លោកបណ្ឌិត កែម ឡី ជាទីគោរព!
លោកចែកឋានទៅបានពីរសប្ដាហ៍ហើយ។ ខ្ញុំសូមជម្រាបលោកតាមត្រង់ថា មកទល់នឹងថ្ងៃនេះ ខ្ញុំនៅតែអួលដើមកនៅឡើយនៅពេលដែលខ្ញុំនឹកដល់លោក។ តែទោះបីជាយ៉ាងណាក៏ដោយ ក្នុងថ្ងៃផ្សាយពិសេសនាឱកាសដង្ហែសពលោកថ្ងៃនេះ (២៤ កក្កដា) ខ្ញុំនឹងព្យាយាមទប់អារម្មណ៍អោយនឹងហ្ន៎ ដើម្បីរួមចំណែកជូនដំណើរលោកជាចុងក្រោយទៅកាន់ស្រុកកំណើតលោកវិញ។
តាមពិតលោកតែងតែដាស់តឿនពួកយើងមិនអោយមានទុក្ខសោកយូរទេ។ ពាក្យមួយឃ្លារបស់លោកដែលយើងទន្ទេញចាំមាត់គ្រប់គ្នានៅពេលនេះ គឺ "ជូតទឹកភ្នែកហើយបន្តដំណើរទៅមុខទៀត"។ យើងនឹងអនុវត្តតាមបណ្ដាំនេះអោយបានខ្ជាប់ខ្ជួន មិនអោយលោកខកចិត្តឡើយ។
ថ្វីត្បិតតែថ្ងៃនេះ អ្នកដែលគោរពស្រឡាញ់លោកជាច្រើនម៉ឺននាក់ ចូលរួមដង្ហែសពលោកក្តី ពួកគាត់នៅតែរកចម្លើយមិនទាន់ឃើញថា ហេតុអ្វីក៏គេដាច់ចិត្តផ្ដាច់យកជីវិតលោកទាំងស្រស់ៗបែបនេះ។ ខ្ញុំក៏មានចម្ងល់នេះដែរ។ មកដល់ពេលនេះ ខ្ញុំនៅមិនទាន់គិតយល់ថា ក្នុងចំណោមយើងទាំងអស់គ្នា ហេតុអ្វីបានជាគេសម្រេចចិត្តជ្រើសយកជីវិតលោក? ពេលដែលគេផ្ដាច់ជីវិតលោកទៅ ពួកយើងគិតថា រឿងនេះវាអាចកើតឡើងចំពោះនរណាម្នាក់ក្នុងចំណោមពួកយើងនេះរាល់វេលា។
នៅពេលដែលលោកចូលរួមក្នុងកម្មវិធីផ្សាយរបស់វិទ្យុអាស៊ីសេរី ជាមួយខ្ញុំ លោកលើកឡើងថា អ្នកប្រដាល់ ម៉ៃ ថៃសាន់ (Mike Tyson) នៅស្រុកខ្មែរ ខាំទាំងគូប្រកួត ខាំទាំងអ្នកអង្គុយមើល។ តែលោក មិនដែលគិតថា ម៉ៃ ថៃសាន់ អាចហក់មកខាំលោក ដែលលោកថា គ្រាន់តែជាអ្នករូតវាំងនននោះទេ។ ខ្ញុំនៅស្រណោះសម្ដីនេះណាស់!
យើងទាំងអស់គ្នាដែលបម្រើការងារជាអ្នកផ្សព្វផ្សាយព័ត៌មាន ក៏ស្ថិតនៅក្នុងក្រុមអ្នករូតវាំងនននេះដូចលោកដែរ។ ក្នុងបេសកកម្មរបស់យើងដែលជាអ្នកបើកកកាយនូវអំពើពុករលួយ អំពើរំលោភជិះជាន់ អំពើអយុត្តិធម៌នានាក្នុងសង្គម និងជាពិសេស ជាអ្នកដែលហ៊ានដេញដោលសាកសួរយកព័ត៌មានដែលគេព្យាយាមបង្វែងដាន យើងបានធ្វើមនុស្សខ្លះខឹង មនុស្សខ្លះស្អប់ និងធ្លាប់ត្រូវបានគេគំរាមកំហែង ព្រមទាំងទទួលនូវពាក្យប្រមាថមាក់ងាយមកលើជាប្រចាំ តែយើងក៏ទទួលបាននូវការលើកទឹកចិត្ត ការស្រឡាញ់ និងគាំទ្រពីមនុស្សភាគច្រើនដែលមានសមានចិត្តមកលើយើងដែរ។
ពួកយើងទាំងអស់គ្នាតាំងចិត្តប្រឈមមុខនឹងគ្រោះថ្នាក់ក្នុងការងារប្រចាំថ្ងៃរបស់យើង ក៏ព្រោះតែយើងជឿជាក់ថា យើងអាចរួមចំណែកជួយប្រជាជាតិកម្ពុជា អោយមានការផ្លាស់ប្ដូរក្នុងជីវភាពរស់នៅ និងមានការអភិវឌ្ឍដ៏ត្រឹមត្រូវមួយ ហើយនេះក៏ជាបំណងរបស់លោកបណ្ឌិត កែម ឡី ដែរ។ លោកតែងហ៊ានរិះគន់ដោយត្រង់ចំពោះអ្នកនយោបាយពីគ្រប់គណបក្ស។ លោកជួយផ្ដល់គំនិត និងទស្សនៈដោយមិនប្រកាន់បក្ស និងនិន្នាការនយោបាយដើម្បីអោយមានការកែប្រែចំណុចអសកម្មជាប្រយោជន៍ដល់ប្រជាជាតិខ្មែរទាំងមូល។
ឃាតកអាចឆក់យកជីវិតលោកមែន តែគេមិនអាចយកឧត្ដមគតិ និងវីរភាពក្លាហានរបស់លោកបានទេ។ អ្នកសម្លាប់នឹងខកចិត្តខ្លាំងណាស់ ប្រសិនគេគិតថា គេអាចសម្លាប់ ឬសម្លុតអ្នករូតវាំងននអោយអស់បាននោះ។ ការចូលរួមកំដររូបកាយដែលគ្មានវិញ្ញាណរបស់លោកដោយស្មោះស្ម័គ្រពីសំណាក់មហាជនគ្រប់ស្រទាប់វណ្ណៈនេះហើយ ជាតឹកតាងនៃភក្ដីភាពដ៏មោះមុតចំពោះលោក និងឧត្ដមគតិរបស់លោក។
ចំពោះរូបខ្ញុំផ្ទាល់ ខ្ញុំសូមសារភាពថា ខ្ញុំពិបាកនឹងបំភ្លេចលោកដែលជាវាគ្មិនដ៏ប្រសើរមួយរូបក្នុងកម្មវិធីរបស់យើងណាស់។ ថ្វីត្បិតតែវាជាសោកនាដកម្មដ៏ធំមួយក្នុងការបាត់បង់រូបលោក ខ្ញុំក៏សូមសម្ដែងនូវកតញ្ញុតាចំពោះការចូលរួមវិភាគទានទាំងអស់របស់លោកចំពោះវិទ្យុ និងទូរទស្សន៍អាស៊ីសេរី និងចំពោះប្រជាជាតិខ្មែរ។
ថ្ងៃនេះខ្ញុំមិនបានទៅដង្ហែសពលោកផ្ទាល់ទេ តែខ្ញុំនឹងចូលរួមជូនដំណើរលោកជាមួយអ្នកគាំទ្រ និងគោរពស្រឡាញ់លោកតាមរលកធាតុអាកាសពីចម្ងាយ។ នេះមិនមែនមកពីខ្ញុំអាក់អន់ស្រពន់ចិត្តនឹងលោកដែលចាកចេញទៅដោយមិនបានលាគ្នាមួយម៉ាត់នោះទេ តែមកពីខ្ញុំមានភារៈនៅបន្តបេសកកម្មមួយចំនួនរបស់លោកដែលលោកធ្វើមិនទាន់បានចប់សព្វគ្រប់។ លោកប្រាកដជាយល់នូវទឹកចិត្តរបស់ខ្ញុំ។ ខ្ញុំសូមគោរពលាលោកពីចម្ងាយ និងសូមអោយវិញ្ញាណក្ខន្ធរបស់លោកបានដល់សុគតិភព៕
ពីខ្ញុំ ជុន ច័ន្ទបុត្រ ដៃគូពិភាក្សាម្នាក់របស់លោក