មន្ត្រីម៉ាឡេស៊ីរិះគន់កម្ពុជាដែលមិនយកកម្រៃពីការផ្សាយព្រឹត្តិការណ៍ស៊ីហ្គេម
2023.04.24
លោកនាយករដ្ឋមន្ត្រី ហ៊ុន សែន ថ្លែងកាលពីថ្ងៃទី១២ កុម្ភៈ ២០២៣។
រូប៖ ហ្វេសប៊ុកលោក ហ៊ុន សែន
មន្ត្រីកីឡាម៉ាឡេស៊ីខកចិត្តនឹងរដ្ឋាភិបាលកម្ពុជា ដែលផ្ដល់សិទ្ធិផ្សព្វផ្សាយព្រឹត្តិការណ៍ស៊ីហ្គេមដោយមិនគិតថ្លៃ ខុសពីអ្វីដែលប្រទេសជាសមាជិកបានសម្រេចរួមគ្នា។ ប៉ុន្តែមន្ត្រីជំនាញកម្ពុជាឆ្លើយតបថា ការសម្រេចមិនគិតថ្លៃពីទូរទស្សន៍ដែលផ្សព្វផ្សាយពីព្រឹត្តិការណ៍កីឡានេះ ទទួលបានការសាទរពីបណ្ដាប្រទេសភាគច្រើន។
ផែនការធ្វើឱ្យបាត់បង់ចំណូលពីការរៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមរបស់លោក ហ៊ុន សែន ក៏ទទួលបានការរិះគន់ពីមន្ត្រីនៅក្នុងប្រទេសជាសមាជិកតំបន់អាស៊ានដែរ។
ប្រធានក្រុមប្រឹក្សាប៉ារ៉ាឡាំពិកម៉ាឡេស៊ី (Paralympic Council of Malaysia) លោក ដាទុក សេរីមេហ្កាត់ ឌី ហ្សះរីម៉ាន់ សាហារួដឌីន (Datuk Seri Megat D Shahriman Zaharuddin) បានខកចិត្តនឹងអាជ្ញាធរកម្ពុជាដែលបានផ្លាស់ប្ដូរផែនការទាំងស្រុងនៃការលក់សិទ្ធិផ្សព្វផ្សាយប្រកួតកីឡាស៊ីហ្គេម ដែលប្រារព្ធធ្វើឡើងនៅទីក្រុងភ្នំពេញ នាដើមខែក្រោយនេះ និងចាត់ទុកថា ជាការសម្រេចចិត្តដ៏អាក្រក់មួយ ខុសពីអ្វីដែលប្រទេសទាំង១១បានព្រមព្រៀងគ្នា។ នេះបើតាមការចុះផ្សាយពីសារព័ត៌មានម៉ាឡេស៊ី ញូវ ស្ត្រេតស៍ ថាមស៍ (New Straits Times) កាលពីថ្ងៃទី១៩ មេសា។
ប្រភពដដែលបន្តថា គណៈកម្មាធិការជាតិកម្ពុជារៀបចំព្រឹត្តិការណ៍ស៊ីហ្គេម បានចេញសេចក្ដីប្រកាសកាលពីថ្ងៃទី៣១ មីនា ថា នឹងមិនគិតកម្រៃពីការផ្ដល់សិទ្ធិផ្សព្វផ្សាយព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលធ្វើឡើងពីថ្ងៃទី៥ ដល់ ថ្ងៃទី១៧ខែឧសភា ឡើយ ខណៈក្រុមប្រឹក្សាប៉ារ៉ាឡាំពិកម៉ាឡេស៊ី ទទួលបានសិទ្ធិលក់ការផ្សព្វផ្សាយកីឡាទាំងពីរនេះនៅក្នុងស្រុករបស់ខ្លួន។ ការសម្រេចរបស់កម្ពុជានេះ គឺខុសពីអ្វីដែលប្រទេសទាំង១១ បានព្រមព្រៀងគ្នាកាលពីថ្ងៃទី២២ ខែកក្កដា ឆ្នាំ២០២២ ស្ដីពីការលក់សិទ្ធិផ្សព្វផ្សាយព្រឹត្តិការណ៍ប្រកួតកីឡានេះជាលើកដំបូង។
លោក ហ្សះរីម៉ាន់ លើកឡើងនូវសម្រង់សម្ដីដើមដូច្នេះថា៖ «តាមពិត ពួកយើងសោកស្ដាយ និងខកចិត្ត ពីព្រោះយើងបានខំប្រឹងធ្វើការងារនេះយ៉ាងខ្លាំង ហើយសង្ឃឹមថា នឹងប្រើប្រាស់មូលនិធិ ដែលទទួលបានពីការលក់សិទ្ធិផ្សព្វផ្សាយ ដើម្បីគាំទ្រការអភិវឌ្ឍ និងប្រតិបត្តិការកីឡានៅក្នុងប្រទេសម៉ាឡេស៊ី»។
ការខកចិត្តនេះធ្វើឡើង ដោយសារក្រុមប្រឹក្សាប៉ារ៉ាឡាំពិកម៉ាឡេស៊ី កំពុងស្ថិតក្នុងការពិភាក្សាជាមួយស្ថានីយទូរទស្សន៍ធំៗ ចំនួន៤ អ្នកផ្គត់ផ្គង់សេវាអ៊ីនធឺណិតចំនួន៣ និងក្រុមហ៊ុនទូរគមនាគមន៍ចំនួន៤ ហើយសង្ឃឹមថា នឹងបញ្ចប់កិច្ចពិភាក្សាគ្នាស្ដីពីការលក់សិទ្ធិ ផ្សព្វផ្សាយការប្រកួតកីឡានៅក្នុងខែមេសានេះ។
កាលពីថ្ងៃទី២០ មេសា លោកនាយករដ្ឋមន្ត្រី ហ៊ុន សែន ប្រកាសថា ការមិនយកកម្រៃស្នាក់នៅនិងហូបចុកពីប្រតិភូកីឡាបរទេសជាង១ម៉ឺន២ពាន់នាក់(១២.៤០៤) សំបុត្រចូលទស្សនា និងសិទ្ធិផ្សព្វផ្សាយពីព្រឹត្តិការណ៍នេះ កម្ពុជាចង់ធ្វើឱ្យខុសប្លែកពីប្រទេសផ្សេងទៀតដែលមិនធ្លាប់មានក្នុងប្រវត្តិសាស្ត្រ និងចង់បង្ហាញទៅពិភពលោកថា កម្ពុជាជាប្រទេសតូចតែមានបេះដូងធំ។
ការប្រកាសរបស់លោក ហ៊ុន សែន នេះ បានរងការរិះគន់ពីមន្ត្រីគណបក្សប្រឆាំង និងអ្នកតាមដានការអភិវឌ្ឍសង្គម ថា ជាយុទ្ធសាស្ត្រស្វែងរកប្រជាប្រិយភាពសម្រាប់មុខមាត់លោក ហ៊ុន សែន ប៉ុណ្ណោះ និងជាការធ្វើឱ្យបាត់បង់ចំណូលជាតិ ខណៈកម្ពុជាជាប្រទេសក្រីក្របំផុតមួយនៅក្នុងតំបន់អាស៊ាន។
ទាក់ទងនឹងបញ្ហានេះ អគ្គលេខាធិការគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន ប្រាប់អាស៊ីសេរី នៅថ្ងៃទី២៣ មេសា ថា ក្នុងនាមជាម្ចាស់ផ្ទះ កម្ពុជាមានសិទ្ធិសម្រេចយក ឬមិនយកកម្រៃពីការផ្ដល់សិទ្ធិផ្សព្វផ្សាយពីព្រឹត្តិការណ៍ប្រកួតកីឡាស៊ីហ្គេម ហើយលោកថា ប្រទេសភាគច្រើនបានអបអរសាទរចំពោះការសម្រេចរបស់កម្ពុជា។
លោក វ៉ាត់ ចំរើន៖ «ការផ្សព្វផ្សាយ ទៅតាមច្បាប់ យើងអត់មានអីគិតគូរទេ អាហ្នឹង។ តាមច្បាប់ TV rights (សិទ្ធិផ្សព្វផ្សាយតាមទូរទស្សន៍)ហ្នឹង គេចែករំលែក(ប្រាក់កម្រៃ)គ្នា។ ប៉ុន្តែ ឥឡូវយើងអត់គិតពីរឿងច្បាប់អីទៀតទេ គ្រាន់តែថា យើងហ្វ្រី (អត់គិតថ្លៃ) អ៊ីចឹងទៅ ហើយមានអ្នកសប្បាយចិត្តអ៊ីចឹងទៅ យើងទទួលបានកិត្តិយសទាំងអស់គ្នា ហើយងាយស្រួលផ្សព្វផ្សាយឱ្យបានទូលំទូលាយ»។
ជុំវិញរឿងនេះ ប្រធានសមាគមនិស្សិតបញ្ញវន្តខ្មែរលោក កើត សារ៉ាយ យល់ឃើញថា ក្នុងនាមជាប្រទេសក្រីក្រ និងកំពុងអភិវឌ្ឍ ហើយពលរដ្ឋមួយចំនួនកំពុងប្រឈមជីវភាពលំបាកដោយសារទើបរួចផុតពីជំងឺកូវីដ១៩ ជាពិសេសត្រូវចំណាយលុយច្រើនក្នុងការរៀបចំការបោះឆ្នោតជាតិខាងមុខនេះ កម្ពុជាមិនគួរខ្ជះខ្ជាយលុយទាំងស្រុងក្នុងការរៀបចំប្រកួតកីឡាស៊ីហ្គេមបែបនេះទេ។
លោក កើត សារ៉ាយ៖ «ជាការខ្ជះខ្ជាយថវិកាផង ហើយវាមានន័យថា យើងជាផ្ទះអ្នកក្រ ហើយយើងគួរតែបង្ហាញថា យើងក្រ ចិត្តទូលាយគឺចិត្តទូលាយហើយ ត្រូវមើលចំណុចណាដែលគួរតែបើក ចំណុចណាគួរសន្សំសំចៃ»។
កម្ពុជាបានចំណាយលុយអស់រាប់រយលានដុល្លារ សាងសង់ហេដ្ឋារចនាសម្ព័ន្ធផ្សេងៗ បម្រើឱ្យការរៀបចំព្រឹត្តិការណ៍កីឡាស៊ីហ្គេមនេះ បន្ទាប់ពីរង់ចាំធ្វើជាម្ចាស់ផ្ទះអស់រយៈពេល៦៤ឆ្នាំ ក្នុងនោះកម្ពុជាចំណាយអស់ជិត ១៦០លានដុល្លារ ជាជំនួយពីប្រទេសចិន ដើម្បីសាងសង់ពហុកីឡាដ្ឋានមរតកតេជោ នៅខណ្ឌជ្រោយចង្វារ។ ការចំណាយប្រាក់ដ៏សន្ធឹកសន្ធប់នេះ ខណៈកម្ពុជាបន្តពឹងផ្អែកពីជំនួយ និងកម្ចីពីបរទេសដើម្បីយកមកអភិវឌ្ឍប្រទេសជាតិ។ របាយការណ៍ក្រសួងសេដ្ឋកិច្ច និងហិរញ្ញវត្ថុបានប្រកាសថា គិតត្រឹមឆ្នាំ២០២២ កម្ពុជាបានជំពាក់បំណុលបរទេសកើនដល់ជាង ៩ពាន់លានដុល្លារ(៩.៥៧៥) ក្នុងនោះ៤១% គឺជំពាក់ប្រទេសចិន៕
ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- កម្ពុជា និងចិន «មិនអាចទប់ស្កាត់បញ្ហាឆបោកតាមអនឡាញ និងជួញដូរមនុស្សនៅកម្ពុជាបាន»
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
- អ្នកឃ្លាំមើលថា កិច្ចសហប្រតិបត្តិការ «ត្បូងពេជ្រ» រវាងកម្ពុជា-ចិនគ្មានពន្លឺសម្រាប់កម្ពុជាឡើយ