ក្រសួងព័ត៌មានព្រួយបារម្ភអំពីការត្រៀមខ្លួនមិនទាន់ក្នុងការរៀបចំព្រឹត្តិការណ៍ស៊ីហ្គេម
2023.04.09
សារលើហ្វេសប៊ុករបស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បង្ហាញក្ដីបារម្ភអំពីការត្រៀមខ្លួនមិនទាន់ក្នុងការរៀបចំព្រឹត្តិការណ៍ស៊ីហ្គេម ដែលត្រូវបានលុបវិញ។
Photo Screenshot
ក្រសួងព័ត៌មាន និងក្រសួងវប្បធម៌ និងវិចិត្រសិល្បៈ ព្រួយបារម្ភអំពីការត្រៀមខ្លួនមិនទាន់ ក្នុងការរៀបចំព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះចាប់ពីថ្ងៃទី៥ ខែឧសភា ខាងមុខ។ អ្នកវិភាគនយោបាយ និងមន្ត្រីគណបក្សប្រឆាំងលើកឡើងដូចៗគ្នាថា ការលើកឡើងរបស់រដ្ឋមន្ត្រីក្រសួងព័ត៌មាននេះ គឺបណ្ដាលមកពីរដ្ឋាភិបាលកំពុងខ្វះខាតថវិកា ក្នុងការធ្វើជាម្ចាស់ផ្ទះប្រារព្ធកីឡាស៊ីហ្គេម (SEA Games)។
នៅសល់ត្រឹមតែរយៈពេល២៧ថ្ងៃទៀតតែប៉ុណ្ណោះ កម្ពុជានឹងធ្វើជាម្ចាស់ផ្ទះរៀបចំការប្រកួតកីឡា ស៊ីហ្គេម (SEA Games)ហើយ។ ទោះជាយ៉ាងណា រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បែរជាលើកឡើងថា ក្រសួងព័ត៌មាន រួមជាមួយក្រសួងវប្បធម៌ និងវិចិត្រសិល្បៈ កំពុងព្រួយបារម្ភអំពីការត្រៀមខ្លួន ដើម្បីទទួលខុសត្រូវក្នុងការធ្វើជាម្ចាស់ផ្ទះ ព្រឹត្តិការណ៍ស៊ីហ្គេមនេះទៅវិញ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបង្ហោះសាររួមជាមួយរូបភាពមួយសន្លឹក ដែលមានរូបលោក និងរដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា កាលពីថ្ងៃទី៧ ខែមេសា ដោយបានលើកឡើងថា ទាំងក្រសួងវប្បធម៌ និងក្រសួងព័ត៌មាន កំពុងចែកគ្នាភ័យ ព្រោះជិតដល់ថ្ងៃស៊ីហ្គេមហើយ តែអនុគណៈកម្មការនីមួយៗ មិនដែលទទួលផែនការលម្អិត រួមទាំងការបែងចែកថវិកាលម្អិតនៅឡើយទេ។
ជុំវិញរឿងនេះ អ្នកវិភាគនយោបាយ លោក គឹម សុខ យល់ឃើញថា ការលើកឡើងរបស់រដ្ឋមន្ត្រីក្រសួងព័ត៌មាន អាចបណ្ដាលមកពីរដ្ឋាភិបាលកម្ពុជា កំពុងប្រឈមបញ្ហាថវិកាក្នុងការចំណាយធ្វើជាម្ចាស់ផ្ទះកីឡា ស៊ីហ្គេមនេះ។ លោកបន្ថែមថា ការលើកឡើងរបស់រដ្ឋមន្ត្រីក្រសួងព័ត៌មាន ក៏បង្ហាញពីរបៀបធ្វើការរបស់រដ្ឋាភិបាលដែលមិនចេះធ្វើការជាមួយគ្នានោះដែរ ព្រោះការបែងចែកផែនការ និងថវិកាលម្អិតយឺតយ៉ាវនឹងធ្វើឱ្យក្រសួងសាមី ដែលត្រូវទទួលខុសត្រូវមិនមានពេលវេលាគ្រប់គ្រាន់ ដើម្បីបំពេញការងាររបស់ខ្លួននោះឡើយ។
លោក គឹម សុខ៖ «លោក ហ៊ុន សែន មិនមានរៀបចំដោយសារតែ គាត់គិតអំពីស្ថានភាពហិរញ្ញវត្ថុកំពុងតែមានវិបត្តិ ឬក៏លើកស្ទួយវិស័យកីឡានោះទេ គាត់រៀបចំដោយព្រោះតែ វាជិតកៀកពេលដែលបោះឆ្នោតឆ្នាំ២០២៣។ គាត់រៀបចំព្រឹត្តិការណ៍ហ្នឹងទៅ ដើម្បីរៀបចំពិធីសាធារណៈឱ្យបានច្រើនផ្សព្វផ្សាយលើកមុខលើកមាត់គាត់ ទាក់ទងទៅនឹងវិស័យកីឡា ហើយភ្ជាប់អំពីអំនួត ជោគជ័យក្នុងវិស័យកីឡា ទៅនឹងការបោះឆ្នោតតែប៉ុណ្ណោះ»។
កម្ពុជានឹងធ្វើជាម្ចាស់ផ្ទះលើកទី១ របស់ខ្លួន ក្នុងការរៀបចំការប្រកួតកីឡា ស៊ីហ្គេម នៅក្នុងខែឧសភា ដោយពិធីបើកការប្រកួតកីឡា ធ្វើឡើងនៅថ្ងៃទី៥ ខែឧសភា ហើយគ្រោងនឹងបិទបញ្ចប់ទៅវិញនៅថ្ងៃទី១៧ ខែឧសភាខាងមុខ។ ក្នុងនោះ កម្ពុជានឹងរៀបចំការប្រកួតកីឡាសរុបចំនួន ៣៧ប្រភេទ ដែលចែកចេញជាជិត ៦រយវិញ្ញាសា (៥៨១)។
ដោយឡែក ហ្វេសប៊ុកផេកលោក ខៀវ កាញារីទ្ធ នៅថ្ងៃទី៨ ខែមេសា បានលុបសារអំពីការព្រួយបារម្ភក្នុងការត្រៀមខ្លួនធ្វើជាម្ចាស់ផ្ទះស៊ីហ្គេមទៅវិញ។ ការលុបសារនេះ ត្រូវបានអ្នកវិភាគនយោបាយ លោក គឹម សុខ យល់ឃើញថា ដោយសារលោក ខៀវ កាញារីទ្ធ បានទទួលបទបញ្ជាពីលោក ហ៊ុន សែន តម្រូវឱ្យលោកលុបសារទាំងនោះចេញវិញ ព្រោះខ្លាចប៉ះពាល់មុខមាត់ដល់រដ្ឋាភិបាល។
ជុំវិញរឿងនេះដែរ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ថា ភាពយឺតយ៉ាវក្នុងការបែងចែកថវិកាលម្អិត ក្នុងការត្រៀមខ្លួនធ្វើជាម្ចាស់ផ្ទះរៀបចំការប្រកួតកីឡា ស៊ីហ្គេម គឺបណ្ដាលមកពីអំពើពុករលួយក្នុងរដ្ឋាភិបាល។ លោកបន្ថែមថា ដោយសារអំពើពុករលួយក្នុងវិស័យកីឡានេះហើយ ដែលធ្វើឱ្យវិស័យកីឡាកម្ពុជានៅតែទន់ខ្សោយជាងគេ ក្នុងបណ្ដាប្រទេសសមាជិកអាស៊ាន (ASEAN)។ លោក អ៊ុំ សំអាន បន្ថែមថា ការធ្វើជាម្ចាស់ផ្ទះរៀបចំកីឡាស៊ីហ្គេម ឆ្នាំ២០២៣នេះ នឹងមិនអាចនាំកិត្តិយសដល់ប្រទេសជាតិបានច្រើននោះឡើយ ព្រោះរដ្ឋាភិបាលដែលដឹកនាំដោយគណបក្សប្រជាជនកម្ពុជា បានលើកកម្ពស់កេរ្តិ៍ឈ្មោះលោក ហ៊ុន សែន ច្រើនជាងព្រះមហាក្សត្រ ក្នុងការរៀបចំព្រឹត្តិការណ៍កីឡាអន្តរជាតិក្នុងតំបន់នេះ។
លោក អ៊ុំ សំអាន៖ «ខ្ញុំថាដោយសាររដ្ឋាភិបាលលោក ហ៊ុន សែន ហ្នឹងគាត់ពុករលួយ ដូច្នេះថវិកាអាចនឹងគាំងនៅខាងលើ ឬក៏គ្មានថវិកាដើម្បីរៀបចំស៊ីហ្គេមហ្នឹង ដោយសារពុករលួយនៅក្នុងរដ្ឋាភិបាលលោក ហ៊ុន សែន ហ្នឹងប្រៀបដូចជាមហារីកអ៊ីចឹង»។
បើទោះបីជាកម្ពុជាធ្វើជាម្ចាស់ផ្ទះក្នុងការរៀបចំកីឡាស៊ីហ្គេមក្ដី អ្នកវិភាគនយោបាយលើកឡើងថា កម្ពុជានឹងមិនអាចទទួលមេដាយមាសច្រើន ពីការប្រកួតឡើយ ព្រោះរដ្ឋាភិបាលកម្ពុជាមិនបានយកចិត្តទុកដាក់ ពង្រឹងសមត្ថភាព កីឡាករថ្នាក់ជាតិបានគ្រប់គ្រាន់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីធនាគារបង្ខំឲ្យកូនបំណុលលក់ទ្រព្យសម្បត្តិសងលុយទៅធនាគារខ្លួន
- តំណាងរាស្ត្រនិងទីប្រឹក្សាបក្សប្រជាជនប្រតិកម្មលើការប្រមូលពន្ធថា គាបសង្កត់ពលរដ្ឋក្នុងគ្រាលំបាក
- អាជ្ញាធរបញ្ជូនកញ្ញា សេង ធារី ទៅឃុំខ្លួននៅពន្ធនាគារព្រៃសវិញ ក្រោយពេលមន្ត្រីអាមេរិកជួបលោក ហ៊ុន ម៉ាណែត ផ្ទួនៗ គ្នា
- អាមេរិកផ្ដល់ជំនួយ ១៨លានដុល្លារមកកម្ពុជាវិញ តែមិនបានទទួលស្គាល់ថា ការបោះឆ្នោតត្រឹមត្រូវទេ
- អ្នកវិភាគថា អាមេរិកផ្ដល់ជំនួយឲ្យកម្ពុជាឡើងវិញ ដើម្បីទប់ទល់នឹងឥទ្ធិពលចិន