថ្នាក់ក្រោម ​ចាប់ផ្តើម​បង្ក្រាប​ល្បែង​ស៊ីសងខុសច្បាប់​​ក្រោយមានបញ្ជាពីលោក ហ៊ុន សែន ​

ដោយ ថា ថៃ
2022.09.18
Share on WhatsApp
Share on WhatsApp
អាជ្ញាធរ​ថ្នាក់ក្រោម ​ចាប់ផ្តើម​បង្ក្រាប​ល្បែង​ស៊ីសងខុសច្បាប់​​ក្រោយមានបញ្ជាពីលោក ហ៊ុន សែន ​ អាជ្ញាធរ​រាជធានី​ភ្នំពេញ បានបើកកិច្ចប្រជុំបន្ទាន់ កាលពីថ្ងៃទី១៧ ខែកញ្ញា ដើម្បីចាត់​វិធានការ​បង្រ្កាបល្បែងសុីសង​ខុសច្បាប់​គ្រប់ប្រភេទ​ទូទាំងរាជធានីភ្នំពេញ បន្ទាប់ពីទទួលបានបទបញ្ជារបស់​លោកនាយករដ្ឋមន្ត្រី ហ៊ុន សែន។
រូប៖ រដ្ឋបាលរាជធានីភ្នំពេញ

អាជ្ញាធរ​ថ្នាក់​ក្រោម​ជាតិ​តាម​បណ្តា​រាជធានី​-ខេត្ត​ចាប់​ ផ្តើម​បើក​យុទ្ធនាការ​បង្ក្រាប​ល្បែង​ស៊ីសង​ខុស​ច្បាប់​ បន្ទាប់ពី​មាន​បទ​បញ្ជារពី​លោក​នាយករដ្ឋមន្ត្រី ​ហ៊ុន សែន។ មន្ត្រីសង្គមស៊ីវិល ​យល់​ថា ​អាជ្ញាធរ​ថ្នាក់​ក្រោម ​គួរតែ​អនុវត្ត​តួនាទីនិងច្បាប់​ឲ្យ​បាន​ត្រឹមត្រូវ​ដោយ​មិន​ត្រូវ​រងចាំ​ស្តាប់​តែ​បញ្ជារ​ពី​ថ្នាក់លើ​នោះទេ ​បើពុំ​នោះទេ​ មិន​អាច​ដោះស្រាយ​បញ្ហានេះ​ មាន​ប្រសិទ្ធិភាព​ឡើយ​។

ក្រោយ​មាន​បទ​បញ្ជា​ពី​លោក​នាយករដ្ឋមន្ត្រី​ ហ៊ុន សែន ​ភ្លាម​ អភិបាល​​រាជធានី-ខេត្ត​ ​​ទូទាំង​ប្រទេស ​មិន​បង្អង់​យូរ​ឡើយ​ដោយ​ចាប់​ផ្តើម​បើក​កិច្ច​ប្រជុំបន្ទាន់​ជាមួយ​អាជ្ញាធរ ពាក់​ព័ន្ធ ​ដើម្បី​ចាត់​វិធានការ​​ចុះ​បង្ក្រាប​ទី​តាំង​ល្បែង​ស៊ីសង​ខុស​ច្បាប់​គ្រប់​ប្រភេទ​ដែល​ពួកគេ​ ធ្លាប់​មើល​រំលង​នោះ ​ដើម្បី​ផ្គាប់​ចិត្ត​លោក ហ៊ុន សែន​។

អ្នកនាំពាក្យ​នៃ​ស្នងការដ្ឋាន​គរបាល​រាជធានីភ្នំពេញ​ លោក សាន សុខសីហា ​ប្រាប់​វិទ្យុអាស៊ីសេរី​នៅថ្ងៃទី​១៨ ​ខែ​កញ្ញាថា​ យុទ្ធនាការ​បង្ក្រាប​ល្បែង​ស៊ីសង​ខុស​ច្បាប់​ នៅ​ក្រុងភ្នំពេញ ​គិតត្រឹម​យប់​ថ្ងៃទី១៧ ​កញ្ញានោះ​ គឺ​អាជ្ញាធរ​ បង្ក្រាប​បាន​២៨​ទីតាំង ​និង​ឃាត់​ខ្លួន​មនុស្ស​ចំនួន​៥២​នាក់ ​។ លោក ​បញ្ជាក់ថា ​មនុស្ស​ដែល​អាជ្ញាធរ​ឃាត់​ខ្លួន​ នោះ ​គឺជាអ្នក​ដែល​ស្ថិតក្នុង​រង្វង់​ទីតាំង​ល្បែង​រួមមាន​ម្ចាស់​ទីតាំង ​មេការ ​និង​អ្នកលេង​ ជាដើម ​ហើយ​អាជ្ញាធរ ​កំពុង​សួរ​នាំ​ដើម្បី​បញ្ចូន​ពួកគេ​​ទៅ​បន្ត​នីតិវិធី​នៅ​តុលាការ។លោក ​អះអាងថា ​អាជ្ញាធរ​ កំពុង​​ចុះបង្ក្រាប​ជា​បន្ត​បន្ទាប់​ទៀត ​ហើយ​មិនមែន​ទើប​ចុះបង្ក្រាបថ្មីៗនេះ ​ក្រោយ​មាន​បញ្ជា​ពី​លោក​នាយករដ្ឋមន្ត្រី​នោះទេ៖ «ចំពោះ​នៅភ្នំពេញ ​មិនមែនថា​យើង​មិន​អនុវត្តទេ​ ដូច​ឃើញ​ស្រាប់​ហើយ​ គឺការ​អនុវត្ត​យើង​មានជា​ប្រចាំ​ជាបន្តបន្ទាប់ ​តែគ្រាន់តែ​ថា ​កន្លែង​មួយចំនួន​មានន័យថា​ ជាការ​លួចលាក់ ​មានន័យថា​ ពេល​ដែល​យើង​ទទួល​បាន​ព័ត៌មាន​ភ្លាម ​ពេល​ដែល​យើង​ឆ្មក់​ចុះទៅ ​វាអត់​មានការ​លេង​អី​ទេ។ចឹង​មាន​ន័យថា​ ទាល់តែ​យើង​រៀប​កម្លាំង​ឲ្យ​ច្បាស់លាស់​ក្នុងការ​អនុវត្ត ​ទើបយើង​ទទួល​បាន​លទ្ធផល​ដូច​ម្សិលមិញ។ពី​មុនៗ​មក ​យើង​បង្ក្រាប​បាន​ដូចគ្នា​តែ​លើកនេះ​ យើង​ដាក់​យុទ្ធនាការ​ធំ​ បាន​លទ្ធផល​ធំ​បាន​ច្រើន»

ក្រៅពី​នៅ​រាជធានីភ្នំពេញ ​អាជ្ញាធរ​ខេត្តផ្សេងៗ ​ក៏ចុះ​បង្ក្រាប​ល្បែងស៊ី​សងខុស​ច្បាប់​ដែរ។ នៅឯ​ខេត្តរតនគិរី​ រយៈពេល​២ថ្ងៃ ​អាជ្ញាធរ​ បាន​ចុះបង្ក្រាប​ល្បែង​ស៊ីសង​ឆ្នោត ឡូតូ​អេឡិច​ត្រូនិច ​ជល់មាន់ ​និង​ភ្នាល់បាល់​ អនឡាញ​ចំនួន៩​ទីតាំង​ ព្រមទាំង​​ធ្វើ​កិច្ច​សន្យា​អប់រំ​ម្ចាស់ផ្ទះ ​និង​ម្ចាស់​អាជីវកម្ម ​ឲ្យ​បញ្ឃប់​ល្បែង​បែប​នេះទៀត​។

ការចុះ​ប្រតិបត្តិ​ការបង្ក្រាប​ល្បែងស៊ី​សងខុស​ច្បាប់​គគ្រឹក​គគ្រេង​នេះ​ ធ្វើ​ឡើង​ក្រោយ​ពី​លោកនាយករដ្ឋមន្ត្រី​ ហ៊ុន សែន​ បាន​គំរាម​ដក​ដំណែង​អភិបាល​ខេត្ត ក្រុង​ ស្រុក​ ខ័ណ្ឌ និង​ថ្នាក់​ដឹកនាំ​មាន​សមត្ថកិច្ច​ចេញពី​ដំណែង ប្រសិនបើ​រក​ឃើញ​ថា ​ពួកគេ ​មិន​ទទួល​ខុសត្រូវ​លើ​តួនាទី​ លុបបំបាត់​ល្បែង​ស៊ីសង​ខុស​ច្បាប់​ឱ្យ​អស់​ពីដែន​សមត្ថកិច្ច​របស់​ខ្លួន៖ «កន្លែង​លេងល្បែង​មួយចំនួន​ មិនមែន​មន្ត្រី​មូលដ្ឋាន​មិន​ដឹង​នោះទេ។ ទាំង​កម្លាំង​នគរបាល​ ឬអាវុធហត្ថ ​ឬមន្ត្រី​រដ្ឋបាល​របស់​យើង​ ក៏ប៉ុន្តែ​បញ្ហា​ស្ថិត​នៅត្រង់ថា​ អស់លោក​មាន​ឆន្ទៈធ្វើ​ឬ​មិនធ្វើ ​ឬ​ក៏កន្លែងនោះ​ ជាទីកន្លែង​នៃ​ការ​រកប្រាក់​របស់​អស់​លោក»

ប្រជាពលរដ្ឋ ​និង​សង្គមស៊ិវិល ​បាន​រិះគន់​និង​​ត្អូញត្អែរ​ជាយូរ​​មក​ហើយ​ចំពោះ​បញ្ហា​ល្បែងស៊ីសង​ជាច្រើន​ប្រភេទ​​ដូចជា ​ល្បែងជល់មាន់​ ភ្នាល់បាល់​តាមអញ​ឡាញ​ ឡូតូ ​ឆ្នោត ​និង​បៀរ​ រីកសាយ​ភាយ ​នៅ​ទូទាំង​ប្រទេស។ អាជ្ញាធរថ្នាក់​ក្រោម​ខ្លះ ​ឆ្លើយការ ពារ​ថា ​មិន​មាន​ល្បែង​ស៊ីសង​ខុស​ច្បាប់​ក្នុង​ដែន​សមត្ថកិច្ច​របស់ខ្លួន​នោះទេ ​ហើយ​អាជ្ញាធរខ្លះ​ ឆ្លើយតបថា ​ពួកគាត់ ​ក៏​មិន​គាំទ្រ​ឲ្យ​មាន​ល្បែងនេះ​ដែរ ​ប៉ុន្តែ​មិន​ហ៊ាន​ចុះ​បង្ក្រាប​ព្រោះ​អាជ្ញាធរ​ថ្នាក់លើ​ជាអ្នកចេញ​អាជ្ញាប័ណ្ណ​ដល់​ម្ចាស់​អាជីវកម្ម​ល្បែង​។ ​​​​

ប្រធាន​មជ្ឈមណ្ឌល​ប្រជាពលរដ្ឋ ​ដើម្បី​អភិវឌ្ឍន៍ ​និង​សន្តិភាព ​លោក យង់ គិមអេង  ថ្លែង​ថា ​មូលហេតុ​ដែល​អាជ្ញាធរ​ថ្នាក់​ក្រោម​ អនុវត្ត​តួនាទី ​ទាល់​តែមាន​បញ្ជា​ពីថ្នាក់​ លើនេះ ​អាច​ដោយសារ​ជា​ទម្លាប់ផង​​ ខ្វះការ​គាំទ្រ​ពី​ថ្នាក់​លើ​ផង ​អំពើ​ពុករលួយ​ផង ​និង​ខ្លាច​ប៉ះពាល់​តួនាទី​ផង ​ដោយសារ​ទីតាំង​ល្បែងស៊ី​សង​ទាំងនោះ ​មាន​អ្នកធំ​កាង​ពី​ក្រោយ។ លោក ​យល់ថា ​រដ្ឋាភិបាល ​គួរតែ​កែ​ទម្រង់​ធ្វើ​យ៉ាងណា​ឲ្យ​អាជ្ញាធរ​ថ្នាក់​ ក្រោម​បំពេញ​តួនាទី​របស់​ខ្លួន​ឲ្យ​បាន​ត្រឹមត្រូវ​ តាមរយៈ​ការ​​លុប​បំបាត់​អំពើ​ពុករលួយ ​និង​លើក​ទឹកចិត្ត​ដល់​មន្ត្រី​ល្អ ​ហើយ​ដាក់​ទោស​ទណ្ឌ​លើ​មន្ត្រី​ប្រព្រឹត្តខុស​ជាដើម។ មន្ត្រី​សង្គម​ស៊ីវិល​រូបនេះ ​យល់ថា ​ប្រសិនបើ​មន្ត្រីថ្នាក់​ក្រោម ​រងចាំ​តែ​បទបញ្ជា​បែប​នេះ ការ​ដោះស្រាយ​បញ្ហា​ល្បែង​ស៊ីសែងនេះ​ គ្មាន​ប្រសិទ្ធិ​ភាព​ឡើយ ​ប្រៀប​ដូចជា​ការ​វែក​ចក​ដូច្នោះ​ដែរ៖ «អាជ្ញាធរ​ ត្រូវតែ​ដឹងច្បាប់​ហើយ​អនុវត្តច្បាប់ ​បើសិន​គាត់ រងចាំ​តែ​បញ្ជា​ងាប់ហើយ ​ចឹង​ការដោះស្រាយ​បញ្ហា​គ្រប់បែប​យ៉ាង​នៅក្នុង​សហគមន៍​ ដោះស្រាយ​ម៉េចចេញ​បាទ។ បើថា​បញ្ហាខ្លះ​លឺដល់​ថ្នាក់​លើទៅ​ ថ្នាក់​លើ​បញ្ជា​ទៅ​ អាហ្នឹង​បាន​ដោះស្រាលអីបាន​ធូរខ្លះ​ ប៉ុន្តែកន្លែង​ខ្លះ គាត់អត់បញ្ជាទៅ គាត់អត់អើពើ​ អាហ្នឹង​ម៉េចកើត»។​​​​

នេះ​មិនមែន​ជា​លើកទី​មួយ​ទេ ​ដែល​អាជ្ញាធរ ​ចាំតែ​អនុវត្ត​បទបញ្ជា​របស់​លោក ហ៊ុន សែន ​បើទោះបី​ជា​ពួកគេ ​បានឃើញ​បទល្មើស​ហើយ​ក៏ដោយ​​។ ​​​

នាយកប្រតិបត្តិនៃ​អង្គការ​សម្ព័ន្ធ​គណនេយ្យភាព​សង្គមកម្ពុជា ​លោក សន ជ័យ​ សង្កេត​ឃើញថា ​​ការរីកសាយ​ភាយ​ល្បែង​ស៊ីសង​ជាច្រើន​ប្រភេទ​​ទូទាំង​ប្រទេសនេះ​ គឺ​គ្រប់​គ្រាន់​ដែល​អាច​ធ្វើ​ឲ្យ​ពលរដ្ឋខ្មែរ​រងគ្រោះ ​វិនាស​ហិនហោច​ទ្រព្យសម្បត្តិ​ឈ្លោះ​ទាស់ទែង​ក្នុង​គ្រួសារ​ និង​បង្ក​បញ្ហា​អសន្តិសុខ​សង្គម។ លោក ​ថា​ ​ល្បែង​ទាំង​ស្រប​និង​ខុស​ច្បាប់មាន​ផល​ប៉ះពាល់​ដល់​សង្គម​ដូចគ្នា​ ដូច្នេះ​​រដ្ឋាភិបាល​មិនគួរ​អនុញ្ញាត​ឲ្យ​មាន ​នៅក្រៅ​កាស៊ីណូ​ឡើយ​ដើម្បី​ទុក​ឲ្យ​ពលរដ្ឋ ​​មាន​ឱកាស​រៀនសូត្រ ​អភិវឌ្ឍ​សមត្ថភាព​ និង​ធ្វើ​កិច្ចការងារ​​សម្រាប់​ប្រយោជ​ន៍​ក្រុម​គ្រួសារ ​និង​សង្គមជាតិ​៖ «យើង​ឃើញថា ​ពេលខ្លះ​ទៅ ​អាជ្ញាធរ ​អ្នក​ខ្លះ​មានចេះ​ដឹងដែរ ​ឃើញ​លេង ​សិស្សសាលា​អីក៏លេង​។ ដូច្នេះ​យើង​យល់ថា ​ដោយសារ​វាមាន​ លក្ខណៈ​ស្របច្បាប់​និង​ខុសច្បាប់​ចឹង​ហើយ​ដែល​ពេលខ្លះ​ធ្វើឲ្យ​ការ​បង្ក្រាប​ពិបាក ហើយ​ម្យ៉ាងទៀត​ បើ​ឥឡូវនេះ​ ចាប់ផ្តើម​បង្ក្រាប​តែអា​ល្បែង​ខុសច្បាប់ ​ជូន​កាល​អ្នកញៀន​ល្បែង​ គេងាក​មកពី​ល្បែង​ខុស​ច្បាប់​មក​លេងល្បែង​ស្រប​ច្បាប់វិញ។ ប៉ុន្តែ​វាអត់​មាន​អីប្លែកទេ​ វាគ្រាន់តែ​រឿង​ស្របច្បាប់​និង​ខុសច្បាប់​តែប៉ុណ្ណឹង។ដើម្បី​ឲ្យល្អ​ គឺ​នៅ​ក្រៅកាស៊ីណូ ​មិន​ចាំបាច់​ឲ្យមាន​ល្បែង​ទាំងស្រប​ច្បាប់​និង​ខុសច្បាប់​។ បើគេ​ ចង់​លេង​រុញ​ចូល​ទៅ​កាស៊ីណូ​ទៅ ​ហើយកំ​ណត់​ទៅ​ថា អ្នក​ដែលអា​ច​លែង​បាន ​គឺ​តែ​ ជនបរទេស ​ដូច​វិធានការ​កន្លងមក»។​​​

ជុំវិញ​រឿង​នេះ​ វិទ្យុអាស៊ីសេរី ​មិនអាច​សុំការ​ឆ្លើយតប​ពី​អគ្គលេខាធិការ​នៃ​គណៈ​កម្ម​ការ​គ្រប់គ្រង​ល្បែង​ពាណិជ្ជកម្មកម្ពុជា​​នៃ​ក្រសួងសេដ្ឋកិច្ច​និង​ហិរញ្ញវត្ថុ លោក រស់ ភីរុណ ឡើយ​ ដោយ​ទូរស័ព្ទ​ចូល​ពុំ​មាន​អ្នកទទួល។​ ប៉ុន្តែ​លោក ​ធ្លាប់​លើកឡើង​ថា ​នៅ​ឆ្នាំ​២០២២នេះ​ គណៈកម្មការ​គ្រប់គ្រង​ល្បែង​ពាណិជ្ជកម្ម​ បាន​ផ្ដល់​អាជ្ញាបណ្ណ​ជាង​​១០​ទៅ​ឱ្យ​ក្រុមហ៊ុន​ដែល​រកស៊ី​លើ​អាជីវកម្ម​ឆ្នោត​និង​ឡូតូ​ ដើម្បី​ប្រមូលចំ​ណូល​ចូល​ជាតិ។ លោក ​ថា ​ល្បែង​ផ្សង​សំណាង​ ដែល​ចាត់ទុក​​ថា ​ជាល្បែង​ស្របច្បាប់​នេះ ​​អាច​បើក​ក្រៅ​កាស៊ីណូ ​ដើម្បី​ឲ្យ​ពលរដ្ឋខ្មែរ​លែង​បាន​។

ទោះជាយ៉ាងណា ​ពលរដ្ឋ ​គណបក្សប្រឆាំង ​និង​សង្គម​ស៊ីវិល ​យល់ថា ​ល្បែង​ស្រប​ច្បាប់​និង​ខុស​ច្បាប់​នេះ ​មាន​ផល​ប៉ះពាល់​​ដូច​តែ​គ្នា​ដូច្នេះ​មិនគួរ​ទុក​ឲ្យ​មាន​ល្បែង​ស្រប​​ច្បាប់​នោះទេ។ ពួកគេ ​យល់ថា ​ប្រសិនបើ​រដ្ឋាភិបាល ​ចង់​ប្រមូល​ចំណូល​ជាតិ ​អាច​មាន​វិធី​ល្អៗ​ជាច្រើនទៀត​​ មិន​ត្រូវ​បើក​បនល្បែង​ពង្វក់​ប្រជាពលរដ្ឋ ​​ដើម្បី​ប្រមូល​កាក​លុយ​ពី​ពួកគាត់​ហើយ​ចាត់ទុកថា​ ជា​ចំណូល​ជាតិ​ដ៏សំខាន់​ឡើយ ​ព្រោះ​ចំណូល​បន្តិច​បន្តួច​នេះ​ មិន​អាច​យក​ទៅ​ទូទាត់​ ឬ​ដោះស្រាយ​ផល​ប៉ះពាល់​ក្នុង​សង្គម​វិញ​បាន​​នោះ​ទេ​៕ ​​​​​​​​​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

លី ប៊ុនលីន
Sep 18, 2022 09:05 PM

ទាន់​តែ​មាន​បញ្ជា​បាន​ចេះ​ធ្វើ​ សង្ស័យ​រាល់​ថ្ងៃ​ដើរ​បិទ​ភ្នែក​