អណិកជន​​ខ្មែរ​​ម្នាក់​​នៅ​​អាមេរិក​​បង្កើត​​មូលនិធិ​​​​រក​​ស្បៀង​​ឧបត្ថម្ភ​ពលរដ្ឋ​ខ្មែរ​​​រងគ្រោះ​​ដោយ​​វិបត្តិ​កូវីដ​១៩​​

ដោយ ជី វិតា
2021-05-09
Share
អណិកជន​​ខ្មែរ​​ម្នាក់​​នៅ​​អាមេរិក​​បង្កើត​​មូលនិធិ​​​​រក​​ស្បៀង​​ឧបត្ថម្ភ​ពលរដ្ឋ​ខ្មែរ​​​រងគ្រោះ​​ដោយ​​វិបត្តិ​កូវីដ​១៩​​ លោក ភូ រស្មី ប្រធាន​មូលនិធិសប្បរសធម៌នៅ​អាមេរិកដែល​ឧបត្ថម្ភស្បៀង​ជួយ​ដល់​ពលរដ្ឋ​ក្រីក្រ ពិសេសក្នុងពេលវិបត្តិនៃជំងឺកូវីដ១៩។
រូប៖ គេ​ផ្ដល់​ឱ្យ

មូលនិធិ​សប្បុរសធម៌​នេះ​​បង្កើត​ឡើង​ដោយ​​​លោក ភូ រស្មី ជាពលរដ្ឋ​ខ្មែរ​រស់​នៅ​សហរដ្ឋអាមេរិក​។ ​បុរស​វ័យ​​៤៤​ឆ្នាំ​រូប​នេះ​ មាន​ស្រុក​កំណើត​នៅ​​ផ្លូវ​លេខ​២​ សង្កាត់​ស្វាយ​ប៉ោ​ ក្រុង​បាត់ដំបង ខេត្ត​បាត់ដំបង​។ លោក​បាន​ចាក​ចេញ​ពី​កម្ពុជា​​តាំង​​តែ​លោក​មាន​អាយុ ​​៦​ ឆ្នាំ​ ​​ដោយ​បាន​ភៀស​ខ្លួន​ទៅ​ជា​មួយ​ឪពុក​ម្ដាយ​​ស្នាក់​នៅ​ជំរុំ​ជន​ភៀស​ខ្លួន​តាម​ព្រំដែន​ខ្មែរ​ថៃ និង​ជំរុំ​ជន​ភៀសខ្លួន​គ្រប់គ្រង​ដោយ​អង្គការ​សហប្រជាជាតិ​ យូ​អិន​អេច​ស៊ីអា ​(UNHCR)​​ នៅក្នុង​ប្រទេស​ថៃ។ ​អំឡុង​ពេល​រស់​នៅ​​ជា​ភៀស​ខ្លួន ​​លោក​ជួប​ប្រទះ​បញ្ហា​លំបាក​ច្រើន​អស់​រយៈ​ពេល​ប្រហែល ៣​ឆ្នាំ ​​ទើប​អង្គការ​សហប្រជាជាតិ​​​បញ្ជូន​លោក​​​ចេញ​ទៅ​តាំង​ទីលំនៅ​ថ្មី​នៅ​សហរដ្ឋ​អាមេរិក។​​ ក្រោយ​មក​​​លោក​ខំប្រឹង​សិក្សា​​រៀនសូត្រ​នៅ​ប្រទេស​មហាអំណាច​មួយ​នេះ​​​រហូត​ចប់​វិស្វករ​ផ្នែក​យានអវកាស​​​។ ​ដោយសារ​តែ​​​​ធ្លាប់​ឆ្លងកាត់​ជា​ជន​ភៀស​ខ្លួន​ដែល​មាន​​ប្រវត្តិ​លំបាក​វេទនា​នេះ​ហើយ​បាន​ជំរុញ​ឱ្យ​​បុរស​មាឌ​ដំបង​រាង​ខ្ពស់​​រូប​នេះ​​​ខំ​ប្រឹង​ធ្វើ​​ការ​​ដើម្បី​សន្សំ​ប្រាក់​ជួយ​ដល់​ពលរដ្ឋ​​​ក្រីក្រ​នៅ​​ប្រទេស​កំណើត​។

​ប្រធាន​មូលនិធិ​សប្បុរសធម៌​លោក ភូ រស្មី ​រៀបរាប់​ប្រាប់​អាស៊ី​សេរី​ថា ​​លោក​បាន​បង្កើត​មូលនិធិ​មួយ​នេះ​ជិត ​២០​ ឆ្នាំ​មក​ហើយ​ ដោយ​ដំបូង​ឡើយ​លោក​ឧបត្ថម្ភ​​ប្រាក់​ទិញ​សៀវភៅ​​សិក្សា​ និង​សម្លៀកបំពាក់​ជូន​ដល់​កុមារ​ក្រីក្រ​​តាម​សាលា​រៀន​នៅ​ទី​ជនបទ​ជា​រៀង​រាល់​ឆ្នាំ​។​ ប៉ុន្តែ​ដោយសារ​​​វិបត្តិ​ជំងឺ​កូវីដ​១៩​ ​បណ្ដាល​ឱ្យ​ពលរដ្ឋ​មួយ​ចំនួន​​មាន​ជីវភាព​ខ្វះខាត​ ​ លោក​ក៏​​បាន​បង្វែរ​ថវិកា​ទាំង​នោះ​​ទិញ​ស្បៀង​អាហារ​ឧបត្ថម្ភ​ដល់​​ពួកគាត់​ជំនួស​វិញ​។ លោក​និយាយ​ថា អំឡុង​ពេល​​ផ្ទុះ​ជំងឺ​កូវីដ​ខ្លាំង​​ឆ្លង​ចូល​សហគមន៍​លើក​ទី​៣​នៅ​កម្ពុជា​នេះ​​ លោក​បាន​ឧបត្ថម្ភ​​សាច់​ប្រាក់​ជាង​​ ៥ ពាន់​​ដុល្លារ​ (៥.០០០) ​និង​រៃអង្គាស​ប្រាក់​ពី​សប្បុរសជន​ខ្មែរ​​នៅ​សហរដ្ឋ​អាមេរិក​ និង​នៅ​ក្នុង​ស្រុក​​ជាង ​៣ ពាន់​ដុល្លារ ​(៣.០០០) ​បន្ថែម​ទៀត​ ដាក់​ចូល​ក្នុង​មូលនិធិ​ ដើម្បី​ទិញ​ស្បៀង​អាហារ​​ឧបត្ថម្ភ​ដល់​ពលរដ្ឋ​៖ «ដូច​ឥឡូវ​នេះ​នៅ​គីឡូ​លេខ​ ៩​ ថា​ចង់​ចែក​ថវិកា​ជា​លុយ​បណ្ដោយ​ ចែក​ឱ្យ​ប៉ុន្មាន​គ្រួសារ​ដែល​អ្នក​នៅ​ម្ដុំ​ហ្នឹង​គេ​ស្គាល់​ថា គ្រួសារ​ហ្នឹង​វា​ពិបាក​អត់​មាន​លទ្ធភាព​ស្អី​ៗ​ទេ។ ​ខ្ញុំ​អត់​ជ្រើស​រើស​ទេ​គេ​អ្នក​នៅ​ណោះ​គេ​អ្នក​ជ្រើស​រើស​ ខ្ញុំ​គ្រាន់​តែ​ឱ្យ​ថវិកា​គេ​ គេ​ចាត់​ការ​បណ្ដោយ​។​ ឥឡូវ​នេះ​នៅ​ស្រុក​ខ្មែរ​ផ្សាយ​កាន់តែ​ធំ​ឡើង​ ធម្មតា​ខ្ញុំ​ចង់​ឱ្យក្មេង​ៗ​នៅ​ស្រុក​ខ្មែរ​ហ្នឹង​គេ​មាន​លទ្ធភាព​គេ​អាច​ជួយ​ខ្លួន​គេ​បណ្ដោយ​ យើង​ណេះ​ខំ​ជួយ​​​រ៉ៃ​ថវិកា​ដើម្បី​ជួយ​បន្ថែម​ទៀត​។​ ប៉ុន្តែ​បើ​អាច​ជួយ​ច្រើន​កន្លែង​យើង​អាច​ចេះ​តែ​ជួយ​ច្រើន​កន្លែង​​ទៅ​ ខ្ញុំ​អត់​​មាន​ចង់​បាន​​មុខ​មាត់​អី​ទេ​ ភាគ​ច្រើន​អ្នក​ចែក​ហ្នឹង​អត់​ដឹង​ថា ​អ្នក​ណា​​ជួយ​ថវិកា​ផង​ អាហ្នឹង​អត់​សំខាន់​ទេ​រឿង​ខ្ញុំ​»

One_Cambodian_American_01.jpg
អំណោយរបស់លោក ភូ រស្មី ត្រូវបានចែកជូនដល់ដៃរបស់ប្រជាពលរដ្ឋកម្ពុជា ក្នុងពេលជួបវិបត្តិនៃជំងឺកូវីដ១៩។

​ស្បៀង​អាហារ​ដែល​​​មូលនិធិ​មួយ​នេះ​ឧបត្ថម្ភ​ដល់​ពលរដ្ឋ​ រួម​មាន​ អង្ករ​ ៥ គីឡូក្រាម ​មី​កញ្ចប់​ ទឹកត្រី ទឹក​ស៊ីអ៊ីវ​ ​មួយ​ចំនួន​​ទៀត និង​ថវិកា ​២ម៉ឺន​រៀល ​ក្នុង​មួយ​គ្រួសារ។ ​នៅ​ក្នុង​ខែ​ឧសភា​​នេះ​ មូលនិធិ​​លោក​បាន​ឧបត្ថម្ភ​ជំនួយ​សប្បុរសធម៌​ជូន​ដល់​​ពលរដ្ឋ​ក្រីក្រ​នៅ​ខេត្ត​បាត់ដំបង មណ្ឌលគិរី ត្បូងឃ្មុំ ​និង​រាជធានី​ភ្នំពេញ សរុប​​​ជាង ​១ ពាន់ (១.០០០) ​គ្រួសារ​ហើយ​។ លោក​បញ្ជាក់​ទៀត​ថា ​ជំនួយសប្បុរសធម៌​ទាំង​នេះ​​​​ធ្វើ​ឡើង​ដោយ​មិន​ប្រកាន់​ពូជសាសន៍​ពណ៌​សម្បុរ​នោះ​ទេ ​ពោល​គឺ​ធ្វើ​ក្នុង​គោលបំណង​ដើម្បី​​​ចូល​រួម​​កាត់​បន្ថយ​​ការអត់​ឃ្លាន​របស់​ពលរដ្ឋ​ ក្នុង​គ្រា​មាន​អាសន្ន​ប៉ុណ្ណោះ​៖ «ពេល​ខ្ញុំ​មក​ស្រុក​អាមេរិក​ហ្នឹង​ ឥឡូវ​ខ្ញុំ​មាន​លទ្ធភាព​ខ្ញុំ​បាន​ទៅ​រៀន​មាន​ការងារ​ត្រឹមត្រូវ​ទៅ​ ប៉ុន្តែ​ខ្ញុំ​ក៏​ធ្លាប់​ទៅ​ស្រុក​ខ្មែរ​៣​ដង​ដែរ​ មើល​ជីវភាព​ស្រុក​ខ្មែរ​សុទ្ធតែ​អ្នក​ក្រ​ នៅ​ភ្នំពេញ​ឃើញ​កូន​ក្មេង​ដែល​គ្នា​ហិតកាវ​អី​ហ្នឹង​ខ្ញុំ​យល់​មិន​មែន​គ្នា​ចង់​ហិតកាវ​ហ្នឹង​ទេ​ ខ្លះ​ណា​វា​ឃ្លាន​អត់​មាន​អី​ហូប​ទៅ​វា​មាន​របស់​ហិត​កាវ​ហ្នឹង​ជួយ​សម្រួល​​ការ​ឃ្លាន​របស់​វា​ហ្នឹង​។​ ខ្ញុំ​ឃើញ​អីចឹង​​ខ្ញុំ​អាណិត​អាសូរ​​ខ្ញុំ​ចេះ​តែ​ចង់​ជួយ​តាំង​ពី​ខ្ញុំ​​ចេញ​ពី​មហា​វិទ្យាល័យ​មក​មាន​ប្រាក់​បន្តិចបន្តួច​ចេះ​តែ​ចង់​ជួយ​បណ្ដោយ​»។

​​​​​​​ជុំ​វិញ​ការ​ផ្ដល់​ជំនួយ​សប្បុរស​នេះ​ ប្រជាពលរដ្ឋ​ម្នាក់​នៅ​ស្រុក​ក្រូចឆ្មារ​ ខេត្ត​ត្បូងឃ្មុំ​ លោក​ ស្លៃ​ម៉ាន់ ម៉ាសូគី​ ​ថ្លែង​ថា ​​ប្រជាពលរដ្ឋ​នៅ​តំបន់​គាត់​​ជា​ច្រើន​គ្រួសារ​បាន​ទទួល​ស្បៀង​អាហារ​​ពី​មូលនិធិ​សប្បុរសធម៌​នេះ​។​ លោក​ថា ​ជំនួយ​សប្បុរសធម៌​ទាំង​នោះ​ពិត​ជា​មាន​តម្លៃ​ចំពោះ​ពួក​លោក​ ដែល​កំពុង​តែ​មាន​ជីវភាព​ក្រីក្រ​ បាន​អង្ករ​ច្រក​ឆ្នាំ​​​ដើម្បី​បន្ត​អាយុជីវិត​ទៅ​មុខ​ទៀត​៖ «ខ្ញុំ​យល់​ថា​ល្អ​ខ្លាំង​ណាស់ ​ព្រោះ​ថា ​នៅ​ពេល​​ជន​ណា​មួយ​លំបាក​អំឡុង​ពេល​កូវីដ​ អត់​មាន​អ្នក​ជួយ​ ក៏​ប៉ុន្តែ​​បាន​គាត់​​អីចឹង​វា​ល្អ​ណាស់​។​ ព្រោះ​ថា​ ពេល​ខ្លះ​​គាត់​ត្រូវ​ការ​ជំនួយ​ខ្លាំង​ប៉ុន្តែ​បែរ​ជា​អត់​មាន​អ្នក​ជួយ​។​ ការ​ជួយ​បែប​នេះ​ ទី​១​ ​អាច​ជួយ​អ្នក​ដែល​ខ្វះ​ខាត​ហ្នឹង​មាន​ស្បៀង​ហូប​ចុក​ មួយ​ទៀត​ ធ្វើ​ឱ្យ​អ្នក​ផ្សេង​​មើល​ឃើញ​យក​គំរូ​តាម​»

​ដូច​គ្នា​នេះ​ដែរ​ ក្រុម​ប្រជាពលរដ្ឋ​នៅ​តំបន់​ក្រហម​​ស្ទឹង​មានជ័យ​ ខណ្ឌ​មាន​ជ័យ​ រាជធានី​ភ្នំពេញ​​​​ ប្រាប់​ថា ​​ការ​ដែល​មូលនិធិ​នេះ​បាន​ឧបត្ថម្ភ​ស្បៀងអាហារ​​ដល់​ពួកគាត់​​អំឡុង​ពេល​​នេះ​​ ប្រៀប​បាន​​ជួយ​សង្គ្រោះ​ជីវិត​​ដែល​ជិត​ស្លាប់​ឱ្យ​រស់​ឡើង​វិញ​។​ ពលរដ្ឋ​ទាំង​​នេះ​បញ្ជាក់​ទៀត​ថា ​ប្រជាពលរដ្ឋ​នៅ​តំបន់​ពួកគាត់​​ជា​ច្រើន​គ្រួសារ​​ដាច់​ស្បៀងអាហារ​​​ ​និង​មួយ​ចំនួន​ទៀត​​ជិត​អស់​​អង្ករ​ច្រក​ឆ្នាំង ដោយសារ​​អាជ្ញាធរ​បិទ​ខ្ទប់​ ដើម្បី​ទប់ស្កាត់​ការ​រាតត្បាត​ជំងឺ​កូវីដ​១៩។ ​ពួកគាត់​ ​និយាយ​ថា ​ពលរដ្ឋ​ខ្លះ​ស្រក់​ទឹក​ភ្នែក​ដោយសារ​ពួកគាត់​ត្រេកអរ​ ក្រោយ​មិន​មាន​អាហារ​បរិភោគ​គ្រប់​គ្រាន់​​ជា​ច្រើន​ថ្ងៃ​មក​ហើយ​៖ «និយាយ​តាម​ពិត​ខ្លះ​ នៅ​ពេល​ដែល​បាន​អំណោយ​គ្នា​អោប​អំណោយ​ហ្នឹង​សប្បាយ​ចិត្ត​ផង​យំ​ផង​ ដូច​ថា​គ្នា​អត់​អីចឹង​ដូច​ជួយ​សង្គ្រោះ​គ្នា​អីចឹង​។ អ្នក​ខ្លះ​អរ​ណាស់​បាន​អំណោយ​ទៅ​គ្នា​សប្បាយ​ចិត្ត​ស្រក់​ទឹក​ភ្នែក​ខ្លះ​ ដូច​ថា​គ្នា​អរ​ពេក​ព្រោះ​ខ្លះ​គ្នា​ដាច់​ស្បៀង​។​ និយាយ​រួម​បង​ជា​អ្នក​ទទួល​អំណោយ​ថ្ងៃ​ដែល​ប្អូន​ប្រុស​ហ្នឹង​យក​មក​ បង​ឃើញ​ការ​ពិត​អ្នក​ដែល​អត់​ហ្នឹង​ហ្មង​។​ អ្នក​ខ្លះ​មក​ឈរ​គ្រាន់​តែ​ឃើញ​ភ្លាម​លើក​ដៃ​សំពះ​ ថា​ខ្ញុំ​ដាច់​ស្បៀង​ហើយ​ ហើយ​ដល់​ពេល​ឱ្យ​ទៅ​អរ​ខ្លាំង​ណាស់​ម្នាក់​ៗ​លុតជង្គង់​សឹងតែ​ថ្វាយ​បង្គំ​​យើង​អរ​ខ្លាំង​ណាស់​»

ក្រុម​ប្រជាពលរដ្ឋ​ទាំង​នេះ​​សំណូមពរ​ដល់​​ពលរដ្ឋ​ខ្មែរ​ដែល​មាន​ទ្រព្យ​ធន​ផ្សេង​ទៀត ​ផ្ដល់​ជំនួយ​សប្បុរសធម៌​​ឧបត្ថម្ភ​​ដល់​​ពលរដ្ឋ​ក្រីក្រ នៅ​តំបន់​ក្រហម​ ​​និង​អ្នក​ដែល​​រង​​ផល​ប៉ះពាល់​ពី​ការ​រាតត្បាត​ជំងឺ​កូវីដ​១៩​នៅ​ទូទាំង​ប្រទេស​ ដើម្បី​បាន​ស្បៀង​អាហារ​ហូប​ចុក​ប្រចាំ​ថ្ងៃ​។

One_Cambodian_American_02.jpg
សិក្សានុសិស្សដែលស្ថិតនៅក្នុងសាលារៀនមួយនៃប្រទេសកម្ពុជា បានទទួលជំនួយជាសម្ភារៈសិក្សាពីមូលនិធិសប្បុរសធម៌របស់លោក ភូ រស្មី អណិកជនខ្មែរ-អាមេរិកកាំង។

​ទាក់​ទង​នឹង​​ការ​ចូល​រួម​​ឧបត្ថម្ភ​ជំនួយ​សប្បុរសធម៌​​ដល់​ពលរដ្ឋ​នេះ​ អ្នក​នាំ​ពាក្យ​គណបក្ស​កាន់​អំណាច​លោក សុខ ឥសាន ប្រាប់​អាស៊ី​សេរី​ថា ​​​លោក​សាទរ​នឹង​សកម្មភាព​នេះ​​ ថា​ជា​រឿង​ល្អ​​ជួយ​ដល់​សង្គម​ជាតិ​ ​និង​ជា​ការ​ចូល​រួម​ចំណែក​ដោះស្រាយ​ការ​អត់ឃ្លាន​របស់​ពលរដ្ឋ​​ក្នុង​គ្រា​អាសន្ន​។​ ​​ចំណែក​​ការ​ដែល​ថា​ មាន​ប្រជាពលរដ្ឋ​​​មួយ​ចំនួន​មិន​ទាន់​បាន​ទទួល​ស្បៀង​អាហារ​​ពី​អាជ្ញាធរ​នោះ​ លោក​​​ថា ​ជា​រឿង​មិន​ពិត​នោះ​ឡើយ​៖ «ពីព្រោះ​បង​ប្អូន​ខ្លះ​ហ្នឹង​សឹង​តែ​បាន​ទទួល​ពីរ​ដង​បី​ដង​ហើយ​ ហើយ​មុខ​ដដែល​ទៀត​ធ្វើ​ឱ្យ​អាជ្ញាធរ​​មូលដ្ឋាន​គេ​ចំណាំ​បាន​ពីព្រោះ​អាជ្ញាធរ​គេ​ស្គាល់​តើ​។ បើ​បងប្អូន​ខ្លះ​ដែល​ស្រែក​មក​ថា​ ចង់​បាន​ហ្នឹង​គឺ​ថា​ចង់​បាន​ហើយ​បាន​ទៀត​ លើស​គេ​លើស​ឯង​ អាហ្នឹង​គឺមាន​ចិត្ត​លោភលន់​ មិន​មែន​គ្រាន់​តែ​ដោះស្រាយ​ជីវភាព​រស់​នៅ​ធម្មតា​ទេ​ ចង់​ធ្វើ​មាន​បាន​ទៀត​យក​អំណោយ​ហ្នឹង​»

​អំឡុង​ពេល​ផ្ទុះ​ការ​រាតត្បាត​ជំងឺ​កូវីដ​នេះ​មាន​ពលរដ្ឋ​ខ្មែរ​​នៅ​ក្រៅ​ប្រទេស​ និង​ពលរដ្ឋ​ខ្មែរ​ក្នុង​ស្រុក​​ជា​ច្រើន​នាក់​​បាន​​ឧបត្ថម្ភ​អង្ក ​និង​ស្បៀងអាហារ​មួយ​ចំនួន​ជូន​ដល់​ពលរដ្ឋ​​ក្រីក្រ​នៅ​រាជធានី​ភ្នំពេញ​ និង​នៅ​តាម​ខេត្ត។​

​ដោយឡែក ក្នុង​រយៈ​ពេល​ជិត ​២០ ឆ្នាំ ​មក​នេះ ​​ប្រធាន​មូលនិធិ​សប្បុរសធម៌​លោក​ ភូ រស្មី ​​​​​​បាន​ចំណាយ​ថវិកា​ផ្ទាល់​ខ្លួន​​ជិត ​១០​ ម៉ឺន​ដុល្លារ ​(១០០.០០០)​ ហើយ​សម្រាប់​ឧបត្ថម្ភ​ដល់​ពលរដ្ឋ​ក្រីក្រ​។ ​ពលរដ្ឋ​​ខ្មែរ​អាមេរិកកាំង​រូប​នេះ​មាន​គម្រោង​​​សន្សំ​ប្រាក់​ និង​ស្វែង​រក​​ជំនួយ​ពី​សប្បុរសជន​ខ្មែរ​នៅ​សហរដ្ឋអាមេរិក​ ឱ្យ​បាន​ច្រើន​បន្ថែម​ទៀត​ ដើម្បី​ឧបត្ថម្ភ​ជូន​ដល់​​​ពលរដ្ឋ​នៅ​ទី​ជនបទ​និង​អ្នក​ដែល​រងគ្រោះ​ដោយសារ​វិបត្តិ​ជំងឺ​កូវីដ​១៩​ នៅ​កម្ពុជា​៕​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល