លេខាធិការដ្ឋានគណៈកម្មាធិការទន្លេមេគង្គហៅកាត់ថា MRC ដែលមានមូលដ្ឋាននៅទីក្រុងវៀងច័ន្ទ ប្រទេសឡាវ កត់សម្គាល់ថា កម្រិតទឹកទន្លេមេគង្គក្នុងតំបន់ខាងក្រោម មានការកើនឡើងក្នុងអំឡុងពេល ៧ ថ្ងៃចុងក្រោយនេះ។ ប្រភពដដែលបញ្ជាក់ថា មូលហេតុចម្បង ២ នាំឱ្យទឹកទន្លេឡើងខ្ពស់នេះ គឺភ្លៀងធ្លាក់ខ្លាំង និងការបើកទំនប់ភ្លាមៗនៅខ្សែទឹកខាងលើ។
តែទោះជាយ៉ាងណា កម្រិតទឹកក្នុងទន្លេមេគង្គក្នុងតំបន់ខាងក្រោមរួមមាន ប្រទេសថៃ ឡាវ កម្ពុជា និងវៀតណាមនេះ នៅមិនទាន់ទៅដល់កម្រិតប្រកាសអាសន្ន ឬកម្រិតគ្រោះថ្នាក់នៅឡើយទេ។
យ៉ាងនេះក្ដីប្រធានមជ្ឈមណ្ឌលគ្រប់គ្រងគ្រោះទឹកជំនន់ និងគ្រោះរាំងស្ងួតក្នុងតំបន់នៃ MRC លោក ឡាំ ហ៊ុង សុន (Lam Hung Son) អះអាងថា ភ្លាមៗនេះនៅមិនទាន់ដឹងឱ្យប្រាកដថា តើកម្រិតទឹកឡើងនេះនឹងបង្កឱ្យមានផលប៉ះពាល់យ៉ាងណាខ្លះនៅឡើយទេ។
នៅកម្ពុជាកម្ពស់ទឹកទន្លេមេគង្គ ដែលយកបានពីស្ថាននីយ៍ស្ទង់កម្ពស់ទឹកចាប់ពីខេត្តស្ទឹងត្រែង បន្តទៅដល់អ្នកលឿង ខេត្តព្រៃវែង កម្ពស់ទឹកបានកើនឡើងប្រមាណជិត ១ ម៉ែត្រ (០,៨៥ម) ជាមធ្យម ក្នុងរយៈពេល ៧ ថ្ងៃមកនេះ។ បើតាមការព្យាករណ៍ក្នុងរយៈពេល ៥ ថ្ងៃខាងមុខ កម្ពស់ទឹកក្នុងតំបន់នេះអាចនឹងឡើងដល់ជាង២ម៉ែត្រ (២,៦០) បន្ថែមទៀត។
បើតាមលោក ឡាំ ហ៊ុង សុន ភ្លៀងធ្លាក់ខ្លាំងនៅផ្នែកជាច្រើនក្នុងតំបន់ទំនាបទន្លេមេគង្គ បានធ្វើឱ្យកម្រិតទឹកភ្លៀងកើនឡើងប្រមាណ ៤០% ខ្ពស់ជាងកម្ពស់ទឹកភ្លៀងក្នុងរយៈពេលដូចគ្នា ក្នុងខែកក្កដា ឆ្នាំ២០១៥ និងឆ្នាំ២០២០។ លោកបន្តថា ការបើកទំនប់វារីអគ្គិសនីនានាភ្លាមៗ នៅខ្សែទឹកខាងលើ និងដៃទន្លេមេគង្គ ក៍បង្កជាបញ្ហាប្រឈម ឬជាការលំបាកមួយសម្រាប់ការព្យាករណ៍ពីស្ថានភាពទឹកក្នុងទន្លេមេគង្គដែរ។
មន្ត្រីជំនាញដដែលបញ្ជាក់ដែរថា ទឹកទន្លេអាចស្រកទៅវិញនៅពេលដែលប្រទេសចិនអះអាងថា ការបង្ហូរទឹកចេញពីស្ថាននីយ៍វារីអគ្គិសនី ជីងហុង (Jinghong) នឹងត្រូវកាត់បន្ថយប្រមាណ ៥០% ក្នុងរយៈពេល ២០ ថ្ងៃ ចាប់ពីថ្ងៃទី៣១ ខែកក្កដា ដល់ថ្ងៃទី២០ ខែសីហា ខាងមុខ។ យ៉ាងនេះក្ដីលោកថា កម្រិតទឹកប្រែប្រួលយ៉ាងណាទៀតអាស្រ័យនឹងកម្រិតទឹកភ្លៀងនៅប៉ុន្មានថ្ងៃខាងមុខទៀតនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។