មនុស្សជាង ១ពាន់នាក់ត្រូវបានសមត្ថកិច្ចចោទប្រកាន់ថាបានល្មើសបម្រាមបង្ការកូវីដ ហើយត្រូវបានសមត្ថកិច្ចអនុវត្តវិធានការដូចជា ណែនាំឱ្យធ្វើកិច្ចសន្យា ពិន័យជាប្រាក់បញ្ជូនខ្លួនឱ្យទៅធ្វើចក្តាឡីស័ក និងកសាងសំណុំរឿងបញ្ជូនទៅតុលាការជាដើម។
អ្នកនាំពាក្យនគរបាលរាជធានីភ្នំពេញលោក សាន សុខសីហា ឱ្យអាស៊ីសេរីដឹងនៅថ្ងៃទី១០ ខែឧសភាថាចាប់តាំងពីអាជ្ញាធរបិទខ្ទប់រាជធានីភ្នំពេញគិតតាំងពីថ្ងៃទី១៥ ខែមេសាដល់ថ្ងៃទី៩ ខែឧសភាមានអ្នកល្មើសបម្រាម ១.០៣៨នាក់ក្នុងនោះតុលាការចេញដីកាឃុំខ្លួន ១០នាក់សាកសួរបន្តនៅតុលាការ ៣នាក់កំពុងសាកសួរនៅអធិការខណ្ឌ ៣៩នាក់ពិន័យជាប្រាក់ ៣៣៣នាក់អប់រំណែនាំ ៤៩១នាក់និងបញ្ជូនទៅធ្វើចក្តាឡីស័ក ១៥៨នាក់។ លោកបន្តថា ក្នុងចំណោមអ្នករងការពិន័យនឹងត្រូវបង់ប្រាក់ទៅអាជ្ញាធរតាមសាលារាជធានីភ្នំពេញកំណត់ចាប់ពីមួយលានរៀលឡើងប៉ុន្តែបើអ្នកប្រព្រឹត្តមិនទាន់មានលុយបង់ភ្លាមៗអាចពន្យារពេលបានមួយខែ។ ទោះយ៉ាងណា អ្នកនាំពាក្យដដែលឱ្យដឹងទៀតថាសមត្ថកិច្ចព្យាយាមសម្របសម្រួលបញ្ហានេះដោយចំនួនជនល្មើសដែលត្រូវបញ្ជូនទៅតុលាការមានតិចបំផុត៖ «យើងធ្វើរបាយការណ៍ យើងធ្វើការសន្មត់ផ្អែកលើរបាយការណ៍ក្នុងចំណោមមួយពាន់នាក់ជាង យើងធ្វើការអប់រំប៉ុន្មានរយនាក់ ពិន័យអន្តរការប៉ុន្មាន បញ្ជូនទៅ ( តុលាការ ) ប៉ុន្មាននាក់ អញ្ចឹងយើងមើលទៅកម្រិតនៃការបញ្ជូនគឺទាបមែនទែន»។
ដោយឡែកចំពោះករណីញុះញង់អ្នកនាំពាក្យនគរបាលរាជធានីភ្នំពេញរូបនេះឱ្យដឹងថាចាប់តាំងពីមានបញ្ហាជំងឺកូវីដពីខែមករា មកដល់ពេលនេះ សមត្ថកិច្ចក្រុងភ្នំពេញឃាត់ខ្លួនមនុស្ស ៤នាក់ទៅតុលាការក្នុងនោះពីរនាក់ពាក់ព័ន្ធការញុះញង់តាមបណ្ដាញសង្គមទីកតុក (TikTok) និងពីរនាក់ទៀតញុះញង់រឿងចាក់វ៉ាក់សាំង។
រីឯនាយករងទទួលបន្ទុកផ្នែកឃ្លាំមើលនៃសិទ្ធិមនុស្ស លីកាដូ លោក អំ សំអាតយល់ថាវិធានការទប់ស្កាត់ជំងឺកូវីដជាកិច្ចការដែលរដ្ឋាភិបាលកំពុងប្រឹងប្រែង ប៉ុន្តែលោកសង្កេតឃើញថាពលរដ្ឋមួយចំនួនមិនទាន់ទទួលបានព័ត៌មានច្បាស់លាស់ ឬពេញលេញពីអាជ្ញាធរនៅឡើយ។លោកបន្តថាផ្អែកលើតួលេខមនុស្សជាង ១ពាន់នាក់ ដែលល្មើសបម្រាមនេះបញ្ជាក់ថាពលរដ្ឋភាគច្រើនមិនទាន់យល់ឬដឹងពីវិធានការនេះនៅឡើយ។មន្ត្រីសង្គមស៊ីវិលរូបនេះជំរុញទៅអាជ្ញាធរព្យាយាមផ្សព្វផ្សាយច្បាប់កូវីដនិងវិធានការរបស់អាជ្ញាធរដល់ឱ្យពលរដ្ឋឱ្យបានទូលំទូលាយ៖ « អ្វីដែលសំខាន់ជាងហ្នឹងគឺពលរដ្ឋត្រូវទទួលបានព័ត៌មានគ្រប់គ្រាន់ទី១ អំពីច្បាប់នៃកូវីដ ទី២ វិធានការរបស់រដ្ឋាភិបាលនានា ដើម្បីឱ្យគាត់ដឹងខ្លួននិងចូលរូមក្នុងការអនុវត្តដើម្បីកុំគាត់បំពាន់បម្រាម និងបំពាន់ច្បាប់មិនទាន់បានយល់ ប៉ុន្តែបើអ្នកដឹងហើយយល់ហើយបំពានការអនុវត្តគឺជារឿងត្រឹមត្រូវហើយ » ។
រដ្ឋាភិបាលលោក ហ៊ុន សែន បានបិទខ្ទប់រាជធានីភ្នំពេញនិងក្រុងតាខ្មៅនៃខេត្តកណ្ដាលយ៉ាងទាន់ហន់កាលពីថ្ងៃទី១៤ ខែមេសា រហូតដល់ថ្ងៃទី៥ ខែឧសភា ប៉ុន្តែរដ្ឋាភិបាល បានព្រមានរួចទៅហើយថា ការបិទខ្ទប់នេះ អាចបន្តថែមយូរថ្ងៃទៀត បើសិនស្ថានភាពចម្លងជំងឺកូវីដ-១៩ ក្នុងសហគមន៍មិនថមថយ។
អ្នកនាំពាក្យនគរបាលរាជធានីភ្នំពេញលោក សាន សុខសីហា ឱ្យដឹងថាទោះពេលនេះរាជធានីបញ្ចប់ការបិទខ្ទប់ប៉ុន្តែសមត្ថកិច្ចនៅតែអនុត្តបម្រាមគោចរណ៍ហាមធ្វើដំណើរពីម៉ោង៨យប់ដល់ម៉ោងបីភ្លឺហើយចាប់ពីថ្ងៃទី៦ ខែឧសភាគឺសមត្ថកិច្ចនៅតែបន្តផាកពិន័យលើអ្នកល្មើសបម្រាមគោចរណ៍។
អង្គការសង្គមស៊ីវិលជាតិ និងអន្តរជាតិរួមទាំងមេដឹកនាំបក្សប្រឆាំងផង បានរិះគន់វិធាននេះថា អាជ្ញាធររឹតត្បិតហួសហេតុ និងមិនបានឆ្លើយតបតាមតម្រូវការថវិកាស្បៀងអាហារបានគ្រប់គ្រាន់និងទាន់ពេលវេលា។
អ្នកនាំពាក្យសមាគមអាដហុកលោក ស៊ឹង សែនករុណា ចង់ឃើញសមត្ថកិច្ចគួរមានការយោគយល់ជាងនេះក្នុងស្ថានភាពពលរដ្ឋជួបការលំបាកបែបនេះ។ លោកសង្កេតឃើញថាពលរដ្ឋក្រីក្រមួយចំនួនដោយសារបញ្ហាជីវភាពក៏ប្រថុយប្រថានចេញរកលុយដែលធ្វើឲ្យល្មើសបម្រាមអាជ្ញាធរដូច្នេះលោកថា អាជ្ញាធរគួរត្រឹមអប់រំណែនាំពលរដ្ឋឬឱ្យធ្វើកិច្ចសន្យា៖ « យើងមិនចង់ឃើញចំណាត់ការណាដាត់ណាត់ពេកទេគួរតែពិនិត្យស្ថានការណ៍ប្រព្រឹត្តទាំងអស់ហ្នឹងហើយបន្ធូរបន្ថយទៅតាមស្ថានភាពរបស់ពួកគាត់ ( ពលរដ្ឋ ) ទៅព្រោះកុំឱ្យពួកគាត់រងទុក្ខដោយសារបញ្ហាកូវីដហើយមករងទុក្ខនូវចំណាត់ការវិធានការរដ្ឋបាលអាជ្ញាធរ » ។
ក្រោយផ្ទុះជំងឺកូវីដ១៩ កាលពីថ្ងៃទី២០ខែកុម្ភៈ ដែលជាការព្រឹត្តិការណ៍សហគមន៍លើកទី៣ រដ្ឋាភិបាល បានសម្រេចបិទរាជធានីភ្នំពេញនិងខេត្តមួយចំនួនក្នុងហេតុផលបង្ការកុំឱ្យមានការរីករាលដាលខ្លាំង។ក្នុងនោះរាជធានីភ្នំពេញអាជ្ញាធរបានរឹតត្បិតខ្លាំងនិងចេញវិធានការលើពលរដ្ឋជាបន្តបន្ទាប់ដោយក្រៅពីការឃាត់ខ្លួនពលរដ្ឋពិន័យពលរដ្ឋអាជ្ញាធរថែមទាំងប្រើរំពាត់ផ្ដៅដេញវាយពលរដ្ឋថែមទៀតផង។ទោះជាយ៉ាងណាមកទល់ពេលនេះស្ថានភាពជំងឺកូវីដហាក់មិនថយខ្លាំងនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។