ពលករ​ខ្មែរ​​​​ជា​ច្រើន​នាក់​​ដាច់​ស្បៀង​​​​ក្នុង​ពេល​​ជំងឺ​កូវីដ​១៩​​ផ្ទុះ​ឡើង​​ខ្លាំង​​នៅ​​ប្រទេស​ថៃ​

ដោយ ជាតិ ចំណាន
2021-05-17
Share
ពលករ​ខ្មែរ​​​​ជា​ច្រើន​នាក់​​ដាច់​ស្បៀង​​​​ក្នុង​ពេល​​ជំងឺ​កូវីដ​១៩​​ផ្ទុះ​ឡើង​​ខ្លាំង​​នៅ​​ប្រទេស​ថៃ​ ពលករ​ខ្មែរ​នៅ​ប្រទេស​ថៃ​ក្នុង​ពេល​ទទួល​ជំនួយ​ឧបត្ថម្ភ​ពី​សប្បុរសជន នៅ​ខេត្ត​សាមុតប្រាកាណ ប្រទេសថៃ។
រូប៖ គេ​ផ្ដល់​ឱ្យ

ការ​រាតត្បាត​ជំងឹ​កូវីដ-១៩ នៅ​ឯ​ប្រទេស​ថៃ កំពុង​ធ្វើ​ឲ្យ​ពលករ​ខ្មែរ​ជា​ច្រើន​នាក់ រង​គ្រោះ​ធ្ងន់ធ្ងរ​ក្នុង​ជីវភាព។ ពលករ​ខ្មែរ​ធ្វើ​ការ​នៅ​ប្រទេស​ថៃ​មួយ​ចំនួន ​ព្រួយបារម្ភ​ខ្លាច​ស្ថានការណ៍​ជំងឺ​កូវីដ​អូស​បន្លាយ​ពេល​យូរ​ ប៉ះពាល់​ធ្ងន់ធ្ងរ​ដល់​ជីវភាព​រស់​នៅ​​របស់​ពួកគាត់​។

ពលករ​ខ្មែរ​​ធ្វើ​ការ​នៅ​ហាង​ម្ហូបអាហារ​នៅ​ខេត្ត​សាមុត​ប្រាកាណ (Samauth Prakan) លោក ណៃ ចាន់ណា ប្រាប់​អាស៊ី​សេរី​នៅ​ថ្ងៃទី​១៧ ខែ​ឧសភា​ថា ពលករ​ខ្មែរ​នៅ​ក្នុង​បន្ទប់​ជា​មួយ​គាត់​បាន​ដាច់​ស្បៀង​អាហារ​​ហើយ​ ដោយសារ​​​ថៅកែ​ថៃ​​​​បាន​​ផ្អាក​​ការងារ​ពួក​លោក​ជាង​១​ខែ​​ហើយ​ បណ្ដាល​មក​ពី​ផ្ទុះ​ការ​រាតត្បាត​ខ្លាំង​ជំងឺ​កូវីដ​១៩​។ ពលករ​វ័យ​ ៣០ ​ឆ្នាំ​​រូប​នេះ​បន្ត​ថា ​ពេល​នេះ​​ពួក​លោក​​នាំ​គ្នា​សំងំ​នៅ​ក្នុង​បន្ទប់​មិន​ហ៊ាន​ចេញ​ដើរ​ទៅ​ណា​មក​ណា​ឆ្ងាយ​ពី​កន្លែង​​​ស្នាក់​នៅ​នោះ​ទេ ព្រោះ​ខ្លាច​ឆ្លង​​ជំងឺ​កូវីដ​១៩។ ​ពលករ​រូប​នេះ​ត្អូញត្អែរ​ទៀត​ថា​ ​ពួក​លោក​​ស្នាក់​នៅ​ក្នុង​បន្ទប់​យូរ​ថ្ងៃ​​​​មាន​អារម្មណ៍​​តប់​ប្រមល់​ ហើយ​ចង់​ត្រឡប់​ទៅ​កម្ពុជា​វិញ​អំឡុង​ពេល​នេះ​៖ «កំពុង​តែ​ខ្លាំង​បង ឥឡូវ​នៅ​តែ​ក្នុង​បន្ទប់​ហ្នឹង​ដើរ​ចេញ​ទៅ​ណា​ក៏​អត់​មាន​ដែរ​ គេ​អត់​ឱ្យ​ចេញ​​ យើង​ត្រូវ​ការ​ទៅទិញ​ឥវ៉ាន់​និង​ទិញ​ទឹកកក​ហូប​ក៏​គេ​អត់​ឱ្យ​ចេញ​ ព្រោះ​វា​យ៉ាប់​ឥឡូវ​។ មិនដឹង​យ៉ាង​ម៉េច​យ៉ាង​ណា​ទេ​ ចង់​នាំ​គ្នា​ទៅ​ផ្ទះ​ក៏​លំបាក​ចុះ​ទៅ​អត់​កើត​ ដល់​អីចឹង​ទៅ ​ចាំ​មើល​ថៅកែ​ហៅ​ចូល​ធ្វើ​ការ​វិញ​។ កាល​មុន​គេ​កូវីដ​យើង​អត់​ដឹង​ថា​ គេ​បិទ​ យើង​បើក​លុយ​​ផ្ញើ​ទៅ​ផ្ទះ​ឱ្យ​កូន​និង​ម្ដាយ​ឪពុក​ចាយ​ ហើយ​ណា​មួយ​ខ្ញុំ​ជំពាក់​​ប្រាក់​ធនាគារ​ខ្លះ​ទៀត ដល់​អីចឹង​ទៅ​យើង​ចេះ​តែ​បណ្ដោះ​ទៅ​ឱ្យ​ខ្ញុំ​អត់​ដឹង​មុន​ ដល់​អីចឹង​ទៅ​យើង​ដាច់​ស្បៀង​»។

អំឡុង​ពេល​ផ្ទុះ​ការ​រាតត្បាត​ជំងឺ​កូវីដ​១៩​លើក​ទី​៣​​នេះ​ ពុំ​មែន​មាន​តែ​ពលករ​ខ្មែរ​ម្នាក់​ប៉ុណ្ណោះ​​ទេ​ ដែល​មាន​ជីវភាព​​វេទនា​នោះ​​ ​ពលករ​ខ្មែរ​ជា​ច្រើន​នាក់​ទៀត​ក៏​​​នាំ​គ្នា​​ស្នាក់​នៅ​ក្នុង​បន្ទប់​​អត់​ការងារ​ធ្វើ​ដែរ​។

ពលករ​មាន​ស្រុក​កំណើត​នៅ​ខេត្ត​តាកែវលោក នៀវ វិចិត្រ ថ្លែង​ថា ​នៅ​តំបន់​​លោក​ធ្វើការ​មាន​ពលករ​ខ្មែរ​ជាង ​១០០​ នាក់​ ត្រូវ​បាន​ថៅកែ​ជនជាតិ​ថៃ ​ផ្អាក​ការ​ងារ​​ប្រហែល ​១ ខែ​ហើយ ដោយសារ​វិបត្តិ​ជំងឺ​កូវីដ​១៩។ ពលករ​វ័យ ​២៨ ​ឆ្នាំ​រូប​នេះ​​ ព្រួយបារម្ភ​ខ្លាច​គ្មាន​អង្ក​ច្រក​ឆ្នាំ​ប៉ះពាល់​ដល់​សុខភាព​ ព្រោះ​នៅ​ពេល​នេះ​គ្រួសារ​គាត់​​នៅ​​សល់​ស្បៀង​អាហារ​បន្តិចបន្តួច​ ដោយ​អាច​ហូប​បាន​យ៉ាង​យូរ ​២ ​​ថ្ងៃ​ទៀត​ប៉ុណ្ណោះ​៖ «អ្នក​ផ្ទះ​យើង​ក៏​មាន​ជំងឺ​ហ្នឹង​ដែរ​ គាត់​ទៅ​ណា​​ក៏​មិន​កើត​រក​អី​ក៏​មិន​កើត​ យើង​ក៏​អត់​បាន​ត្រៀម​រក​ថវិកា​​ថា យើង​នៅ​នេះ​ត្រូវ​ផ្អាក​ការងារ​ទេ​។ បើ​យើង​ទៅ​ផ្ទះ​ឥឡូវ​ហ្នឹង​ក៏​ទៅ​អត់​កើត​ ណា​មួយ​ក៏​យើង​អត់​ដឹង​រក​អី​ដែរ​ ព្រោះ​នៅ​ស្រុក​​ខ្មែរ​ការងារ​ក៏​ពិបាក​រក​ធ្វើ​ ហើយ​ជីវភាព​ខ្ញុំ​ក្រីក្រ​។ បើ​យើង​នេះ​ទៅ​ យើង​ធ្វើ​ជា​កម្មករ​គេ​​បាន​ប្រាក់​ចំណូល​ដោយ​មិន​បាច់​ចំណាយ​ដើម​ទុន​ យើង​ប្រើ​តែ​កម្លាំង​​ញើស​ឈាម​»។

ពលករ​មួយ​ក្រុម​នេះ​ធ្វើ​ការងារ​នៅ​ក្នុង​ហាង​​​បាយ​នៅ​​ខេត្ត​ជាប់​ទីក្រុង​បាងកក​។​ ពួកគេ​អះអាង​ថា មាន​ពលករ​ខ្មែរ​​ធ្វើ​ការ​សំណង់​និង​លក់​ម្ហូប​អាហារ​នៅ​ទីក្រុង​បាងកក​និង​ខេត្ត​នន់ថាក់បូរី ​(Nunthaburi) ​​រាប់​ពាន់​នាក់​ផ្សេង​ទៀត ដោយ​អ្នក​ខ្លះ​ដាច់​ស្បៀង​និង​ខ្លះ​ទៀត​​នៅ​សល់​អង្ករ​បន្តិចបន្តួច ​ដោយសារ​អត់​ការងារ​ធ្វើ​ជា​ច្រើន​ថ្ងៃ​មក​ហើយ​។​

អាស៊ី​សេរី​មិន​អាច​ទាក់​ទង​មន្ត្រី​ស្ថានទូត​ខ្មែរ​ប្រចាំ​នៅ​ប្រទេស​ថៃ និង​អ្នក​នាំ​ពាក្យ​ក្រសួង​ការងារ​លោក ហេង សួរ ដើម្បី​អត្ថាធិប្បាយ​ជុំ​វិញ​​​ក្ដី​កង្វល់​របស់​ពលករ​ខ្មែរ​នេះ​បាន​ទេ នៅ​ថ្ងៃ​ទី​១៧ ខែ​ឧសភា ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

​ប៉ុន្តែ​​ស្ថានទូត​ខ្មែរ​ប្រចាំ​នៅ​ទីក្រុង​បាងកក បាន​បង្ហោះ​សារ​នៅ​ហ្វេសប៊ុក​ស្ថានទូត​នៅ​ថ្ងៃ​ទី​១៧ ខែ​ឧសភា​ថា ​​អំឡុង​ពេល​នេះ​ ពលរដ្ឋខ្មែរ​ដែល​កំពុង​ស្នាក់​នៅ​ប្រទេស​ថៃ ​ត្រូវ​ចូល​រួម​អនុវត្ត​តាម​វិធាន​ការរបស់​​​អាជ្ញាធរ​ថៃ​ឲ្យ​បាន​ខ្ជាប់ខ្ជួន​ដើម្បី​បង្ការ​កុំ​ឲ្យ​ឆ្លង​ជំងឺ​ក៏​កាច​សាហាវ​​​នេះ។

​​​​ចាប់​តាំង​ពី​ដើម​ខែ​មេសា​មក​​ ការផ្ទុះ​​រាតត្បាត​ខ្លាំងនៃ​ជំងឺ​កូវីដ​១៩​ឆ្លង​ចូល​​ក្នុង​សហគមន៍​លើក​ទី​៣​នៅ​ក្នុង​ប្រទេស​ថៃ ​មាន​អ្នក​ឆ្លង​​​ជាង ​៨ ម៉ឺន​ ២ ពាន់​នាក់​(៨២.២១៩) ​ហើយ​ ក្នុង​នោះ​នៅ​ទីក្រុង​បាងកក​ច្រើន​ជាង​គេ​។​​​

​​​ជុំ​វិញ​​រឿង​នេះ​មន្ត្រី​អង្គការ​សង់ត្រាល់ (Central) ​ទទួល​បន្ទុក​ផ្នែក​ពលករ​លោក ឌី ថេហូយ៉ា​ មាន​ប្រសាសន៍​ថា ​ស្ថានការណ៍​រាតត្បាត​​ជំងឺ​កូវីដ​នៅ​ប្រទេស​ថៃ​រលក​ថ្មី​នេះ​មាន​ស្ទុះ​ខ្លាំង​ជាង​ពេល​មុនៗ និង​​ជា​ហានិភ័យ​​ដល់​​ពលករ​ខ្មែរ​នៅ​ទី​នោះ​។ មន្ត្រី​សង្គម​ស៊ីវិល​រូប​នេះយល់​ថា ​ពលករ​​នៅ​តំបន់​ទីក្រុង​បាងកក​​ប្រឈម​នឹង​​ការ​ឆ្លង​ជំងឺ​កូវីដ​ជាង​គេ ព្រោះ​ជា​តំបន់​ក្រហម​។ ​លោក​បញ្ជាក់​ទៀត​ថា ​ពលករ​ធ្វើ​ការ​ផ្នែក​សំណង់​រង​ផល​ប៉ះពាល់​ធ្ងន់ធ្ងរ​ជាង​គេ ដោយសារ​ពួកគាត់​ធ្វើ​ការងារ​មិន​ទៀង​ទាត់ ហើយ​​​ប្រឈម​នឹង​ថៅកែ​បោកប្រាស់​កម្លាំង​ពលកម្ម​ពួកគាត់​៖ «វា​ទាំង​សំណង់​ទាំង​រោងចក្រ​ ប៉ុន្តែ​អ្នក​ដែល​ធ្វើ​ការ​សំណង់​ហ្នឹង​គឺ ប្រឈម​ជាង​គេ​ហើយ​ ដោយសារ​អី ដោយសារ​តែ​វិស័យ​សំណង់​យើង​ចាត់​ទុក​ថា ជា​វិស័យ​មិន​រៀបរយ​មិន​ផ្លូវ​ការ។​ គាត់​ធ្វើ​ការ​ច្រើន​តែ​ជា​ពលករ​មិន​មាន​ឯកសារ​​ ហើយ​ល័ក្ខខ័ណ្ឌ​ការងារ​គាត់​លំបាក​​ជាង​គេ​ ហើយ​មិន​មាន​អ្នក​ណា​ចូល​ទៅ​ដល់​ការដ្ឋាន​​ធំ​ៗ​នោះ​ទេ​»។

លោក​ ឌី ថេហូយ៉ា ​យល់​ថា ដើម្បី​ដោះស្រាយ​​ការ​អត់​ឃ្លាន​របស់​ពលករ​ រដ្ឋាភិបាល​គួរតែ​បង្កើត​គណៈកម្មការ​បញ្ជូន​​ជំនួយ​មនុស្សធម៌​​ជួយ​ដល់​ពលករ​ខ្មែរ​ដែល​រង​ផល​​ប៉ះពាល់​​​ពី​វិបត្តិ​ជំងឺ​កូវីដ​នៅ​ប្រទេស​ថៃ​ជា​បន្ទាន់​ ដើម្បី​ពួកគាត់​បាន​ស្បៀងអាហារ​ហូបចុក​​អំឡុង​ពេល​នេះ​។

​របាយការណ៍​អង្គការ​សង់​ត្រាល់​ឱ្យ​ដឹង​ថា បច្ចុប្បន្ន​មាន​ពលករ​ខ្មែរ​ធ្វើ​ការ​ស្របច្បាប់​និង​មិន​ស្របច្បាប់​មាន​ជាង​ ១ លាន ​៨ សែន​នាក់ ​(១.៨០០.០០០) ធ្វើ​ការ​ងារ​នៅ​ប្រទេស​ថៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល