មន្រ្តី​សង្គមស៊ីវិល​​ចង់​ឃើញ​​អាជ្ញាធរ​​អនុវត្ត​ច្បាប់​​តឹងរ៉ឹង​​លើ​​ជនបរទេស​​ល្មើស​​ច្បាប់​នៅ​​កម្ពុជា​

ដោយ សេក បណ្ឌិត
2022.08.14
Share on WhatsApp
Share on WhatsApp
មន្រ្តី​សង្គមស៊ីវិល​​ចង់​ឃើញ​​អាជ្ញាធរ​​អនុវត្ត​ច្បាប់​​តឹងរ៉ឹង​​លើ​​ជនបរទេស​​ល្មើស​​ច្បាប់​នៅ​​កម្ពុជា​ រូបសំណាកសត្វខ្លានៅរង្វង់មូលខេត្តព្រះសីហនុនាពេលរាត្រី។
រូប៖ រដ្ឋបាលខេត្តព្រះសីហនុ

មន្រ្តី​សង្គម​ស៊ីវិល​ ស្នើ​ដល់​​អាជ្ញាធរ​រដ្ឋាភិបាល​​ឱ្យ​ពង្រឹង​យន្តការ​ទប់ស្កាត់​ជនបរទេស ​ពិសេស​គឺ​ជនជាតិចិន​ដែល​ពួកគេ​តែងតែ​ប្រព្រឹត្ត​បទល្មើស​នៅ​កម្ពុជា​។ ការ​ស្នើ​នេះ​ ធ្វើ​ឡើង​បន្ទាប់​ពី​វត្តមាន​ជនជាតិ​ចិន​មួយ​ចំនួន​នៅ​លើ​ទឹកដីខ្មែរ​បាន​បង្ក​អសន្តិសុខ​ក្នុង​សង្គម​តាម​រយៈការ​សម្លាប់​មនុស្ស ​រត់​ពន្ធ​ថ្នាំ​ញៀន​ និង​ចាប់​បង្ខាំង​​មនុស្ស​ធ្វើ​ទារុណកម្ម​ជម្រិត​ទារ​ប្រាក់​ជាដើម។

ក្រោយ​ពី​លំហូរ​ចូល​នៃ​វត្តមាន​ជនជាតិ​ចិន​ដ៏​ច្រើនលើស​លប់​ចូល​មក​បើក​ជំនួញ​អាជីវកម្ម​ក្នុង​ខេត្ត​ព្រះសីហនុ ​អំពើឃាតកម្ម​បាញ់​សម្លាប់​មនុស្ស​ និង​បញ្ហា​អសន្តិសុខ​សង្គម​ជាច្រើន​ដែល​ភាគច្រើន​បង្ក​ឡើង​ដោយ​ជនជាតិចិន​បាន​បន្ត​កើត​មាន​ឡើង​ជា​បន្ត​បន្ទាប់​។

មន្រ្តី​សម្របសម្រួល​សមាគម​ការពារ​សិទ្ធិ​មនុស្ស​អាដហុក​ (ADHOC) ប្រចាំ​ខេត្ត​ព្រះសីហនុ ​អ្នកស្រី ជៀប សុធារី ​ប្រាប់​វិទ្យុ​អាស៊ីសេរី​នៅ​ថ្ងៃ​ទី១៤​ ខែសីហា​ថា​ ទីក្រុង​ព្រះសីហនុ​ដំបូង​ឡើយ​ប្រជាពលរដ្ឋ​រស់​នៅ​សុខុដមរម្យនា​ ថ្វីដ្បិត​តែ​គ្មាន​អគារ​ទីក្រុង​រណប​ដូច​ពេល​បច្ចុប្បន្ន​យ៉ាង​ណា​ក្ដី។ ប៉ុន្តែ​ អ្នកស្រី​ថា​ ក្រោយ​ពី​រដ្ឋាភិបាល​បាន​បើក​ចំហ​ឱ្យ​ជនបរទេស​ ជាពិសេស​ជនជាតិចិន​ចូល​មក​វិនិយោគ​នៅ​ក្រុង​ព្រះសីហនុ​ច្រើន​លើសលប់​ កើត​មាន​បទល្មើស ​និង​ឧក្រិដ្ឋកម្ម​នានា​ដែល​មិន​ធ្លាប់​កើត​មិន​មុន​មក​នោះ ​ពេល​នេះ​កំពុង​កើត​ឡើង​ជា​បន្ត​បន្ទាប់​។

អ្នកស្រី ជៀប សុធារី​ ថា​ ជនជាតិ​ចិន​ដែល​ប្រព្រឹត្ត​បទល្មើស​ក្នុង​ខេត្ត​ព្រះសីហនុ​ភាគច្រើន ​គឺ​ទាក់ទង​នឹង​បញ្ហា​ជំពាក់​បំណុល។ អ្នកស្រី​ លើកឡើង​បន្ត​ថា​ បញ្ហា​ជំពាក់​បំណុល​នេះ ​គឺ​ដោយសារ​ជនជាតិ​ចិន​នៅតែ​មាន​ភ្នាល់​ល្បែង​តាម​អនឡាញ (​Online) ខុស​ច្បាប់ ​នៅ​តាម​អគារ​សហគ្រាស​មួយ​ចំនួន​ក្នុង​ខេត្ត​ព្រះសីហនុ​ ទោះ​បី​ជារដ្ឋាភិបាល​បាន​ប្រកាស​បិទ​បនល្បែង​ប្រភេទ​នេះ​កាល​ពី​ឆ្នាំ២០១៩ក្ដី​។ អ្នក​ស្រី​បន្ត​ទៀត​ថា​ ដោយសារ​តែ​វិស័យបនល្បែង​ខុសច្បាប់​ក្នុង​ខេត្តព្រះសីហនុ​នៅតែ​បន្ត​ដំណើរ​ការ​បែប​នេះ​ហើយ​ ទើប​ធ្វើ​ឱ្យ​ជនជាតិ​ចិន​មួយ​ចំនួន​ហ៊ាន​ប្រព្រឹត្ត​បទល្មើស​គ្រប់បែប​យ៉ាង ​រាប់​ទាំង​ការ​សម្លាប់​មនុស្ស​ និង​ការ​ចាប់​ជម្រិត​ទារ​ប្រាក់​ជា​ផ្នូរ​នឹង​ដោះលែង​ជនរង​គ្រោះ​ជា​ដើម​៖ «ប៉ុន្តែ​ អ្វី​ដែល​យើង​ព្រួយបារម្ភ​ថា ​ការ​ជម្រាប​ជូន​អំពី​លទ្ធផល​នៃ​ការ​ធ្វើ​សវនាការ​ និង​ការ​សម្រេច​ផ្តន្ទាទោស​កម្រិត​សាលា​ដំបូង​ថ្នាក់​ខេត្ត​ព្រះសីហនុ​នេះ ​តើ​ប្រទេស​កម្ពុជា​សមត្ថកិច្ច​តុលាការ​ហ្នឹង​ លោក​ផ្ដន្ទាទោស ​[ក្រុម​ឧក្រិដ្ឋជន] ​ដល់​កម្រិត​ណាព្រោះ​យើង​ចង់​ឱ្យ​ជន​ដែល​ប្រព្រឹត្ត​បទល្មើស ​គាត់​បាន​ទទួល​ទោស ​ដើម្បី​ជា​ការ​ព្រមាន​ កុំ​ឱ្យ​បង្ក​បញ្ហា​ទាំង​អស់​កើត​មាន​ឡើង​ទៀត​»

វិទ្យុ​អាស៊ីសេរី​មិន​ទាន់​អាច​ទាក់ទង​ស្នងការ​នគរបាល​ខេត្ត​ព្រះសីហនុ ​លោក ជួន ណារិន្ទ ​ដើម្បី​សាក​សួរ​បញ្ជាក់​ពី​បញ្ហា​នេះ​បាន​ទេ​នៅ​ថ្ងៃ​ទី១៤​ ខែ​សីហា។ ប៉ុន្តែ​ លោក​ធ្លាប់​ប្រាប់​វិទ្យុអាស៊ីសេរី​ថា​ បទល្មើស​នានា​ក្នុង​ខេត្ត​ព្រះសីហនុ​មិន​មែន​ជា​រឿងគួរ​ឱ្យ​ព្រួយ​បារម្ភ​ឡើយ​ ដោយ​សារ​តែ​សមត្ថកិច្ច​ជំនាញ​បង្ក្រាប​ក្រុមជនល្មើស​បាន​ជា​បន្ត​បន្ទាប់។

លោក ជួន ណារិន្ទ ​ទទួលស្គាល់​ថា​ ជនជាតិចិន​មួយ​ចំនួន​បាន​លួច​ប្រើប្រាស់​អាវុធខុស​ច្បាប់​ប្រព្រឹត្ត​បទល្មើស​លើ​ទឹក​ដី​ខ្មែរ។ លោក​អះអាង​ថា​ សមត្ថកិច្ច​ក៏​កំពុង​បន្ត​ការ​ស៊ើបអង្កេត​រក​អ្នក​ដែល​ពាក់ព័ន្ធ​លើ​ករណី​ជួញដូរ​អាវុធ​នេះ​ ដើម្បី​យក​អនុវត្ត​តាម​ផ្លូវ​ច្បាប់​៖ «អ្នកណា​ក៏​ដោយ​មិន​មែន​តែ​ថា​ ជនជាតិ​ចិន​ទេ​ ជន​ជាតិ​ណា​ដែល​បាន​ប្រើ​អាវុធ​ ខុស​ច្បាប់​ កាន់កាប់​ដោយ​ខុស​ច្បាប់ ​អនុវត្ត​ដោយ​ច្បាប់​ដែល​យើង​មាន​ មិន​លើក​លែង​ទេ»

ទោះ​បី​ជា​យ៉ាង​ណា ​អ្នក​ឃ្លាំមើល​ថា​ ការ​អះអាង​របស់​ស្នងការ​នគរបាល​ខេត្ត​ព្រះសីហនុ​រូប​នេះ​ ហាក់​មិន​ទាន់​មាន​ឆន្ទៈ​គ្រប់គ្រាន់​ក្នុងការ​ចាត់វិធានការ​ទប់ស្កាត់​ជនបរទេស​ប្រព្រឹត្ត​បទល្មើស​ ជា​ពិសេសជនជាតិចិន​ប្រើប្រាស់​កាំភ្លើង​បាញ់​សម្លាប់​មនុស្សនៅ​លើ​ទឹក​ដី​ខ្មែរ​នេះ ​ឱ្យ​មាន​ប្រសិទ្ធិភាព​នៅ​ឡើយ​។

កាល​ពី​យប់​ថ្ងៃទី​១៥ ខែ​មិថុនា ក្រុម​ឧក្រិដ្ឋជន​​ជនជាតិ​ចិន​ និង​វៀតណាម​​មាន​គ្នា​ជាង ១០នាក់​ បាន​ទាស់​ពាក្យ​សម្តី​ជាមួយ​អ្នក​រត់ម៉ូតូ​កង់​បី​ម្នាក់​ដែល​ជនជាតិ​ខ្មែរ​ និង​បាន​ដក​កាំភ្លើង​បាញ់​ភ្ជង់​អ្នក​រត់កង់​បី​រូប​នោះ ដែល​ស្ថិត​ក្នុង​ខេត្ត​ព្រះសីហនុ។ ភ្លាមៗ​ក្រោយ​កើត​ហេតុក្រុមឧក្រិដ្ឋជន​ទាំងនោះ​បាន​ដកកាំភ្លើង​បាញ់​រះ​មក​លើ​ក្រុម​សមត្ថកិច្ច​ពេល​ចុះ​បង្ក្រាប​ ដែល​បណ្តាល​ឱ្យ​សមត្ថកិច្ច​ម្នាក់​រង​របួស​ធ្ងន់​ទៀត​ផង។

ដោយឡែក​ កាល​ពី​យប់​ថ្ងៃទី​៣០ ​ខែកក្កដា ​ជនជាតិ​ចិន​មួយក្រុម​មាន​គ្នាប្រមាណ​ជាង ​១០​នាក់បាន​ឈ្លោះ​ទាស់ទែង​គ្នា​រឿង​អាជីវកម្ម​ពួកគេ​ ដែល​បណ្តាល​ឱ្យ​ខ្មាន់​កាំភ្លើង​ជនជាតិចិន​ម្នាក់​ដក​កាំភ្លើង​សម្លាញ់​ជនជាតិ​ចិន​ដូចគ្នា។ អំពើ​ឃាតកម្ម​នេះ​ បណ្តាល​ឱ្យ​ជនជាតិ​ចិន​២​នាក់​បាន​ស្លាប់​ភ្លាមៗ ​នៅក្នុង​ថ្លុកឈាម ​និង​ជនជាតិ​ចិន​ម្នាក់​បាន​រងរបួស​ធ្ងន់ ​ស្ថិតនៅ​ទីតាំង​អគារ​បន​ល្បែង​កាស៊ីណូ តុង​ ហ្វា​ង​ ប៉ា​លី​រិ​ន (Tong Fang Palirin) ក្នុង​ខេត្ត​ព្រះសីហនុ​។

ក្រោយ​ពី​រំលង​បាន​ប៉ុន្មាន​ថ្ងៃ​នៃ​អំពើឃាតកម្ម​នេះ​ គឺ​ចូល​ដល់​​យប់​រំលង​អធ្រាត្រ​ចូល​ដល់​ថ្ងៃ​ទី៩ ​ខែសីហា​ ស្រាប់​តែ​មាន​ជនជាតិចិន​មួយ​ក្រុម​ទៀត​មាន​គ្នា​៥នាក់​ បាន​ដក​កាំភ្លើង​បាញ់​ជនជាតិចិន​ដូចគ្នា​ពីរ​នាក់​ បណ្តាល​ឱ្យ​ជនជាតិចិន​ម្នាក់​ស្លាប់​ភ្លាមៗ​ក្នុង​រថយន្ត​ និង​ម្នាក់​ទៀត​រង​របួស​ធ្ងន់។ ភ្លាមៗ​នោះ​សមត្ថកិច្ច​ខេត្តព្រះសីហនុ​ ក៏​បាន​ដេញ​តាម​ក្រុម​ខ្មាន់កាំភ្លើង​ជនជាតិចិន​ទាំង៣នាក់​នោះ​រហូត​ដល់​តំបន់​ស្រុក​ព្រៃនប់​ ហើយ​ពួកគេ​ក៏​បាន​ដក​កាំភ្លើង​បាញ់​តដៃ​ជា​មួយ​សមត្ថកិច្ច​ក្នុង​ពេល​កំពុង​បើក​ឡាន​ ដែល​ធ្វើ​ឱ្យ​ក្រុម​ខ្មាន់​កាំភ្លើង​ទាំង​នោះ​ត្រូវ​គ្រាប់​កាំភ្លើង​របស់​សមត្ថកិច្ច ​រួច​បើក​ឡាន​បុក​បង្គោល​ភ្លើង​ស្លាប់​ទាំង៣​នាក់។

មន្រ្តី​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក ​(ADHOC) ប្រចាំ​ខេត្ត​ព្រះសីហនុ អ្នកស្រី ជៀប សុធារី ​បន្ថែម​ថា​ បើ​បទល្មើស​បន្ត​កើត​មាន​ឡើង​កាន់​តែ​ច្រើន​ ជាពិសេស​ជនជាតិ​ចិន​មាន​កាំភ្លើង​បាញ់​សម្លាប់​មនុស្ស​ដូច​សព្វ​ថ្ងៃ​នេះ​ នោះ​វា​នឹង​បង្ក​ឱ្យ​ផល​វិបត្តិ​ដល់​សង្គម​ធ្ងន់ធ្ងរ​ និង​គំរាមកំហែង​ដល់​ប្រជាពលរដ្ឋ​កាន់​តែ​ខ្លាំង​។

អ្នកស្រី ​បន្ត​ស្នើ​ដល់​អាជ្ញាធរ​ពង្រឹង​យន្ត​ការ​គ្រប់គ្រង​ជនជាតិ​ចិន​ និង​ត្រូវ​អនុវត្ត​ច្បាប់​ឱ្យ​បាន​តឹងរឹង​លើ​ជនបរទេស​ណា​ដែល​តែង​តែ​បង្ក​អសន្តិសុខ​ដល់​សង្គម​កម្ពុជា​។  អ្នកស្រី​ក៏​បន្ត​ស្នើ​យ៉ាង​ទទូច​ ដល់​អាជ្ញាធរ​ស៊ើបអង្កេត​ដោយ​តម្លាភាព​ និង​យុត្តិធម៌​ ក្នុងការ​វែក​មុខ​រក​ប្រភព​នៃ​មេខ្លោង​ពិត​ប្រាកដ​ដែល​បាន​លក់​អាវុធ​ទៅ​ឱ្យ​ជន​ជាតិ​ចិន​សម្រាប់​ប្រព្រឹត្ត​អំពើ​ឃាតកម្ម​នៅ​លើ​ទឹក​ដី​កម្ពុជា​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ក្រុម​អ្នក​វិទ្យាសាស្ត្រ រក​ឃើញ​ត្រី​កម្រ​ដែល​ជិត​ផុត​ពូជ​នៅ​ទន្លេ​មេគង្គ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។