សង្គម​ស៊ីវិល​ស្នើ​ក្រសួង​មុខងារ​សាធារណៈ​លុបចោល​លក្ខខ័ណ្ឌ​តម្រូវ​ឱ្យ​បេក្ខជន​ប្រឡង​ក្របខណ្ឌ​មន្រ្តី​រាជការ​ចាក់​វ៉ាក់សាំង​​កូវីដ-១៩​ឱ្យគ្រប់ចំនួន​២ដូស

ដោយ សុជីវី
2021-05-13
Share
សង្គម​ស៊ីវិល​ស្នើ​ក្រសួង​មុខងារ​សាធារណៈ​លុបចោល​លក្ខខ័ណ្ឌ​តម្រូវ​ឱ្យ​បេក្ខជន​ប្រឡង​ក្របខណ្ឌ​មន្រ្តី​រាជការ​ចាក់​វ៉ាក់សាំង​​កូវីដ-១៩​ឱ្យគ្រប់ចំនួន​២ដូស វ៉ាក់សាំងចិនឈ្មោះ Sinopharm ដែលនឹងត្រូវចាក់លើកម្មករកម្ពុជារាប់ម៉ឺននាក់ ដើម្បីបង្ការឆ្លងពីជំងឺកូវីដ១៩។
រូប៖ គេ​ផ្ដល់​ឱ្យ

ក្រុមអង្គការ សមាគម និង​សហជីព​មួយចំនួន​មើលឃើញ​ថា លក្ខខ័ណ្ឌ​តម្រូវ​ឱ្យបេក្ខជន​ចាក់វ៉ាក់សាំង​ជំងឺកូវីដ-១៩ កំពុង​ធ្វើ​ឱ្យ​យុវជន​ជាច្រើន​បាត់បង់​ឱកាស​ចូលរួម​ប្រកួតប្រជែង​ធ្វើជា​មន្រ្តី​រាជការ​នៅ​ក្នុងកាលៈទេសៈ ដែលពលរដ្ឋ​ពិបាក​ទទួល​បាន​វ៉ាក់សាំង​បាន​គ្រប់ៗ​គ្នា និង​មាន​ពលរដ្ឋ​ជាច្រើន​មិន​សូវមាន​ជំនឿ​ចិត្ត​នឹងការ​ចាក់​វ៉ាក់សាំង​នៅ​ឡើយ។

ការលើកឡើង​នេះ​បន្ទាប់​ពី​ក្រសួង​មុខងារ​សាធារណៈ​បាន​តម្រូវ​ឱ្យ​បេក្ខជន ដែល​បានដាក់ពាក្យ​ស្នើ​សុំ​សិទ្ធិ​ប្រឡង​​ចូលបម្រើ​ការងារ​ក្នុង​ក្របខណ្ឌ​ក្រសួង ស្ថាប័នរដ្ឋ ចំនួន​ ៦ រួម​មាន ក្រសួង​មុខងារ​សាធារណៈ ក្រសួង​ទំនាក់ទំនង​ជាមួយ​រដ្ឋសភា-ព្រឹទ្ធសភា និង​អធិការកិច្ច ក្រសួង​កសិកម្ម ក្រសួង​ពាណិជ្ជកម្ម ក្រសួង​ធនធានទឹក និង​ឧតុនិយម និង​រដ្ឋលេខធិការដ្ឋាន​អាកាសចរ​ស៊ីវិល ត្រូវ​ទៅចាក់វ៉ាក់សាំង​ជំងឺកូវីដ-១៩​ចំនួន២ដង ​រួចរាល់ជាមុនសិន។ ក្រសួង​ដដែល​បញ្ជាក់​ថា ចំពោះ​បេក្ខជន​ណា ដែល​មិន​បំពេញ​លក្ខខ័ណ្ឌ​នេះ ឬ​ពុំមាន​លិខិតបញ្ជាក់​ពី​មន្ទីរ​សុខាភិបាល​ពី​ករណី​ដែល​មិនអាច​ចាក់​វ៉ាក់សាំង​បាន​ទេ នឹង​ពុំត្រូវ​អនុញ្ញាត​ឱ្យ​ចូលរួម​ប្រឡងឡើយ។

ប្រធាន​សមាគម​បណ្ដាញ​យុវជន​កម្ពុជាលោក អ៊ុល វ៉ាន់ ថ្លែង​ប្រាប់​អាស៊ីសេរី​ថា មក​ដល់ពេល​នេះ​មាន​ពលរដ្ឋ​ភាគតិច​ណាស់ ដែល​បាន​ចាក់វ៉ាក់សាំង​គ្រប់ចំនួន​២លើក បើប្រៀបធៀបនឹង​ចំនួន​ពលរដ្ឋ​សរុប​នៅ​ទូទាំង​ប្រទេស។ លោក​បន្ត​ថា​ បើ​ផ្អែក​តាម​ផែនការរបស់​រដ្ឋាភិបាល​ការចាក់វ៉ាក់សាំង​នឹង​ត្រូវ​ផ្ដល់​អាទិភាព​ទៅ​ពលរដ្ឋ​ក្នុង​តំបន់​បិទខ្ទប់ ដែល​ជាហេតុផល​ធ្វើ​អោយ​ពលរដ្ឋ​នៅ​ក្រៅ​តំបន់​នេះ​អាច​នឹង​ពិបាក​ទទួល​បាន​វ៉ាក់សាំង ស្របពេល​ដែល​ការចាក់វ៉ាក់សាំង​នេះ​​ឈរ​នៅ​លើ​គោលការណ៍​ស្ម័គ្រចិត្ត។ លោក​ថា ​លក្ខខ័ណ្ឌ​របស់​ក្រសួង​មុខងារ​សាធារណៈនេះ ​ប៉ះពាល់​ទៅ​ដល់សិទ្ធិ​ពលរដ្ឋ និង​ដំណើរការ​ជ្រើសរើស​ធនធាន​មនុស្ស​ឱ្យ​បាន​ចូលរួម​ប្រកួតប្រជែង​ដោយសេរី តម្លាភាព សមភាព គណនេយ្យភាព និង​យុត្តិធម៌៖ «យើងចង់អោយ​ការប្រឡង​ចូលរួម​ជាមន្រ្តី​រាជការ​ហ្នឹង​គឺផ្ដល់ឱកាសស្មើគ្នា ហើយ​នឹង​ផ្ដល់​សិទ្ធិ ឬក៏សេរីភាព​អោយបានស្មើគ្នា​សម្រាប់​ពលរដ្ឋ​ទូទៅ សម្រាប់​យុវជនទូទៅ បើទោះបីជាគាត់​មិនទាន់​ទទួល​បានវ៉ាក់សាំង​ក៏ដោយ​ ក៏គាត់គួរបាន​ការប្រកួត​ប្រជែង​ ទទួល​បាន​មុខងារ​ តួនាទីសាធារណៈ ដើម្បី​បម្រើ​ដល់​ប្រយោជន៍​សង្គម​ជាតិ។ ការដាក់លក្ខខ័ណ្ឌ​មិនផ្ដល់សិទ្ធិឱ្យ​យុវជន​​មិនទាន់ទទួលបាន​វ៉ាក់សាំង​ហ្នឹងវាជាការរឹតរ្បិត​ដល់សេរីភាព​​ក្នុង​ការទទួល​បាន​នូវ​ឱកាស​ការងារ និង​ការប្រកួតប្រជែង។ រដ្ឋាភិបាល​មិន​បាន​គោរព​គោលការណ៍​សេរីភាព និង​គោលការណ៍​ចូលរួមប្រកួតប្រជែង​នៅក្នុង​មុខងារ​ជាមន្រ្តី​រាជការ​សាធារណៈហ្នឹង​បាទ»។

អាស៊ីសេរី​មិន​អាច​សុំ​ការឆ្លើយ​តប​រឿង​នេះ​ពី​អ្នកនាំពាក្យ​ក្រសួង​មុខងារ​សាធារណៈលោក ឈឿន ប៊ុណ្ណារ័ត្ន បាន​ទេ​នៅយប់​ថ្ងៃទី១៣ ខែឧសភា ដោយទូរស័ព្ទ​គ្មាន​អ្នកទទួល។

តែទោះជាយ៉ាងណា អនុប្រធាន​គណៈកម្មាធិការ​សិទ្ធិមនុស្ស​រដ្ឋាភិបាល លោក ជិន ម៉ាលីន បាន​សរសេរ​នៅលើ​ហ្វេសប៊ុក ​​(Facebook) ថា អាជ្ញាធរ​សាធារណៈ អាច​កំណត់​នូវ​លក្ខខណ្ឌ​មួយ​ចំនួន​បាន​ក្នុង​ការជ្រើសរើស​មន្រ្តី ដូចជា​លក្ខខណ្ឌ​អាយុ បទពិសោធន៍ សញ្ញាបត្រ ពិរុទ្ធភាព និង​ការចាក់វ៉ាក់សាំង ជាដើម ដើម្បី​ធានា​បាន​នូវ​គុណភាព ប្រសិទ្ធិភាព និង​សុវត្ថិភាព​របស់​ស្ថាប័ន ដែល​ការកំណត់​នេះ​មិនមែន​ជា​ការរំលោភបំពាន​សិទ្ធិ​ស្មើភាព​គ្នា​ចំពោះ​មុខច្បាប់​នោះ​ទេ តែ​គឺ​ដោយសារ​ប្រយោជន៍​សាធារណៈ ពិសេស​ដើម្បី​ទប់ស្កាត់​ការឆ្លង​រាលដាល​ជំងឺ​កូវីដ-១៩។ លោកបន្ថែម​ថា​សិទ្ធិ​ស្មើភាព​គ្នា​ចំពោះ​មុខ​ច្បាប់​មិនមែន​មាន​ន័យ​ថា ពលរដ្ឋ​ត្រូវ​ទទួល​បាន​នូវ​លក្ខខណ្ឌ​ដូចគ្នា​ទាំងអស់​ពី​រដ្ឋ​នៅ​គ្រប់​ករណី និង​គ្រប់​កាលៈទេសៈ​នោះទេ គឺ​អាច​មាន​ការលើកលែង​ក្នុង​ស្ថានភាព​ចាំបាច់។

យ៉ាងនេះ​ក្ដី​សម្រាប់​ក្រុមអង្គការ​សង្គម​ស៊ីវិល​វិញ​ការដាក់​លក្ខខណ្ឌ​ក្នុង​ស្ថានភាព​នេះ​គឺបង្កការលំបាក​ដល់​យុវជន ធ្វើអោយ​ការប្រកួតប្រជែង​ពុំមាន​តម្លាភាព ប្រសិទ្ធិភាព យុត្តិធម៌ និង​បង្កើត​អោយ​មាន​វិប្បដិសារី ដោយសារតែ​បេក្ខជន ដែល​មាន​សមត្ថភាព​ពិតប្រាកដ​មិន​បាន​ចូលរួម​​ប្រឡង​ធ្វើ​ជាមន្រ្តីរាជការ​ដោយសារតែមិនបាន​ចាក់វ៉ាក់សាំង​គ្រប់ចំនួន។ ជាមួយគ្នានេះ​ធ្វើអោយ​ស្ថាប័នរដ្ឋ​បាត់បង់ឱកាស​ទទួល​បាន​ធនធានមនុស្ស​ប្រកប​ដោយ​គុណភាព​សម្រាប់​ចូលរួម​ពង្រឹង​សេវាសាធារណៈ និង​អភិវឌ្ឍន៍​សង្គម​ជាតិ។

ក្រសួងសុខាភិបាល​ឱ្យដឹង​ថា​ ត្រឹមថ្ងៃទី១៣ ខែឧសភា មាន​ពលរដ្ឋដែល​ស្ម័គ្រ​ចិត្ត​ចាក់វ៉ាក់សាំង​ជំងឺកូវីដ-១៩ បានចំនួន​ជាង​ ២ លាននាក់ (២ ០៦៤ ៨៣៣) ក្នុង​នោះ​អ្នកចាក់​បាន​ពីរ​ដូស មាន​ចំនួន​ជាង​ ១លាន​១សែន​នាក់ ( ១ ១៣៥ ៩១១) គឺស្មើ​នឹង​ចំនួន​ជិត​ ២០%​ (១៩,៩៧%) នៃ​ចំនួន​ពលរដ្ឋ​ជា​គោលដៅ​សម្រាប់​ចាក់​វ៉ាក់សាំង​សរុប​១០លាន​នាក់ ដែល​រដ្ឋាភិបាលបាន​គ្រោងទុក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល