កម្លាំងសមត្ថកិច្ចរកឃើញឧទ្ធម្ភាគចក្រធ្លាក់នៅពោធិ៍សាត់ និងសាកសពអាកាសយានិកម្នាក់
2024.07.29
ឧទ្ធម្ភាគចក្រ ប្រភេទ Z-9 ផលិតនៅប្រទេសចិន ដែលបាត់ដាន ១៧ថ្ងៃ ក្រុមអ្នករុករកទើបតែរកឃើញនៅព្រៃខ្នងភ្នំយ៉ាវយ៉ៃ ឃុំថ្មដា ស្រុកវាលវែង ខេត្តពោធិ៍សាត់ នៅថ្ងៃទី២៩ ខែកក្កដា ឆ្នាំ២០២៤ ជាមួយសាកសពអ្នកបើកម្នាក់ រីឯម្នាក់ទៀត នៅបាត់ខ្លួន។
រូប៖ ក្រសួងព័ត៌មាន
កម្លាំងរុករកនៃក្រសួងការពារជាតិ នៅរសៀលថ្ងៃទី២៩ ខែកក្កដា បានរកឃើញឧទ្ធម្ភាគចក្រធ្លាក់នៅពោធិ៍សាត់ហើយ ដែលស្ថិតនៅចំណុចលើខ្នងភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង និងបានរកឃើញសាកសពអាកាសយានិកម្នាក់។
ទីភ្នាក់ងារសារព័ត៌មានកម្ពុជាអាកាប៉េ (AKP) ឱ្យដឹង នៅថ្ងៃទី២៩ ខែកក្កដាថា សាកសពអាកាសយានិកម្នាក់ ដែលរកឃើញមានឈ្មោះ ខេង ឆៃយុទ្ធ ខណៈអាកាសយានិកម្នាក់ទៀត ដែលជាមេក្រុមមានឈ្មោះ ស៊ុន ផ្លា កម្លាំងសង្គ្រោះ នៃក្រសួងការពារជាតិកំពុងបន្តប្រតិបត្តិការស្វែងរក។
អគ្គមេបញ្ជាការរងនាយសេនាធិការចម្រុះ នៃកងយោធពលខេមរភូមិន្ទលោក ឥត សារ៉ាត់ ប្រាប់ប្រព័ន្ធផ្សព្វផ្សាយក្នុងស្រុកថា ការរកឃើញឧទ្ធម្ភាគចក្រ ដែលធ្លាក់នេះ គឺបានតម្រុយចេញពីផ្កាយរណប តាំងពីថ្ងៃទី២៨ ខែកក្កដា ហើយមកទល់ពេលនេះ កម្លាំងនៃក្រសួងការពារជាតិកំពុងបន្ថែមកម្លាំងថ្មើរជើងបន្តស្វែងរក និងជួយសង្គ្រោះអាកាសយានិក។
លោក ឥត សារ៉ាត់៖ «បច្ចុប្បន្ននេះ លើយន្តហោះរបស់យើង យើងបានថតហើយឃើញហើយយន្តហោះនោះ។ យើងបានបន្ទាបបញ្ជាក់អត្តសញ្ញាណរបស់យើង មានទង់ជាតិ មានអីអស់ហើយ។ យើងព្យាយាមចុះ ប៉ុន្តែ ចុះអត់បាន ដោយសារធាតុអាកាស។ ឥឡូវភ្លៀងទៀតហើយ។ ដូច្នេះ យើងអាចបញ្ជាក់បានថា យើងបានឃើញយន្តហោះ ដែលធ្លាក់ហ្នឹងហើយ។ សូមជម្រាបជូនតែប៉ុណ្ណឹងទេ ហើយឥឡូវនេះ យើងកំពុងរុញកម្លាំងថ្មើរជើងយើងចូលទៅកៀកទីហ្នឹងប្រហែលជា ៦០០ម៉ែត្រហើយ ប៉ុន្តែ ដីព្រៃក្រាស់។ ក្នុង ៦០០ម៉ែត្រនេះ យើងជំរុញថា ឱ្យលឿន ចូលទៅដល់ ដើម្បីយើងសង្គ្រោះមន្ត្រីបងប្អូនពីឡុតហ្នឹង ក្នុងលក្ខណៈណាមួយ»។
ឧទ្ធម្ភាគចក្រ ដែលទើបរកឃើញនេះ គឺប្រភេទ Z-9 ជាយន្តហោះផលិតនៅប្រទេសចិន (China) ដែលរដ្ឋាភិបាលកម្ពុជា បានបញ្ជាទិញចំនួន ១២គ្រឿង កាលពីឆ្នាំ២០១៣។ កាលពីឆ្នាំ២០១៤ កន្លងទៅ ឧទ្ធម្ភាគចក្រប្រភេទ Z-9 មួយគ្រឿង បានធ្លាក់នៅក្នុងសង្កាត់ព្រៃស ខណ្ឌដង្កោ រាជធានីភ្នំពេញ បណ្ដាលឱ្យមនុស្សចំនួន ៤នាក់ បាត់បង់ជីវិត និងម្នាក់ទៀតរងរបួស ក្នុងពេលកំពុងហោះហើរហ្វឹកហ្វឺន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
