សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
2024.09.06
សមាជិកសមាជិកាលោកអ្នកឧកញ៉ា អ្នកឧកញ៉ា និងឧកញ៉ា ថតក្នុងពិធីមហាសន្និបាតលើកទី១ របស់សមាគមឧកញ៉ាកម្ពុជា កាលពីថ្ងៃទី២៣ ខែកញ្ញា ឆ្នាំ២០២៤
រូប៖ ហ្វេសប៊ុកឧកញ៉ាកម្ពុជា
សមាគមឧកញ៉ាកម្ពុជា អំពាវនាវដល់អ្នកមានគោរមងារជាលោកអ្នកឧកញ៉ា អ្នកឧកញ៉ា និងឧកញ៉ា ឱ្យចុះឈ្មោះចូលជាសមាជិកសមាគម និងត្រូវបង់វិភាគទានប្រចាំឆ្នាំទៅរដ្ឋាភិបាល។ អ្នកឃ្លាំមើលឃើញថា អ្នកចូលលុយជាមួយរដ្ឋាភិបាល មានការថយចុះច្រើន ព្រោះបញ្ហាសេដ្ឋកិច្ច និងសង្ស័យពីតម្លាភាព។
ប្រធានសមាគមឧកញ៉ាកម្ពុជា និងជាប្រធានគណៈកម្មាធិការហិរញ្ញវត្ថុរបស់គណបក្សប្រជាជនកម្ពុជាលោកអ្នកឧកញ៉ា លី យ៉ុងផាត់ បានរំឭកទៅអ្នកមានងារជាអ្នកឧកញ៉ា និងឧកញ៉ា ឱ្យចុះឈ្មោះចូលជាសមាជិកសមាគម និងត្រូវបង់វិភាគទានចន្លោះពី ៨ពាន់ ដុល្លារដល់ ១០ម៉ឺនដុល្លារជូនរដ្ឋាភិបាល។
នេះ គឺយោងតាមសេចក្ដីជូនដំណឹងរបស់សមាគមឧកញ៉ាកម្ពុជានៅថ្ងៃទី៦ ខែកញ្ញា ដោយភ្ជាប់ជាមួយអនុក្រឹត្យស្ដីពីបែបបទ និងនីតិវិធីនៃការស្នើសុំ និងវាយតម្លៃក្នុងការផ្តល់គោរមងារឧកញ៉ា និងការបញ្ចប់គោរមងារឧកញ៉ាចុះថ្ងៃទី៤ ខែមិថុនា ឆ្នាំ២០២៤ ដែលកំណត់លក្ខខណ្ឌតម្រូវឱ្យបង់វិភាគទានផង។
អនុក្រឹត្យបញ្ជាក់ថា ក្នុងមួយឆ្នាំលោកអ្នកឧកញ៉ាត្រូវបង់វិភាគទានចំនួន ១០ម៉ឺន ដុល្លារ រីឯអ្នកឧកញ៉ាបង់ ១ម៉ឺន ៥ពាន់ដុល្លារ និងឧកញ៉ាចំនួន ៨ពាន់ដុល្លារ។
ចំពោះអ្នកទទួលគោរមងារជាលោកអ្នកឧកញ៉ា ដែលមានអាយុយ៉ាងតិច ៤៥ឆ្នាំ ត្រូវអនុវត្តគោរមងារជាអ្នកឧកញ៉ាយ៉ាងតិច ៥ឆ្នាំ ហើយត្រូវផ្តល់អំណោយជាថវិកាជូនរដ្ឋ ក្នុងទំហំទឹកប្រាក់ចំនួន ១៦.០០០.០០០.០០០ (ដប់ប្រាំមួយប៊ីលាន)រៀល ឬប្រហែល ៤លានដុល្លារឡើងទៅ បន្ថែមពីលើសមិទ្ធផលផ្សេងទៀត ដែលជាអត្ថប្រយោជន៍សម្រាប់សង្គមជាតិ។
រីឯគោរមងារជាឧកញ៉ាយ៉ាងតិច ៣ឆ្នាំ និងផ្តល់អំណោយជាថវិកាជូនរដ្ឋ ក្នុងទំហំទឹកប្រាក់ចំនួន ៤.០០០.០០០.០០០ (បួនប៊ីលាន)រៀល ឬប្រហែល ១លានដុល្លារឡើងទៅ បន្ថែមពីលើសមិទ្ធផលផ្សេងទៀត ដែលជាអត្ថប្រយោជន៍សម្រាប់សង្គមជាតិ ខណៈអ្នកគោរមងារជាឧកញ៉ា ដែលមានអាយុយ៉ាងតិច ១៨ឆ្នាំ ត្រូវផ្តល់អំណោយជាថវិកាជូនរដ្ឋ ឬកសាងសមិទ្ធផលនានា ក្នុងទំហំទឹកប្រាក់ចំនួន ២.០០០.០០០.០០០ (ពីរប៊ីលាន)រៀល ឬប្រហែល ៥០ម៉ឺនដុល្លារឡើងទៅ។
អ្នកឃ្លាំមើលសិទ្ធិមនុស្ស និងសង្គមលោក ស៊ឹង សែនករុណា សង្កេតឃើញថា ការចូលរួមវិភាគទានរបស់ក្រុមឧកញ៉ាដល់រដ្ឋាភិបាល និងស្ថាប័នផ្សេងៗ ទៀត ចំណុះឱ្យរដ្ឋាភិបាលក្នុងរយៈពេលនេះ ហាក់បានថយចុះច្រើនទាំងចំនួនអ្នកចូលរួមលុយនិងទាំងចំនួនថវិកាដោយសារបញ្ហាសេដ្ឋកិច្ច។
លោក ស៊ឹង សែនករុណា៖ «អ៊ីចឹង មានបាត់នូវចំនួនអ្នក ដែលធ្លាប់ចូលរួមសកម្មជាច្រើន ពាក់ព័ន្ធនឹងរឿងប្រាសាទព្រះវិហារ ពាក់ព័ន្ធទៅនឹងរឿងការចូលរួមក្នុងការជួយទៅដល់កាកបាទក្រហមអីជាដើម។ ខ្ញុំឃើញថា ហាក់ដូចជាមិនមានចំនួនច្រើនទេ នេះតាមតែខ្ញុំមើលឃើញប៉ុនក្នុងរយៈកាលនេះ ខ្ញុំមិនមានការទូទាត់អីឱ្យឃើញច្បាស់អ៊ីចឹង គ្រាន់តែថា ចំនួនលុយ ចំនួនមនុស្សចូលរួម ហាក់មិនទាន់គម្រប់តាមតម្រូវការគណបក្សកាន់អំណាចបច្ចុប្បន្នចង់បាន»។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតនិងការសិក្សាស្រាវជ្រាវលោក សេក សុជាតិ លើកឡើងថា អ្នកមានធនធាន គួរតែចូលរួមជួយអភិវឌ្ឍន៍សង្គម និងពលរដ្ឋក្រីក្រ ប៉ុន្តែការកំណត់ឱ្យឧកញ៉ាចូលលុយបែបនេះ លោកថា ហាក់ដូចជាតឹងបន្តិច ក្នុងករណីដែលក្រុមឧកញ៉ាជួបបញ្ហាវិបត្តិសេដ្ឋកិច្ចនោះ។
លោកបន្ថែមថា រដ្ឋាភិបាលគួរតែរៀបចំគោលនយោបាយចំណាយឱ្យមានតម្លាភាព ចំពោះលុយដែលប្រមូលបានពីក្រុមឧកញ៉ា។
លោក សេក សុជាតិ៖ «តើថវិកា ដែលទទួលបានពីក្រុមលោកអ្នកឧកញ៉ា អ្នកឧកញ៉ា ឬឧកញ៉ាទាំងអស់ហ្នឹង យកទៅប្រើនៅក្នុងគោលដៅអ្វីខ្លះ ហើយថវិកានោះប្រើប្រាស់យ៉ាងម៉េច វាមានតម្លាភាពក្នុងកម្រិតណា ហើយមួយប្រមូលបានប៉ុន្មាន ហើយនៅសល់ថវិកាប៉ុន្មានសម្រាប់ការប្រើប្រាស់ជាបន្តបន្ទាប់។ អ៊ីចឹង លុះត្រាណាតែរដ្ឋាភិបាល ឬក៏អ្នកដែលទទួលបន្ទុកខាងហ្នឹង ទាល់តែធ្វើកិច្ចការហ្នឹង ឱ្យបានច្បាស់លាស់»។
អ្នកឃ្លាំមើលលើកឡើងថា គោរមងារឧកញ៉ាក្លាយទៅជាមុខរបរមួយរបស់រដ្ឋាភិ បាលត្រកូលហ៊ុននិងអ្នកដែលចង់បានងារជាឧកញ៉ា។ ពួកគាត់ថា រដ្ឋាភិបាល ហាក់ដូចជា យកងារឧកញ៉ាទៅលក់ឱ្យបុុគ្គលជាច្រើន ដែលមិនស័ក្ដិសម ដើម្បីប្រមូលលុយដោយគ្មានតម្លាភាព ហើយបុគ្គលទាំងនោះ យកងារជាឧកញ៉ារបស់ខ្លួនទៅដើរធ្វើជាជំនួញឧក្រិដ្ឋកម្មបាញ់សម្លាប់ជនស្លូតត្រង់ បំផ្លាញធនធានធម្មជាតិ រំលោភដីធ្លី និងការបោកប្រាស់ប្រជាពលរដ្ឋទូទាំងប្រទេស។
ជាក់ស្ដែងដូចជា ក្រុមហ៊ុនអតីតឧកញ៉ា ឡេង ចាន់ណា អតីតឧកញ៉ា ហ៊ីង គឹមហុង អតីតឧកញ៉ា ជា សារ៉ន អតីតឧកញ៉ា ស្រី ស៊ីណា និងឧកញ៉ា ថោង សារ៉ាត់ ជាដើម។ ក្រៅពីឧកញ៉ានេះ អ្នកឧកញ៉ា ហ៊ុន តូ និងឧកញ៉ាល្បីឈ្មោះនៅកម្ពុជា ៤រូប ដែលស្និទ្ធនឹងត្រកូល «ហ៊ុន» រងនូវការសង្ស័យថា អាចជាប់ពាក់ព័ន្ធនឹងឧស្សាហកម្មឆបោកតាមអនឡាញនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
