ក្រសួងការបរទេសកម្ពុជាឲ្យដឹងថា អតីតនិស្សិតខ្មែរចំនួន ២៣នាក់និងក្រុមគ្រួសារកំពុងរស់នៅប្រទេសអ៊ុយក្រែន(Ukraine)។ អតីតនិស្សិតខ្មែរទាំងនោះបានទៅសិក្សានៅប្រទេសអ៊ុយក្រែន តាំងពីទសវត្សរ៍ ១៩៨០ និងខ្លះទសវត្សរ៍១៩៩០ ហើយសម្រេចចិត្តរស់នៅទីនោះ។
អ្នកនាំពាក្យក្រសួងការបរទេសកម្ពុជាលោក ជុំ សុន្ទរី ប្រាប់សារព័ត៌មានក្នុងស្រុកថា កម្ពុជាគ្មាននិស្សិតទេ ប៉ុន្តែមានតែអតីតនិស្សិតខ្មែរ ដែលកំពុងរស់នៅ នៅប្រទេសអ៊ុយក្រែន។ បច្ចុប្បន្នស្ថានទូតខ្មែរនៅប្រទេសរុស្សី (Russia) កំពុងព្យាយាមទាក់ទងពលរដ្ឋទាំងនោះ ដើម្បីស្វែងយល់ពីស្ថានភាពរបស់ពួកគេ។ ការអះអាងនេះ ធ្វើឡើងបន្ទាប់ពីមានក្តីបារម្ភពីសុវត្ថិភាពពលរដ្ឋខ្មែរ អាចនៅជាប់គាំងក្នុងប្រទេសអ៊ុយក្រែន ដែលកំពុងមានសង្គ្រាមនឹងប្រទេសរុស្សី។
កាលពីថ្ងៃទី២៤ ខែកុម្ភៈ លោកនាយករដ្ឋមន្ត្រី ហ៊ុន សែន ថ្លែងថា លោកចង់ឃើញជម្លោះប្រទេស អ៊ុយក្រែន និងរុស្សី ដោះស្រាយគ្នាដោយសន្តិវិធី។ លោកបន្ត ចំពោះ អាស៊ាន នឹងពិភាក្សារឿងនេះ ដោយស្ងៀមស្ងាត់ ហើយមិនទាន់មានសេចក្តីថ្លែងការណ៍រួមមួយចេញនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។