ក្រសួង​មហាផ្ទៃ​កំពុង​ស៊ើបអង្កេត​ករណី​ដោះលែង​ជនជាតិ​ចិន ៨​នាក់​រឿង​លួច​ឆ្លង​ដែន​ខុសច្បាប់​នៅ​ខេត្ត​ស្ទឹងត្រែង

ដោយ មាន ឫទ្ធិ
2024.06.07
ក្រសួង​មហាផ្ទៃ​កំពុង​ស៊ើបអង្កេត​ករណី​ដោះលែង​ជនជាតិ​ចិន ៨​នាក់​រឿង​លួច​ឆ្លង​ដែន​ខុសច្បាប់​នៅ​ខេត្ត​ស្ទឹងត្រែង រដ្ឋមន្ត្រី​ក្រសួង​មហាផ្ទៃ​លោក ស សុខា។
រូប៖ ហ្វេសប៊ុកលោក ស សុខា

ក្រសួងមហាផ្ទៃ​កំពុង​បើក​ការស៊ើបអង្កេត​លើ​មន្ត្រី​សាលាដំបូង និង​មន្ត្រី​ពន្ធនាគារ​ខេត្តស្ទឹងត្រែង ដែល​បាន​ដោះលែង​ជនជាតិ​ចិន​ចំនួន ៨​នាក់​ពាក់ព័ន្ធ​ការ​ឆ្លងដែន​ខុសច្បាប់​ចូល​កម្ពុជា​។ មន្ត្រី​សិទ្ធិមនុស្ស​ថា ការ​ដោះលែង​ជនជាតិ​ចិន​ទាំង ៨​នាក់​នោះ​មន្ត្រី​តុលាការ និង​មន្ត្រី​ពន្ធនាគារ​ខេត្ត​អាច​ពាក់ព័ន្ធ​នឹង​ការប្រព្រឹត្ត​អំពើពុករលួយ​ទទួល​សំណូក​ពី​ជនល្មើស និង​ស្នើ​ឱ្យ​ក្រសួង​ស្ថាប័ន​ពាក់ព័ន្ធ​ចាត់វិធានការ​ឱ្យ​បាន​ម៉ឺងម៉ាត់។

ក្រសួង​មហាផ្ទៃ និង​ក្រសួង​យុត្តិធម៌​មិន​ទាន់​បង្ហាញ​លទ្ធភាព​នៃ​ការស្រាវជ្រាវ​រកមុខ​មន្ត្រី​សាលាដំបូង​ខេត្តស្ទឹងត្រែង និង​មន្ត្រី​ពន្ធនាគារ​ក្នុង​ខេត្ត​នេះ ជុំវិញ​ការ​ដោះលែង​ជនជាតិ​ចិន​ចំនួន ៨​នាក់​ដែល​បាន​ឆ្លងដែន​ចូល​កម្ពុជា​ខុសច្បាប់​នៅ​ឡើយ។

ក្រសួង​មហាផ្ទៃ និង​កម្លាំង​នគរបាល​ក៏​មិនទាន់​ចាប់បាន​ជនជាតិ​ចិន​ទាំង ៨​នាក់​នោះ ដើម្បី​យក​មក​អនុវត្ត​ទោស​តាមផ្លូវ​ច្បាប់​ឡើងវិញ​នៅឡើយ​ដែរ។

កម្លាំង​នគរបាល​ខេត្ត​ស្ទឹងត្រែង កាល​ពី​ថ្ងៃទី​៣០ ខែ​មករា បាន​សហការ​ជាមួយ​កម្លាំង​នគរបាល​ខេត្ត​ព្រះវិហារ​ឃាត់ខ្លួន​ជនជាតិ​ចិន​ទាំង ៨​នាក់​នោះ ស្ថិតនៅ​ឃុំ​កំពង់​ស្រឡៅ​មួយ ស្រុក​ឆែប ក្នុង​ខេត្ត​ព្រះវិហារ បន្ទាប់ពី​ពួកគេ​បាន​ឆ្លងដែន​ចូល​តាម​ច្រកព្រំដែន​អន្តរជាតិ​ត្រពាំង​ក្រៀល​ក្នុង​ខេត្ត​ស្ទឹងត្រែង ជាប់​ព្រំប្រទល់​ប្រទេស​ឡាវ ចូល​មក​កម្ពុជា​ដោយ​ខុសច្បាប់។

ជនជាតិ​ចិន​ទាំង​នោះ​បាន​សារភាព​ប្រាប់​ប៉ូលិស​ថា ពួកគេ​លួច​ឆ្លងដែន​ពី​ប្រទេស​ឡាវ​ចូល​កម្ពុជា​ក្នុង​បំណង​ស្វែងរក​ការងារ​ធ្វើ​នៅ​រាជធានី​ភ្នំពេញ និង​នៅ​ខេត្ត​ព្រះសីហនុ។

អ្នកនាំពាក្យ​សាលាដំបូង​ខេត្តស្ទឹងត្រែង លោក សុំ ស៊ាងហាក់ ប្រាប់​វិទ្យុ​អាស៊ីសេរី​នៅ​ថ្ងៃ​ទី៦ ខែ​មិថុនា​ថា ជនជាតិ​ចិន​ទាំង ៨​នាក់​នោះ​ត្រូវ​បាន​តុលាការខេត្ត​ស្ទឹងត្រែង​សម្រេច​ផ្ដន្ទាទោស​ឱ្យ​ជាប់​ពន្ធនាគារ​រយៈពេល ៤​ខែ​ពី​បទ​លួច​ឆ្លងដែន​ដោយ​ខុសច្បាប់ នៅ​ថ្ងៃទី​១០ កុម្ភៈ ហើយ​ព្រះរាជអាជ្ញា​រង​អម​សាលាដំបូង​ខេត្តស្ទឹងត្រែង​គឺ លោក ជា សុភ័ក្រ បាន​បង្កាប់​ឱ្យ​ឃុំខ្លួន​ភ្លាមៗ​ក្នុង​ពន្ធនាគារ។

លោក សុំ ស៊ាងហាក់ ឱ្យ​ដឹង​ទៀត​ថា ព្រះរាជអាជ្ញា​រង​គឺ លោក ជា សុភ័ក្រ គឺជា​អ្នក​កាន់​សំណុំ​រឿង​នេះ និង​បាន​ចេញ​ដីកា​ឱ្យ​ដោះលែង​ជនជាតិ​ចិន​ទាំង ៨​នាក់​ឱ្យ​មាន​សេរីភាព​កាលពី​ថ្ងៃ​ទី​២៧ ខែ​កុម្ភៈ។

លោក សុំ ស៊ាងហាក់៖ «និយាយ​ទៅ​នីតិវិធី​នៃ​ការ​ដោះលែង​ដោយសារតែ​ជនបរទេស​ទាំង ៨​នាក់​បាន​ជំនុំជម្រះ​កាត់ទោស​រួចហើយ គួរណា​តែ​សួរ​ខាង​អយ្យការ​វិញ​ល្អ​ជាង​។ ព្រះរាជអាជ្ញា​រង​ដែល​ទទួលបន្ទុក​ដោះស្រាយ​រឿង​ហ្នឹង​គឺ​ឈ្មោះ ជា សុភ័ក្រ ទាក់ទង​រឿង​ដោះលែង​ខ្ញុំ​ឆ្លើយ​អត់​ចេញ​ដោយសារ​នីតិវិធី​គាត់​ជា​អ្នកធ្វើ អ៊ីចឹង​គួរណា​គាត់​ជា​អ្នកឆ្លើយ»

លោក សុំ ស៊ាងហាក់ ឱ្យ​ដឹង​ទៀត​ថា មក​ទល់​ពេល​នេះ ការ​តាម​ចាប់ខ្លួន​ជនជាតិ​ចិន ៨​នាក់​ដែល​បាន​ដោះលែង​នោះ មិន​ស្ថិត​ក្នុង​ដែន​សមត្ថកិច្ច​របស់​តុលាការខេត្ត​ស្ទឹងត្រែង​ទៀត​នោះ​ទេ គឺ​កំពុង​ស្ថិត​ក្នុង​នីតិវិធី​ស្រាវជ្រាវ​របស់​ក្រសួង​មហាផ្ទៃ និង​ក្រសួង​យុត្តិធម៌។

វិទ្យុ​អាស៊ីសេរី​មិនអាច​ទាក់ទង​ព្រះរាជអាជ្ញា​រង​ខេត្តស្ទឹងត្រែង​គឺ លោក ជា សុភ័ក្រ ដើម្បី​ឆ្លើយតប​ជុំវិញ​រឿង​នេះ​បាន​ទេ នៅ​ថ្ងៃ​ទី៦ ខែ​មិថុនា។

រដ្ឋមន្ត្រី​ក្រសួង​មហាផ្ទៃ លោក ស សុខា កាលពី​ថ្ងៃទី​២ ខែ​ឧសភា បាន​បង្កើត​គណៈកម្មការ​ចំពោះ​កិច្ច​មួយ ដែល​មាន​ការចូលរួម​ដោយ​រដ្ឋលេខាធិការ​ក្រសួង​យុត្តិធម៌ លោក គឹមសន្តិភាព កម្លាំង​ស្នងការដ្ឋាន​នគរបាល​ខេត្ត​ស្ទឹងត្រែង នគរបាល​ថ្នាក់​ជាតិ និង​កម្លាំង​អាវុធហត្ថ​ជាដើម ដើម្បី​ស៊ើបអង្កេត​លើ​នីតិវិធី​មិន​ប្រក្រតី​លើ​ការ​ដោះលែង​ជនជាតិ​ចិន​ទាំង ៨​នាក់។

គណៈកម្មការ​នេះ មាន​ភារកិច្ច​ស្រាវជ្រាវ​ប្រមូល​ព័ត៌មាន និង​សហការ​ជាមួយ​សមត្ថកិច្ច​ពាក់ព័ន្ធ​ស៊ើបអង្កេត​លើ​ការ​ចេញ​ដីកា​របស់​ព្រះរាជអាជ្ញា​រង ខេត្ត​ស្ទឹងត្រែង និង​ពន្ធនាគារ​ខេត្ត ដែល​បាន​ដោះលែង​ជនជាតិ​ចិន​ទាំង ៨​នាក់ ដោយ​ពុំបាន​ធ្វើ​លិខិត និង​ប្រគល់​ជន​ជាតិចិន​ទាំងនោះ មក​មន្ត្រី​នគរបាល​អន្តោប្រវេសន៍ ដើម្បី​បណ្ដេញ​ចេញ​ពី​កម្ពុជា។

មន្ត្រី​សម្របសម្រួល​នៃ​សមាគម​ការពារ​សិទ្ធិមនុស្ស​អាដហុក (ADHOC) ប្រចាំ​ខេត្ត​ស្ទឹងត្រែង លោក ចឹក ចិត្រា ជឿជាក់​ថា នីតិវិធី​ដោះលែង​ជនជាតិ​ចិន​ទាំង ៨​នាក់​នោះ គឺ​ជាប់​ពាក់ព័ន្ធ​នឹង​ការប្រព្រឹត្ត​អំពើពុករលួយ។

លោក ចឹក ចិត្រា៖ «យើង​ក៏​សំណូមពរ​ឱ្យ​ក្រសួង​ដែល​ជា​មេ​កើយ​មន្ត្រី​ទាំង​អស់ហ្នឹង​រឹត​បន្តឹង​ឱ្យ​តឹងរ៉ឹង​ធ្វើការ​ស៊ើបអង្កេត​ដោយ​ឯករាជ្យ ដើម្បី​យក​ជនល្មើស ឬ​មន្ត្រី​ដែល​ប្រព្រឹត្ត​អំពើ​ទាំង​អស់ហ្នឹង​យក​មក​អនុវត្ត ឬ​ដាក់ទោស​តាមផ្លូវ​ច្បាប់ កុំឱ្យ​មានការ​អនុវត្ត​ច្បាប់​ស្តង់ដារ​ពីរ​លើ​មន្ត្រី​ទាំងអស់​ហ្នឹង​។ យើង​ចង់ឱ្យ​មន្ត្រី​ដែល​ជា​គណៈកម្មការ​ចុះ​មក​ហ្នឹង​ត្រូវតែ​មាន​ឯករាជ្យ​ភាព​ក្នុង​ការ​ស៊ើបអង្កេត និង​ជំរុញ​ការអនុវត្ត​ទៅតាម​ច្បាប់​ជាជាង​មាន​មនោសញ្ចេតនា ជាមួយ​អ្នក​ប្រព្រឹត្ត​ដែល​បាន​ដោះលែង​ជនជាតិ​ចិន​ទាំង ៨​នាក់​ហ្នឹង​រួចខ្លួន​ដែល​ល្មើស​នឹង​ច្បាប់​ស្រុក​យើង»

មន្ត្រី​សង្គម​ស៊ីវិល​រិះគន់​ថា ករណី​តុលាការ​ខេត្ត​ស្ទឹងត្រែង​ដោះលែង​ជនជាតិ​ចិន​ទាំង ៨​នាក់​ឱ្យ​នៅ​ក្រៅ​ឃុំ​ស្ងាត់ៗ​បែប​នេះ ឆ្លុះបញ្ចាំង​ឱ្យ​ឃើញ​ថា ប្រព័ន្ធ​ច្បាប់​ទន់ខ្សោយ​ដោយសារ​តែ​មាន​មន្ត្រី​តុលាការ​មួយចំនួន ប្រព្រឹត្ត​អំពើពុករលួយ ទទួល​សំណូក​ពី​ជនល្មើស​ជា​ថ្នូរ​នឹង​ការ​ដោះលែង​ឱ្យ​មាន​សេរីភាព និង​ធ្វើ​ឱ្យ​ជនបរទេស​មួយចំនួន​ដែល​ចូល​មក​បង្ក​អសន្តិសុខ​នៅ​កម្ពុជា​នៅតែ​មិន​ខ្លាច​ញញើត​ចំពោះ​ប្រព័ន្ធ​ច្បាប់​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ព្រះចៅ​អធិការ​វត្ត​ដំរីស ខេត្ត​បាត់ដំបង បណ្ដេញ​ព្រះសង្ឃ​មួយ​អង្គ​ចេញ​ពី​វត្ត​បន្ទាប់​ពី​ចូលរួម​បុណ្យ​ខួប​បាញ់សម្លាប់​បណ្ឌិត កែម ឡី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។