មន្ត្រីសង្គមស៊ីវិលនិងពលរដ្ឋ អំពាវនាវឱ្យអាជ្ញាធរពាក់ព័ន្ធផ្តល់ជំនួយសង្គ្រោះបន្ទាន់ជូនពលរដ្ឋដែលរងគ្រោះដោយទឹកជំនន់ ក្នុងខេត្តបន្ទាយមានជ័យឱ្យបានគ្រប់ៗគ្នា។ ការលើកឡើងនេះ បន្ទាប់ពីទឹកជំនន់នៅតែបន្តហក់ឡើងខ្លាំងប៉ះពាល់ដល់ពលរដ្ឋរាប់ពាន់គ្រួសារ ក្នុងខេត្តជាប់ព្រំដែនថៃមួយនេះ ហើយអាជ្ញាធរមិនបានជួយពួកគាត់គ្រប់គ្នានៅឡើយ។
មន្ត្រីសង្គមស៊ីវិលនិងពលរដ្ឋដែលរងគ្រោះដោយទឹកជំនន់ ក្នុងខេត្តបន្ទាយមានជ័យឱ្យដឹងថា ជំនន់ទឹកភ្លៀង បូកផ្សំទឹកហូរច្រាលពីប្រទេសថៃធ្វើឱ្យទឹកជន់លិចផ្ទះសម្បែង និងស្រូវរបស់ពលរដ្ឋរាប់ពាន់គ្រួសារ អស់រយៈពេល១សប្តាហ៍មកហើយ។ ពួកគាត់អះអាងថា អាជ្ញាធរបានផ្តល់ស្បៀងអាហារ និងជួយសង្គ្រោះពលរដ្ឋ ខ្លះដែរ ប៉ុន្តែមានពលរដ្ឋមួយចំនួនរស់នៅសង្កាត់ប៉ោយប៉ែតត្អូញថា ពួកគាត់ពុំទាន់ទទួលបានជំនួយមនុស្សធម៌ ពីអាជ្ញាធរនៅឡើយទេ។
ពលរដ្ឋរងគ្រោះដោយទឹកជំនន់រស់នៅសង្កាត់ប៉ោយប៉ែតលោក បឿន រត្ន ឱ្យដឹងនៅថ្ងៃទី២៨ ខែកញ្ញានេះថា ពលរដ្ឋរាប់រយគ្រួសាររស់នៅសង្កាត់ប៉ោយប៉ែតកំពុងខ្វះខាតស្បៀងអាហារនៅមិនទាន់ឃើញមន្ត្រីរដ្ឋាភិបាលផ្តល់ជំនួយជូនដល់ពួកគាត់នៅឡើយទេ។ លោកថា វិបត្តិជំងឺកូវីដ-១៩ ធ្វើឱ្យពលរដ្ឋលំបាកវេទនា ហើយស្ថានភាពទឹកជំនន់នេះ នឹងកាន់តែធ្វើឱ្យពលរដ្ឋលំបាកវេទនាបន្ថែមទៀត៖ «និយាយទៅអត់ទាន់បានអីមួយបន្តិច សូម្បីអង្កមួយគ្រាប់។ និយាយទៅពិបាក បើនៅជួរខ្ញុំ ខ្លះគេគ្មានបានអីបន្តិច តែមានចំណុចខ្លះគេបានជំនួយ បើនិយាយទៅដូចនិយមបក្ខពួក ពិបាកដែរ»។
ចំណែកពលរដ្ឋម្នាក់ទៀតរស់នៅសង្កាត់ប៉ោយប៉ែតលោកស្រី ឈៀង សុភាព សង្កេតឃើញថា អាជ្ញាធរបានយកចិត្តទុកដាក់ជួយសង្គ្រោះពលរដ្ឋ និងសង់ជម្រកស្នាក់នៅបណ្ដោះអាសន្នជូនពលរដ្ឋរងគ្រោះជាច្រើនគ្រួសារ បានទាន់ពេលវេលា ល្អជាងឆ្នាំមុនៗ។ លោកស្រីថា ពលរដ្ឋរាប់រយគ្រួសារ ដែលជម្លៀសទៅកាន់ទីទួលសុវត្ថិភាព ភាគច្រើនទទួលជំនួយស្បៀងអាហារ និងសម្ភារៈផ្សេងៗ ពីអាជ្ញាធររដ្ឋ៖ «ប្រជាជនឡើងមកលើផ្លូវអាស៊ាន ឆ្នាំនេះឡើងមុនកំណត់ រាល់ដងឡើងខែ១០ តែឆ្នាំនេះ បែរជាខែ ៩ឡើងមក វាលិចមុន។ ឃើញគេជួយរហូត»។
ឆ្លើយតបរឿងនេះ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយអះអាងថា អាជ្ញាធរបានត្រៀមលក្ខណៈច្បាស់លាស់ ជួយសង្គ្រោះពលរដ្ឋឱ្យបានទាន់ពេល ដោយយកបទពិសោធន៍ឆ្នាំមុនៗជាមូលដ្ឋានក្នុងការសិក្សា និងកែលម្អចំណុចខ្វះខាត។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក ឃុន សុខា ប្រាប់វិទ្យុអាស៊ីសេរីនៅថ្ងៃទី២៨ ខែកញ្ញាថា ចំពោះកិច្ចអន្តរាគមន៍ជួយសង្គ្រោះពលរដ្ឋរងគ្រោះដោយទឹកជំនន់ អាជ្ញាធរបានអនុវត្តទាន់ពេលវេលា ដោយមានកងអន្តរាគមន៍រៀបចំរួចជាស្រេច រុករក និងសង្គ្រោះពលរដ្ឋដោយគ្មានពលរដ្ឋណាម្នាក់លំបាកនោះទេ។ លោកថា ទេសរដ្ឋមន្ត្រីលោក គន់ គីម កំពុងដឹកនាំកម្លាំងចុះជួយពលរដ្ឋដោយផ្ទាល់ និងណែនាំឱ្យមន្ត្រីជំនាញ សង់ជម្រកនៅទីទួលសុវត្ថិភាព និងផ្តល់ស្បៀងអាហារជូនពលរដ្ឋឱ្យទាន់ពេល៖ «អ្វីដែលយើងត្រៀម គឺយើងធ្វើការឆ្លើយតបទាន់ពេលអត់មានឱ្យពលរដ្ឋណាលំបាកអីទេ ? ម្នាក់ៗសុទ្ធតែយើងបានជួយបានទាន់ពេល បើសិនជាគាត់ជម្លៀសទៅទីទួលសុវត្ថិភាព ហើយយើងផ្តល់នូវអ្វីសេចក្តីត្រូវការចាំបាច់»។
អ្នកនាំពាក្យរូបនេះបន្ថែមថា រហូតមកទល់ពេលនេះមានពលរដ្ឋជាង ៥ពាន់គ្រួសារ ឬស្មើនឹងមនុស្សជាង ១ម៉ឺននាក់ រស់នៅក្នុងស្រុកចំនួន ៦ ក្នុងខេត្តបន្ទាយមានជ័យ កំពុងរងផលប៉ះពាល់ដោយគ្រោះទឹកជំនន់ និងបានជម្លៀសពលរដ្ឋជិត១ពាន់គ្រួសារ (៧៣៦) ទៅកាន់ទីទួលសុវត្ថិភាព។ លើសពីនេះ គ្រោះទឹកជំនន់នេះក៏បណ្តាលឱ្យប៉ះពាល់ស្រូវនិងដំណាំរួមផ្សំផ្សេងទៀត អស់ជាច្រើនពាន់ហិកតារទៀត។ លោកបញ្ជាក់ថា មន្ត្រីជំនាញកំពុងស្រង់ទិន្នន័យបន្ថែមទៀត នឹងបង្ហាញជាសាធារណៈនៅពេលក្រោយ។
ជុំវិញរឿងនេះ ប្រធានអង្គការពង្រឹងសេដ្ឋកិច្ចក្រៅប្រព័ន្ធកម្ពុជាលោក ឌិន ពុទ្ធី សង្កេតឃើញថា ស្ថានភាពទឹកជំនន់នេះ ពលរដ្ឋរស់នៅទីប្រជុំជនរងគ្រោះធ្ងន់ធ្ងរជាងពលរដ្ឋរស់នៅជនបទ ព្រោះទឹកលិចក្នុងក្រុង កខ្វក់ខ្លាំង និងមានក្លិនស្អុយ ប៉ះពាល់សុខភាពសាធារណៈ។ លោកថា គ្រោះមហន្តរាយនេះ ធ្វើឱ្យពលរដ្ឋរាប់រយគ្រួសាររស់នៅសង្កាត់ប៉ោយប៉ែតកាន់តែលំបាក និងខ្វះខាតស្បៀងអាហារ បន្ទាប់ពីជំងឺកូវីដ-១៩ ដែលទាមទារឱ្យអាជ្ញាធរបង្កើនការយកចិត្តទុកដាក់ជួយសង្គ្រោះពលរដ្ឋ៖ «នៅប៉ោយប៉ែតមានការលំបាកច្រើនដែរ អ្នកខ្លះលិចទឹកមួយសប្តាហ៍ហើយ វាអត់ទាន់មានជំនួយសង្គ្រោះបន្ទាន់ ពលរដ្ឋមួយចំនួន។ ទឹកជំនន់នរណាក៏ខ្វះស្បៀងអាហារដូចគ្នា ទាំងអស់គ្នាអ្នកនៅប៉ោយប៉ែត»។
ចំណែកមន្ត្រីសម្របសម្រួលសមាគមអាដហុកខេត្តបន្ទាយមានជ័យលោក ស៊ុំ ច័ន្ធគា វិញ លោកសង្កេតឃើញថា អាជ្ញាធរត្រៀមលក្ខណៈជួយសង្គ្រោះពលរដ្ឋបានល្អប្រសើរជាងឆ្នាំមុនៗ ប៉ុន្តែលោកថា ការអភិវឌ្ឍផ្លូវថ្នល់ ស្ថាបនាប្រព័ន្ធលូទឹក និងប្រឡាយទឹក របស់អាជ្ញាធរនៅខ្វះចន្លោះច្រើន ធ្វើឱ្យកកស្ទះទឹកជាច្រើនថ្ងៃ លិចលង់ផ្ទះសម្បែងពលរដ្ឋជាច្រើនខ្នង៖ «កន្លែងផ្លូវទឹកចេញវាអត់ទៅរួចវាតូចពេក ចង្អៀតពេក កន្លែងធ្លាប់ហូរ ត្រូវបានគេចាក់ដីលុបអស់ហើយ ធ្វើជាកម្មសិទ្ធិ។ យើងគិតថា ភ្នាក់ងាររបស់រដ្ឋគួរតែពិនិត្យ»។
របាយការណ៍បឋមរបស់គណៈកម្មាធិការជាតិគ្រប់គ្រងគ្រោះមហន្តរាយឱ្យដឹងថា គិតត្រឹមថ្ងៃទី២៨ ខែកញ្ញា ទឹកជំនន់នៅតែបន្តជន់លិចស្រុកចំនួន ៦ និងឃុំ/សង្កាត់ ៣០ ក្នុងខេត្តបន្ទាយមានជ័យអស់រយៈពេល១សប្តាហ៍មកហើយ។ លើសពីនេះ ទឹកលិចសាលារៀនចំនួន ២៨កន្លែង វត្តអារាម ១០កន្លែង ទឹកហូរកាត់ផ្លូវជិត៣រយ (២៩៦)កន្លែង និងមានមនុស្ស២នាក់ហើយ បានលង់ទឹកស្លាប់។ ទន្ទឹមនឹងនេះ ខេត្តមួយចំនួនទៀតក៏កំពុងរងផលប៉ះពាល់ដោយទឹកជំនន់ដែរ រួមមាន ខេត្តបាត់ដំបង ក្រចេះ ស្ទឹងត្រែង និងខេត្តកំពង់ឆ្នាំងជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។