កូដករ​ណាហ្គាវើលដ៍​បន្ត​ធ្វើ​កូដកម្ម​ដោយ​សន្តិវិធី​រក​ដំណោះស្រាយ ខណៈ​អាជ្ញាធរ​ព្រមាន

ដោយ ​មាន ឫទ្ធិ
2022.11.07
Share on WhatsApp
Share on WhatsApp
កូដករ​ណាហ្គាវើលដ៍​បន្ត​ធ្វើ​កូដកម្ម​ដោយ​សន្តិវិធី​រក​ដំណោះស្រាយ ខណៈ​អាជ្ញាធរ​ព្រមាន សកម្មភាព​តវ៉ារបស់បុគ្គលិកណាហ្គាវើលដ៍ កាលពីថ្ងៃទី៦ ខែ​វិច្ឆិកា ឆ្នាំ​២០២២។
រូប៖ ពលរដ្ឋផ្ដល់ឱ្យ

ក្រុម​កូដករ​ណាហ្គាវើលដ៍ (Naga World) បន្ត​ធ្វើ​កូដកម្ម​ដោយ​សន្តិវិធី​នៅ​មុខ​អគារ​ក្រុមហ៊ុន​ដើម្បី​ស្វែង​រក​ដំណោះស្រាយ​ការងារ ខណៈ​អាជ្ញាធរ​ចាប់​ផ្តើម​រឹត​បណ្តឹង​សណ្ដាប់ធ្នាប់​សាធារណៈ និង​ព្រមាន​ចាត់​វិធានការ​លើ​ពួកគេ។ មន្ត្រី​សិទ្ធិ​មនុស្ស​ថា​ការ​ធ្វើ​កូដកម្ម​ដោយ​អហិង្សា និង​សន្តិវិធី​របស់​ក្រុម​កូដករ​ណាហ្គាវើលដ៍ គឺ​អនុវត្ត​ត្រឹម​ត្រូវ​ច្បាប់។

ក្រុម​កូដករ​ណាហ្គាវើលដ៍ ប្រមាណ​១រយនាក់​បាន​នាំ​គ្នា​បន្ត​ប្រមូល​ផ្តុំ​ឈរ​តវ៉ា​នៅ​មុខ​អាគារ​ក្រុមហ៊ុន​នៅ​ថ្ងៃទី០៦ ខែវិច្ឆិកា ដោយ​អ្នក​ខ្លះ​វាយ​ស្គរ ផ្លុំត្រែ លើក​បដា​ស្រែក​ទាមទារ​ឱ្យ​ឲ្យ​រដ្ឋាភិបាល និង​ម្ចាស់​ក្រុម​ហ៊ុន​បនល្បែង​ណាហ្គាវើលដ៍ ចេញមុខ​ដោះ​ស្រាយ វិវាទ​ការងារ​ជូន​ពួកគាត់​ទៅ​តាមច្បាប់។ ទោះ​យ៉ាង​ណា អាជ្ញាធរ និង​ក្រុម​សន្តិសុខ​ស្លៀកពាក់​ឯក​សណ្ឋាន និង​ស៊ីវិល​ក្រុង​ភ្នំពេញ​ជាង​១រយ​នាក់​បាន​បង្កើន​ឃ្លាំ​មើល និង​រឹត​បណ្តឹង​បរិវេណ​នោះ ដូចជា​ដាក់​រនាំង​ដែក​បិទ​ផ្លូវ​ចេញ​ចូល និង​ប្រកាស​តាម​មេក្រូ​ណែនាំ​ឱ្យ​ម្ចាស់​ទីតាំង​ដែល​ស្ថិត​ក្បែរ​ក្រុម​ហ៊ុន​ទទួល​ផ្អាក​​ផ្ញើ​ម៉ូតូ ព្រមទាំង​ផ្សព្វ​ផ្សាយ​សារ​សំឡេង​នៃ​លិខិត​រដ្ឋ​បាល​រាជធានី​ភ្នំពេញ​ឲ្យ​ក្រុម​កូដករ​ផ្អាក​កូដកម្ម​ដើម្បី​រក្សា​សន្តិសុខ សណ្ដាប់ធ្នាប់ អំឡុង​ពេល​ប្រជុំ​អាស៊ាន និង​បុណ្យ​អុំទូក។

សំឡេង៖ « សំឡេង ត្រែ ស្គរ! ហេតុ​អ្វី​គំរាម​កំហែង​រឿង​គុក ច្រវាក់ លើ​អ្នក​តវ៉ា​ដែល​គ្រាន់​តែ​ការពារ​សិទ្ធិ​ការងារ សិទ្ធិ​មនុស្ស ប៉ុណ្ណោះ! ពួក​យើង​មាន​ចម្ងល់​ណាស់​គ្រាន់​តែ​ការពារ​សិទ្ធិ​ឱ្យ​កម្មករ​ខ្មែរ សួរ​ថា​ខុស​ច្បាប់​​មែន​ឬ​ទេ»

កូដករ​ណាហ្គាវើលដ៍​គឺ​កញ្ញា ម៉ែន សុធីវឌ្ឍនៈ ប្រាប់​វិទ្យុអាស៊ីសេរី​ថា​ក្រុម​កូដករ​មិន​ផ្អាក​ធ្វើ​កូដកម្ម​អំឡុង​ពេល​ថ្ងៃ​ឈប់​សម្រាក ឬ​ថ្ងៃ​ពិសេស​ណាមួយ​តាម​អាជ្ញាធរ​ក្រុង​ភ្នំពេញ​នោះ​ទេ ពី​ព្រោះ​ការ​ប្រមូល​ផ្តុំ​រក​ដំណោះ​ស្រាយ​ការងារ​ជិត​មួយឆ្នាំ​មក​នេះ​កូដករ​បាន​អនុវត្ត​សិទ្ធិ​ស្រប​តាម​ច្បាប់ ហើយ​មិនបាន​ធ្វើ​ឲ្យ​ប៉ះពាល់​ដល់​សណ្ដាប់ធ្នាប់​សាធារណៈ​ឡើយ។ កញ្ញា​យល់​ថា ការ​ដាក់​សម្ពាធ និង​គំរាមកំហែង​លើ​ក្រុម​កូដករ​មិនមែន​ជា​ដំណោះស្រាយ​ទេ។ កញ្ញា​បន្ថែម​ថា បើសិន​អាជ្ញាធរ​ក្រុង​ភ្នំពេញ​ចង់​បញ្ឈប់​រឿង​នោះ ស្ថាប័ន​ពាក់ព័ន្ធ​ត្រូវ​ជំរុញ​ឱ្យ​ភាគី​ថៅកែ​ក្រុមហ៊ុន​ណាហ្គាវើលដ៍​គោរព​ច្បាប់​ការងារ ដើម្បី​ការពារ​សិទ្ធិ​កម្មករ និង​លើក​មុខមាត់​រដ្ឋាភិបាល។

កញ្ញា ម៉ែន សុធីវឌ្ឍនៈ៖ «ជា​កូដករ​យល់ឃើញ​ថា នេះ​ជា​រូបភាព​នៃ​ការ​គំរាមកំហែង បិទ​សិទ្ធិ​សេរីភាព​ក្នុង​ការ​បញ្ចេញ​មតិ ជាក់​ស្តែង​កូដកម្ម​របស់​យើង​អត់​មាន​ប៉ះពាល់​ដល់​សណ្ដាប់ធ្នាប់​សាធារណៈ​អ្វី​ទេ យើង​ធ្វើ​កូដកម្ម​នៅ​ក្បែរ​ក្រុម​ហ៊ុន ហេតុ​អ្វី​បាន​ជា​ខាង​សាលា​រាជធានី​ភ្នំពេញ​ចេញ​លិខិត​គំរាម​មិន​ឱ្យ​យើង​ធ្វើ ទាំង​ជាក់​ស្តែង​យើង​ដឹង​ហើយ​ថា​គ្មាន​ច្បាប់​ណា​ឃាម​ឃាត់​យើង​ធ្វើ​កូដកម្ម​អំឡុង​ពេល​បុណ្យ​ទាន ឬ​ប្រជុំ​អាស៊ាន​ណា​ទេ»

កាល​ពី​ថ្ងៃ​ទី​៥ ខែ​វិច្ឆិកា អាជ្ញាធរ​ក្រុងភ្នំពេញ​បាន​ចេញ​សេចក្តី​ប្រកាស​ព័ត៌មាន​ដោយ​ឲ្យ​ក្រុម​កូដករ​ណាហ្គាវើលដ៍(Naga world) ផ្អាក​ការ​ធ្វើ​កូដកម្ម​ជា​បន្ទាន់​រយៈពេល​មួយ​សប្តាហ៍​ចាប់​ពី​ថ្ងៃ​ទី៦ ដល់​ថ្ងៃ​ទី​១៣ ខែ​វិច្ឆិកា អំឡុង​ពេល​ព្រះរាជ​ពិធីបុណ្យ​អុំទូក និង​កិច្ច​ប្រជុំ​កំពូល​អាស៊ាន។ លិខិត​ដដែល​បាន​ព្រមាន​ថា ប្រសិន​បើ​ក្រុម​កូដករ​ណាហ្គាវើលដ៍​នៅតែ​បន្ត​ប្រមូល​ផ្តុំ​គ្នា​តវ៉ា​ធ្វើ​ឲ្យ​ប៉ះពាល់​ដល់​សន្តិសុខ សុវត្ថិភាព សណ្ដាប់ធ្នាប់ និង​របៀប​រៀបរយ​សាធារណៈ​អំឡុង​ពេល​កិច្ច​ប្រជុំ​កំពូល​អាស៊ាន និង​កិច្ច​​ប្រជុំ​ពាក់ព័ន្ធ នានា នោះ​ពួកគេ​នឹង​ត្រូវ​ទទួល​ខុស​ត្រូវ​ចំពោះ​មុខ​ច្បាប់។

វិទ្យុ​អាស៊ីសេរី​មិន​អាច​ទាក់​ទង​អ្នកនាំ​ពាក្យ​សាលា​រាជធានី​ភ្នំពេញ​លោក ម៉េត មាសភក្តី ដើម្បី​បក​ស្រាយ​ជុំវិញ​រឿង​នេះ​បានទេ​នៅ​ថ្ងៃទី០៦ ខែវិច្ឆិកា។

ទោះ​យ៉ាង​ណា ប្រធាន​សមាគម​ការពារ​សិទ្ធិ​មនុស្ស​អាដហុក (Adhoc) លោក នី សុខា មាន​ប្រសាសន៍​ថា ក្នុង​សង្គម​ប្រជាធិបតេយ្យ​សេរី​ដូច​ប្រទេស​កម្ពុជា​នោះ ការ​ធ្វើ​កូដកម្ម​ដោយ​អហិង្សា និង​សន្តិវិធី​របស់​ក្រុម​កូដករ​ណាហ្គាវើលដ៍​កន្លង​មក មិនមែន​ជា​ទង្វើ​ខុស​ច្បាប់​នោះ​ទេ។ ផ្ទុយ​ទៅវិញ​លោក​ថា អាជ្ញាធរ​ដែល​​ណែ​នាំ ​កូដករ​ផ្អាក​ធ្វើ​កូដកម្ម​​នោះ គឺ​ជា​បំបិទ​សិទ្ធិ​សេរីភាព​ពួក​គាត់។ លោក​ជំរុញ​ឱ្យ​អាជ្ញាធរ​ដើរ​តួ​ជា​អាជ្ញា​កណ្តាល គោរព​សិទ្ធិ​ជា​មូលដ្ឋាន​របស់​កម្មករ​ដោយ​ជំរុញ​ឱ្យ​មាន​ដំណោះស្រាយ​ករណី​វិវាទ​ការងារ​នៅ​ក្រុមហ៊ុន​ណា​ហ្គាវើលដ៍​តាម​ច្បាប់​ការងារ គឺ​ជា​ដំណោះ​ស្រាយ​ល្អ និង​អាច​បញ្ឈប់​កូដកម្ម​តទៅ​ទៀត។

លោក នី សុខា៖ «អាជ្ញាធរ​ចេញ​សេចក្តី​ជូន​ដំ​ណឹង ឬ​សេចក្តី​ណែនាំ​ផ្សេងៗ គឺ​វា​មិនមែន​ជា​ច្បាប់​នោះ​ទេ ពីព្រោះ​វា​ជា​ការ​យល់​ឃើញ​របស់​អាជ្ញាធរ​ខ្លួន​ឯង ដោយ​មិន​អាច​យក​ការ​យល់​ឃើញ​របស់​យើង​ទៅ​ដាក់​សម្ពាធ ឬ​រឹតត្បិត​លើ​សេរីភាព​របស់​គេ​បាន​ទេ អ៊ីចឹង​សូម​ឱ្យ​អាជ្ញាធរ​ងាក​ទៅ​មើល​ច្បាប់​វិញ»

គិត​មក​ទល់​ពេល​នេះ ក្រុម​កូដករ បាន​ធ្វើ​កូដកម្ម​ជិត​១ឆ្នាំ​ហើយ ប៉ុន្តែ​ពុំ​ទទួល​បាន​ដំណោះ​ស្រាយ​នោះ​ទេ។ ផ្ទុយ​ទៅ​វិញ អាជ្ញាធរ និង​ក្រុម​ហ៊ុន បាន​រួម​គ្នា​ចោទ​ប្រកាន់ និង​ចាប់​ខ្លួន​តំណាង​ក្រុម​កម្មករ​ជាង​១០នាក់ ដាក់​ពន្ធនាគារ ហើយ​ថែម​ទាំង​ប្រើ​ហិង្សា​ឥត​ឈប់​ឈរ​លើ ក្រុម​កូដករ​ភាគច្រើន​ជា​ស្ត្រី​បណ្តាល​ឲ្យ​របួសធ្ងន់​និង​ស្ត្រី​ម្នាក់​រលូត​កូនក្នុង​ផ្ទៃ។ ថ្មីៗនេះ ក្រុមហ៊ុន ក៏​បាន​ប្តឹង​ស្ត្រីកូដករ៧នាក់​ទៅ​តុលាការ​ពី​បទ «រំលោភ​លើ​លំនៅឋាន ​ធ្វើ​ឱ្យ​ខូច​ខាត​ដោយចេតនា​មាន​ស្ថាន​ទម្ងន់​ទោស និង​ចាប់​ឃុំ​ឃាំង និង​បង្ខាំង​ដោយ​ខុស​ច្បាប់»

ក្រុម​កូដករ លើកឡើង​ថា ការ​គំរាម​កំហែង និង​ការ​ប្រើប្រាស់​ប្រព័ន្ធ​តុលាការ​មិនមែន​ជា​ដំណោះស្រាយ​ពិត​ប្រាកដ​ដែល​ធ្វើ​ឲ្យ​កូដករ​បោះបង់​ការ​ទាម​ទារ​សិទ្ធិ​ការងារ និង​យុត្តិធម៌​នៅ​កន្លែង​ការងារ​ឡើយ ប៉ុន្តែ​ករណីនេះ​កាន់​តែ​បង្ហាញ​ពី​ការរំ​លោភ​សិទ្ធិ​ការងារ​ធ្ងន់ធ្ងរ​នៅ​ក្នុង​ប្រទេស​កម្ពុជា​គ្រប់​ទម្រង់។

កន្លង​មក​ក្រុម​អង្គការ សមាគម និង​សហជីព​ជាច្រើន​ស្ថាប័ន រួម​ទាំង​អ្នក​រាយការណ៍​ពិសេស​អង្គការ​សហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​កម្ពុជា​ផង បាន​ទទូច​ឱ្យ​រាជ​រដ្ឋាភិបាល ​បញ្ឈប់​ស្ថានភាព​តានតឹង​នេះ និង​ចាត់​វិធានការ​ច្បាស់លាស់ ដើម្បី​ដោះស្រាយ​វិវាទ​ការងារ​នេះ ដែល​រួមមាន​ការ​ធានា​ឱ្យ​ក្រុមហ៊ុន​ណាហ្គាវើលដ៍​ចូល​រួម​ចរចា​ដោយ​ភាព​ស្មោះ​ត្រង់ និង​គោរព​ច្បាប់​ជាតិ​ជា​ធរមាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។