មន្ត្រីសង្គមស៊ីវិលជំរុញឱ្យក្រសួងអប់រំ យុវជន និងកីឡា បកស្រាយចំពោះការលុបឈ្មោះគរុសិស្សចេញពីវិទ្យាស្ថានអប់រំកាយ និងកីឡា ជាជាងបន្តប្រើអំពើហិង្សាបញ្ឈប់សកម្មភាពតវ៉ាទាមទារយុត្តិធម៌របស់អតីតគរុសិស្ស។ អតីតគរុសិស្សលើកឡើងថា បើទោះបីជាមានការគំរាមកំហែងរបស់អាជ្ញាធរក្ដី ក៏លោកនៅតែទាមទាររកយុត្តិធម៌ ចំពោះការលុបឈ្មោះចេញពីវិទ្យាស្ថានជាតិអប់រំកាយ និងកីឡា។
សមត្ថកិច្ចខណ្ឌដូនពេញបានប្រើអំពើហិង្សាដោយវាយដំទៅលើអតីតគរុសិស្សម្នាក់ គឺលោក កែវ សុវណ្ណឫទ្ធិ និងមិត្តភ័ក្តិលោក លាភ ប្រាថ្នា នៅពេលពួកគេតវ៉ាសុំឲ្យក្រសួងអប់រំដោះលែងបញ្ហានៃការបណ្តេញពីវិទ្យាស្ថានជាតិអប់រំកាយ។ លោក កែវ សុវណ្ណឫទ្ធិ តវ៉ាដោយសារតែវិទ្យាស្ថានជាតិអប់រំកាយ ធ្លាប់បានវាស់កម្ពស់ឃើញថា លោកមានកម្ពស់ត្រឹមតែ១ម៉ែត្រ៦២ (១៦២ សង់ទីម៉ែត្រ) ប៉ុន្តែបានអនុញ្ញាតឱ្យចូលរៀនកំឡុងខែវិច្ឆិកា ដល់ខែធ្នូ ឆ្នាំ២០២១ ទោះបីស្ដង់ដារតម្រូវឱ្យមានកម្ពស់១ម៉ែត្រ៦៥ (១៦៥ សង់ទីម៉ែត្រ) យ៉ាងតិចក៏ដោយ។ ប៉ុន្តែបន្ទាប់ពីលោកបានចូលរួមសម្ដែង ការសម្ពោធកីឡដ្ឋានមរតកតេជោរួចរាល់ វិទ្យាស្ថានជាតិអប់រំកាយ បែរជាលុបឈ្មោះលោកចេញពីវិទ្យាស្ថានវិញ ដោយសារយកមូលហេតុថា ខ្វះកម្ពស់ទៅវិញ។
វីដេអូដែលត្រូវគេផ្សព្វផ្សាយតៗគ្នាជាច្រើននៅលើបណ្ដាញសង្គមហ្វេសប៊ុក កាលពីថ្ងៃទី២១ ខែសីហា បានបង្ហាញសកម្មភាពរបស់កម្លាំងសមត្ថកិច្ចខណ្ឌដូនពេញជិត ១០នាក់ បានវាយនិងចាប់បង្ខំឱ្យយុវជន៣នាក់ឱ្យចូលទៅក្នុងរថយន្ត នៅខាងមុខការិយាល័យក្រសួងអប់រំយុវជន និងកីឡា។ ទោះជាយ៉ាងណាគេឃើញយុវជនម្នាក់បានរើបម្រះខ្លួនរួច និងរត់គេចចេញពីការឃាត់ខ្លួននេះ។
លោក កែវ សុវណ្ណឫទ្ធិ ប្រាប់វិទ្យុអាស៊ីសេរីថា លោក និងមិត្តភ័ក្ដិរបស់លោកម្នាក់ទៀតគីលោក លាភ ប្រាថ្នា នៅតែឈឺចាប់ត្រង់កន្លែងសមត្ថកិច្ចបានវាយ។ លោកបន្ថែមថា សមត្ថកិច្ចបានទាត់ធាក់លោកចំចុងដង្ហើម និងបានយកដៃលូកឆ្កឹះឆ្អឹងជំនីរបស់លោក ចំណែកឯមិត្តភ័ក្ដិរបស់លោកត្រូវបានសមត្ថកិច្ចវាយមួយទំហឹងដៃចំលលាដ៏ក្បាលខាងក្រោយ បណ្ដាលឱ្យដួលសន្លប់ភ្លាមៗ។ ទោះជាយ៉ាងណា អធិការនគរបាលខណ្ឌដូនពេញបានដោះលែងលោក និងមិត្តភ័ក្ដិរបស់លោកឱ្យមានសេរីភាពនៅថ្ងៃដដែល។
លោក កែវ សុវណ្ណឫទ្ធិ បន្ថែមថា ការទាមទារឱ្យក្រសួងអប់រំយុវជន និងកីឡា បកស្រាយឱ្យបានច្បាស់លាស់ចំពោះការលុបឈ្មោះគាត់ចេញពីវិទ្យាស្ថានជាតិអប់រំកាយ និងកីឡានេះ មិនមានគោលបំណងធ្វើឱ្យប៉ះពាល់ទៅដល់ក្រសួងអប់រំនោះឡើយ គឺលោកធ្វើឡើងក្នុងគោលបំណងស្វែងរកយុត្តិធម៌សម្រាប់ខ្លួនឯងតែប៉ុណ្ណោះ។
ពាក់ព័ន្ធនឹងរឿងនេះ សមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី មានប្រសាសន៍ថា ការលុបឈ្មោះគរុសិស្សចេញពីក្របខណ្ឌនៃវិទ្យាស្ថានជាតិអប់រំកាយ និងកីឡា មិនត្រឹមតែធ្វើឱ្យក្រុមយុវជនខាតបង់ថវិកា និងពេលវេលាតែប៉ុណ្ណោះ តែក៏ធ្វើក្រុមយុវជនប៉ះទង្គិចផ្លូវចិត្តធ្ងន់ធ្ងរផងដែរ។ អ្នកស្រីបន្ថែមថា ដើម្បីបង្ហាញអំពីតម្លាភាពក្នុងការជ្រើសរើសគរុសិស្សឱ្យចូលរៀននៅវិទ្យាស្ថានជាតិអប់រំកាយ និងកីឡា ក្រសួងអប់រំយុវជន និងកីឡា គួរបកស្រាយឱ្យបានច្បាស់ចំពោះការអនុញ្ញាតឱ្យគរុសិស្សមួយចំនួន ដែលលើសអាយុ និងបានរៀបការរួចឱ្យនៅបន្តសិក្សា ខណៈគរុសិស្សដែលខ្វះកម្ពស់ត្រូវបានក្រសួងបណ្ដេញចេញមិនឱ្យបន្តការសិក្សា។ «»
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងអប់រំយុវជន និងកីឡា លោក រស់ សុវាចា ដើម្បីបកស្រាយជុំវិញរឿងនេះបាននៅឡើយទេ កាលពីថ្ងៃទី២៣ ខែសីហា។
លោក កែវ សុវណ្ណឫទ្ធិ បញ្ជាក់បន្ថែមថា លោកនឹងបន្តតវ៉ាដោយមិនបញ្ឈប់ឡើយ ដ៏រាបណាក្រសួងអប់រំយុវជន និងកីឡា នៅតែមិនផ្ដល់យុត្តិធម៌ចំពោះរូបលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។